1, 2. а) Һансы һәдијјәни дәјәрли һесаб едирсиниз? б) Нәјә ҝөрә фидјә Аллаһын ән ҝөзәл һәдијјәсидир?

ЈӘГИН, нә вахтса сизә үрәјинизҹә олан, һәгигәтән дә, еһтијаҹ дујдуғунуз бир шеји һәдијјә едибләр. Ола билсин, һәмин ан сизин севинҹиниз јерә-ҝөјә сығмырды вә һәдијјәни верән инсана үрәкдән миннәтдар идиниз.

² Јараданымыз да бизә бир чох һәдијјәләр бәхш едиб. Амма онларын арасында бир һәдијјә вар ки, бизим она бөјүк еһтијаҹымыз вар. Бу, Аллаһын бәшәријјәтә бәхш етдији ән ҝөзәл һәдијјәдир. Јеһова Аллаһ әбәди јашамағымыз үчүн Оғлу Иса Мәсиһи јер үзүнә ҝөндәрди. (Мәтта 20:28 ајәсини охујун.) Бу фәсилдә Аллаһын бу һәдијјәси барәдә әтрафлы өјрәнәҹәјик. Иса Мәсиһи фидјә олараг јер үзүнә ҝөндәрмәси Јеһова Аллаһын бизә дәрин мәһәббәтиндән хәбәр верир.

3. Нәјә ҝөрә бу ҝүн өлүм вар?

³ Фидјә васитәсилә Јеһова Аллаһ инсанлары ҝүнаһдан тәмизләмәк вә өлүмдән азад етмәк нијјәтиндәдир (Ефеслиләрә 1:7). Фидјәјә нәјә ҝөрә еһтијаҹ јарандығыны билмәк үчүн ҝәлин бир нечә мин ил бундан габаг баш вермиш бир һадисәни јадымыза салаг. Улу валидејнләримиз Адәмлә Һәвва Аллаһа гаршы ҝүнаһ ишләтдиләр вә бу, онлара һәјатлары баһасына баша ҝәлди. Онларын өвладлары олан бизләр дә өлүмү дадырыг, чүнки ҝүнаһы онлардан мирас алмышыг. (9-ҹу әлавәјә бахын.)

4. Мүгәддәс Китабда Адәм һаггында нә јазылыб?

 ⁴ Јеһова Аллаһ илк инсан олан Адәмә мүкәммәл һәјат бәхш етмишди. Ону гүсурсуз, ејибсиз јаратмышды, она камил зәка вермишди. Адәм хәстәлик, гоҹалыг вә өлүм нәдир билмәјәҹәкди. Јеһова Адәмә ата кими иди, чүнки ону Өзү јаратмышды (Лука 3:38). Аллаһ Адәмлә сых үнсијјәт едирди. Она бир бәндә кими үзәринә дүшән мәсулијјәти һәртәрәфли баша салмышды, она мараглы иш тапшырмышды (Јарадылыш 1:28—30; 2:16, 17).

5. Адәмин Аллаһын бәнзәриндә јарадылмасы һансы мәнаны дашыјыр?

⁵ Аллаһ Адәми «Өз бәнзәриндә» јаратмышды (Јарадылыш 1:27). Јеһова Аллаһ Адәмә Өзүндә олан хүсусијјәтләри, мәһәббәт, һикмәт, әдаләт вә ҝүҹ-гүввәт кими кејфијјәтләри бәхш етмишди. Аллаһ Адәми робот кими јаратмамышды, она азад ирадә вермишди. Адәмин јахшы илә пис арасында сечим етмәк ихтијары вар иди. О, Аллаһа итаәткар галсајды, ҹәннәтдә әбәди јашајаҹагды.

6. Итаәтсизлији Адәмә нәјин баһасына баша ҝәлди? Адәмин ҝүнаһы бизә неҹә тәсир етди?

⁶ Аллаһын сөзүндән чыхдығы үчүн Адәм өлүмә мәһкум олду. Итаәтсизлији она баһа баша ҝәлди. О, Јеһова Аллаһла достлуғуну, мүкәммәл һәјаты вә ҹәннәт бағы кими ҝөзәл евини итирди (Јарадылыш 3:17—19). Адәмлә Һәвва билә-билә Аллаһын сөзүндән чыхдылар, буна ҝөрә дә әбәди һәјатдан мәһрум олдулар. «Ҝүнаһ бир адам васитәсилә, өлүм дә ҝүнаһ васитәсилә дүнјаја ҝирди. Беләҹә, өлүм бүтүн адамлара кечди, чүнки һамы ҝүнаһ ишләјиб» (Ромалылара 5:12). Адәм ҝүнаһ ишләдәндә өзүнү вә биз өвладларыны, мәҹази мәнада, ҝүнаһын вә өлүмүн көләлијинә сатды (Ромалылара 7:14). Бәс биз бу көләликдә әбәди галаҹағыг? Әсла! Јеһова Аллаһ бизи гуртармаг үчүн фидјә вериб.

7, 8. Фидјә нәдир?

 ⁷ Бәс фидјә нәдир? Фидјә анлајышы өзүнә ики шеји дахил едир. Биринҹиси, кимисә азад етмәк вә ја нәји исә ҝери алмаг үчүн өдәнилән пулу вә саирәни, икинҹиси, вурулан зәрәри там шәкилдә өдәјән мәбләғи билдирир.

⁸ Адәм ҝүнаһ едиб бәшәријјәти өлүмә мәһкум етмәклә бизә елә бөјүк зәрәр вуруб ки, ону һеч бир инсан өвлады өдәјә билмәз. Амма Јеһова Аллаһ бизи ҝүнаһдан вә өлүмдән гуртармаг үчүн артыг чарә гылыб. Ҝәлин ҝөрәк, Јеһова Аллаһ бу фидјәни неҹә өдәди вә фидјә бизә һансы фајданы ҝәтирир.

9. Адәмин ҝүнаһынын әвәзиндә неҹә фидјә тәләб олунурду?

⁹ Адәмин итирдији мүкәммәл һәјаты гајтармаг үчүн тәләб олунан фидјәни һеч бир инсан өдәјә билмәз. Чүнки бүтүн инсанлар гүсурлудур (Зәбур 49:7, 8). Мүгәддәс Китаба әсасән, бу фидјә мүвафиг олмалыдыр (1 Тимутијә 2:6). Демәли, фидјә Адәмин итирдији һәјатла ејни дәјәрдә олмалы иди, јәни фидјәни өдәмәк үчүн камил инсан һәјаты тәләб олунурду.

10. Јеһова Аллаһ фидјәни өдәмәк үчүн нә етди?

¹⁰ Јеһова Аллаһ фидјәни өдәмәк үчүн нә етди? Јарадан хилгәтин илки олан истәкли Оғлу Иса Мәсиһи јер үзүнә ҝөндәрди (1 Јәһја 4:9, 10). Иса Атасындан ајрылмаға, Аллаһын дәрҝаһыны гојуб јерә енмәјә һазыр иди (Филиппилиләрә 2:7). Јеһова Аллаһ Исаны ҝөјдән јерә ҝөндәрди. О, камил, гүсурсуз вә ҝүнаһсыз бир инсан кими доғулду (Лука 1:35).

11. Кимсә бүтүн бәшәријјәт үчүн фидјә верә биләрдими?

¹¹ Илк инсан олан Адәм Јеһованын сөзүндән чыхмагла ҝәләҹәк өвладларыны әбәди һәјатдан мәһрум етди.  Бәс кимсә Адәмин нәслини өлүмдән азад едә биләрдими? Бәли, биләрди. (Ромалылара 5:19 ајәсини охујун.) Һеч вахт ҝүнаһ етмәјән Иса Мәсиһ камил һәјатыны фидјә кими тәгдим етди (1 Коринфлиләрә 15:45). Онун камил һәјаты сајәсиндә Адәмин бүтүн нәслини өлүмдән азад етмәк мүмкүндүр (1 Коринфлиләрә 15:21, 22).

12. Нәјә ҝөрә Иса Мәсиһ чохлу әзаб чәкди?

¹² Мүгәддәс Китабда Иса Мәсиһин өлүмгабағы нә гәдәр әзаб чәкдији тәсвир олунур. Ону амансызҹасына гамчылајыр, ишҝәнҹә дирәјинә мыхлајырлар; о, саатларла әзаб чәкиб өлүр (Јәһја 19:1, 16—18, 30). Бәс нәјә ҝөрә Мәсиһ бу гәдәр әзаб чәкмәли олду? Чүнки Шејтан иддиа етмишди ки, ағыр сынагла үзләшсә, һеч бир инсан Аллаһа садиг галмајаҹаг. Иса Мәсиһ сүбут етди ки, ән ағыр сынаг гаршысында белә, камил инсан Аллаһа садиг гала биләр. Сөзсүз ки, Јеһова Аллаһ Иса илә фәхр едирди! (Мәсәлләр 27:11; 15-ҹи әлавәјә бахын).

13. Фидјә неҹә өдәнилди?

¹³ Фидјә неҹә өдәнилди? Ерамызын 33-ҹү илиндә, јәһуди тәгвими илә нисан ајынын 14-дә Јеһова Аллаһын изни илә дүшмәнләри Мәсиһи едам етдиләр (Ибраниләрә 10:10). Едамдан үч ҝүн сонра Аллаһ Исаны ҹисмани бәдәндә јох, руһани варлыг кими дирилтди. Амма Иса јер үзүндә камил инсан кими јашамаг һүгугуну итирмәмишди. Иса Аллаһын дәрҝаһына галханда бу һүгугу фидјә олараг Аллаһа тәгдим етди ки, Аллаһ бу һүгугу Адәмин өвладларына версин вә онлар әбәди јашасын (Ибраниләрә 9:24). Јеһова Аллаһ бу фидјәни гәбул етди, бунун сајәсиндә һәр бир инсанын гаршысында ҝүнаһдан вә өлүмдән азад олмаг имканы ачылды. (Ромалылара 3:23, 24 ајәләрини охујун.)

14, 15. Ҝүнаһларымызын бағышланмасы үчүн нә етмәлијик?

¹⁴ Аллаһын ән ҝөзәл һәдијјәси олан фидјә бизә индидән фајда ҝәтирир. Ҝәлин ҝөрәк, фидјәнин бизә бу ҝүн һансы көмәји дәјир вә ҝәләҹәкдә неҹә көмәк едәҹәк.

¹⁵ Ҝүнаһларымыз бағышланыр. Һәмишә Аллаһы разы салан ишләр ҝөрмәк асан олмур. Һәрдән сәһвләр едирик, сөздә вә әмәлдә ҝүнаһа јол веририк (Колослулара 1:13, 14). Бәс Аллаһын әфвини газанмаг үчүн нә етмәлијик? Әмәлимизә ҝөрә үрәкдән пешман олмалы вә тәвазөкарлыг ҝөстәриб Аллаһдан әфв диләмәлијик. Онда әмин ола биләрик ки, Аллаһ ҝүнаһымыздан кечәҹәк (1 Јәһја 1:8, 9).

16. Виҹданымыз тәмиз олсун дејә нә етмәлијик?

¹⁶ Виҹданымыз тәмиз олур. Виҹдан әзабы чәкәндә инсан өзүнү ҝүнаһкар вә дәјәрсиз һисс едир, үмидсизлијә гапылыр. Анҹаг бу о демәк дејил ки, инсан һәр шејдән әлини үзмәлидир. Әҝәр инсан Јеһова Аллаһа јалварыб әфв диләсә, Аллаһ мүтләг онун сәсини ешидәҹәк вә ҝүнаһындан кечәҹәк (Ибраниләрә 9:13, 14). Јеһова Аллаһ бизи ҝүнаһларымызы вә нөгсанларымызы Она ачыб данышмаға чағырыр (Ибраниләрә 4:14—16). Бунун сајәсиндә Аллаһын гаршысында виҹданымыз тәмиз олаҹаг.

17. Иса Мәсиһин гурбанлығы сајәсиндә һансы немәтләрә саһиб ола биләрик?

¹⁷ Әбәди јашамаг үмидимиз јараныр. «Ҝүнаһын өдәдији һагг өлүмдүр, Аллаһын вердији әнам исә Ағамыз Мәсиһ Иса сајәсиндә әбәди һәјатдыр» (Ромалылара 6:23). Иса Мәсиһ уғрумузда ҹаныны гурбан вердији үчүн һәр биримизин хәстәликләрин олмадығы бир һәјатда әбәди јашамаг имканы вар (Вәһј 21:3, 4). Бәс Аллаһын вәд етдији бу немәтләри алмаг үчүн нә етмәлијик?

18. Јеһова Аллаһын бизи севдијинә нәјә ҝөрә әминик?

¹⁸ Кимсә сизә үрәјинизҹә олан һәдијјә верәндә кечирдијиниз һиссләри јадыныза салын. Фидјә Аллаһын бүтүн инсанлара бәхш етдији ән дәјәрли һәдијјәдир. Биз бу һәдијјәјә ҝөрә Она үрәкдән миннәтдар олмалыјыг. Јәһја 3:16 ајәсиндә дејилир: «Аллаһ дүнјаны о гәдәр севир ки, јеҝанә Оғлуну онун уғрунда фәда етди». Бәли, Јеһова Аллаһын бизә мәһәббәти о дәрәҹәдә ҝүҹлүдүр ки, Оғлу Иса Мәсиһи уғрумузда гурбан вериб. Әминик ки, Иса Мәсиһ дә бизи чох севир, чүнки уғрумузда өлүмә ҝетди (Јәһја 15:13). Фидјә Јеһова Аллаһын вә Иса Мәсиһин бизә мәһәббәтинин ән бариз сүбутудур (Галатијалылара 2:20).

19, 20. а) Јеһова Аллаһын досту олмаг үчүн нә етмәк лазымдыр? б) Мәсиһин фидјә гурбанлығына иман ҝәтирдијимизи неҹә ҝөстәрә биләрик?

¹⁹ Ҝөрдүјүмүз кими, Јеһова Аллаһ бизи дәрин мәһәббәтлә севир. Бәс бизи бу дәрәҹәдә севән Аллаһла дост олмаг үчүн нә едә биләрик? Дүздүр, танымадығымыз шәхси севмәк, онунла дост олмаг чәтиндир. Буна ҝөрә дә Јәһја 17:3 ајәси бизи Јеһова Аллаһы танымаға тәшвиг едир. Аллаһы таныдыгҹа Она мәһәббәтиниз артаҹаг, Ону разы салмаға чалышаҹаг, беләҹә, Онунла достлашаҹагсыныз. Бу мәгсәдә чатмаг истәјирсинизсә, Мүгәддәс Китабдан Јеһова Аллаһ барәдә өјрәнмәјә давам един (1 Јәһја 5:3).

²⁰ Мәсиһин фидјә гурбанлығына иман ҝәтирин. Мүгәддәс Китабда јазылыб ки, «Оғула иман едән әбәди һәјата говушаҹаг» (Јәһја 3:36). Оғула иман етмәк нә демәкдир? Бу о демәкдир ки, биз Мәсиһин тәлимләринә әсасән јашамалыјыг (Јәһја 13:15). Садәҹә дилдә «Мәсиһә инанырам» демәк аздыр. Иманымызы әмәлимизлә сүбут  етмәлијик. Јагуб 2:26 ајәсиндә дејилир: «Әмәлсиз иман... өлүдүр».

21, 22. а) Нәјә ҝөрә һәр ил Мәсиһин өлүмүнү анма мәрасиминдә иштирак етмәлијик? б) 6 вә 7-ҹи фәсилләрдә нә барәдә өјрәнәҹәјик?

²¹ Мәсиһин өлүмүнү анма мәрасиминдә иштирак един. Өлүм ҝүнүндән әввәлки ҝеҹә Иса Мәсиһ давамчыларына онун өлүмүнү анмағы тапшырмышды. Анма мәрасими, јахуд Ағанын шам јемәји адланан бу тәдбири биз һәр ил кечиририк (1 Коринфлиләрә 11:20; Мәтта 26:26—28). Иса Мәсиһ истәјир ки, уғрумузда камил һәјатыны гурбан вердијини унутмајаг. О, белә демишди: «Хатирәми јад етмәк үчүн буну һәмишә един». (Лука 22:19 ајәсини охујун.) Анма мәрасиминдә иштирак етмәклә биз фидјәјә вә Јеһова Аллаһла Иса Мәсиһин бизә бәсләдији бөјүк мәһәббәтә ҝөрә миннәтдарлығымызы билдирмиш олуруг. (16-ҹы әлавәјә бахын.)

²² Фидјә һәјатда алдығымыз ән дәјәрли һәдијјәдир (2 Коринфлиләрә 9:14, 15). Бу әвәзсиз һәдијјә өлүмү дадмыш милјонлара инсана белә фајда ҝәтирәҹәк. 6 вә 7-ҹи фәсилләрдә бу барәдә әтрафлы мәлумат верилир.