ЈЕР ҮЗҮНДӘ инсанлар артмаға башлады. Онларын чоху Габил кими пис ишләр ҝөрүрдүләр. Лакин бир адам һамыдан фәргләнирди. Бу адам Ханок иди. Ханок ҹәсарәтли инсан иди. Ону әһатә едән адамлар чох пис ишләрлә мәшғул олсалар да, Ханок Аллаһа хидмәт едирди.

Билирсән нәјә ҝөрә инсанлар о заман бу гәдәр пис ишләр ҝөрүрдүләр? Ҝәл бир аз дүшүнәк. Адәмлә Һәвванын Аллаһын сөзүндән чыхыб, гадаған едилмиш мејвәдән јемәләринә ким сәбәбкар олду? Дүздүр, пис мәләк. Мүгәддәс Китаб ону Шејтан адландырыр. О чалышыр ки, һамы пис олсун.

Јеһова Аллаһ бир дәфә Ханока тапшырыг верди. Ханок инсанлара белә бир хәбәр чатдырмалы иди: ‘Елә бир ҝүн ҝәләҹәк ки, Аллаһ бүтүн пис инсанлары мәһв едәҹәк’. Бу хәбәр ҹамаатын хошуна ҝәлмәди. Јәгин, инсанлар буну ешидәндә чох гәзәбләндиләр. Ола билсин, һәтта Ханоку өлдүрмәк истәдиләр. Бах елә буна ҝөрә дә, Ханок ҹәсарәтли олмалы иди. Ахы о, инсанлара Аллаһын ҝөрәҹәји ишләр барәсиндә данышырды.

Аллаһ гојмады ки, Ханок белә пис адамларын арасында үзүн мүддәт јашасын. О, ҹәми 365 ил јашады. Бәс нә үчүн «ҹәми 365 ил», мәҝәр бу аздыр? О вахт инсанлар даһа ҝүҹлү идиләр вә даһа чох јашајырдылар. Мәсәлән, Ханокун оғлу Метушелаһ 969 ил јашамышды!

Һә, Ханок өләндән сонра инсанлар даһа да писләширләр. Мүгәддәс Китабда јазылдығы кими ‘онларын фикир вә нијјәтләри һәр заман пис иди’ вә ‘дүнја зоракылыгла долмушду’.

Билирсән, о вахтлар јер үзүндә нә үчүн бу гәдәр пислик вар иди? Она ҝөрә ки, Шејтан инсанлара јени бир јолла пис ишләр ҝөрдүрүрдү. Нөвбәти фәсилдә бу һагда даһа әтрафлы өјрәнәҹәјик.