ИБРАҺИМИН нә етдијини ҝөрүрсәнми? Онун әлиндә бычаг вар вә дејәсән, оғлуну кәсмәјә һазырлашыр. Ахы Ибраһим нәјә ҝөрә буну етмәк истәјир? Әввәла, ҝәл ҝөрәк Ибраһимлә Саранын оғуллары неҹә олду.

Јадындадыр, Аллаһ сөз вермишди ки, онларын бир оғлу олаҹаг. Илк бахышдан бу гејри-мүмкүн ҝөрүнүрдү, чүнки Ибраһимлә Сара чох гоҹа идиләр. Буна бахмајараг, Ибраһим Аллаһын һәр шејә гадир олдуғуна инанырды. Ҝәл ҝөрәк нә баш верир.

Аллаһын вәд етдији вахтдан бир ил кечир. Артыг Ибраһимин 100, Саранын исә 90 јашы вар. Онларын Исһаг адлы бир оғуллары доғулур. Аллаһ һәгигәтән дә, вердији вәди јеринә јетирир!

Исһаг боја-баша чатанда, Јеһова Ибраһими сәсләјиб дејир: ‘Јеҝанә оғлун Исһагы ҝөтүр вә ҝөстәрәҹәјим даға ҝет. Орада оғлуну мәнә гурбан ҝәтир’. Әслиндә Аллаһ истәмирди ки, Ибраһим Исһагы өлдүрсүн. О, Ибраһимин иманыны сынајырды.

Бу сөзләр Ибраһими неҹә дә кәдәрләндирир, ахы о, оғлуну чох севирди. Јадындадырса, Аллаһ сөз вермишди ки, Ибраһимин ушаглары Кәнан торпағында јашајаҹаглар. Бәс әҝәр Исһаг өләрсә, бу неҹә ола биләр? Ибраһим буну баша дүшмәсә дә, Аллаһын дедикләринә әмәл едир.

Ибраһим даға галхыр, Исһагын әл-голуну бағлајыр вә ону дүзәлтдији гурбанҝаһын үзәринә гојур. Сонра оғлуну кәсмәк үчүн бычағы әлинә алыр. Елә бу ан Аллаһын мәләји дејир: ‘Ибраһим, Ибраһим!’ Ибраһим ҹаваб верир: ‘Бәли!’

Аллаһ дејир: ‘Ушаға әл галдырма вә она бир шеј етмә. Инди билдим ки, сән Мәнә иман едирсән, чүнки өз јеҝанә оғлуну Мәндән әсирҝәмәдин’.

Ибраһимин Аллаһа неҹә дә бөјүк иманы варды! О, инанырды ки, Јеһова һәр шеј едә биләр вә әмин иди ки, Исһаг өлсә белә, Аллаһ ону дирилдә биләр. Аллаһ бир гоч ҝөндәрир вә Ибраһим коллара илишмиш о гочу оғлунун әвәзинә гурбан ҝәтирир.