АЛЛАҺ Мәсиһи бүтүн халглар үчүн Рәһбәр тәјин едәҹәјини габагҹадан демишди. О бизим неҹә рәһбәрә еһтијаҹымыз олдуғуну јахшы билир, буна ҝөрә дә бизим үчүн ән јахшы Рәһбәри сечиб. Мәсиһ неҹә Рәһбәрдир? Ҝүҹлү сәркәрдә, тәҹрүбәли сијасәтчи, јохса мүдрик философ? Мүгәддәс Китаба әсасән Мәсиһ, јәни Иса хүсуси пејғәмбәр иди (Мәтта 23:10).

Аллаһ Исанын камил вә мүгәддәс инсан кими доғулмасынын гајғысына галды. Үстәлик, Иса Шејтанын ону јолдан чыхартмаг үчүн ҝөстәрдији бүтүн ҹәһдләрә гаршы дурурду. О, сөзләриндә вә әмәлләриндә Аллаһын ҝүҹүнү, әдаләтини, һикмәтини вә мәһәббәтини мүкәммәл сурәтдә тәзаһүр етдирмишди. Ҝәлин ҝөрәк биз Исадан нә өјрәнә биләрик.

О, Аллаһын вердији ҝүҹү башгаларынын рифаһы үчүн истифадә едирди. Иса, һәгигәтән дә, инсанларын гајғысына галыр вә онларын еһтијаҹыны өдәмәк үчүн ҝүҹүнү әсирҝәмирди. Бир дәфә о, тәлимләринә гулаг асмаға ҝәлән бөјүк издиһамы ҝөрүб деди: «Ҹамаата јазығым ҝәлир,.. јемәјә дә һеч нәләри јохдур» (Марк 8:2). Сонра мөҹүзәли шәкилдә онлары једиздирди.

Иса һәмчинин ҝәзиб-долашыр, өјрәдир вә «һәр ҹүр хәстәни вә нахошу сағалдырды» (Мәтта 4:23). Ҹамаатын нәјә ҝөрә онун ардынҹа ҝетдији ајдын иди, белә ки «ҹамаат она тохунмаға чалышырды, чүнки ондан ҝүҹ чыхыр вә онлары сағалдырды» (Лука 6:19). Әслиндә, Иса она ҝөрә ҝәлмәмишди ки, «она гуллуг етсинләр, әксинә, о, хидмәт етмәк вә бир чохлары уғрунда һәјатыны фидјә кими вермәк үчүн» ҝәлмишди a (Мәтта 20:28). Һеч бу ҹүр фәдакар давранан башга рәһбәр таныјырсыныз?

О, Аллаһын әдаләтини әкс етдирирди. Иса Аллаһын ганунуна дәгиглик илә әмәл едир вә бу ганунларын маһијјәтини дәрк едирди. Мүгәддәс Китабда пејғәмбәрлик олундуғу кими о санки белә дејир: «Еј Аллаһым, истәјини јеринә јетирмәкдән һәзз алырам, ганунун гәлбимдәдир» (Зәбур 40:8). Иса Мәсиһ һамыја — варлылара вә касыблара, ушаглара вә бөјүкләрә — һөрмәт вә еһтирамла, еләҹә дә гәрәзсиз јанашырды. О бу саһәдә Аллаһа бәнзәјирди. Бир дәфә Исанын шаҝирдләри ушагларыны онун јанына ҝәтирән валидејнләри мәзәммәт етмишдиләр. Анҹаг Иса демишди: «Гојун ушаглар јаныма ҝәлсинләр, онлара мане олмајын, чүнки Аллаһын Падшаһлығы беләләринә мәхсусдур» (Марк 10:14).

О, Аллаһа хас һикмәт тәзаһүр етдирирди. Иса инсанлара анлајышла јанашырды. «О, һәр кәсин үрәјини ҝөрүрдү» (Јәһја 2:25). Һәтта Исаны тутмаг үчүн адам ҝөндәрән дүшмәнләри белә етираф етмишдиләр: «Биз һәлә өмрүмүздә бу ҹүр данышан адам ҝөрмәмишик». Исада бу һикмәт һарадан иди? О изаһ етмишди: «Вердијим тәлим мәним дејил, мәни ҝөндәрәниндир» (Јәһја 7:16, 46).

 О, Аллаһын мәһәббәтини әкс етдирирди. Иса һәмчинин инсанлара гаршы мәрһәмәтли иди. Бир дәфә «башдан-ајағадәк ҹүзам ичиндә» олан бир адам Исаја јалварыб демишди: «Аға, әҝәр истәсән, мәни тәмизләјә биләрсән». Исанын она јазығы ҝәлди, «әлини узадыб она тохунду вә деди: “Истәјирәм. Тәмизлән”. Һәмин андаҹа о адамын ҹүзамы кечди» (Лука 5:12, 13; Марк 1:41, 42). Иса әзаб-әзијјәт ичиндә олан бу јазыг адама көмәк етмәји үрәкдән истәјирди.

Иса сизин дә гајғыныза галыр? Бу суала О өзү ҹаваб верир: «Еј бүтүн зәһмәткешләр вә јүкү ағыр оланлар, јаныма ҝәлин, мән сизә тәравәт верәҹәјәм. Бојундуруғуму үзәринизә ҝөтүрүн вә мәндән өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр» (Мәтта 11:28, 29).

Иса бу ҝүнә гәдәр олан ән јахшы Рәһбәрдир. О бизи тәшвиг едир: «Мәндән өјрәнин». Бәс сиз бу сәмими дәвәти гәбул едәҹәксиниз? Әҝәр гәбул етсәниз, бу сизә хошбәхтлик ҝәтирәҹәк.