Зәбур 107:1—43
(107—150-ҹи мәзмурлар)
107 Јеһоваја шүкүр един, чүнки кәрамәтлидир,Мәһәббәти әбәдидир.
2 Белә десин Јеһованын хилас етдији,Дүшмән әлиндән азад етдији кәсләр,
3 Дијар-дијар јығдығы,Шәргдән, гәрбдән,Шималдан, ҹәнубдан топладығы кәсләр.
4 Онлар сәһрада, бијабанда долашырдылар,Бир шәһәрә јол тапмырдылар ки, ҝедиб орада јашасынлар.
5 Онлар аҹырдылар, сусајырдылар,Тагәтсизликдән һушларыны итирирдиләр.
6 Дар ајагда Јеһоваја фәрјад едирдиләр,О да онлары әзаб-әзијјәтдән гуртарырды.
7 Мәскән салмаг үчүн бир шәһәрә чатанадәкОнлары доғру јолла апарды.
8 Гој инсанлар Јеһоваја шүкүр етсин мәһәббәтинә ҝөрә,Бәшәр оғлу үчүн ҝөрдүјү һејрәтли ишләринә ҝөрә.
9 Чүнки сусузлара су ичирдир,Аҹлары немәтләрлә дојурур.
10 Бәзиләри зүлмәтин дибиндә јашајырды,Дәмир буховлардан әзијјәт чәкирди, мәһбус иди,
11 Чүнки Аллаһын сөзүнә гаршы чыхмышдылар,Һагг-Тааланын мәсләһәтини рәдд етмишдиләр.
12 Одур ки, сыхынтыларла үрәкләрини рам етди.Јыхылырдылар, онлара көмәк едән олмурду.
13 Дар ајагда Јеһовадан имдад диләјирдиләр,Јенә дә онлары бәладан гуртарырды.
14 Онлары зүлмәтин дибиндән азад едирди,Буховларыны гопарыб ачырды.
15 Гој инсанлар Јеһоваја шүкүр етсинләр мәһәббәтинә ҝөрә,Бәшәр оғулларына ҝөстәрдији һејрәтли ишләринә ҝөрә.
16 Мис гапылары сындырды,Дәмир рәзәләри гырды.
17 Ахмаглар асиликләри илә,Ҝүнаһлары илә башларына бәла ачырдылар.
18 Һәр јемәкдән ијрәнирдиләр,Өлүмүн гапыларына јахынлашырдылар.
19 Дар ајагда Јеһовадан имдад диләјирдиләр,Јенә дә онлары бәладан гуртарырды.
20 Сөзүнү ҝөндәрирди, онлары сағалдырды,Онлары дүшдүкләри гујулардан чыхарырды.
21 Гој инсанлар Јеһоваја шүкүр етсинләр мәһәббәтинә ҝөрә,Бәшәр оғулларына ҝөстәрдији һејрәтли ишләринә ҝөрә.
22 Гој шүкранларыны гурбан ҝәтирсинләр,Онун ишләрини севинҹ сәдалары илә бәјан етсинләр.
23 Ҝәми илә дәниздә сәјаһәт едәнләр,Дәрјаларда тиҹарәт едәнләр
24 Јеһованын ишләрини,Әнҝин сулардакы харигәләрини,
25 Сөзү илә туфан гопдуғуну,Далғалары габартдығыны ҝөрдүләр.
26 Онлар ҝөјләрә галхыр,Дәринлијә енирләр.
Бәдбәхтлик јахынлашанда ҹанлары әлдән ҝедир.
27 Сәрхош адам кими фырланыр, сәндәләјирләр,Баҹарыглары пуча чыхыр.
28 Дар ајагда Јеһоваја фәрјад едирләр,Онлары бәладан гуртарыр.
29 Гасырғаны рам едир,Дәнизин далғалары јатыр.
30 Сакитлик чөкәндә севинирләр,Онлары истәдикләри лимана апарыр.
31 Гој инсанлар Јеһоваја шүкүр етсинләр мәһәббәтинә ҝөрә,Бәшәр оғулларына ҝөстәрдији һејрәтли ишләринә ҝөрә.
32 Гој ҹамаат ичиндә Ону уҹалтсынлар,Ағсаггаллар мәҹлисиндә тәриф етсинләр.
33 О, чајлары сәһраја,Ахар сулары гураглыға,
34 Бәрәкәтли торпағы шоранлыға дөндәрир,Орадакы сакинләрин шәр әмәлләринә ҝөрә.
35 Сәһралығы ҝөлә чевирир,Гураг јердә чешмәләр гајнадыр.
36 Аҹлары орада мәскунлашдырыр ки,Шәһәр салыб јашасынлар.
37 Онлар әкин әкир, үзүмлүкләр салырлар,Бол мәһсул топлајырлар.
38 Онлара хејир-бәрәкәт верир, чохалырлар,Мал-гараларынын сајы азалмыр.
39 Амма сыхынты, әзаб, гәм-гүссә ҝөрәндәЈенә халгын сајы азалыр, бели бүкүлүр.
40 О, әсилзадәләрин үстүнә нифрәт јағдырыр,Онлары јолсуз-ризсиз сәһрада сәрҝәрдан едир.
41 Фәгири исә зүлмдән горујур,Аиләсини бөјүдүр, сүрү кими чохалдыр.
42 Дүрүст адамлар буну ҝөрүб севинир,Надүрүстләрсә ағзыны јумур.
43 Ағыллы кимдирсә, гој бунлары нәзәрә алсын,Јеһованын хејирхаһ әмәлләринә јахшы-јахшы диггәт етсин.
