Һөрмәтҹил әр-арвадлар анлашылмазлыг јарананда белә бир-биринин гајғысына галыр. Бир китабда дејилир: «Белә әр-арвадлар өз мөвгеләринин үстүндә исрарла дурмур. Әксинә, онлар разылыға ҝәлмәдикләри мәсәләләри бирликдә мүзакирә едир. Бир-биринин нөгтеји-нәзәринә һөрмәтлә јанашыр вә һәр ики тәрәфи разы салаҹаг бир гәнаәтә ҝәлир» («Ten Lessons to Transform Your Marriage»).

МҮГӘДДӘС КИТАБ ПРИНСИПИ: «Мәһәббәт... өз хејрини ҝүдмүр» (1 Коринфлиләрә 13:4, 5).

«Мәним үчүн һәјат јолдашыма һөрмәт етмәк — онун гәдрини билмәк, она вә ја никаһымыза зәрәр верәҹәк һеч бир шеј етмәмәкдир» (Мајк).

Һөрмәт олмаса, әрлә арвад бир-бирилә данышығында тәнгидә, кинајәјә вә һәтта тәһгирә јол верә биләр. Тәдгигатчылар дејир ки, бу, бошанмаја ҝәтириб чыхараҹаг илкин әламәтләрдир.

«Һәјат јолдашына ирад тутмаг, кинајәли сөзләр демәк вә ја һаггында зарафатлар етмәк онун өзүнәинам һиссини зәифләдәҹәк, етибарыны сарсыдаҹаг, беләҹә, никаһыныз зәрәр ҝөрәҹәк» (Брајн).

ӨЗҮНҮЗҮ ЈОХЛАЈЫН

Сөз вә һәрәкәтләринизә һәфтә әрзиндә диггәт јетирин. Сонра өзүнүздән сорушун:

• «Һәјат јолдашымы нечә дәфә тәнгид етмишәм, бәс нечә дәфә комплимент демишәм?»

• «Һәјат јолдашыма һансы јолларла һөрмәт ҝөстәрмишәм?»

ҺӘЈАТ ЈОЛДАШЫНЫЗЛА МҮЗАКИРӘ ЕДИН

• Һансы сөз вә һәрәкәтләрдән бир-биринизә һөрмәт гојдуғунуз ҝөрүнүр?

• Һансы сөз вә һәрәкәтләрдән бир-биринизә һөрмәт гојмадығыныз ҝөрүнүр?

МӘСЛӘҺӘТЛӘР

• Һәр бириниз һәјат јолдашынызын сизә һөрмәт гојмасыны истәдијиниз үч саһәни јазын. Сонра гејдләринизи бир-биринизә верин. Јолдашынызын гејд етдији саһәләрдә она һөрмәт етмәјә чалышын.

• Һәјат јолдашынызда бәјәндијиниз хүсусијјәтләри јазын. Сонра онун бу хүсусијјәтләрини нә гәдәр гијмәтләндирдијинизи дилә ҝәтирин.

«Мәним үчүн һәјат јолдашыма һөрмәт етмәк — она дәјәр вердијими, хошбәхт олмасыны истәдијими әмәлләримдә ҝөстәрмәкдир. Бунун үчүн һәмишә бөјүк жестләрә еһтијаҹ јохдур; бәзән әсл һөрмәти кичик жестләрлә дә ҝөстәрмәк олар» (Меган).

Хүласә, сиз јолдашыныза һөрмәт гојдуғунузу дүшүнә биләрсиниз, амма әсас мәсәлә одур ки, о, буну һисс едир, ја јох.

МҮГӘДДӘС КИТАБ ПРИНСИПИ: «Шәфгәти, һәмчинин хејирхаһлығы, тәвазөкарлығы, мүлајимлији вә сәбри ҝејинин» (Колослулара 3:12).