Сәмими үнсијјәт өвладынызла фикирләринизи вә һиссләринизи гаршылыглы бөлүшмәјиниз демәкдир.

Үнсијјәт етмәк, хүсусилә јенијетмәләрлә чәтин ола биләр. Бир китабда дејилдији кими, ола билсин, бир мүддәт әввәл «сиз ушагларынызын һәјатында, санки сәһнә архасында идиниз», јәни һәр шејдән хәбәриниз вар иди. «Инди исә ән јахшы еһтималла сәһнә гаршысында, тамашачыларын арасында әјләшәҹәксиниз вә һәтта әјләшдијиниз јер јахшы јер олмаја биләр» («Breaking The Code»). Ушағынызын сизинлә данышмаг истәмәдијини дүшүндүјүнүз ан, бәлкә дә онун сизә ән чох еһтијаҹ дујдуғу андыр.

Үнсијјәт етмәјә истәнилән вахт һазыр олун. Лазым ҝәлсә лап ҝеҹәнин бир аләми дә ушағынызла үнсијјәт един.

«Бәлкә дә үрәјиниздән белә демәк кечәҹәк: “Сөһбәтин индијә галыб? Бүтүн ҝүнү јанында дејилдим?” Ушағымыз үрәјини бизә ачмаг истәјирсә, бундан неҹә ҝилејләнә биләрик? Мәҝәр бу, һәр валидејнин истәји дејил?» (Лиза).

«Јатмағы чох севирәм, амма јенијетмә өвладларымла етдијим ән јахшы сөһбәтләр мәһз ҝеҹә јарысындан сонра олур» (Һерберт).

МҮГӘДДӘС КИТАБ ПРИНСИПИ: «Гој һеч кәс өз хејрини дүшүнмәсин, башгасынын хејрини дүшүнсүн» (1 Коринфлиләрә 10:24).

Диггәтинизин јајынмасына јол вермәјин. Бир ата етираф едир: «Бәзән ушагларым данышанда фикрим башга јерә ҝедир. Онлары алдатмаг олмур, о дәгигә буну һисс едирләр».

Әҝәр сиздә дә беләдирсә, телевизору сөндүрүн вә електрон ҹиһазлары кәнара гојун. Мәсәләнин өнәмли олмадығыны дүшүнсәниз белә, бүтүн фикринизи ушағынызын дедикләринә ҹәмләјин.

«Ушагларымызы әмин етмәлијик ки, онларын һиссләри бизим үчүн әһәмијјәтлидир. Әҝәр онлар бунун әксини дүшүнәрләрсә, онда ја өз нараһатчылыгларыны үрәкләриндә сахлајаҹаг, ја да көмәји башга јердә ахтараҹаглар» (Маранда).

«Ушағынызын дүшүнҹәләри тамамилә сәһв олса белә, кәскин реаксија вермәјин» (Антони).

МҮГӘДДӘС КИТАБ ПРИНСИПИ: «Неҹә гулаг асдығыныза фикир верин» (Лука 8:18).

Һәр шәраитдән истифадә един. Бәзән ушаглара валидејнләри илә үз-үзә сөһбәт етмәк чәтин ҝәлир.

«Машын сүрән заман сөһбәт етмәк үчүн әла фүрсәт јараныр. Јанбајан оланда даһа јахшы мүзакирәләр едирик, нәинки үзбәүз оланда» (Никол).

Сөһбәт үчүн башга бир шәраит сүфрә архасында јараныр.

«Јемәк вахты һәр биримиз ҝүн әрзиндә олуб-битән јахшы вә пис шејләри бөлүшүрүк. Бу, бизи бир-биримизә даһа да јахынлашдырыр вә әмин едир ки, үзләшдијимиз чәтинликләрлә мүбаризәдә тәк дејилик» (Робин).

МҮГӘДДӘС КИТАБ ПРИНСИПИ: «Һәр бир инсан ешитмәјә һазыр олмалы, данышмаға... тәләсмәмәлидир» (Јагуб 1:19).