«Буна ҝөрә дә ојаг галын, чүнки о ҝүнү вә о сааты билмирсиниз» (МӘТТА 25:13).

«Диггәтли олун, ојаг галын, чүнки тәјин едилмиш вахты билмирсиниз» (МАРК 13:33).

Демәли, јер үзүндә һеч ким дүнјанын сонунун нә заман ҝәләҹәјини дәгиг билмир. Амма Аллаһ дүнјанын сону үчүн конкрет вахт, конкрет ҝүн вә саат тәјин едиб (Мәтта 24:36). Бәс бу о демәкдир ки, сонун јахын олуб-олмадығыны һеч ҹүр билә билмәрик? Хејр, бу о демәк дејил. Пејғәмбәрләримиздән бири демишди ки, мүәјјән һадисәләри ҝөрәндә сонун јахын олдуғуну баша дүшә биләрик.

Мүгәддәс Китабда јазылан һадисәләр «дөврүн јекунуна әламәт»дир. Орада јазылыб: «Милләт милләтә гаршы, дөвләт дөвләтә гаршы галхаҹаг. Ҝаһ бурада, ҝаһ орада гытлыг, зәлзәләләр олаҹаг» (Мәтта 24:3, 7). Орада һәмчинин јазылыб ки, хәстәликләр, јахуд епидемијалар олаҹаг (Лука 21:11; һашијә). Сизҹә, бүтүн бунлар бу ҝүн јеринә јетмир?

Јашадығымыз зәманәдә дағыдыҹы мүһарибәләр, аҹлыг, зәлзәләләр, һәмчинин амансыз хәстәликләр дүнјаны виран гојуб. Мәсәлән, 2004-ҹү илдә Һинд океанында баш верән ҝүҹлү зәлзәлә сунамијә сәбәб олмушду. Бунун нәтиҹәсиндә исә 225 000 адам һәјатыны итирмишди. Үч илдир ки, COVID-19 пандемијасы бүтүн дүнјаны ҹәнҝинә алыб. О, тәхминән 6,9 милјон инсанын өлүмүнә сәбәб олуб. Мүгәддәс Китаба әсасән, бу кими һадисәләр дүнјанын сонунун јахын олдуғуну ҝөстәрир.

Дүнјанын сонундан габагкы дөвр Мүгәддәс Китабда «ахырзаман» адланыр (2 Бутрус 3:3, 4). 2 Тимутијә 3:1—5 ајәләринә әсасән, ахырзаманда әхлаг дәјәрләри тәнәззүлә уғрамалы иди. (« Дүнјанын сонунун астанасында» адлы чәрчивәјә бахын.) Сизҹә, бу ҝүн инсанлар худбин, тамаһкар, залым дејилләр? Инсанларда бир-биринә мәһәббәт сојумајыб? Бу, дүнјанын сонуна лап аз галдығыны ҝөстәрән диҝәр сүбутдур.

Бәс ахырзаман нә гәдәр давам едәҹәк? Мүгәддәс Китаба әсасән, чох аз. Сонра Аллаһ «јери тәләф едәнләри тәләф» едәҹәк (Вәһј 11:15—18; 12:12).

Аллаһ бу шәр дүнјанын сонунун ҝүнүнү вә саатыны артыг тәјин едиб (Мәтта 24:36). Анҹаг бир шад хәбәр дә вар: Аллаһ «һеч кәсин мәһв олмасыны истәмир» (2 Бутрус 3:9). О, инсанларын гаршысында имкан ачыр ки, Онун гајда-ганунларыны өјрәниб әмәл етсинләр. Чүнки Аллаһ истәјир ки, биз бу шәр дүнјанын сонундан сағ чыхыб, јени дүнјада, ҹәннәтә чеврилмиш Јер күрәсиндә әбәдијјән јашајаг.

Аллаһын ирадәси илә бүтүн дүнјада маарифләндирмә иши һәјата кечирилир. Беләҹә, бу ҝүн һәр кәс өјрәнә биләр ки, Аллаһын Падшаһлығынын һакимијјәти алтында јашамаг үчүн нә етмәлидир. Аллаһын Кәламында јазылыб ки, Аллаһын Падшаһлығы һаггында мүждә «бүтүн јер үзүндә тәблиғ едиләҹәк» (Мәтта 24:14). Бүтүн дүнјада Јеһованын Шаһидләри мүждәни тәблиғ етмәјә, инсанлара Аллаһ һагда өјрәтмәјә милјардларла саат сәрф едир. Мүгәддәс Китаба әсасән, дүнјанын сону ҝәлмәздән әввәл тәблиғ иши бүтүн дүнјада һәјата кечирилмәлидир.

Инсан һакимијјәтинин сону чатыб. Шад хәбәр ондан ибарәтдир ки, сиз дүнјанын сонунда хилас олуб, јер үзүндәки ҹәннәтдә јашаја биләрсиниз. Нөвбәти мәгаләдән өјрәнәҹәксиниз ки, јени дүнјада јашамаг үчүн нә етмәк лазымдыр.