1, 2. а) Јеһова сөзүнү инсанлара неҹә чатдырыб? б) Бу мәгаләдә нәји арашдыраҹағыг?

ЈЕҺОВА хидмәтчиләрилә данышмағы хошлајыр. О, кечмишдә сөзүнү пејғәмбәрләри, мәләкләри вә Иса Мәсиһ васитәсилә чатдырырды (Амс. 3:7; Гал. 3:19; Вәһј 1:1). Бу ҝүн Онун сәсини Кәламы васитәсилә ешидә биләрик. Јеһова Мүгәддәс Китабы назил едиб ки, Онун дүшүнҹә тәрзини өјрәниб јолларыны дәрк едәк.

² Иса Мәсиһ јер үзүндә оланда Јеһова үч дәфә Өз дәрҝаһындан данышмышды. Ҝәлин ҝөрәк Јеһова нә демишди, Онун сөзләриндән нә өјрәнирик вә бунун бизә һансы фајдасы вар.

3. Марк 1:9—11 ајәләринә әсасән, Иса Мәсиһ вәфтиз олунан заман Јеһова нә демишди вә бу сөзләр һансы үч факты тәсдиг едир?

³ Марк 1:9—11 ајәләриндә Јеһованын ҝөјдән данышдығы илк вәзијјәт гејдә алыныб. (Ајәләри охујун.) Јеһова дејир: «Сән Мәним севимли Оғлумсан. Сәндән чох разыјам». Атасынын ону севдијини, она етибар етдијини ешитмәк сөзсүз ки, Исаја дәрин тәсир бағышламышды! Јеһованын сөзләри Иса Мәсиһ һагда үч мүһүм факты тәсдиг едир. Биринҹиси, Иса Јеһованын Оғлудур, икинҹиси, Јеһова Оғлуну севир, үчүнҹүсү, Јеһова Оғлундан разыдыр. Ҝәлин бунлары бир-бир арашдыраг.

4. Вәфтиз олунан заман Иса Мәсиһ һансы мәнада Аллаһын Оғлу олду?

⁴ «Оғлумсан». Јеһованын бу сөзләри Иса Мәсиһлә Онун арасында јени мүнасибәтин башладығына ишарә едир.  Иса Мәсиһ ҝөјдә оланда Аллаһын руһани оғлу иди. Лакин вәфтиз олунан заман о, мүгәддәс руһла мәсһ едилди. Бу заман Јеһова вурғулады ки, Иса Мәсиһ Онун мәсһ олунмуш Оғлу олараг ҝөјә гајыдыб Падшаһ вә Баш Каһин олмаг үмидинә саһиб олду (Лука 1:31—33; Ибр. 1:8, 9; 2:17). Одур ки, вәфтиз олунан заман Атасынын она «сән Мәним севимли Оғлумсан» демәси тәәҹҹүблү дејил (Лука 3:22).

5. Мәһәббәт ҝөстәрмәкдә вә руһландырмагда Јеһованы неҹә тәглид едә биләрик?

⁵ «Севимли Оғлумсан». Јеһованын мәһәббәтини вә разылығыны ифадә етмәсиндән өјрәнирик ки, биз дә башгаларыны руһландырмаг үчүн фүрсәт ахтармалыјыг (Јәһ. 5:20). Јахын билдијимиз бири ҝөрдүјүмүз ишләрә ҝөрә бизи тәрифләјәндә, бизә мәһәббәт ҝөстәрәндә үрәкләнирик. Бизим кими, диндашларымызын вә аилә үзвләримизин дә хош сөзләрә еһтијаҹы вар. Онлары тәрифләмәклә иманларыны мөһкәмләндирир вә Јеһоваја сәдагәтлә хидмәт етмәләринә стимул веририк. Хүсусилә дә валидејнләрин өвладларыны һәвәсләндирмәси ҝәрәкдир. Валидејн өвладына мәһәббәт ҝөстәрәндә, сәмими-гәлбдән тәрифләјәндә онун тәрәггисинә көмәк едир.

6. Иса Мәсиһә етибар етмәјә һансы әсасымыз вар?

⁶ «Сәндән чох разыјам». Јеһова бу сөзләрлә Исаја етибар етдијини, тапшырдығы иши сәдагәтлә баша чатдыраҹағына әмин олдуғуну ҝөстәрди. Јеһова Исадан бу гәдәр архајындырса, демәли, биз дә тамамилә әмин ола биләрик ки, о, Атасынын бүтүн вәдләрини јеринә јетирәҹәк (2 Кор. 1:20). Исанын нүмунәси һагда дүшүнәндә ондан өјрәнмәк вә изи илә ҝетмәк истәјимиз даһа да артыр. Јеһова Иса Мәсиһә етибар  етдији кими, хидмәтчиләринин дә бир халг кими Оғлундан өрнәк алаҹағындан архајындыр (1 Бут. 2:21).

7. Мәтта 17:1—5 ајәләри әсасында Јеһованын ҝөјдән данышдығы һадисәни әтрафлы тәсвир един.

⁷ Мәтта 17:1—5 ајәләрини охујун. Јеһованын ҝөјдән икинҹи дәфә данышмасы Мәсиһин ҝөркәми дәјишдији һадисә заманы баш верир. Һәмин вахт Иса Мәсиһ Бутрус, Јагуб вә Јәһја илә бирҝә уҹа бир дағын башына галхмышды. Һәвариләр бурада оланда гејри-ади бир ҝөрүнтү ҝөрүрләр. Исанын үзү шәфәг сачыр, палтары пар-пар парылдајыр. Муса вә Илјас пејғәмбәрин ҝөркәминдә ики нәфәр пејда олур вә Иса илә ону ҝөзләјән өлүм вә дирилмәси барәдә сөһбәт етмәјә башлајыр. Һәвариләр мүрҝүләсә дә, там ојананда бу мөһтәшәм ҝөрүнтүнү ҝөрдүләр (Лука 9:29—32). Сонра онларын башынын үстүнү парлаг булуд алыр вә булудун ичиндән бир сәс ҝәлир, бу, Аллаһын сәси иди! Јеһова Иса вәфтиз олунан заман гејд етдији кими, бу дәфә дә, «бу, Мәним севимли Оғлумдур. Мән ондан чох разыјам» дејәрәк ондан мәмнун галдығыны вә ону севдијини билдирир. Лакин бу дәфә Јеһова әлавә едир: «Она гулаг асын».

8. Ҝөрүнтү Иса Мәсиһә вә шаҝирдләринә неҹә тәсир етмишди?

⁸ Бу ҝөрүнтүдә Исанын ҝәләҹәкдә Аллаһын Падшаһлығынын Падшаһы кими саһиб олаҹағы шөһрәт вә гүдрәт тәсвир олунурду. Шүбһәсиз ки, бу ҝөрүнтү Исаны ҹәсарәтләндирди, чәкәҹәји әзаблара, дәһшәтли өлүмә дөзмәјә ҝүҹ верди. Ҝөрүнтү һәмчинин шаҝирдләрин иманыны мөһкәмләндирди, онлары гаршыда ҝөзләјән зәһмәт долу ҝәрҝин илләрә вә үзләшәҹәкләри сынаглара һазырлады. Һәвари Бутрусун тәхминән 30 ил сонра да Исанын ҝөркәминин дәјишмәсини хатырламасы ҝөрүнтүнүн һәлә дә јаддашында ҹанлы галдығыны ҝөстәрирди (2 Бут. 1:16—18).

9. Иса Мәсиһ шаҝирдләринә һансы нәсиһәтләри вермишди?

⁹ «Она гулаг асын». Јеһова ајдын ҝөстәрди ки, Оғлунун сөзүнә гулаг асыб, она итаәт етмәјимизи истәјир. Бәс Иса јер үзүндә оланда нә һагда данышырды? О, чох ваҹиб мөвзулара тохунурду. Мисал үчүн, о, шаҝирдләринә мүждәни јајмағын үсулларыны өјрәдир вә дәфәләрлә онлары ојаг галмаға сәсләјирди (Мәт. 24:42; 28:19, 20). Һәмчинин онлары вар ҝүҹләри илә чалышмаға вә тәслим олмамаға тәшвиг едирди (Лука 13:24). Иса давамчыларына бир-бирини севмәјин, бирлији горумағын вә әмрләринә итаәт етмәјин ваҹиблијини вурғулајырды (Јәһ. 15:10, 12, 13). Доғрудан да, онун вердији нәсиһәтләр чох практики иди. Бу нәсиһәтләр кечмишдә олдуғу кими, бу ҝүн дә дәјәрлидир.

10, 11. Иса Мәсиһә гулаг асдығымызы неҹә ҝөстәрә биләрик?

¹⁰ Иса Мәсиһ дејирди: «Һәгигәт тәрәфиндә олан һәр бир адам сәсимә гулаг асыр» (Јәһ. 18:37). Биз бир-биримизә гаршы сәбирли олуб бир-биримизи үрәкдән бағышламагла онун сәсинә гулаг асдығымызы ҝөстәририк (Кол. 3:13; Лука 17:3, 4). Она гулаг асдығымызы ҝөстәрмәјин бир јолу да «һәм әлверишли, һәм дә чәтин» вахтларда хош хәбәри тәблиғ етмәјимиздир (2 Тим. 4:2).

¹¹ Иса Мәсиһ дејирди: «Мәним гојунларым сәсимә гулаг асырлар» (Јәһ. 10:27). Мәсиһин давамчылары нәинки онун сәсини  ешидир, һәм дә ешитдикләринә әмәл едир. «Һәјатын гајғылары» онларын фикрини јајындырмыр (Лука 21:34). Әксинә, онлар ән чәтин вәзијјәтләрдә белә, Мәсиһин әмрләринә итаәт етмәји һәр шејдән үстүн тутурлар. Бир чох баҹы-гардашымыз ағыр сынагларла үзләшир, бәзиләри әлејһдарларын һүҹумларына мәруз галыр, диҝәрләри сон дәрәҹә јохсул шәраитдә јашајыр, јахуд тәбии фәлакәтләрин гурбаны олур. Лакин онлар нәјин баһасына олурса-олсун, Јеһоваја сәдагәтләрини горујурлар. Иса Мәсиһ бу баҹы-гардашлара вәд верир: «Мәни севән адам мәним әмрләрими гәбул едиб онлара әмәл едир. Мәни севән адамы Атам да севәҹәк» (Јәһ. 14:21).

12. Иса Мәсиһә гулаг асдығымызы даһа неҹә ҝөстәрә биләрик?

¹² Иса Мәсиһә гулаг асдығымызы ҝөстәрмәјин даһа бир јолу бизә рәһбәрлик етмәк үчүн тәјин етдији кәсләрлә әмәкдашлыг етмәкдир (Ибр. 13:7, 17). Сон илләр әрзиндә Аллаһын тәшкилатында чохлу дәјишиклик олуб. Мәсәлән, тәблиғ ишиндә јени вәсаит вә үсуллардан истифадә олунур, һәфтәичи ҝөрүшләрин тәртибаты дәјишиб, ибадәт евләринин тәмизлијиндә, тикинтисиндә вә тәмир-бәрпа ишләринин апарылмасында мүәјјән јениликләр һәјата кечирилиб. Сөзсүз ки, мәһәббәтдән ирәли ҝәлән вә өлчүлүб-бичилмиш тәлиматлара ҝөрә чох миннәтдарыг! Әмин ола биләрик ки, Јеһова тәшкилаты васитәсилә вердији ҝөстәришләрә әмәл етмәк ҹәһдләримизи аванд едәҹәк.

13. Иса Мәсиһә гулаг асмаг һансы фајданы ҝәтирир?

¹³ Иса Мәсиһин өјрәтдикләринә гулаг асмаг бизә фајда ҝәтирир. Мәсиһ тәлимләринин давамчыларына тәравәт ҝәтирәҹәјини вәд едәрәк демишди: «Бојундуруғум раһат, јүкүм јүнҝүлдүр» (Мәт. 11:28—30). Иса Мәсиһин һәјатындан вә хидмәтиндән бәһс едән дөрд Мүждәнин дә дахил олдуғу Аллаһын Кәламы бизи тәравәтләндирир, руһландырыр вә һикмәт бәхш едир (Зәб. 19:7; 23:3). Мәсиһ демишди: «Аллаһын сөзүнү ешидиб она әмәл едәнләр хошбәхтдирләр!» (Лука 11:28).

14, 15. а) Јәһја 12:27, 28 ајәләри әсасында Јеһованын ҝөјдән үчүнҹү дәфә данышдығы һадисәни тәсвир един. б) Јеһованын сөзләри Мәсиһә неҹә тәсир етди?

¹⁴ Јәһја 12:27, 28 ајәләрини охујун.  Јәһјанын мүждәсиндә Јеһованын ҝөјдән данышдығы үчүнҹү һадисә гәләмә алыныб. Иса Мәсиһ өлүмүндән бир нечә ҝүн өнҹә сонунҹу дәфә Пасханы гејд етмәк үчүн Јерусәлимә ҝәлир. О, үрәјинин сыхылдығыны дејәрәк дуа едир: «Ата, Өз адыны уҹалт». Атасы ҹавабында ҝөјдән дејир: «Уҹалтмышам, јенә дә уҹалдаҹағам».

¹⁵ Мәсиһин үрәјини сыхан үзәриндәки бөјүк мәсулијјәт иди, о, Јеһоваја садиг галмалы иди. Иса амансызҹасына гамчыланаҹағыны вә дәһшәтли өлүмлә үзләшәҹәјини билирди (Мәт. 26:38). Амма онун үчүн ән өнәмлиси Атасынын адыны уҹалтмаг иди. Иса күфр данышмагда иттиһам олунурду вә өлүмү илә Атасынын адыны бәднам едәҹәјинә ҝөрә нараһатлыг кечирирди. Сөзсүз ки, Јеһованын сөзләриндән сонра о әмин олду ки, Јеһова адыны уҹалдаҹаг. Атасынын сөзләри онун үрәјини сакитләшдирди вә гаршыда ҝөзләјән сынаглара дөзмәјә ҝүҹ верди. Бәлкә дә, һәмин вахт Јеһованын сөзләринин мәнасыны јалныз о анламышды. Лакин Јеһова бизләрдән өтрү бу сөзләри Кәламына һәкк етдирди (Јәһ. 12:29, 30).

16. Аллаһын адына ҝөрә нараһатлыг кечирмәјимизә нәләр сәбәб ола биләр?

¹⁶ Иса Мәсиһ кими, ола билсин, биз дә Јеһованын адына гара јахылмасына ҝөрә нараһатыг. Ола билсин, биз дә әдаләтсиз рәфтара мәруз галырыг. Бәлкә дә, әлејһдарларын јајдыглары шајиәләрин Јеһованын  адына вә тәшкилатына ләкә вурдуғуну дүшүнүб нараһатлыг кечиририк. Белә вәзијјәтләрдә Јеһованын сөзләри үрәјимизи сакитләшдирәҹәк. Биз һәддән артыг нараһат олмамалыјыг. Әмин ола биләрик ки, «Аллаһын һәр бир ағылдан үстүн олан сүлһү» үрәјимизи вә фикирләримизи Мәсиһ Иса васитәсилә горујаҹаг (Филип. 4:6, 7). Јеһова Өз адыны мүтләг уҹалдаҹаг! О, мөмин бәндәләрини Шејтанын вә онун дүнјасынын вурдуғу бүтүн зәрәрдән гуртараҹаг (Зәб. 94:22, 23; Әшј. 65:17).

17. Әшија 30:21 ајәсинә әсасән, Јеһова бу ҝүн бизимлә неҹә данышыр?

¹⁷ Јеһова бу ҝүн дә хидмәтчиләри илә данышыр. (Әшија 30:21 ајәсини охујун.) Дүздүр, биз Онун сәсини ҝөјдән ешитмирик. О, өјүдләрини назил етдији Кәламы — Мүгәддәс Китаб васитәсилә верир. Бундан башга, Јеһова мүгәддәс руһу илә јөнәлтдији «садиг вә ағыллы нөкәрбашы» васитәсилә хидмәтчиләринә «јемәк пајларыны» верир (Лука 12:42). Ҝөрүн бизим истәр чап форматда, истәрсә дә онлајн шәкилдә нә гәдәр материалларымыз, нә гәдәр видеоларымыз вә аудио нәшрләримиз вар!

18. Јеһованын сөзү иманынызы вә ҹәсарәтинизи неҹә артырыр?

¹⁸ Ҝәлин Јеһованын Иса Мәсиһә дедији сөзләри һеч вахт јаддан чыхармајаг! Јеһованын Мүгәддәс Китабда јазылмыш сөзләри бизи әмин едир ки, һәр шеј Онун нәзарәти алтындадыр вә О, Шејтанын вә дүнјасынын вурдуғу бүтүн зәрәри арадан галдыраҹаг. Ҝәлин Јеһованын сәсинә диггәтлә гулаг асмаға әзмли олаг! О заман һәм индики, һәм дә гаршыда үзләшәҹәјимиз истәнилән чәтинликдән башыуҹа чыхаҹағыг. Мүгәддәс Китабда дејилир: «Сиз ҝәрәк дөзүмлү оласыныз ки, Аллаһын ирадәсини јеринә јетириб Онун вәд етдији шеји аласыныз» (Ибр. 10:36).