Инсанын хасијјәтинә нә гәдәр јахшы бәләд олсаг, ону бир о гәдәр јахшы таныјарыг, беләҹә, достлуғумуз мөһкәмләнәр. Буна бәнзәр тәрздә, Јеһованын хүсусијјәтләри илә таныш олдугҹа Онун неҹә Аллаһ олдуғуну биләҹәјик, беләҹә, достлуғумуз мөһкәмләнәҹәк. Аллаһын ҝөзәл кејфијјәтләри чохдур. Лакин онлардан дөрдү: гүдрәти, һикмәти, әдаләти вә мәһәббәти өзүнү даһа габарыг бүрузә верир.

«Ја Күлли-Ихтијар Јеһова, Сән бөјүк гүдрәтинлә, гүввәтли голунла јери-ҝөјү јаратмысан» (ӘРӘМЈА 32:17).

Аллаһын гүдрәти Онун јаратдыгларындан ајдын ҝөрүнүр. Мәсәлән, ҝүнәшли бир јај ҝүнүндә адам ачыг һавада оланда дәрисиндә ҝүнәшин һәрарәтини һисс едир. Ҝүнәш Јеһованын јарадыҹы гүввәсинин бәһрәсидир. Бәс Ҝүнәш барәдә нә билирик? Дејиләнә ҝөрә, Ҝүнәшин нүвәсиндә температур тәхминән 15 000 000 дәрәҹә селсидир. Ҝүнәшдән һәр санијәдә ајрылан енержи јүз милјонларла атом бомбасынын партлајышы заманы ајрылан енержијә бәрабәрдир.

Бунунла белә, Ҝүнәш каинатдакы трилјонларла улдузларла мүгајисәдә кичик улдуздур. Алимләрин һесабламаларына ҝөрә, ән нәһәнҝ улдузлардан бири олан UY Scuti (ВИЈУ Скути) улдузунун диаметри Ҝүнәшдән тәхминән 1700 дәфә бөјүкдүр. UY Scuti улдузуну Ҝүнәшин јеринә гојсаг, о, Ҝүнәш системиндәки дөрд планет, Меркури, Венера, Јер, Марс планети дахил олмагла, Јупитерин орбитинә кими олан  әразини әһатә едәр. Јәгин ки, бу мәлумат бизә Јеһова Аллаһын ҝөјү вә јери, башга сөзлә, каинаты бөјүк гүдрәтилә јаратдығыны даһа дәриндән баша дүшмәјә көмәк етди.

Аллаһын гүдрәтинин бизә фајдасы. Бизим һәјатымыз Аллаһын јаратдыгларындан, мәсәлән, Ҝүнәшдән вә јер үзүндәки мөһтәшәм тәбии ресурслардан асылыдыр. Бундан башга, Аллаһ Өз гүдрәтиндән ајры-ајрылыгда һәр бир инсанын рифаһы үчүн истифадә едир. Мәсәлән, биринҹи әсрдә Аллаһ Иса пејғәмбәрә мөҹүзәләр ҝөстәрмәк гүдрәти вермишди. Инҹилдә јазылыб: «Корларын ҝөзләри ачылыр, топаллар ҝәзир, ҹүзамлылар тәмизләнир, карлар ешидир, өлүләр дирилир» (Мәтта 11:5). Бәс бу ҝүн Аллаһ гүдрәтиндән неҹә истифадә едир? Мүгәддәс Китабда јазылыб ки, Јеһова «јорғунлара ҝүҹ, тагәтсизләрә гүввәт верир». Һәмчинин дејилир ки, «Јеһоваја бел бағлајанларын ҝүҹү тәзәләнәр» (Әшија 40:29, 31). Аллаһ бизә һәр бир чәтинлијә, әзијјәтә дөзмәк, онларын өһдәсиндән ҝәлмәк үчүн инсан ҝүҹүндән үстүн олан ҝүҹ верә биләр (2 Коринфлиләрә 4:7). Өз интәһасыз гүдрәтилә бизә чәтинликләр вахты көмәк едән Аллаһа јахынлашмаг истәмәздиниз?

«Еј Јеһова, ҝөрдүјүн ишләр неҹә дә чохдур! Һәр бирини һикмәтлә ҝөрмүсән» (ЗӘБУР 104:24).

Аллаһын ҝөрдүјү ишләр барәдә өјрәндикҹә Онун һикмәтинә валеһ олуруг. Биомиметика адлы елмдә алимләр Јеһованын јаратдығы аләми тәдгиг едир вә өз ихтираларыны мүкәммәлләшдирмәк үчүн тәбиәтдәки идејалардан јарарланырлар. Буна камера линзаларыны, јахуд тәјјарәнин гурулушуну мисал ҝәтирмәк олар.

Аллаһын һикмәтинә ән мөһтәшәм нүмунә инсан бәдәнидир. Мәсәлән, ҝөтүрәк көрпәнин ана бәтниндәки инкишафыны. Һәр шеј бир мајаланмыш һүҹејрәдән башлајыр. Лазым олан бүтүн ҝенетик мәлумат бу һүҹејрәдә јерләшир. Һәмин һүҹејрә бир-биринә бәнзәјән чохлу һүҹејрәләрә бөлүнүр. Амма дүз вахтында һүҹејрәләр фәргләнмәјә башлајыр, јүзләрлә фәргли һүҹејрәләр, ган, синир вә сүмүк һүҹејрәләри әмәлә ҝәлир. Чох кечмәмиш органлар јараныр вә фәалијјәт ҝөстәрмәјә башлајыр. Ҹәми доггуз аја һәмин илк һүҹејрә милјардларла һүҹејрәдән ибарәт көрпәјә чеврилир. Бу мөҹүзәдәки һикмәт чохларыны мәзмурда дејилән сөзләрлә разылашмаға тәшвиг едир: «Шүкүр Сәнә! Нә һејрәтли, нә еҹазкар јарадылмышам!» (Зәбур 139:14).

Аллаһын һикмәтинин бизә фајдасы. Јарадан билир ки, хошбәхт олмаг үчүн бизә нә лазымдыр. О Өзүнүн дәрин билик вә анлајышындан гајнагланараг бизә Мүгәддәс Китабда һикмәтли мәсләһәтләр вериб. Мәсәлән, орада дејилир: «Бир-биринизи үрәкдән бағышламалысыныз» (Колослулара 3:13). Һәгигәтән дә, мүдрик мәсләһәтдир. Тәдгигатлар ҝөстәрмишдир ки, бағышламаг инсанын јухусуну јахшылашдырыр, ган тәзјигини ашағы салыр. Депрессија вә диҝәр хәстәликләрә тутулма рискини азалдыр. Аллаһ һикмәтли, гајғыкеш дост кими һәмишә бизә лазым олан мәсләһәти верир (2 Тимутијә 3:16, 17). Истәмәздиниз, сизин белә Достунуз олсун?

Јеһова әдаләти севир (ЗӘБУР 37:28).

Аллаһ һәмишә әдаләтлә давраныр. «Аллаһ гәтијјән пислик етмәз, Гүдрәт Саһиби һагсызлыг етмәз!» (Әјјуб 34:10). Онун һөкмләри һагдыр. Зәбур китабында Јеһова барәдә дејилир: «Сән үммәтләри әдаләтлә мүһакимә едәҹәксән» (Зәбур 67:4). Јеһова үрәји ҝөрдүјү үчүн һеч вахт ријакарлыға алданмыр. О, һәмишә һәгигәти ҝөрүр вә дүзҝүн һөкм чыхарыр (1 Ишмуил 16:7). Бундан башга, Аллаһ јер үзүндәки һәр әдаләтсизликдән, һагсызлыгдан аҝаһдыр. О вәд едир ки, тезликлә «писләрин... көкү јер үзүндән кәсиләҹәк» (Мәсәлләр 2:22).

Лакин Аллаһ ҝүнаһкары ҹәзаландырмаг истәјилә алышыб-јанан амансыз һаким дејил. Бағышламаға әсас оланда О мәрһәмәт ҝөстәрир. Мүгәддәс Китабда дејилир: «Јеһова мәрһәмәт, шәфгәт саһибидир». О, һәтта сәмими-гәлбдән төвбә едән пис инсана да мәрһәмәт ҝөстәрир. Мәҝәр әсл әдаләт бу дејил? (Зәбур 103:8; 2 Бутрус 3:9).

Аллаһын әдаләтинин бизә фајдасы. Инҹилдә јазылыб: «Аллаһ ајры-сечкилик етмәјән Аллаһдыр, һәр халгын ичиндә Ондан горхан вә дүзҝүн иш ҝөрән адамдан разыдыр» (Һәвариләрин ишләри 10:34, 35). Биз Аллаһын әдаләтиндән һәмишә фајда әлдә едирик, чүнки О, һеч вахт тәрәфкешлик етмир. Биз миллијјәтимиздән, дәримизин рәнҝиндән, тәһсилимиздән вә мадди вәзијјәтимиздән асылы олмајараг, Аллаһы разы салыб Она ибадәт едә биләрик.

Аллаһ истәјир ки, биз Онун әдаләтини дәрк едәк вә бундан фајдаланаг. Буна ҝөрә дә бизә виҹдан бәхш едиб. Мүгәддәс Китаба әсасән, виҹдан үрәјимиздә јазылан ганундур вә давранышымызын дүзҝүн, јахуд сәһв олдуғуна шаһидлик едир (Ромалылара 2:15). Виҹданын бизә хејри нәдир? Дүзҝүн тәрбијә олунмуш виҹдан бизи писликдән, әдаләтсизликдән чәкиндирир. Сәһв едәндә исә пешман олуб һәрәкәтимизи дүзәлтмәјә тәшвиг едир. Доғрудан да, Аллаһын әдаләтини дәрк етмәк бизә көмәк едир вә бизи Она јахынлашдырыр.

«Аллаһ мәһәббәтдир» (1 ЈӘҺЈА 4:8).

Аллаһын етдији һәр ишдә Онун гүдрәти, һикмәт вә әдаләти өзүнү ајдын бүрузә верир, анҹаг Мүгәддәс Китабда дејилмир ки, Аллаһ гүдрәт, һикмәт вә ја әдаләтдир. Орада дејилир ки, Аллаһ мәһәббәтдир. Нә үчүн белә дејилир? Аллаһ ҝөрдүјү ишләри гүдрәти сајәсиндә едир, әдаләт вә һикмәти исә Онун һәрәкәтләрини јөнләндирир. Амма Јеһованы һәрәкәтә кечмәјә мәһәббәт тәшвиг едир. О етдији һәр иши мәһәббәтдән ирәли ҝәләрәк едир.

Јеһованын һеч нәјә еһтијаҹы јохдур. Буна бахмајараг, О, мәһәббәтдән ирәли ҝәләрәк, һәм ҝөјдә, һәм дә јердә шүурлу варлыглар јаратды. Бу варлыглар Онун мәһәббәт вә гајғысыны дујуб ондан фајдалана биләрләр. Јеһова Јер күрәсини әсрарәнҝиз сурәтдә һазырлајыб бәшәр өвладына ев кими вериб. О, «ҝүнәшә әмр едир ки, писләрин дә, јахшыларын да үзәринә доғсун. Јағыша әмр едир ки, салеһләрин дә, гејри-салеһләрин дә үзәринә јағсын» вә беләҹә, бүтүн инсанлара мәһәббәт ҝөстәрмәјә давам едир (Мәтта 5:45).

Бундан башга, «Јеһова чох меһрибан вә мәрһәмәтлидир» (Јагуб 5:11). Јеһова Ону танымаг вә Она јахынлашмаг үчүн сәмими-гәлбдән сәј ҝөстәрән инсанлардан разы галыр. О, белә инсанларын һәр биринә дәјәр верир. Бәли, О, һәр кәсин гајғысыны чәкир (1 Бутрус 5:7).

Аллаһын мәһәббәтинин бизә фајдасы. Ҝүнәшин батмасы, көрпәнин ҝүлүшү, аилә үзвүнүн севҝиси... Бүтүн бунлар бизә зөвг верир. Бәлкә дә, бунлар һәјати ваҹиб шејләр дејил, амма һәјатымыза сонсуз мәна гатыр.

Аллаһын мәһәббәти бизә бир немәт дә бәхш едир. Бу, дуа әнамыдыр. Аллаһ Мүгәддәс Китаб васитәсилә бизи тәшвиг едир: «Һеч нәјә ҝөрә нараһат олмајын. Һәр мәсәлә барәдә диләјинизи дуа вә јалварышла, шүкр едә-едә Аллаһа билдирин». Өвладыны севән Ата кими, О истәјир ки, биз һәтта һеч кәсә дејә билмәдијимиз нараһатчылыгларымызы да Она сөјләјиб, Ондан көмәк истәјәк. Бизи саф мәһәббәтлә севән Јеһова вәд едир ки, бизә «һәр бир ағылдан үстүн олан сүлһүнү» верәҹәк (Филиппилиләрә 4:6, 7).

Аллаһын гүдрәт, һикмәт, әдаләт вә мәһәббәт кими әсас хүсусијјәтләрини гысаҹа арашдырдыг. Бу сиздә Јеһованын неҹә ҝөзәл Аллаһ олдуғу һагда тәсәввүр јаратды? Инди исә ҝәлин инсанларын рифаһы наминә Аллаһын етдији вә ҝәләҹәкдә едәҹәји ишләр барәдә данышаг. Бунун сајәсиндә Аллаһы бир аз да јахындан таныјаҹагсыныз.