Дара дүшәндә, шүбһәсиз ки, јахын достунуздан көмәк умурсунуз. Чәтинлијә дүшәндә дә инсанлар Аллаһдан көмәк истәјирләр. Анҹаг онлара елә ҝәлир ки, Аллаһ онлара көмәк етмир, буна ҝөрә дә Аллаһы өзләринә дост санмырлар. Әслиндә исә Аллаһ бизим рифаһымыз үчүн артыг чох шеј едиб. Амма О бунунла кифајәтләнмир. Аллаһ бу ҝүн үзләшдијимиз бүтүн чәтинликләри вә әзаб-әзијјәти арадан галдыраҹаг. Неҹә?

Аллаһ шәрин мәнбәјини арадан галдырараг јер үзүндәки писликләрә сон гојаҹаг. Мүгәддәс Китабда шәрин кимдән гајнагландығы ачыг-ајдын јазылыб. Орада дејилир ки, бүтүн дүнја Шәририн әлиндәдир (1 Јәһја 5:19). Бу Шәрир Исанын «дүнјанын һөкмдары» адландырдығы Шејтан Иблисдир (Јәһја 12:31). Дүнјада белә аҹынаҹаглы вәзијјәтин һөкм сүрмәсинин әсл сәбәбкары Шејтандыр. Бәс Аллаһ нә едәҹәк?

Јеһова Аллаһ тезликлә Иса Мәсиһ васитәсилә «Иблиси, өлүм силаһларынын саһибини» мәһв едәҹәк (Ибраниләрә 2:14; 1 Јәһја 3:8). Мүгәддәс Китабда дејилир ки, Иблис өзү дә вахтынын аз олдуғуну, тезликлә мәһв едиләҹәјини билир (Вәһј 12:12). Аллаһ һәм дә бүтүн писликләри вә онлары төрәдән инсанларын көкүнү кәсәҹәк (Зәбур 37:9; Мәсәлләр 2:22).

Јер үзүндән пислијин көкүнү кәсәндән сонра Јараданымыз бәшәријјәтлә вә Јер күрәси илә бағлы әзәли нијјәтини һәјата кечирәҹәк. Ҝәлин ҝөрәк нә олаҹаг.

Әбәди сүлһ вә әмин-аманлыг. «Һәлимләр јер үзүнә саһиб олаҹаг, әмин-аманлығын боллуғундан һәзз алаҹаглар» (Зәбур 37:11).

Сағлам гида боллуғу. «Јердә чөрәк бол олаҹаг, дағ башында зәмиләр ашыб-дашаҹаг» (Зәбур 72:16).

Раһат ев-ешик вә инсанларын үрәјинҹә олан иш. «Онлар евләр тикиб ичиндә јашајаҹаг, үзүм бағлары салыб барыны јејәҹәк... Сечилмишләрим әлләринин зәһмәтиндән дојунҹа зөвг алаҹаг» (Әшија 65:21, 22).

Бу ҹүр һәјаты ҝөрмәк истәјәрдиниз? Тезликлә һәр кәсин белә ҝөзәл ҝүзәраны олаҹаг.

Бу ҝүн һамы хәстәләнир, һамы өлүмә мүбтәладыр. Амма даһа белә олмајаҹаг. Аллаһ тезликлә Иса әлејһиссәламын фидјә гурбанлығынын сајәсиндә мүмкүн олан немәтләри ҝерчәклијә чевирәҹәк ки, «она иман едәнләр мәһв олмасын, онларын әбәди һәјаты олсун» (Јәһја 3:16). Бәс фидјә сајәсиндә һансы немәтләр ҝерчәкләшәҹәк?

Хәстәликләрин көкү кәсиләҹәк. «Һеч бир сакин “хәстәјәм” демәјәҹәк. Орада јашајанларын ҝүнаһы бағышланаҹаг» (Әшија 33:24).

Бәшәријјәт өлүм ләнәтиндән азад олаҹаг. «Өлүмү әбәдилик мәһв едәҹәк, Күлли-Ихтијар Јеһова бүтүн үзләрдән ҝөз јашларыны силәҹәк» (Әшија 25:8).

Инсанлар әбәди јашајаҹаг. «Аллаһын вердији әнам исә Ағамыз Мәсиһ Иса сајәсиндә әбәди һәјатдыр» (Ромалылара 6:23).

Өлүләр һәјата гајыдаҹаг. «Аллаһын һәм салеһләри, һәм дә гејри-салеһләри дирилдәҹәјинә үмид едирәм» (Һәвариләрин ишләри 24:15). Өлән инсанлар Аллаһын вердији фидјә әнамы сајәсиндә һәјата гајыдаҹаглар.

Бәс Аллаһ бүтүн бунлары неҹә һәјата кечирәҹәк?

Аллаһ бәшәријјәтлә вә Јер күрәсилә бағлы нијјәтини сәмави һөкумәт васитәсилә һәјата кечирәҹәк. О, Иса Мәсиһи бу һөкумәтин падшаһы тәјин едиб (Зәбур 110:1, 2). Иса әлејһиссәлам өз давамчыларына мәһз бу Падшаһлыг, јахуд һөкумәт һагда дуа етмәји өјрәтмишди: «Ҝөјләрдә олан Атамыз... Гој Падшаһлығын ҝәлсин (Мәтта 6:9, 10).

Аллаһын Падшаһлығы бүтүн Јер күрәсини идарә едәҹәк. Бу һөкумәт бүтүн дүнјадан әзаб-әзијјәтин көкүнү кәсәҹәк. Бу, ән јахшы һөкумәтдир. Буна ҝөрә дә Иса јер үзүндә хидмәт едәндә бүтүн ҝүҹүнү Падшаһлыг һаггындакы мүждәни јајмаға һәср етмишди вә шаҝирдләринә дә ејни шеји тапшырмышды (Мәтта 4:23; 24:14).

Инсанлара дујдуғу бөјүк мәһәббәтдән ирәли ҝәләрәк Јеһова Аллаһ бәшәријјәтә бүтүн бу ҝөзәл немәтләри вәд едиб. Мәҝәр бу сизи Аллаһы даһа јахындан танымаға, Она јахынлашмаға тәшвиг етмир? Нөвбәти мәгаләдә ҝөрәҹәксиниз ки, Аллаһа јахынлашмағын инсана һансы фајдасы вар.