Ағанын шам јемәји тәсис олунанда 70 шаҝирдин орада олмамасы о демәк дејил ки, Иса бу шаҝирдләриндән наразы иди, јахуд онлар ону тәрк етмишдиләр. Иса садәҹә һәмин мәрасимдә һәвариләри илә олмаг истәјирди.

Иса һәм 12 һәварисиндән, һәм дә 70 шаҝирдиндән разы иди. Буну нәјә әсасән дејә биләрик? Билдијимиз кими, Исанын чохлу шаҝирди вар иди. Иса онларын арасындан әввәлҹә 12 киши сечиб онлары һәвари адландырды (Лука 6:12—16). О, Ҹәлиләдә оланда бу «он ики һәварисини јанына чағырыб» онлары «Аллаһын Падшаһлығыны тәблиғ етмәјә вә хәстәләри сағалтмаға ҝөндәрди» (Лука 9:1—6). Сонра исә Јәһудијјәдә оланда «јетмиш шаҝирд тәјин едиб онлары ики-ики ҝөндәрди» (Лука 9:51; 10:1). Нәтиҹәдә, Исанын мүхтәлиф әразиләрдә онун һагда тәблиғ едән шаҝирдләри олду.

Өлүмүндән гыса мүддәт әввәл Иса вә һәвариләри Јерусәлимә ҝетди. Амма Исанын Јәһудијјәдән, Ҹәлиләдән вә Перејадан олан бүтүн шаҝирдләрини јығыб бөјүк бир Пасха бајрамы кечирмәк фикри јох иди. Онун шаҝирди олан бу јәһудиләр Пасханы һәр бир һалда кечирәҹәкдиләр вә јәгин, буну аиләләри илә бирҝә едәҹәкдиләр (Чых. 12:6—11, 17—20). Бу дәфә Иса Пасханы јалныз һәвариләри илә кечирмәк истәјирди. О, һәвариләринә демишди: «Мән чох арзулајырдым ки, әзаб чәкмәздән әввәл бу Пасха јемәјини сизинлә јејим» (Лука 22:15).

Бу, сәбәбсиз јерә дејилди. Иса билирди ки, «бәшәријјәтин ҝүнаһыны јујан Аллаһын Гузусу» кими тезликлә өлдүрүләҹәк (Јәһ. 1:29). Бу, Јерусәлимдә, узун илләр әрзиндә Аллаһа гурбанларын ҝәтирилдији шәһәрдә баш верәҹәкди. Исанын фидјә гурбанлығы Пасха гузусундан даһа бөјүк дәјәрә малик олаҹагды. Пасха гузусу исраиллиләрә Јеһованын онлары Мисирдән неҹә азад етдијини хатырладырды. Мәсиһ исә өлүмү илә бүтүн бәшәри ҝүнаһ вә өлүмдән азад едәҹәкди (1 Кор. 5:7, 8). Исанын бу гурбанлығы сајәсиндә 12 һәвари мәсиһи јығынҹағынын бүнөврәсини тәшкил едәҹәкди (Ефес. 2:20—22). Мараглыдыр ки, мүгәддәс шәһәр олан Јерусәлимин «бүнөврәсиндә 12 даш вар иди» вә «дашларын үстүндә Гузунун 12 һәварисинин ады јазылмышды» (Вәһј 21:10—14). Бәли, бу садиг һәвариләр Аллаһын нијјәтинин јеринә јетмәсиндә бөјүк рол ојнајаҹагдылар. Инди баша дүшмәк олар нәјә ҝөрә Иса сонунҹу Пасханы вә ардынҹа Ағанын шам јемәји мәрасимини һәвариләри илә бирҝә гејд етмәк истәјирди.

Дүздүр, бу 70 шаҝирд вә диҝәр шаҝирдләр һәмин ахшам Иса илә бирҝә шам јемәјиндә дејилдиләр. Бунунла белә, садиг галмыш бүтүн шаҝирдләр Исанын тәсис етдији Ағанын шам јемәјиндән фајдаланаҹагдылар. Диҝәр мәсиһиләр дә мәсһ олундугҹа Исанын һәмин ҝеҹә шаҝирдләринә бәһс етдији Падшаһлыг әһдинә дахил олаҹагдылар (Лука 22:29, 30).