1—3. Тамвахтлы хидмәтчиләрин тәјинатлары һансы сәбәбләрә ҝөрә дәјишә биләр?

«ХҮСУСИ тәјинатлы мүждәчи кими 21 ил ҝөзәл хидмәт етмишик. Һәр икимизин валидејнләри гоҹалыб тагәтдән дүшдүјү үчүн тәјинатымызы дајандырмалы олдуг. Әлбәттә, онларын гајғысына галмаг хош иди, лакин бизә доғма олмуш бу әразини тәрк етмәк чох чәтин иди», — дејә Роберт вә Мери Ҹоу хатырлајыр.

² «Сәһһәтимиздән долајы јенидән тәјинатымыза гајыда билмәјәҹәјимизи өјрәнәндә бизи ағламаг тутду. Башга әразидә Јеһоваја хидмәт етмәк арзумуз јарымчыг галды», — дејә Вилјам вә Тери гејд едир.

³ «Тәгибчиләрин хидмәт етдијимиз филиалы бағламаг истәдијини билирдик. Лакин бу, баш верәндә дәһшәтә ҝәлдик. Бејтели тәрк етмәли олдуг», — дејә Алексеј бөлүшүр.

4. Мәгаләдә һансы суаллары арашдыраҹағыг?

⁴ Бу сијаһыја тәјинаты дәјишмиш минләрлә бејтеллини вә диҝәрләрини әлавә етмәк олар *. Бу садиг баҹы-гардашлар үчүн чох севдикләри тәјинатдан ајрылмаг чәтин ҝәлә биләр. Бәс бу чәтинлијин өһдәсиндән ҝәлмәкдә онлара нә көмәк едәр? Сиз онлара неҹә дајаг ола биләрсиниз? Бу суалларын ҹаваблары һәр биримизә һәјатда үзләшдијимиз дәјишикликләрә ујғунлашмагда көмәк едәҹәк.

5. Тәјинатын дәјишмәси инсана неҹә тәсир едә биләр?

⁵ Бејтелдә, јахуд тамвахтлы хидмәтин башга нөвүндә олмағымыздан асылы олмајараг, хидмәт етдијимиз әразијә вә орадакы инсанлара бағланырыг. Буна ҝөрә дә тәјинатымызы дајандырмалы оланда чох пис олуруг. Ҝеридә гојдуғумуз баҹы-гардашлар үчүн дарыхырыг, онлара ҝөрә нараһат олуруг, хүсусилә дә ораны тәгибләр үзүндән тәрк етмәли олмушугса (Мәт. 10:23; 2 Кор. 11:28, 29). Бундан әлавә, јени тәјинат аланда, һәтта доғма јурдумуза ҝери гајыданда чох вахт оранын мәдәнијјәтинә ујғунлашмаг лазым ҝәлир. Роберт вә Мери Ҹоу дејир: «Аид олдуғумуз мәдәнијјәти вә ана дилимиздә тәблиғ етмәји јадырғамышдыг. Өз вәтәнимиздә өзүмүзү әҹнәби кими һисс едирдик». Тәјинаты дәјишәнләрин бәзиләри гәфилдән мадди чәтинликләрлә үзләшир. Ола билсин, онлар өзүнәинамсызлыг, мәјуслуг һиссинә гапылсынлар. Бәс онлара нә көмәк едә биләр?

6. Јеһоваја бағлы галмаг үчүн нә едә биләрик?

⁶ Јеһоваја бағлы галын (Јаг. 4:8). Буну неҹә етмәк олар? «Дуалары ешидән» Аллаһымыза етибар етмәклә (Зәб. 65:2). Зәбур 62-ҹи фәсил 8-ҹи ајәдә дејилир: «Үрәјинизи Она ачын». Јеһова «хаһиш етдијимиз, дүшүндүјүмүз һәр бир шејдән гат-гат артығыны» етмәјә гадирдир (Ефес. 3:20). О, тәкҹә дуада хаһиш етдијимиз шејләрә ҹаваб вермир. Јеһова проблемимизи ҝөзләмәдијимиз, һәтта һеч вахт ағлымыза ҝәлмәјәҹәк тәрздә һәлл едә биләр.

7. а) Јеһоваја бағлы галмаға бизә нә көмәк едәҹәк? б) Ибраниләрә 6:10—12 ајәләринә әсасән, Јеһоваја сәдагәтлә хидмәт етмәјә давам етмәјин нәтиҹәси нә олаҹаг?

⁷ Јеһоваја бағлы галмаг үчүн Мүгәддәс Китабы һәр ҝүн охујуб үзәриндә дәриндән дүшүнүн. Вахтилә хүсуси тәјинатлы мүждәчи олмуш бир гардаш дејир: «Әввәлки тәјинатынызда етдијиниз кими, мүнтәзәм аиләви ибадәт кечирмәјә вә јығынҹаглара һазырлашмаға давам един». Бундан башга, јени јығынҹағынызла бирҝә тәблиғдә иштирак етмәк үчүн әлиниздән ҝәләни един. Јеһова Она сәдагәтлә хидмәт етмәјә давам едәнләри унутмур, һәтта онлар әввәлки кими хидмәт едә билмәсәләр дә. (Ибраниләрә 6:10—12 ајәләрини охујун.)

8. 1 Јәһја 2:15—17 ајәләри садә һәјат сүрмәјә неҹә көмәк едир?

 ⁸ Садә һәјат сүрмәјә давам един. Шејтан дүнјасындакы чәтинликләрин руһани фәалијјәтинизи боғмасына јол вермәјин (Мәт. 13:22). Тәһлүкәсиз вә ҝөзәл һәјатын чохлу пулда олдуғуну ашылајан Шејтан дүнјасынын, дост-танышын, јахуд гоһумларын тәзјигинә гаршы дурун. (1 Јәһја 2:15—17 ајәләрини охујун.) Јеһоваја етибар един, О, сөз вериб ки, «дара дүшәндә» руһани, емосионал вә мадди еһтијаҹларынызы өдәмәјә көмәк едәҹәк (Ибр. 4:16; 13:5, 6).

9. Мәсәлләр 22:3, 7 ајәләринә әсасән, нә үчүн ҝәрәксиз јерә борҹа ҝирмәмәлијик вә һикмәтли гәрарлар вермәкдә бизә нә көмәк едә биләр?

⁹ Ҝәрәксиз јерә борҹа ҝирмәјин. (Мәсәлләр 22:3, 7 ајәләрини охујун.) Башга јерә көчмәк баһа баша ҝәлә биләр вә асанлыгла борҹа ҝирә биләрсиниз. Чох да еһтијаҹыныз олмајан шејләри алмаг үчүн кредитә ҝирмәсәниз, борҹунуз аз олар. Ҝәрҝин вәзијјәтләрдә, мәсәлән, аилә үзвүмүз хәстәләнәндә нә гәдәр борҹ ҝөтүрмәклә бағлы гәрар вермәк чәтин олур. Бу кими һалларда унутмајын ки, «дуа вә јалварыш» һикмәтли гәрар вермәјинизә көмәк едә биләр. Јеһова да дуаларыныза ҹаваб олараг Өз сүлһү васитәсилә «үрәјинизи вә фикирләринизи» горујаҹаг ки, дүзҝүн гәрар верә биләсиниз (Филип. 4:6, 7; 1 Бут. 5:7).

10. Јени достлуглар гурмаг үчүн нә едә биләрик?

¹⁰ Јахшы дост әһатәниз олсун. Кечирдијиниз һиссләри вә үзләшдијиниз чәтинликләри достларынызла, хүсусилә дә сизинлә охшар вәзијјәтдә олан инсанларла бөлүшүн. Бу, өзүнүзү даһа јахшы һисс етмәјинизә көмәк едәҹәк (Ваиз 4:9, 10). Әввәлки тәјинатынызда газандығыныз достлар јенә дә достларыныз олараг галыр. Инди јени тәјинатынызда јени достлар газанмалысыныз. Унутмајын ки, дост газанмаг үчүн дост олмаг ҝәрәкдир. Јени достлуглар гурмаг үчүн нә етмәк лазымдыр? Јеһованын јолунда газандығыныз зәнҝин тәҹрүбәни бөлүшүн, гој дујдуғунуз севинҹи башгалары да ҝөрсүн. Ола билсин, јығынҹагда бәзиләри сизин тамвахтлы хидмәти нә үчүн бу гәдәр севдијинизи анламасын, лакин диҝәрләри сиздән өрнәк алмаг истәјә вә сизинлә јахшы дост ола биләр. Бунунла белә, чалышын өзүнүз, Јеһоваја хидмәтдә етдикләриниз вә мәнфи һиссләриниз барәдә һәддиндән артыг данышмајасыныз.

11. Аиләдәки хошбәхтлији неҹә горумаг олар?

¹¹ Һәјат јолдашынызын сәһһәтиндәки проблемә ҝөрә тәјинатынызы дајандырмалы олмусунузса, ону ҝүнаһландырмајын. Әҝәр сәбәб өз сәһһәтиниз олубса, јолдашынызы мәјус етдијинизи дүшүнәрәк өзүнүзү  гынамајын. Унутмајын ки, сиз «бир бәдән»синиз вә истәнилән вәзијјәтдә бир-биринизин гејдинә галаҹағыныза Јеһованын өнүндә сөз вермисиниз (Мәт. 19:5, 6). Тәјинатынызын дајанмасына сәбәб ҝөзләнилмәз һамиләлик олубса, ушағынызы әмин един ки, о, сизин үчүн тәјинатыныздан даһа дәјәрлидир. Тәјинатынызы онун уҹбатындан дајандырмалы олдуғунузу дејиб, ону ҝүнаһландырмајын. Гој өвладыныз она Аллаһдан олан «мирас» кими јанашдығынызы дујсун (Зәб. 127:3—5). Һәмчинин тәјинатыныз заманы үзләшдијиниз мараглы һадисәләри өвладыныза данышын. Бунун сајәсиндә ушағынызда сизин кими Јеһоваја тамвахтлы хидмәт етмәјә һәвәс ојана биләр.

12. а) Тамвахтлы хидмәтчиләрин тәјинатларыны давам етдирмәләринә неҹә дәстәк ола биләрик? б) Баҹы-гардашлара јени вәзијјәтләринә ујғунлашмаға неҹә көмәк едә биләрик?

¹² Тәрифәлајигдир ки, јығынҹаглар вә ајры-ајрылыгда баҹы-гардашлар тамвахтлы хидмәтдә оланлара хидмәтләрини давам етдирмәјә көмәк етмәк үчүн әлләриндән ҝәләни едир. Онлары сөзләри илә руһландырыр, мүәјјән еһтијаҹларыны гаршылајыр, мадди дәстәк олур, јахуд узагда јашајан гоһумларынын гајғысына галмаға көмәк едирләр (Гал. 6:2). Әҝәр кимләрсә тәјинатлары дајандырылдығы үчүн сизин јығынҹағыныза кечибсә, нәјисә сәһв етдикләрини, јахуд тәјинатларынын өһдәсиндән ҝәлә билмәдикләрини дүшүнмәјин *. Әксинә, онлара јығынҹағыныза ујғунлашмаға көмәк един. Онлары хош гаршылајын вә етдикләри хидмәтә ҝөрә тәрифләјин, һәтта хәстәлик уҹбатындан инди чох хидмәт едә билмәсәләр дә.  Онлары танымаға чалышын. Зәнҝин биликләриндән, тәҹрүбәләриндән вә өјрәтдикләриндән фајдаланын.

13. Тәјинаты дәјишәнләрә һансы саһәләрдә көмәк едә биләрик?

¹³ Тәјинатлары дәјишәнләрин ев тапмаг, нәглијјатдан истифадә, иш вә диҝәр мәсәләләрлә бағлы көмәјинизә еһтијаҹы ола биләр. Һәмчинин коммунал хәрҹләрин өдәнилмәси, алыш-вериш мәсәләләри илә бағлы көмәк едә биләрсиниз. Ән чох еһтијаҹ дујдуглары шеј онларын вәзијјәтинә аҹымағыныз јох, анлајыш ҝөстәрмәјиниздир. Ола билсин, өзләринин, јахуд аилә үзвләринин сәһһәтиндәки проблемә ҝөрә чәтинлик чәкирләр. Вә ја јахын биринин өлүмүнә ҝөрә кәдәрлидирләр *. Јахуд билдирмәсәләр дә, ола билсин, көһнә достларындан өтрү дарыхдыглары үчүн кәдәрлидирләр. Бу кими дәрин вә гарышыг дујғулардан азад олмалары үчүн онлара вахт лазымдыр.

14. Јерли тәблиғчиләр бир баҹыја јени тәјинатына ујғунлашмаға неҹә көмәк едибләр?

¹⁴ Дәстәјиниз вә нүмунәниз онлара јени вәзијјәтә ујғунлашмаға көмәк едәҹәк. Узун илләр башга әразидә хидмәт едән бир баҹы дејир: «Әввәлки тәјинатымда һәр ҝүн Мүгәддәс Китаб дәрси кечирдим. Амма инди хидмәт етдијим әразидә һәтта Мүгәддәс Китабы ачыб ајә охумаг, јахуд видео ҝөстәрмәк белә чәтиндир. Лакин бурадакы тәблиғчиләр мәни тәкрар сөһбәт етдикләри вә дәрс кечдикләри инсанларын јанына апарыр. Бу сәдагәтли вә чалышган баҹы-гардашларын Мүгәддәс Китаб дәрсләри кечирмәси мәнә бу әразинин мүсбәт тәрәфләрини ҝөрмәјә көмәк едир. Бурадакы инсанларла сөһбәтә башламағын јолуну өјрәндим. Бүтүн бунлар јенидән севинҹ дујмағыма көмәк етди».

15. Јени тәјинатынызда мүвәффәгијјәт газанмаг үчүн нә едә биләрсиниз?

¹⁵ Сиз јени вәзијјәтдә дә мүвәффәгијјәт газана биләрсиниз. Кечмиш тәјинатынызын  өһдәсиндән ҝәлә билмәдијинизи вә ја әввәлки гәдәр лазымлы олмадығынызы дүшүнмәјин. Јеһованын сизә мүхтәлиф саһәләрдә неҹә дајаг олдуғуну ҝөрмәјә чалышын вә тәблиғ ишини давам етдирин. Биринҹи әсрдәки садиг мәсиһиләрин нүмунәсини тәглид един. Онлар олдуглары һәр јердә «өлкәни дијар-дијар ҝәзәрәк Аллаһын сөзүнү мүждәләјирдиләр» (Һәв. 8:1, 4). Тәблиғ ишинә давам етмәјиниз ҝөзәл нәтиҹәләр верә биләр. Мәсәлән, јашадыглары өлкәдән чыхарылан өнҹүлләр онларын дилиндә хош хәбәрин тәблиғинә еһтијаҹ олан гоншу өлкәјә көчмүшдүләр. Орада бир нечә ајын ичиндә јаранмыш груплар сүрәтлә бөјүјүрдү.

16. Јени тәјинатынызда севинҹ дујмаг үчүн нә едә биләрсиниз?

¹⁶ «Јеһованын бәхш етдији севинҹ сизә галадыр» (Нәһ. 8:10). Тәјинатымыз бизим үчүн нә гәдәр әзиз олса да, севинҹи тәјинатда јох, Јеһовада тапмалыјыг. Одур ки, Јеһова илә аддымламаға давам един, һикмәт, рәһбәрлик вә дәстәк алмаг үчүн Она үз тутун. Әввәлки тәјинатынызы нәјә ҝөрә севдијиниз барәдә дүшүнүн. Ахы сиз әлиниздән ҝәлән гәдәр башгаларына көмәк етдијиниз үчүн севинҹ дујурдунуз. Јени вәзијјәтиниздә дә ҹанла-башла хидмәт един, онда Јеһованын сизә јенә севинҹ бәхш едәҹәјини ҝөрәҹәксиниз (Ваиз 7:10).

17. Индики тәјинатымызла бағлы нәји унутмамалыјыг?

¹⁷ Унутмамалыјыг ки, индики тәјинатымыз мүвәггәти, Јеһоваја хидмәтимиз исә әбәдидир. Ола билсин, јени дүнјада һәр биримизин башга бир тәјинаты олаҹаг. Јухарыда бәһс етдијимиз Алексеј тәјинатындакы дәјишиклијин ону ҝәләҹәјә һазырладығыны сөјләјир. О дејир: «Јеһова вә јени дүнја мәним үчүн һәмишә ҝерчәк олуб, амма нәдәнсә онлар мәнә бир аз узаг ҝөрүнүб. Инди Јеһова, санки дүз гаршымда дајаныб, јени дүнја исә сәјаһәтимин нөвбәти дајанаҹағыдыр» (Һәв. 2:25). Тәјинатымыз нә олур олсун, ҝәлин Јеһованын әлини бурахмајаг. О бизи һеч вахт тәрк етмәјәҹәк, әксинә, һарада олуругса олаг, Она хидмәтдә етдијимиз һәр бир шејдә севинҹ тапмаға көмәк едәҹәк (Әшј. 41:13).