1, 2. Бир шаҝирдин һадисәси һәјатда дәјишиклик етмәјин мүмкүн олдуғуну неҹә ҝөстәрир?

ЈУХАРЫ синифдә охујан Тони адлы бир шаҝирд мәктәби јарымчыг гојмаг гәрарына ҝәлир. Атасыз бөјүјән бу ҝәнҹин мәктәбдә охумаға һеч бир һәвәси јох иди вә һәфтәсонларыны кинотеатрларда, ја да достлары илә кечирирди. О, нә давакар иди, нә дә наркоман. Садәҹә олараг, һәјат онун үчүн тамамилә мәнасыз иди. Тони Аллаһын варлығына да шүбһә илә јанашырды. Бир ҝүн о, Јеһованын Шаһидләринә раст ҝәлир. Онлара өз шүбһәләри барәдә данышыр вә суаллар верир. Шаһидләр она «Һәјатын әмәлә ҝәлмәси. Беш ваҹиб суала ҹаваб» вә «Һәјат неҹә јараныб?» адлы брошүрләри верир.

² Нөвбәти дәфә Шаһидләр Тонини зијарәт едәндә ҝөрүрләр ки, онун дүшүнҹә тәрзи тамамилә дәјишиб. О, брошүрләри о гәдәр охумушду ки, икиси дә әзик-әзик олмушду. Тони демишди: «Аллаһ вар, башга ҹүр ола билмәз». Тони Мүгәддәс Китаб дәрси кечмәјә башлајыр вә нәтиҹәдә онун һәјата олан бахышы дәјишир. Әввәлләр мәктәбдә пис охудуғу һалда, мәктәбин ән јахшы охујан шаҝирдләриндән бири олур. Онун јени дини һагда мәлуматы олан мәктәб директору һејрәт ичиндә дејир: «Сәнин давранышында вә гијмәтләриндә инанылмаз дәјишиклик вар. Бу сәнин Јеһованын Шаһидләри илә әлагәндән гајнагланмыр ки?» Тони «бәли» дејиб, директора јахшы  шаһидлик верир. Мәктәби мүвәффәгијјәтлә баша вуран Тони һал-һазырда өнҹүл вә јығынҹаг хидмәтчиси кими хидмәт едир. О, Јеһова кими ҝөзәл Ата тапдығына ҝөрә чох хошбәхтдир (Зәб. 68:5).

3. Јеһова ҝәнҹләрә нә мәсләһәт ҝөрүр?

³ Тонинин һадисәси бизә бир даһа хатырладыр ки, Јеһова ҝәнҹләрлә јахындан марагланыр. Јеһова истәјир ки, ҝәнҹләр һәјатда уғур газансынлар, ән ҝөзәл һәјат јашасынлар. Буна ҝөрә дә О сизләрә нөвбәти мәсләһәти верир: «Ҹаванлыг ҝүнләриндә Улу Јараданыны хатырла» (Ваиз 12:1). Индики зәманәдә бу, о гәдәр дә асан дејил. Амма мүмкүнсүз дә дејил. Аллаһын көмәји илә сиз тәкҹә ҝәнҹлик илләриндә јох, бүтүн һәјатыныз боју мүвәффәгијјәт газана биләрсиниз. Ҝәлин буну Вәд едилмиш дијары фәтһ едән исраиллиләрин вә Ҹалута галиб ҝәлән Давудун нүмунәси әсасында арашдыраг.

4, 5. Кәнан дијарыны фәтһ етмиш исраиллиләрдән вә Ҹалуту мәғлуб едән Давуддан нә өјрәнирик? (Мәгаләнин әввәлиндәки шәкилләрә бахын.)

⁴ Исраиллиләр Вәд едилмиш дијарын астанасында оланда Јеһова онлара дөјүшә һазырлашмағы тапшырмады (Ган. 28:1, 2). Әксинә, Онун ганунларына итаәт етмәли вә Она етибар етмәли олдугларыны сөјләди (Јуш. 1:7—9). Инсан нөгтеји-нәзәри илә бу мәсләһәт ағлабатан ҝөрүнмәјә биләрди, амма бу, ән јахшы мәсләһәт иди. Јеһова халгына кәнаниләр үзәриндә гәләбә далынҹа гәләбә верди (Јуш. 24:11—13). Бәли, Јеһоваја итаәт етмәк үчүн иман ҝәрәкдир вә бу иман һәмишә мүвәффәгијјәт ҝәтирир. Бу һәгигәт вахт өтдүкҹә дәјишмир, кечмишдә олдуғу кими, бу ҝүн дә өз дәјәрини горујуб сахлајыр.

⁵ Ҝүҹлү дөјүшчү олан Ҹалутун боју 2,9 метр иди вә о, јахшы силаһланмышды (1 Ишм. 17:4—7). Амма Давудун сапанддан вә Аллаһы Јеһоваја иманындан башга һеч нәји јох иди. Чох јәгин ки, Давуд имансызларын ҝөзүндә ахмаг кими ҝөрүнүрдү. Амма онлар чох јанылырдылар! Чүнки ахмаг олан Давуд јох, Ҹалут иди (1 Ишм. 17:48—51).

6. Мәгаләдә нәји мүзакирә едәҹәјик?

⁶ Өтән мәгаләдә һәјатда даһа хошбәхт олмағымыза вә мүвәффәгијјәт газанмағымыза сәбәб олан дөрд саһәдән данышдыг. Өјрәндик ки, руһани тәләбатларымызы тәмин етмәли, Јеһованы севән инсанларла достлуг етмәли, дәјәрли мәгсәдләр гојмалы вә Јеһованын бизә вердији азадлығы гијмәтләндирмәлијик. Ҝәлин бу мөвзуну бир аз да дәриндән арашдырмаг үчүн Зәбур 16-ҹы мәзмурдакы принсипләрдән бәзиләринә нәзәр салаг.

7. а) Руһани дүшүнҹәли инсаны неҹә тәсвир едәрдиниз? б) Давудун нәсиби ким иди вә бу онда һансы һиссләри ојадырды?

⁷ Руһани дүшүнҹәли инсан Аллаһа инаныр вә һәр шејә Онун ҝөзү илә бахмаға чалышыр. Белә инсан рәһбәрлик үчүн Аллаһа үз тутур вә Она итаәт етмәјә гәрарлы олур (1 Кор. 2:12, 13). Давуд бу саһәдә ҝөзәл нүмунәдир. О, «Јеһова нәсибим, пајымдыр, пијаләмә дүшән пајдыр» дејәрәк Јеһованы тәрәннүм едирди (Зәб. 16:5). Бу паја Давудун пәнаһына сығындығы Аллаһла јахын мүнасибәти дахил иди (Зәб. 16:1). Бәс бунларын гаршылығында о, һансы һиссләри кечирирди? Давуд јазмышды: «Бүтүн варлығым шадланыр». Бәли, Јеһова илә сых мүнасибәтләри гәдәр Давуда хошбәхтлик бәхш едән икинҹи бир шеј јох иди. (Зәбур 16:9, 11 ајәләрини охујун.)

8. Һансы амилләр инсанын һәјатына һәгиги мәмнунлуг гатыр?

⁸ Һәјатыны зөвг-сәфаја, вар-дөвләтә һәср едән инсан һеч вахт Давуд кими хошбәхтлик дуја билмәз (1 Тим. 6:9, 10). Канададан олан бир гардаш дејир: «Инсана  әсл мәмнунлуг ҝәтирән бу дүнјадан әлдә етдикләри јох, һәр бир ҝөзәл пајын Саһиби Јеһоваја вердикләридир» (Јаг. 1:17). Јеһова Аллаһа иман јетишдириб Она ибадәт етмәк һәјатыныза мәна гатаҹаг вә сизә севинҹ бәхш едәҹәк. Бәс иманы неҹә артырмаг олар? Бунун үчүн мәҹази диллә десәк, Јеһова илә бирҝә вахт кечирмәлисиниз, јәни Кәламыны охумалы, јаратдыгларыны сејр етмәли, хүсусијјәтләри, сизә олан мәһәббәти үзәриндә дүшүнмәлисиниз (Ром. 1:20; 5:8).

9. Аллаһын Кәламынын сизи формалашдырмасы үчүн нә едә биләрсиниз?

⁹ Јеһованын бизә бәсләдији мәһәббәт һәрдән ата кими вердији дүзәлишләрдән дә ҝөрүнүр. Давуд бу ҹүр хејирхаһлыгла верилән мәсләһәтләри севә-севә гәбул едирди. О демишди: «Мәнә нәсиһәт верән Јеһоваја шүкүрләр олсун! Ҝеҹәләр үрәјим дә мәни ислаһ едир» (Зәб. 16:7). Бәли, Давуд Јеһованын дүшүнҹә тәрзи үзәриндә дәриндән фикирләшәрәк онлары мәнимсәјирди вә бу ҹүр дүшүнҹә тәрзинин ону формалашдырмасыны истәјирди. Әҝәр сиз дә белә етсәниз, Јеһоваја олан мәһәббәтиниз вә Она итаәт етмәк истәјиниз артаҹаг. Һәмчинин руһән јеткин мәсиһи олаҹагсыныз. Кристин адлы бир баҹы демишди: «Арашдырма апаранда вә охудугларымын үзәриндә дәриндән дүшүнәндә мәнә елә ҝәлир ки, Јеһова бунлары мәһз мәним үчүн јаздырыб».

10. Әшија 26:3 ајәсиндә гејд олундуғу кими, руһани дүшүнҹәли олмағын һансы фајдасы вар?

¹⁰ Руһани дүшүнҹә сизә дүнјаны вә онун ҝәләҹәк агибәтини Јеһованын ҝөзү илә ҝөрмәјә көмәк едир. Бәли, Јеһова сизә белә бир мүстәсна билик вә дәрракә вериб. Чүнки О истәјир ки, сиз һәјатда нәјин даһа ваҹиб олдуғуну ајырд едиб, һикмәтли гәрарлар верәсиниз вә ҝәләҹәјә әминликлә бахасыныз. (Әшија 26:3 ајәсини охујун.) Бирләшмиш Штатларда јашајан Ҹошуа адлы бир гардаш дејир ки, Јеһоваја бағлы галанда инсан нәјин ваҹиб олдуғуну, нәјин олмадығыны ајдын ҝөрә билир. Доғрудан да еләдир вә бу, инсана мәмнунлуг бәхш едир!

11. Давуд әсл достлар газанмағын сиррини нәдә ҝөрүрдү?

¹¹ Зәбур 16:3 ајәсини охујун. Давуд әсл достлар газанмағын сиррини билирди. О, Јеһованы севәнләрин әһатәсиндә олмағы зөвгү-сәфа адландырырды. Давуд достларынын «мүгәддәс бәндәләр» олдуғуну сөјләмәклә онларын тәмиз әхлаглы, дүзҝүн инсанлар олдуғуну гејд едирди. Башга бир мәзмурчу да дост сечими һагда охшар фикирләр сөјләмишди. О демишди: «Сәндән горханларла, бујругларына әмәл едәнләрлә достам» (Зәб. 119:63). Өтән мәгаләдә арашдырдығымыз кими, сиз Јеһоваја итаәт едән, Ондан горхан инсанлар арасында чохлу јахшы достлар тапа биләрсиниз вә ваҹиб дејил ки, онлар сизинлә ејни јашда олсунлар.

12. Давудла Јонатанын мөһкәм достлуғунун әсасында нә дурурду?

¹² Мәзмурчу Давудун достлары тәкҹә һәмјашыдлары дејилди. Онун «нәҹиб» адландырдығы әзиз достунун адыны хатырлајырсыныз? Бу, Јонатан иди. Онларын достлуғу Мүгәддәс Китабда гәләмә алынмыш ән ҝөзәл достлуг өрнәкләриндәндир. Билирсиниз ки, Јонатан Давуддан 30 јаш бөјүк иди? Бәс онларын арасындакы мөһкәм достлуғун әсасында нә дурурду? Һәр икиси Аллаһа иман едирди, араларында гаршылыглы һөрмәт вар иди. Аллаһын дүшмәнләринә гаршы дөјүшдә ҝөстәрдикләри шүҹаәт дә бир-бириләриндә гијмәтләндирдикләри хүсусијјәтләрдән иди (1 Ишм. 13:3; 14:13; 17:48—50; 18:1).

13. Дост әһатәнизи неҹә ҝенишләндирә биләрсиниз? Нүмунә чәкин.

¹³ Давудла Јонатан кими, биз дә Јеһованы севән вә Она иманыны ҝөстәрән инсанларын әһатәсиндә «зөвгү-сәфа» чәкә биләрик. Илләрдир Јеһоваја хидмәт едән Кера адлы баҹы дејир: «Мәним дүнјанын һәр јанында  фәргли мәдәнијјәтдән олан достларым вар». Сиз достлуг даирәнизи ҝенишләндирмәклә Аллаһын Сөзүнүн вә руһунун бирләшдириҹи ҝүҹүнә шаһид ола биләрсиниз.

14. а) Һәјатда дәјәрли мәгсәдләр гојмаг үчүн нә едә биләрсиниз? б) Бәзи ҝәнҹләр руһани мәгсәдләрлә бағлы һансы фикирдәдир?

¹⁴ Зәбур 16:8 ајәсини охујун. Давудун һәјаты Аллаһа ибадәт үзәриндә гурулмушду. Сиз дә Јеһоваја ибадәти һәјатынызда һәр шејдән үстүн тутсаныз вә гојдуғунуз мәгсәдләрдә Јеһованын истәјини нәзәрә алсаныз, һәјатдан мәмнунлуг дујаҹагсыныз. Стивен адлы бир гардаш дејир: «Гојдуғум мәгсәдләрә ҹан атмаг, онлара чатмаг вә ҝеријә бојлананда нәләрә наил олдуғуму ҝөрмәк мәнә бөјүк мәмнунлуг бәхш едир». Башга бир әразидә хидмәт едән бир алман гардаш дејир: «Истәмирәм ки, гоҹаланда ҝеријә бојланыб һәјатда һәр шеји анҹаг өзүм үчүн етдијими ҝөрүм». Үмид едирик ки, сиз дә бу ҹүр дүшүнүрсүнүз. Әҝәр еләдирсә, онда баҹарыг вә габилијјәтинизи Јеһованы шәрәфләндирмәк вә башгаларына көмәк етмәк үчүн истифадә един (Гал. 6:10). Гаршыныза руһани мәгсәдләр гојун вә онлара чатмаг үчүн Јеһовадан көмәк истәјин. Јеһова бу ҹүр дуалара мәмнунијјәтлә ҹаваб верир (1 Јәһ. 3:22; 5:14, 15).

15. Сиз гаршыныза һансы мәгсәдләри гоја биләрсиниз? (« Бәзи фајдалы мәгсәдләр» адлы чәрчивәјә бахын.)

¹⁵ Сиз һансы мәгсәдләр гоја биләрсиниз? Мәсәлән, ибадәт ҝөрүшләриндә өз сөзләринизлә шәрһ вермәји, өнҹүл олмағы, јахуд Бејтелдә хидмәт етмәји мәгсәд гоја биләрсиниз. Һәмчинин әҹнәбидилли әразидә хидмәт етмәк үчүн јени дил өјрәнмәк олар. Тамвахтлы хидмәтдә олан Барак адлы бир ҝәнҹ дејир: «Һәр ҝүн сәһәр ојананда ҝүҹүмү Јеһоваја сәрф едәҹәјими билмәк һеч бир ишин ҝәтирә билмәјәҹәји севинҹи бәхш едир».

16. Давуд Јеһованын ганун вә принсипләри һагда нә дүшүнүрдү вә нә үчүн?

¹⁶ Зәбур 16:2, 4 ајәләрини охујун. Өтән мәгаләдән ҝөрдүјүмүз кими, Аллаһын ганун вә принсипләри әсасында јашамаг бизә азадлыг бәхш едир. Онларын сајәсиндә јахшыны севмәји, писә исә нифрәт етмәји  өјрәнирик (Амс. 5:15). Мәзмурчу Давуд Јеһованы «јахшылығымын мәнбәји» адландырмышды. Јахшылыг сөзү јүксәк мәнәвијјат, ләјагәт демәкдир. Давуд јахшылыг етмәкдә Јеһоваја бәнзәмәк үчүн әлиндән ҝәләни едирди. О һәмчинин Јеһованын ҝөзүндә пис олан шејләрә нифрәт етмәји өјрәнирди. Бунлардан бири бүтпәрәстлик иди. Бүтпәрәстлик инсанын ләјагәтини алчалдыр вә Јеһованын лајиг олдуғу шәрәфи бир башгасына верир (Әшј. 2:8, 9; Вәһј 4:11).

17, 18. а) Давуд јалан ибадәтин нәтиҹәләри барәдә нә сөјләмишди? б) Бу ҝүн нәләр инсанларын «дәрд-сәрини» артырыр?

¹⁷ Мүгәддәс Китабын јазылдығы дөврдә јалан динләрдә әхлагсызлыг да ҝениш јајылмышды (Һушә 4:13, 14). Инсанлар бу ҹүр ибадәти гәбул едирдиләр, чүнки әхлагсызлыг ҝүнаһлы бәдәнин истәјини тәмин едирди. Лакин бу ҹүр ибадәт әсл хошбәхтлик ҝәтирмирди. Әксинә, Давуд пејғәмбәр демишкән, јалан аллаһлара ибадәт едәнләр дәрд-сәрләрини артырырды. Үстәлик, онлар нә гәдәр көрпәнин һәјатына баис олурдулар (Әшј. 57:5). Јеһова онларын бу гәддарлығындан икраһ едирди! (Әрм. 7:31). Һәмин дөврдә јашасајдыныз, сөзсүз ки, валидејнләринизин Јеһоваја ибадәт етдијинә ҝөрә шүкүр едәрдиниз!

¹⁸ Бу ҝүн дә јалан дин чох вахт ҹинси әхлагсызлыға, һәтта һомосексуализмә ҝөз јумур. Бу ҹүр ишләрлә мәшғул оланлар өзләрини азад инсан һесаб етсәләр дә, чох вахт Мүгәддәс Китабын јазылдығы дөврдәки агибәтлә үзләширләр (1 Кор. 6:18, 19). Өзүнүз дә ҝөрдүјүнүз кими, реаллыгда инсанлар дәрд-сәрләрини артырырлар. Одур ки, әзиз ҝәнҹләр, сәмави Атанызын сөзүнә гулаг асын. Әмин олун ки, Она итаәт етмәк сизин рифаһынызадыр. Әхлагсызлығын ҝәтирдији аҹы нәтиҹәләр һаггында јахшы-јахшы дүшүнүн. Онда ҝөрәҹәксиниз ки, һеч бир ани һәззә ҝөрә бу әзаблары чәкмәјә дәјмәз (Гал. 6:8). Јухарыда һаггында бәһс етдијимиз Ҹошуа дејир: «Саһиб олдуғумуз азадлыгдан истәдијимиз кими истифадә едә биләрик, амма ондан суи-истифадә етмәк һеч дә мәмнунлуг ҝәтирмир».

19, 20. Јеһоваја иман едиб Она итаәт едән ҝәнҹләр һансы немәтләри алаҹаглар?

¹⁹ Иса Мәсиһ давамчыларына демишди: «Әҝәр мәним сөзләримә даима әмәл етсәниз, демәли, сиз, һәгигәтән, мәним шаҝирдләримсиниз. Сиз һәгигәти дәрк едәҹәксиниз вә һәгигәт сизи азад едәҹәк» (Јәһ. 8:31, 32). Бу азадлыға јалан диндән, ҹәһаләт вә мөвһуматдан азадлыг да дахилдир. Һәлә бу һарасыдыр. Гејд етдијимиз кими, ҝәләҹәкдә «Аллаһын өвладларынын шанлы азадлығына» говушмаг үмидимиз вар (Ром. 8:21). Мәсиһин сөзләринә даима әмәл едәрәк бу азадлығы индидән дадын. Онда сиз тәкҹә өјрәнмәклә јох, һәм дә һәјат тәрзинизлә «һәгигәти дәрк едәҹәксиниз».

²⁰ Әзиз ҝәнҹләр, Јеһованын сизә бәхш етдији азадлығын гәдрини билин! Бу азадлыгдан ағылла истифадә едәрәк ҝәләҹәјиниз үчүн ҝөзәл тәмәл гојун. Бир ҝәнҹ гардаш демишди: «Инсанын ҝәнҹ јашларда азадлығындан ағылла истифадә етмәси даһа бөјүк гәрарларла үзләшдији вахт көмәјинә чатыр. Истәр бу, мүнасиб иш тапмаг, аилә гурмаг, бир мүддәт субај галмаг олсун, истәрсә дә башга шеј».

21. Әсл һәјата апаран јолда галмаға сизә нә көмәк едә биләр?

²¹ Бу дүнјада һәтта јахшы адландырдығымыз һәјат белә чох гыса вә етибарсыздыр. Сабаһ нә баш верәҹәјини һеч ким билмир (Јаг. 4:13, 14). Она ҝөрә дә бу дүнјада ән ағыллы һәрәкәт әсл һәјата — әбәди һәјата апаран јолда јеримәкдир (1 Тим. 6:19). Әлбәттә, Аллаһ һеч кәси бу јолла ҝетмәјә мәҹбур етмир. Һәр кәс өзү сечим етмәлидир. Гој Јеһова нәсибиниз, пајыныз олсун! Јеһованын сизә вердији «јахшы немәтләр»и гијмәтләндирин (Зәб. 103:5). Әмин олун ки, Јеһова сизә «әбәди сәадәт» вә ашыб-дашан севинҹ вермәјә гадирдир (Зәб. 16:11).