2 Коринфлиләрә 12:2, 3 ајәләриндә һәвари Булус «үчүнҹү ҝөјә» апарылан бир адамдан данышыр. О ким иди? Коринф јығынҹағына јаздығы мәктубда Булус Аллаһын ону һәвари сечдијини гејд едир (2 Кор. 11:5, 23). Даһа сонра о, «ҝөрүнтүләр» вә «Ағадан ҝәлән вәһјләр» барәдә данышыр. Бу контекстдә Булус башга гардашлардан сөз ачмыр. Буна ҝөрә дә мәнтиглидир ки, о, ҝөрүнтүләр вә вәһјләр алан шәхс һагда данышаркән өзүнү нәзәрдә тутурду (2 Кор. 12:1, 5).

Беләликлә, «үчүнҹү ҝөјә» вә «ҹәннәтә» апарылан шәхс Булусун өзү иди (2 Кор. 12:2—4). Булусун истифадә етдији «вәһјләр» сөзү ҝөстәрир ки, она ҝәләҹәкдә баш верәҹәк һадисәләр әјан олмушду.

Бәс о, «үчүнҹү ҝөј»ә апарыланда нә ҝөрмүшдү?

Мүгәддәс Китабда бәзән «ҝөј» дејиләркән физики ҝөјләр нәзәрдә тутулур (Јар. 11:4; 27:28; Мәт. 6:26). Бунунла белә, «ҝөј» ифадәси башга мәналарда да ишләдилиб. Бәзән бу ифадә инсан һакимијјәтинә аид едилир (Дән. 4:20—22). Бәзән исә «ҝөј» дејиләркән илаһи һакимијјәт, мәсәлән, Аллаһын Падшаһлығы нәзәрдә тутулур (Вәһј 21:1).

Булус «үчүнҹү ҝөј» дејәркән нәји нәзәрдә тутурду? Мүгәддәс Китабда нәјисә вурғуламаг, фикри ҝүҹләндирмәк үчүн бәзән һәмин шеј үч дәфә тәкрарланыр (Әшј. 6:3; Һизг. 21:27; Вәһј 4:8). Ҝөрүнүр, һәвари Булус «үчүнҹү ҝөј» демәклә ән үстүн, али идарә формасыны — Иса Мәсиһин вә онун 144 000 һакимијјәт шәрикинин идарә етдији Падшаһлығы тәсвир едирди. («Мүгәддәс Јазыларын дәрк едилмәси» енсиклопедијасында «Небо» башлығына вә «Новые небеса и новая земля» јарымбашлығына бахын.) Һәвари Бутрусун да јаздығы кими, биз Аллаһын «вәдинә ҝөрә јени бир ҝөј» ҝөзләјирик (2 Бут. 3:13).

Бәс Булусун гејд етдији «ҹәннәт» һагда нә демәк олар?

«Ҹәннәт» сөзү дә, ејнилә, мүхтәлиф шејләри билдирир: 1) Инсанын јарадылдығы илк мәканы нәзәрә алсаг, мәнтигә ујғун олараг, «ҹәннәт» ҝәләҹәкдә јер үзүндә олаҹаг һәрфи Ҹәннәтә аиддир. 2) Бу сөз һәмчинин Аллаһын халгынын јени дүнјада саһиб олаҹағы руһани мүһитә ишарә едир. 3) Үстәлик, бу сөз ҝөјдәки мүбарәк вәзијјәти, Вәһј 2:7 ајәсиндә јазылмыш «Аллаһын ҹәннәти»ни билдирә биләр. («Ҝөзәтчи гүлләси» журналынын 2015-ҹи ил 15 ијул сајынын 8-ҹи сәһифәсинин 8-ҹи абзасына бахын.)

Ола билсин, һәвари Булус 2 Коринфлиләрә 12:4 ајәсиндә ҝөрдүјү вәһји тәсвир едәркән ҹәннәт сөзүнүн һәр үч мәнасыны нәзәрдә тутурду.

Хүласә:

2 Коринфлиләрә 12:2 ајәсиндә јазылмыш «үчүнҹү ҝөј» ифадәси еһтимал ки, Иса Мәсиһин вә 144 000 шәрикинин идарә етдији Падшаһлығы, «јени ҝөјләр»и билдирир (2 Бут. 3:13).

Аллаһын Падшаһлығы ән јүксәк, али идарә формасы олдуғу үчүн о, «үчүнҹү ҝөј»дүр.

Булусун ҝөрүнтүдә апарылдығы «ҹәннәт» 1) јер үзүндә олаҹаг физики Ҹәннәти, 2) индикиндән даһа ҝениш олаҹаг руһани ҹәннәти вә 3) ҝөјдәки ҹәннәти, «Аллаһын ҹәннәти»ни билдирир. Јени дүнјада бунларын һәр үчү дә ејни вахтда мөвҹуд олаҹаг.

Беләликлә, јени дүнја јени ҝөјлә јени јерин вәһдәтидир. Башга сөзлә, бу, сәмави Падшаһлыг вә јер үзү ҹәннәтдә Јеһоваја хидмәт едәҹәк бәшәријјәтин дахил олдуғу јени гурулушдур.