1, 2. а) Бәзи инсанлар нәји гејд едир вә Азадлыг или нә иди? (« Азадлыг или нә иди?» адлы чәрчивәјә бахын.) б) Лука 4:16—19 ајәләринә әсасән, Иса Мәсиһ нә барәдә данышмышды?

БӘЗИ өлкәләрдә кралын, јахуд краличанын һакимијјәтинин 50 иллијини гејд етмәк үчүн хүсуси тәдбирләр тәшкил олунур. Тәдбирләр бәзән бир ҝүн, бир һәфтә, һәтта даһа узун чәкир. Амма әввәл-ахыр сона јетир вә онларын бәхш етдији севинҹ тезликлә унудулур.

² Гәдимдә исраиллиләр дә һәр 50 илдән бир бөјүк вә мөһтәшәм тәдбир кечирирдиләр. Бүтүн или давам едән бу тәдбир Азадлыг или адланырды. Азадлыг или исраиллиләрә азадлыг бәхш едирди. Нәјә ҝөрә бу тәдбир бизим үчүн дә хүсуси мараг кәсб едир? Чүнки Азадлыг или Јеһованын бизим үчүн ҝөрдүјү мөһтәшәм бир тәдбири хатырладыр. Бу тәдбир бизә әбәди азадлыг бәхш едәҹәк вә ондан артыг индидән јарарлана биләрик. Иса Мәсиһ бу мөһтәшәм азадлыг һагда данышмышды. (Лука 4:16—19 ајәләрини охујун.)

3. Лавилиләр 25:8—12 ајәләринә әсасән, Азадлыг илинин исраиллиләрә һансы фајдасы вар иди?

³ Иса Мәсиһин һансы азадлыгдан данышдығыны даһа јахшы анламаг үчүн ҝәлин Јеһованын гәдим Исраил халгы үчүн тәсис етдији Азадлыг илини арашдыраг. Јеһова исраиллиләрә демишди: «Әллинҹи ил мүгәддәсдир. Һәмин ил өлкәнин бүтүн сакинләринә азадлыг елан един. Бу ил сизин үчүн Азадлыг или олаҹаг. Һәр кәс өз евинә, ешијинә, аиләсинә гајыдаҹаг». (Лавилиләр 25:8—12 ајәләрини охујун.) Әввәлки мәгаләдә шәнбәнин исраиллиләрә ҝәтирдији фајда һагда өјрәндик.  Бәс Азадлыг илинин онлара һансы фајдасы вар иди? Тәсәввүр един ки, бир исраилли борҹа дүшүр вә борҹуну гајтармаг үчүн торпағыны сатмаг мәҹбуријјәтиндә галыр. Азадлыг илиндә һәмин торпаг она ҝери гајтарылырды. Буна ҝөрә дә о, «өз евинә, ешијинә» гајыда билирди вә беләҹә, өвладлары өз мирасларыны итирмирди. Бәзән дә олурду ки, исраилли борҹуну өдәмәк үчүн өвладларындан бирини ја да өзүнү гул кими сатырды. Азадлыг илиндә исә гуллар аиләләринин јанына гајытмалы иди. Одур ки, һеч кәс өмүрлүк гул олараг галмырды! Бу тәдбир Јеһованын нә гәдәр гајғыкеш олдуғуну ҝөстәрир!

4, 5. Нә үчүн гәдимдә тәсис олунан Азадлыг или бизи дә марагландырмалыдыр?

⁴ Азадлыг илинин исраиллиләрә даһа һансы фајдасы вар иди? Јеһова демишди: «Аранызда јохсуллуға дүшән олмамалыдыр, чүнки Аллаһыныз Јеһованын сизә ирс олараг верәҹәји дијарда Јеһова сизә хејир-бәрәкәт верәҹәк» (Ган. 15:4). Бу ҝүн дүнјада бунун там әкси баш верир! Чох вахт варлылар даһа да варланыр, касыблар исә даһа да јохсуллашыр.

⁵ Биз Мусанын гануну алтында дејилик. Јәни биздән Азадлыг илинә риајәт едиб гуллары азад етмәк, борҹлары бағышламаг вә инсанлары өз ев-ешикләринә гајтармаг тәләб олунмур (Ром. 7:4; 10:4; Ефес. 2:15). Бунунла белә, Азадлыг или һагда билмәк бизим үчүн дә ваҹибдир. Чүнки Азадлыг или Јеһованын бизи ҝүнаһын әсарәтиндән азад етмәк үчүн ҝөрдүјү тәдбири хатырладыр.

6. Бәшәријјәтин нәдән азад олмаға еһтијаҹы вар?

⁶ Һәр биримизин азадлыға еһтијаҹы вар, чүнки биз ән амансыз гулдарлығын — ҝүнаһын әсарәти алтындајыг. Ҝүнаһлы олдуғумуз үчүн гоҹалыр, хәстәләнир вә өлүрүк. Бунун һәгигәт олдуғуну ҝүзҝүјә баханда, јахуд мүалиҹә алмаг үчүн һәкимә үз тутанда ајдын ҝөрүрүк. Үстәлик, ҝүнаһлы олдуғумуз үчүн сәһвләрә јол веририк вә бу бизи мәјус едир. Һәвари Булус ҹисминдә јашајан «ҝүнаһ  ганунунун әсири» олдуғуну дејәрәк әлавә етмишди: «Неҹә дә јазыг адамам! Өлүмә мүбтәла олан бу ҹисимдән мәни ким хилас едәҹәк?» (Ром. 7:23, 24).

7. Әшија азадлыгла бағлы һансы пејғәмбәрлији етмишди?

⁷ Нә хош ки, Јеһова бизи ҝүнаһдан азад етмәк үчүн бир тәдбир ҝөрүб. Бу азадлыг Иса Мәсиһин сајәсиндә мүмкүндүр. Ерамыздан әввәл 8-ҹи әсрдә Әшија пејғәмбәр даһа бөјүк азадлығын олаҹағыны пејғәмбәрлик етмишди. Исраиллиләрин Азадлыг или илә мүгајисәдә бу азадлыг заманы даһа бөјүк ишләр һәјата кечәҹәк. О јазмышды: «Күлли-Ихтијар Јеһованын руһу үзәримдәдир, чүнки Јеһова мәни һәлимләрә мүждә вермәк үчүн мәсһ етди. О, мәни гәлбисыныгларын јарасыны сарымаға, әсирләрә азадлығы... хәбәр вермәјә ҝөндәрди» (Әшј. 61:1). Бу пејғәмбәрлик кимә аиддир?

8. Әшијанын азадлыг һагда пејғәмбәрлији кимә аиддир?

⁸ Азадлыға даир бу ваҹиб пејғәмбәрлик Иса Мәсиһ хидмәтә башлајандан сонра јеринә јетмәјә башлады. Иса бөјүдүјү Насирә шәһәриндә синагога ҝедиб орада јәһудиләрин гаршысында Әшијанын јаздығы һәмин сөзләри охујанда нөвбәти сөзләри өзүнә аид етмишди: «Јеһованын руһу үзәримдәдир, чүнки О, мәни јохсуллара мүждә вермәк үчүн мәсһ етди. О, мәни әсирләрә азадлығы вә корлара ишығы тәблиғ етмәк, мәзлумлара гуртулуш вермәк, Јеһованын илтифат илини тәблиғ етмәк үчүн ҝөндәрди» (Лука 4:16—19). Иса Мәсиһ бу пејғәмбәрлији неҹә јеринә јетирди?

9. Исанын јашадығы дөврдә бир чохлары һансы азадлыға говушмаг арзусунда иди?

⁹ Инсанлар Әшијанын пејғәмбәрлик етдији вә Исанын охудуғу азадлығы биринҹи әсрдән алмаға башладылар. Исанын «ешитдијиниз бу ајәләр бу ҝүн јеринә јетди» сөзләри буну тәсдиг едир (Лука 4:21). Онун охудугларыны ешидәнләр еһтимал ки, Романын әсарәтиндән азад олаҹагларыны ҝөзләјирдиләр. Ҝөрүнүр, Исанын шаҝирдләри дә ејни һиссләри кечирирди. Чүнки гыса мүддәт сонра онлардан икиси белә демишди: «Еһ, биз исә үмид едирдик ки, о, Исраили азад едәҹәк» (Лука 24:13, 21). Билирик ки, Иса давамчыларыны Романын ағыр бојундуруғуна гаршы үсјан етмәјә сәсләмирди. Әксинә, о, «падшаһа мәхсус шејләри падшаһа» вермәји бујурурду (Мәт.  22:21). Бәс һәмин вахт Иса Мәсиһ инсанлара һансы азадлығы бәхш етди?

10. Иса Мәсиһ һансы азадлыға јол ачды?

¹⁰ Аллаһын Оғлу инсанлары ики саһәдә азадлыға чыхармаг үчүн ҝәлмишди. Биринҹиси, Иса дин хадимләринин өјрәтдији сахта тәлимләрдән азад олмаг үчүн јол ачды. Һәмин дөврдә јәһудиләрин бир чоху инсан адәтләринин вә сахта инанҹларын гулу иди (Мәт. 5:31—37; 15:1—11). Халга Аллаһ һагда өјрәтдикләрини иддиа едәнләрин өзләри Аллаһа дүзҝүн ибадәт етмәдикләри үчүн бир нөв кор бәләдчи идиләр. Онлар Мәсиһи вә онун вәд етдији руһани нуру гәбул етмәмәклә гаранлыгда вә ҝүнаһын көләлијиндә галдылар (Јәһ. 9:1, 14—16, 35—41). Иса Мәсиһ һәгигәти өјрәтмәклә вә өз ҝөзәл нүмунәси илә һәлим инсанлара руһани азадлығын јолуну ҝөстәрди (Марк 1:22; 2:23—3:5).

11. Иса Мәсиһин азадлыг бәхш етдији икинҹи јол һансыдыр?

¹¹ Иса Мәсиһин азадлыг бәхш етдији икинҹи јол инсанлары ҝүнаһын көләлијиндән азад етмәси иди. Јеһова Мәсиһин фидјә гурбанлығы әсасында фидјәјә иман ҝәтирәнләрин вә она ујғун јашајанларын ҝүнаһыны бағышлајырды (Ибр. 10:12—18). Иса Мәсиһ демишди: «Әҝәр Оғул сизи азад етсә, сиз, һәгигәтән дә, азад олаҹагсыныз» (Јәһ. 8:36). Сөзсүз ки, бу, исраиллиләрин Азадлыг илиндә саһиб олдуглары азадлыгдан даһа мөһтәшәм иди! Чүнки Азадлыг илиндә азад олунан инсан јенидән гула чеврилә биләрди вә истәнилән һалда, о, әввәл-ахыр өләҹәкди.

12. Исанын бәјан етдији азадлыгдан илк бәһрәләнәнләр кимләр иди?

¹² Ерамызын 33-ҹү илинин Әллинҹи ҝүн бајрамында Јеһова һәвариләри вә диҝәр садиг киши вә гадынлары мүгәддәс руһла мәсһ етди. Онлары оғуллуға ҝөтүрдү ки, ҝәләҹәкдә ҝөјләр һәјаты үчүн дирилтсин вә онлар Иса илә һакимијјәт сүрсүнләр (Ром. 8:2, 15—17). Онлар Мәсиһин Насирәдәки синагогда бәјан етдији азадлыгдан бәһрәләнән илк инсанлар иди. Һәмин киши вә гадынлар артыг јәһуди дин хадимләринин сахта тәлимләриндән вә Аллаһын Кәламына әсасланмајан адәт-әнәнәләрдән азад олунмушдулар. Һәмчинин Аллаһ онлара өлүмә апаран ҝүнаһдан азад инсанлар кими бахырды. Ерамызын 33-ҹү илиндә Мәсиһин давамчыларынын мәсһ олунмасы илә башлајан символик Азадлыг или онун миниллик һакимијјәтинин сонунда битәҹәк. Бәс бу ҝүндән о ҝүнә гәдәр нәләр һәјата кечәҹәк?

13, 14. Иса Мәсиһин бәјан етдији азадлығы мәсһ олунмушлардан башга кимләр ала биләр?

¹³ Бу ҝүн бүтүн милләтләрдән олан милјонларла сәмими инсан «башга гојунлар»ын арасындадыр (Јәһ. 10:16). Аллаһ онлары Мәсиһлә бирҝә ҝөјдә һакимијјәт сүрмәк үчүн чағырмајыб. Мүгәддәс Китабда дејилир ки, онлар јер үзүндә әбәди јашамаг үмидинә маликдирләр. Сиз дә бу үмидә саһибсиниз?

¹⁴ Сиз артыг индидән мәсһ олунмушларын алдығы бәзи немәтләри алырсыныз. Исанын ахыдылан ганына иманыныз сајәсиндә ҝүнаһларынызын бағышланмасыны диләјә биләрсиниз. Бунун сајәсиндә Аллаһын разылығыны газанмаг вә Онун өнүндә тәмиз виҹдана саһиб олмаг мүмкүндүр (Ефес. 1:7; Вәһј 7:14, 15). Һәмчинин узун илләр әсири олдуғунуз сахта тәлимләрдән азад олмагла саһиб олдуғунуз немәтләри бир дүшүнүн. Иса Мәсиһ демишди: «Сиз һәгигәти дәрк едәҹәксиниз вә һәгигәт сизи азад едәҹәк» (Јәһ. 8:32). Бу ҹүр азадлыға саһиб олдуғумуз үчүн неҹә дә хошбәхтик!

15. Ҝәләҹәкдә һансы азадлығы вә немәтләри алаҹағыг?

¹⁵ Сизи гаршыда даһа бөјүк азадлыг ҝөзләјир. Јахын ҝәләҹәкдә Иса Мәсиһ јалан динә вә инсан һакимијјәтләринә гаршы гәти  тәдбир ҝөрүб онлары мәһв едәҹәк. Аллаһ Она хидмәт едән «бөјүк бир издиһам»ы горујаҹаг вә онлара јер үзү ҹәннәтдә ҝөзәл немәтләр бәхш едәҹәк (Вәһј 7:9, 14). Чохлу сајда инсан дириләҹәк вә Адәмин ҝүнаһынын бүтүн фәсадларындан азад олмаг имканы әлдә едәҹәк (Һәв. 24:15).

16. Бәшәријјәти һансы мөһтәшәм азадлыг ҝөзләјир?

¹⁶ Мәсиһ миниллик һакимијјәти заманы һәмварисләри илә бирҝә бәшәријјәтин мүкәммәл физики вә руһани сағламлыға јетишмәсинә көмәк едәҹәк. Бу бәрпа вә азадлыг дөврү мүәјјән мәнада исраиллиләрин Азадлыг илинә бәнзәјәҹәк. Беләҹә, јер үзүндә Јеһоваја сәдагәтлә хидмәт едән һәр кәс тамамилә камил олаҹаг вә ҝүнаһын әсарәтиндән гуртулаҹаг.

17. Әшија 65:21—23 ајәләриндә Аллаһын халгынын ҝәләҹәји илә бағлы нә јазылыб? (Үз габығындакы шәклә бахын.)

¹⁷ Јер үзүндә һәјатын неҹә олаҹағына даир пејғәмбәрлик Әшија 65:21—23 ајәләриндә тәсвир олунуб. (Ајәләри охујун.) Һәмин вахт бош-бикар отурмајаҹағыг. Мүгәддәс Китабда дејилир ки, Аллаһын халгы фајдалы, мәмнунлуг ҝәтирән ишләрлә мәшғул олаҹаг. Һәмин дөврүн сонунда исә «хилгәт чүрүклүк әсарәтиндән гуртулуб Аллаһын өвладларынын шанлы азадлығына» говушаҹаг (Ром. 8:21).

18. Бизи парлаг ҝәләҹәјин ҝөзләдијинә нә үчүн әмин ола биләрик?

¹⁸ Гәдимдә Јеһова халгы үчүн шәнбә ҝүнү тәсис етмишди ки, онлар ишдән истираһәт едиб, диггәти руһани ишләрә јөнәлтсинләр. Сөзсүз ки, Мәсиһин миниллик һакимијјәти заманы да руһани ишләрә вахт ајыраҹағыг. Аллаһа ибадәт бу ҝүн хошбәхтлијимиздә әвәзсиз рол ојнајыр, бу һәгигәт јени дүнјада да дәјишмәз олараг галаҹаг. Мәсиһин миниллик һакимијјәти заманы садиг инсанларын һамысы һәјатдан севинҹ дујаҹаг, чүнки һамымызын мәмнунедиҹи иши олаҹаг вә һамымыз Јеһоваја ибадәт едәҹәјик.