1. Јеһованын халгы арасында һансы әһвали-руһијјә вар?

 ТА ГӘДИМДӘН Мүгәддәс Китабда пејғәмбәрлик олунмушду ки, Аллаһын халгы Исанын рәһбәрлији алтында Она хидмәт етмәк үчүн «һазыр дураҹаг» (Зәб. 110:3). Бу пејғәмбәрлијин бу ҝүн јеринә јетдијинә шүбһә јохдур. Һәр ил Јеһованын чалышган хидмәтчиләри тәблиғ ишинә јүз милјонларла саат сәрф едирләр. Онлар буну көнүллү шәкилдә вә өз һесабларына едирләр. Бундан әлавә, диндашларына физики, мәнәви вә руһани ҹәһәтдән дајаг олмаг үчүн дә чох вахт ајырырлар. Мәсул гардашлар исә јығынҹагдакы бәндләринә һазырлашмаг, баҹы-гардашлара руһландырыҹы зијарәтләр етмәк үчүн сајсыз-һесабсыз саат сәрф едирләр. Онлары бүтүн бунлары етмәјә нә тәшвиг едир? Мәһәббәт. Јеһоваја вә инсанлара мәһәббәт (Мәт. 22:37—39).

2. Ромалылара 15:1—3 ајәләринә әсасән, Иса Мәсиһ һансы нүмунәни гојуб?

² Иса Мәсиһ үчүн башгаларынын рифаһы өзүнүнкүндән даһа үстүн иди. Биз чалышырыг, баҹардығымыз гәдәр онун гојдуғу нүмунәни изләјәк. (Ромалылара 15:1—3 ајәләрини охујун.) Ондан өрнәк аланлар бол немәтләр бичир. Иса Мәсиһ демишди: «Вермәк алмагдан даһа чох хошбәхтлик ҝәтирир» (Һәв. 20:35).

3. Бу мәгаләдә нә барәдә данышаҹағыг?

³ Бу мәгаләдән өјрәнәҹәјик ки, Иса Мәсиһ башгаларына гуллуг етмәк үчүн нәләри гурбан вермишди вә биз ондан  неҹә өрнәк ала биләрик. Һәмчинин өјрәнәҹәјик ки, башгаларына гуллуг етмәк истәјимизи неҹә артыра биләрик.

4. Иса өзүндән чох башгаларыны дүшүндүјүнү неҹә ҝөстәрди?

⁴ Иса һәтта јорғун олса белә, башгаларына көмәк едирди. Бир јадыныза салын, дағлыг әразидә, еһтимал ки, Кәфәрнаһумун јахынлығында бөјүк бир издиһам Исанын јанына ҝәләндә о нә етди? Һәмин ҝүнү Иса бүтүн ҝеҹәни дуа етмишди. Јәгин ки, чох јорғун иди. Амма издиһамы вә онларын арасында касыблары, хәстәләри ҝөрәндә онлара үрәји ағрыды. Иса онлара шәфа вермәклә јанашы, бәшәр тарихинин ән руһландырыҹы нитгини — Дағүстү вәзини сөјләди (Лука 6:12—20).

5. Аилә башчылары јорғун олан вахт Исанын фәдакарлығындан неҹә өрнәк алыр?

⁵ Аилә башчылары Исадан өрнәк алыр. Белә бир сәһнәни тәсәввүр един: ағыр иш ҝүнүндән сонра аилә башчысы евә гајыдыр вә чох јорғундур. Һәмин ахшам онлар аиләви ибадәт кечирмәлидирләр. Аилә башчысы ибадәти тәхирә салмаг истәсә дә, Јеһоваја јалварыр ки, она ҝүҹ версин. Јеһова онун дуасына ҹаваб верир вә о, һәр һәфтә олдуғу кими, бу һәфтә дә аиләви ибадәт кечирир. Һәмин ҝүн ушаглары ваҹиб бир дәрси өјрәнир: онларын валидејнләри үчүн руһани шејләр һәјатда һәр шејдән өнәмлидир.

6. Иса башгаларына көмәк етмәк үчүн өз вахтыны неҹә гурбан вермишди? Нүмунә чәкин.

⁶ Иса Мәсиһ инсанлардан өз вахтыны әсирҝәмирди. Тәсәввүр едирсиниз, о, Вәфтизчи Јәһјанын өлдүрүлдүјүнү ешидәндә һансы һиссләри кечирмишди? Сөзсүз ки, о, бөјүк кәдәр ичиндә иди. Мүгәддәс Китабда јазылыб: «Иса буну [Јәһјанын өлдүјүнү] ешидәндә тәкликдә галмаг үчүн гајыға миниб сакит бир јерә чәкилди» (Мәт. 14:10—13). Баша дүшмәк олар, о, нәјә ҝөрә белә етмәк истәјирди. Чохумуз белә мәгамларда тәк галмаға үстүнлүк веририк. Амма Иса буну едә билмәди. Ҹамаат һәмин сакит јерә ондан габаг ҝетмишди. Иса онлары ҝөрәндә нә етди? О, онларын һалыны дүшүндү вә онлара «јазығы ҝәлди». Иса баша дүшүрдү ки, онларын Аллаһдан тәсәлли, көмәк алмаға бөјүк еһтијаҹы вар. Буна ҝөрә дә дәрһал онлар үчүн әлиндән ҝәләни етди.  Белә ки, «Иса онлара [бир-ики шеј јох] чох шеј өјрәтмәјә башлады» (Марк 6:31—34; Лука 9:10, 11).

7, 8. Ағсаггаллар диндашларынын көмәјә еһтијаҹы олан вахт Исадан неҹә өрнәк алырлар? Нүмунә чәкин.

⁷ Ағсаггаллар Исадан өрнәк алыр. Биз ағсаггалларын биздән өтрү фәдакарлыгла етдији ишләри чох гијмәтләндиририк. Онларын ҝөрдүјү ишләрин бөјүк һиссәси ҝөз габағында дејил. Мәсәлән, тибби ҹәһәтдән рискли вәзијјәт јарананда Хәстәханаларла әлагә комитәсинин үзвләри дәрһал диндашларынын көмәјинә чатырлар. Чох вахт белә вәзијјәт ҝеҹәнин бир аләминдә баш верир. Бу ағсаггалларын вә онларын аиләләринин дара дүшән баҹы-гардашлара үрәји јаныр вә өзләриндән чох онлары дүшүнүрләр.

⁸ Ағсаггаллар һәмчинин ибадәт евләринин вә диҝәр биналарын тикинтисиндә иштирак едирләр, фәлакәтләр заманы зәрәрчәкәнләрә јардым ишинә көмәк едирләр. Һәлә ағсаггалларын өз јығынҹағымызда бизә тәлим вермәк, руһландырмаг, дајаг олмаг үчүн нә гәдәр вахт сәрф етдијини демирик. Бүтүн бу гардашлар вә онларын аиләләри ән ҝөзәл тәриф сөзләринә лајигдирләр! Гој Јеһова онлара дүзҝүн әһвали-руһијјәдә олдугларына ҝөрә јар олсун. Әлбәттә, һамы кими, ағсаггаллар да таразлы олмалыдыр. Јығынҹагла бағлы ҝөрдүкләри ишләр өз аиләләринин јетәринҹә гајғысына галмасына мане олмамалыдыр.

9. Филиппилиләрә 2:4, 5 ајәләринә әсасән, бүтүн мәсиһиләр һансы әһвали-руһијјәни јетишдирмәлидирләр?

⁹ Филиппилиләрә 2:4, 5 ајәләрини охујун. Тәкҹә ағсаггаллар јох, һәр биримиз Исадан өрнәк ҝөтүрәрәк фәдакар олмалыјыг. Мүгәддәс  Китабда дејилир ки, Иса «гул сурәтини» гәбул етди (Филип. 2:7). Ҝөрүн бу сөзләр неҹә дәрин мәна дашыјыр. Јахшы гул вә ја хидмәтчи ағасыны разы салмаг үчүн фүрсәт ахтарыр. Сиз Јеһованын гулу вә диндашларынызын хидмәтчиси олараг, шүбһәсиз ки, Јеһоваја вә диндашларыныза фајда ҝәтирмәк үчүн даһа чох иш ҝөрмәк истәјирсиниз. Нөвбәти мәсләһәтләрә әмәл етмәк сизә бу саһәдә көмәк едәҹәк.

10. Һансы суаллар үзәриндә дүшүнмәлијик?

¹⁰ Өзүнүзү тәһлил един. Нөвбәти суаллар сизә бу саһәдә көмәк едәҹәк: «Фәдакарам? Башгаларына көмәк етмәк үчүн вахтымы вә ҝүҹүмү сәрф етмәјә һазырам? Мәсәлән, јашлы гардаша баш чәкмәк вә ја јашлы баҹыны јығынҹаға ҝәтирмәк лазым ҝәләндә мән нә едирәм? Топланты әразисинин тәмизлијиндә, ибадәт евинин тәмир-бәрпасында көнүллүләрә еһтијаҹ оланда көмәк ҝөстәрмәјә һазырам?» Биз өзүмүзү Јеһоваја һәср едәндә сөз вермишдик ки, вахтымызы, ҝүҹүмүзү, вәсаитимизи Онун јолунда сәрф едәҹәјик. Бу вәдимизә ујғун давраныб, башгаларына көмәк әлини узаданда Јеһованын гәлби шад олур. Бәс әҝәр бу саһәдә инкишаф етмәјимизә еһтијаҹ варса, нә етмәлијик?

11. Дуа фәдакар олмағымыза неҹә көмәк едә биләр?

¹¹ Јеһоваја үрәкдән дуа един. Ола билсин, ҝөрүрсүнүз ки, бәзи саһәләрдә даһа фәдакар олмалысыныз, амма дәјишиклик етмәјә һәвәсиниз јохдур. Бу заман Јеһоваја үрәкдән дуа един. Дүрүст олун. Һансы һиссләри кечирдијинизи Јеһоваја дејин вә Она јалварын ки, «гәлбиниздә һәм арзу» ојатсын, һәм дә «фәалијјәт ҝөстәрмәјиниз үчүн сизә ҝүҹ» версин (Филип. 2:13).

12. Вәфтиз олунмуш ҝәнҹ гардашлар һансы саһәдә көмәк едә биләрләр?

¹² Әҝәр сиз вәфтиз олунмуш ҝәнҹ гардашсынызса, Јеһоваја дуа един ки, јығынҹагдакы баҹы-гардашлара даһа чох көмәк етмәк үчүн сизин үрәјиниздә истәк ојатсын. Елә өлкәләр вар ки, јығынҹагда ағсаггалларын сајы јығынҹаг хидмәтчиләринин сајындан чохдур, әксәр јығынҹаг хидмәтчиләри исә орта јашлы вә ја јашлы гардашлардыр. Тәшкилат бөјүдүјү үчүн Јеһованын халгына гуллуг етмәјә һазыр олан ҝәнҹ гардашлара бөјүк еһтијаҹ вар. Сизә тапшырылан истәнилән иши ҝөрмәјә һазыр олсаныз, бөјүк севинҹ дујаҹагсыныз. Нәјә ҝөрә? Чүнки бунунла Јеһованы разы салаҹагсыныз, јахшы ад газанаҹагсыныз вә башгаларына көмәк етдијиниз үчүн мәмнунлуг дујаҹагсыныз.

13, 14. Баҹы-гардашлара һансы көмәји ҝөстәрә биләрик? (Үз габығындакы шәклә бахын.)

¹³ Кимин көмәјә еһтијаҹ дујдуғуна диггәт јетирин. Һәвари Булус ибраниләрә нәсиһәт етмишди: «Јахшылыг етмәји, варынызы башгалары илә бөлүшмәји јаддан чыхартмајын, чүнки бу ҹүр гурбанлар Аллаһа хошдур» (Ибр. 13:16). Бу онларын хејринә мәсләһәт иди. Булусун мәктубуну аландан сонра чох кечмәмиш Јәһудијјәдәки мәсиһиләр ев-ешикләрини, ишләрини, иманда олмајан гоһумларыны гојуб дағлара гачмалы олдулар (Мәт. 24:16). Һәмин вахт онларын бир-биринин көмәјинә бөјүк еһтијаҹ јаранды. О кәсләр ки бундан өнҹә Булусун мәсләһәтинә әмәл едиб варларыны башгалары илә бөлүшүрдүләр, онлара јени јаранмыш чәтин вәзијјәтә ујғунлашмаг даһа асан олду.

¹⁴ Баҹы-гардашларымыз нәјә еһтијаҹ дујдугларыны һәмишә дилә ҝәтирмир. Мәсәлән, ола билсин, һансыса гардашын һәјат јолдашы вәфат едиб. Мәҝәр бу гардашын јемәк, ев ишләри вә диҝәр саһәләрдә көмәјә еһтијаҹы јохдур? Ола билсин, бизә јүк олмамаг  үчүн о, һеч нә демәјәҹәк. Амма өзүмүз тәшәббүс ҝөстәриб она лазыми көмәји етсәк, чох миннәтдар олар. Биз дүшүнмәмәлијик ки, һәр шеј биртәһәр јолуна дүшәҹәк, јахуд инсан нәјәсә еһтијаҹ дујса, өзү бизә хәбәр едәҹәк. Јахшы олар ки, нөвбәти суал үзәриндә дүшүнәк: «Әҝәр мән бу вәзијјәтдә олсајдым, мәнә һансы көмәјин ҝөстәрилмәсини истәјәрдим?»

15. Фәдакар олмағымыз үчүн нә етмәк лазымдыр?

¹⁵ Гој башгаларына сизә јахынлашмаг асан олсун. Јәгин, јығынҹағынызда елә баҹы-гардашлар вар ки, һәмишә башгаларына көмәк етмәјә һазырдырлар. Онлар һеч вахт демирләр, биз онлары бездиририк. Билирик ки, дара дүшсәк, һәмишә онларын көмәјинә архалана биләрик. Чох истәјәрдик ки, биз дә онлар кими олаг! 40-дан чох јашы олан Алан адлы бир ағсаггал чалышыр ки, башгалары она чәкинмәдән јахынлаша билсин. Алан Исанын нүмунәси барәдә дејир: «Иса чох мәшғул иди, буна бахмајараг, бөјүклү-кичикли, һәр кәс онун јанында олмаға ҹан атырды, чәкинмәдән ондан көмәк истәјирди. Онлар билирди ки, Иса үчүн дәјәрлидирләр. Мән сәмими гәлбдән истәјирәм ки, Иса кими олум. Һамы мәни меһрибан, гајғыкеш вә ҹаныјанан бир инсан кими танысын».

16. Зәбур 119:59, 60 ајәләринә әмәл етмәк бизә Исанын нүмунәсини јахындан изләмәјә неҹә көмәк едәҹәк?

¹⁶ Исанын нүмунәсини мүкәммәл шәкилдә изләјә билмәдијимиз үчүн руһдан дүшмәмәлијик (Јаг. 3:2). Рәссамлығы өјрәнән шаҝирд мүәллимин рәсм әсәрини дәгигликлә онун кими чәкә билмәз. Амма о, өз сәһвләриндән өјрәнәрәк, чәкдији рәсми баҹардығы гәдәр мүәллимин чәкдијинә охшатмаға чалышараг јаваш-јаваш тәкмилләшәҹәк. Ејнилә биз дә Мүгәддәс Китабы  мүталиә едәркән өјрәндикләримизә ујғун даврансаг, сәһвләримизи дүзәлтмәк үчүн әлимиздән ҝәләни етсәк, Иса Мәсиһин бизим үчүн гојдуғу нүмунәни јахындан изләмиш олаҹағыг. (Зәбур 119:59, 60 ајәләрини охујун.)

17, 18. Иса кими фәдакар олмаға чалышмағымыз бизә һансы фајданы ҝәтирәҹәк?

¹⁷ Бизим фәдакарлығымыз башгаларына да сирајәт едә биләр. Тим адлы бир ағсаггал дејир: «Јығынҹағымызда ҹаван гардашлар вар ки, руһани ҹәһәтдән инкишаф етдиләр вә јығынҹаг хидмәтчиси тәјин олундулар. Һәтта бәзиләри лап ҝәнҹ јашында тәјинат алдылар. Онлар она ҝөрә инкишаф етдиләр ки, башгаларынын көмәјә һазыр олдуғуну ҝөрдүләр вә онлара бәнзәмәјә чалышдылар. Бу фәдакар гардашлар јығынҹаға чох дајаг олурлар вә ағсаггаллар үчүн бөјүк көмәкдирләр».

¹⁸ Худбинлијин һөкм сүрдүјү бир дүнјада јашајырыг. Амма Јеһованын халгы тамамилә башга ҹүрдүр. Иса Мәсиһин башгалары уғрунда вахтыны, ҝүҹүнү сәрф етмәјә һазыр олмасы бизим үчүн бөјүк өрнәкдир. Биз Исанын «изи илә» мүкәммәл шәкилдә ҝедә билмәсәк дә, баҹардығымыз гәдәр јахындан ҝедә биләрик (1 Бут. 2:21). Иса кими фәдакар олмаға чалышсаг, Јеһованын разылығыны газанаҹағыг вә бундан бөјүк севинҹ дујаҹағыг.