ТӘЛИМ МӘГАЛӘСИ 7
НӘҒМӘ 15 Јеһованын Илкинә тәзим едәк!
Јеһованын әфвинин бизә аидијјәти
«Сән һәгигәтән бағышлајансан» (ЗӘБ. 130:4).
ӘСАС ФИКИР
Бу мәгаләдә Јеһованын бизи һәгигәтән бағышладығыны ҝөстәрән бәзи бәдии ифадәләри арашдыраҹағыг вә беләҹә, Јеһованын әфвинә ҝөрә миннәтдарлығымыз даһа да артаҹаг.
1. Достунузун сизи бағышладығыны демәси мүнасибәтләринизә неҹә тәсир едә биләр?
ТӘСӘВВҮР един ки, сөзүнүзлә вә ја һәрәкәтинизлә достунузун хәтринә дәјмисиниз. Сонра ондан үзр истәјирсиниз, о да дејир: «Сәни бағышлајырам». Бу сөзләри ешидәндә һансы һиссләри кечирәрдиниз? Јәгин, үрәјинизә раһатлыг чөкәрди, чијниниздән бөјүк бир јүкүн ҝөтүрүлдүјүнү һисс едәрдиниз. Бәс достлуғунуз давам едәрди, јохса мүнасибәтләриниздә аз да олса, сојуглуг јаранарды? Чох шеј инсанын «бағышлајырам» дејәндә нәји нәзәрдә тутдуғундан асылыдыр.
2. Мүгәддәс Китабда Јеһованын әфви илә бағлы нә дејилир? (Һәмчинин һашијәјә бахын.)
2 Јеһованын инсанлары бағышламасы илә инсанларын бир-бирини бағышламағы арасында дағлар гәдәр фәрг вар. Һеч ким Јеһова кими бағышлаја билмәз. Мәзмурчу Јеһова барәдә демишди: «Сән һәгигәтән бағышлајансан, та ки үрәкләрдә Сәнин хофун олсун» a (Зәб. 130:4). Бәли, Јеһова бағышлајанда һәгигәтән бағышлајыр. Бағышламағын әслиндә нә олдуғуну Ондан өјрәнирик. Бәзи һалларда Мүгәддәс Китаб јазарлары Јеһованын бағышламасына аид истифадә етдикләри ибрани сөзүнү һеч вахт инсанларын бир-бирини бағышламасына аид ишләтмәјибләр.
3. Јеһова илә инсанларын бағышламасы арасында һансы фәрг вар? (Әшија 55:6, 7).
3 Јеһова бағышладығы инсанын ҝүнаһыны тамамилә силир. Нәтиҹәдә, онун Јеһова илә корланмыш мүнасибәти бүтүнлүклә бәрпа олунур. Нә јахшы ки, Јеһова бизи тамамилә бағышлајыр вә буну дөнә-дөнә едир. (Әшија 55:6, 7 ајәләрини охујун.)
4. Јеһова бизә бағышламағын әсл мәнасыны баша дүшмәјә неҹә көмәк едир?
4 Ҝөрдүјүмүз кими Јеһованын бағышламаг тәрзи бизимкиндән фәргләнир. Бәс гејри-камил олан бизләр һәгигәтән бағышламағын нә демәк олдуғуну неҹә баша дүшә биләрик? Јеһова бәдии ифадәләр васитәсилә бизә буну изаһ едир. Мәгаләдә онлардан бәзиләрини арашдыраҹағыг. Онларын көмәји илә Јеһованын ҝүнаһларымызы неҹә силдијини вә ејни заманда Онунла јенидән дост олмағымыз үчүн нә етдијини өјрәнәҹәјик. Бу ифадәләри арашдырдыгҹа әфвини чохлу јолларла ифадә едән мәһәббәтли Атамыза миннәтдарлығымыз бирә-беш артаҹаг.
ЈЕҺОВА ҜҮНАҺЛАРЫМЫЗЫ БИЗДӘН УЗАГЛАШДЫРЫР
5. Јеһова ҝүнаһларымызы неҹә әфв едир?
5 Мүгәддәс Китабда ҝүнаһ чох вахт ағыр јүкә бәнзәдилир. Мәсәлән, Давуд падшаһ өз ҝүнаһлары һагда белә демишди: «Тәгсирләрим башымдан ашыр, санки, ағыр јүкдүр, дашымаг олмур» (Зәб. 38:4). Буна рәғмән, Јеһова төвбә едән инсанын ҝүнаһыны әфв едир (Зәб. 25:18; 32:5). «Әфв етмәк» кими тәрҹүмә едилмиш ибрани ифадәси, әсасән, «галдырмаг», јахуд «ҝөтүрүб апармаг» мәнасыны верир. Санки Јеһова пәһләвантәк чијнимиздәки ҝүнаһ јүкүнү ҝөтүрүб узаға апарыр.
«Ҝүнаһларымдан кечдин» (Зәб. 32:5)
6. Јеһова ҝүнаһларымызы нә гәдәр узаға апарыр?
6 Башга бир бәдии ифадә исә Јеһованын ҝүнаһларымызы нә гәдәр узаға апардығыны ҝөстәрир. Зәбур 103:12 ајәсиндә дејилир: «Шәрг гәрбдән нә гәдәр узагдырса, ҝүнаһларымызы биздән о гәдәр узаглашдырды». Шәрг гәрбдән ән узаг мәсафәдә јерләшир вә онлар һеч вахт говушмур. Бу о демәкдир ки, Јеһова ҝүнаһларымызы ағлымыза сығмајаҹаг гәдәр узаг мәсафәјә апарыр. Јеһова неҹә дә ҝүҹлү сөзләрлә бизи бағышладығына әмин едир!
«Шәрг гәрбдән нә гәдәр узагдырса» (Зәб. 103:12)
7. Микә 7:18, 19 ајәләринә әсасән Јеһова ҝүнаһларымызла неҹә давраныр?
7 Бәс Јеһова мәҹази мәнада ҝүнаһларымызы биздән узаглашдырандан сонра онлары өзүндә сахлајыр? Хејр. Һизгијјә падшаһ Јеһова һагда демишди: «Бүтүн ҝүнаһларымы архана тулладын» (Әшј. 38:9, 17). Бу ифадә ҝөстәрир ки, Јеһова төвбә едән инсанын ҝүнаһларыны ҝөтүрүб ҝөзүнүн габағындан кәнара атыр. Бу ајәни белә дә тәрҹүмә етмәк олар: «Елә етдин ки, бу ҝүнаһлары санки һеч ишләмәмишәм». Микә 7:18, 19 ајәләриндә бу фикир башга бир бәдии ифадә илә дә вурғуланыр. (Ајәләри охујун.) Орада Јеһованын ҝүнаһларымызы дәнизин дибинә атдығы гејд олунур. Гәдимдә дәнизин дибинә атылан бир шеји орадан чыхартмаг мүмкүнсүз иди.
«Бүтүн ҝүнаһларымы архана тулладын» (Әшј. 38:17)
«Бүтүн ҝүнаһларымызы дәнизин дибинә атаҹагсан» (Мик. 7:19)
8. Бу абзаса кими нә өјрәндик?
8 Бу бәдии ифадәләрин көмәји илә өјрәндик ки, Јеһова бағышлајанда бизи ҝүнаһ јүкүндән азад едир. Доғрудан да, Давуд демишкән, «хошбәхтдир о кәс ки, тәгсирләри бағышланыб, ҝүнаһлары әфв едилиб. Хошбәхтдир о кәс ки, Јеһова онун ҝүнаһларыны һесаба алмыр» (Ром. 4:6—8). Бах бағышламаг буна дејәрләр!
ЈЕҺОВА ҜҮНАҺЛАРЫМЫЗЫ СИЛИР
9. Јеһова әфвинин бөјүклүјүнү изаһ етмәк үчүн һансы бәдии ифадәдән истифадә едир?
9 Јеһова фидјә гурбанлығы васитәсилә төвбә едән инсанын ҝүнаһыны силир. Буну неҹә етдијини изаһ етмәк үчүн О, башга бәдии ифадәләрдән истифадә едир. Мәҹази диллә десәк, Јеһова ҝүнаһларымызы јујуб тәмизләјир. Нәтиҹәдә, ҝүнаһлы инсан пак олур (Зәб. 51:7; Әшј. 4:4; Әрм. 33:8). Јеһова бу просеси белә изаһ едир: «Ҝүнаһларыныз ал-гырмызы олса да, онлары гар кими ағаппаг едәҹәјәм, түнд-гырмызы парча рәнҝдә олса да, онлары јун кими едәҹәјәм» (Әшј. 1:18). Түнд-гырмызы вә ја ал-гырмызы ләкәни парчадан тәмизләмәк чох чәтиндир. Бунунла белә, Јеһова бу бәдии ифадә васитәсилә бизи бир шејә әмин едир: О, ҝүнаһларымызы тәртәмиз јујур, онларын һеч изи дә галмыр.
«Ҝүнаһларыныз ал-гырмызы олса да, онлары гар кими ағаппаг едәҹәјәм» (Әшј. 1:18)
10. Мүгәддәс Китабда Јеһованын бизи ҹомәрдликлә әфв етдијини тәсвир едән башга һансы ифадә вар?
10 Әввәлки мәгаләдә гејд олундуғу кими ҝүнаһларымызы борҹа бәнзәтмәк олар (Мәт. 6:12, һашијә; Лука 11:4, һашијә). Јеһоваја гаршы һәр дәфә ҝүнаһ едәндә борҹумузун үстүнә борҹ јығырыг. Һал-һазырда Она күллү мигдарда борҹумуз вар. Амма Јеһова бизи бағышлајанда санки борҹларымызы ләғв едир. Әкс һалда, буна ҝөрә ҹаваб вермәли олардыг. О, бағышладығы ҝүнаһларымызын әвәзини тәләб етмир. Неҹә ки инсан борҹу бағышлананда дахилән раһатлыг дујур, Јеһова бизи бағышлајанда биз дә ејни һиссләри кечиририк.
«Борҹларымызы бағышла» (Мәт. 6:12, һашијә)
11. Һәвариләрин ишләри 3:19 ајәсиндәки «бағышламаг» сөзү һансы мәнаны дашыјыр?
11 Һәвариләрин ишләри 3:19 ајәсини охујун. Бу ајәдә «бағышламаг» кими тәрҹүмә олунан јунан феили «силиб јох етмәк» мәнасыны дашыјыр. Јеһова ҝүнаһ борҹумузу тәкҹә ләғв етмир, һәм дә ону силир. Фәрз едәк ки, кимсә борҹумузу ләғв етмәк үчүн онун үстүндән хәтт чәкир. Бу һалда онун алтындакы рәгәм һәлә дә ҝөрүнүр. Нәјисә силмәк исә хәтт чәкмәкдән фәргләнир. Бу бәдии ифадәни баша дүшмәк үчүн гәдим дөврдә инсанларын һансы нөв мүрәккәбдән истифадә етдијини нәзәрә алмалыјыг. Һәмин мүрәккәблә јазылан јазыны јаш сүнҝәрлә асанлыгла силмәк олурду. Демәли, борҹ «силинәндә» о, тамамилә јох олурду. Ади ҝөзлә баханда билмәк олмазды ки, орада вахтилә нәсә јазылыб. Санки бу борҹ һеч вахт олмајыб. Јеһованын ҝүнаһларымызы тәкҹә ләғв етмәдијини, һәм дә онлары тамамилә силдијини билмәк гәлбимизи исиндирир! (Зәб. 51:9).
«Ҝүнаһларынызын бағышланмасы [силинмәси] үчүн төвбә един» (Һәв. 3:19)
12. «Гаты булудла» бағлы бәдии ифадә нә мәна кәсб едир?
12 Јеһова ҝүнаһларымызы неҹә бағышладығыны ҝөстәрмәк үчүн башга бәдии ифадәдән дә истифадә едир. О дејир: «Асиликләрини булудла, ҝүнаһларыны гаты булудла өртәрәм» (Әшј. 44:22). Јеһова бағышлајанда асилијимизи, ҝүнаһларымызы санки гаты булудла өртүр. Беләҹә, онлар ҝөздән тамамилә итир.
«Ҝүнаһларыны гаты булудла өртәрәм» (Әшј. 44:22)
13. Јеһова ҝүнаһларынызы бағышлајанда һансы һиссләри кечирирсиниз?
13 Бу нүмунәләрдән нә өјрәнирик? Јеһова ҝүнаһларымызы бағышлајанда дүшүнмәмәлијик ки, етдијимиз ҝүнаһын ләкәси өмүр боју үстүмүздә галаҹаг. Иса Мәсиһин фидјә гурбанлығы ҝүнаһ борҹумузу тамамилә өдәјиб. Бу ҝүнаһларымызын һеч изи-тозу да галмајыб. Биз төвбә едәндә Јеһова бизи мәһз бу ҹүр бағышлајыр.
ЈЕҺОВА БИЗИМЛӘ ӘВВӘЛКИ КИМИ ДОСТЛУГ ЕДИР
Јеһованын бизи бағышламасы сајәсиндә Онунла ҝөзәл мүнасибәтләримиз јараныр (14-ҹү абзаса бахын)
14. Јеһованын бизи бағышладығына нәјә ҝөрә етибар едә биләрик? (Һәмчинин шәкилләрә бахын.)
14 Јеһова бизи бағышлајанда Онунла әввәлки кими дост ола биләрик. Артыг өзүмүзү ҝүнаһкар һисс етмәјимизә еһтијаҹ галмыр. Горхмамалыјыг ки, Јеһова һәлә дә бизә гаршы аҹыглыдыр вә бизи ҹәзаландырмаг үчүн бир јол ахтарыр. О, һеч вахт буну етмәз. Јеһова бизи бағышладығыны дејирсә, нәјә ҝөрә Она етибар едә биләрик? О, Әрәмја пејғәмбәрә белә демишди: «Онларын тәгсирини бағышлајаҹағам, ҝүнаһларыны бир дә јада салмајаҹағам» (Әрм. 31:34). Бу сөзләрә истинад едәрәк һәвари Булус да бәнзәр ифадә ишләтмишди: «Ҝүнаһларыны бир дә хатырламајаҹағам» (Ибр. 8:12). Бәс бу сөзләрин мәнасы нәдир?
«Ҝүнаһларыны бир дә јада салмајаҹағам» (Әрм. 31:34)
15. Һансы мәнада Јеһова бир дә ҝүнаһларымызы јада салмајаҹаг?
15 Мүгәддәс Китабда «јада салмаг» ифадәси һеч дә һәмишә «нәјисә хатырламаг, нәсә барәдә дүшүнмәк» мәнасыны вермир. Бу сөз һәм дә һәрәкәтә кечмәк мәнасыны билдирир. Иса илә бирликдә дирәкдә асылмыш ҹинајәткар ондан белә бир хаһиш етмишди: «Иса, Падшаһлығына ҝәләндә мәни јада сал» (Лука 23:42, 43). О демәк истәјирди ки, Иса һәмин вахт онун үчүн нәсә етсин. Иса да ҹавабында ону дирилдәҹәјини билдирди. Демәли, Јеһова бир дә ҝүнаһларымызы јада салмајаҹағыны дејәндә бизимлә бағлы өлчү ҝөтүрмәјәҹәјини нәзәрдә тутур. Јәни О бизи бағышлајыбса, бу ҝүнаһларымыза ҝөрә ҝәләҹәкдә бизи ҹәзаландырмајаҹаг.
16. Мүгәддәс Китабда Јеһованын әфвинин бәхш етдији азадлыг неҹә тәсвир олунуб?
16 Јеһова бизи бағышлајанда өзүмүзү азад һисс едирик. Мүгәддәс Китабда истифадә олунан башга бир бәдии ифадә буну баша дүшмәјимизә көмәк едир. Биз гејри-камил олдуғумуз үчүн «ҝүнаһын гулу»југ, амма Јеһованын әфви сајәсиндә биз «ҝүнаһын әсарәтиндән» гуртулмушуг (Ром. 6:17, 18; Вәһј 1:5). Бәли, Јеһова бизи бағышлајанда әсарәтдән гуртулмуш гул кими севинҹимиз јерә-ҝөјә сығмыр.
«Ҝүнаһын әсарәтиндән» гуртулмусунуз (Ром. 6:18)
17. Һансы мәнада Јеһова бизи бағышлајанда шәфа тапырыг? (Әшија 53:5).
17 Әшија 53:5 ајәсини охујун. Кечәк сонунҹу бәдии ифадәмизә. Биз ҝүнаһлы олдуғумуз үчүн өлүмҹүл хәстәлијә јолухмуш инсана бәнзәјирик. Амма Јеһованын тәгдим етдији фидјә гурбанлығы васитәсилә бир нөв шәфа тапырыг (1 Бут. 2:24). Ҝүнаһ нәтиҹәсиндә Јеһова илә позулан мүнасибәтләримиз фидјә сајәсиндә там бәрпа олунур. Ағыр хәстәликдән сағалан инсан һәдсиз севинҹ дујдуғу кими, биз дә руһани ҹәһәтдән шәфа тапанда вә јенидән Јеһованын разылығыны газананда бах бу ҹүр севинирик.
«Биз онун јаралары илә шәфа тапдыг» (Әшј. 53:5)
ЈЕҺОВАНЫН ӘФВИНИН ҺӘЈАТЫМЫЗДАКЫ РОЛУ
18. Јеһованын әфви илә бағлы арашдырдығымыз бәдии ифадәләрдән нә өјрәндик? (Һәмчинин «Јеһова бизи неҹә бағышлајыр?» адлы чәрчивәјә бахын.)
18 Мүгәддәс Китабда Јеһованын әфви илә бағлы јазылан бәзи бәдии ифадәләри арашдырдыг. Онлардан нә өјрәндик? Јеһова елә бағышлајыр ки, санки о ҝүнаһлары һеч вахт етмәмишик. О, ҝәләҹәкдә бу ҝүнаһларымыза ҝөрә бизи ҹәзаландырмајаҹаг. Бунунла биз сәмави Атамыз Јеһова илә ҝөзәл мүнасибәтләр гура билирик. Амма бир шеји јаддан чыхармајаг: Јеһованын әфви әнамдыр, биз буна лајиг дејилик, Ондан буну тәләб етмәјә һаггымыз чатмыр. Бу, Јеһованын мәһәббәтиндән, лүтфүндән гајнагланыр (Ром. 3:24).
19. а) Нәјә ҝөрә миннәтдар олмалыјыг? (Ромалылара 4:8). б) Нөвбәти мәгаләдә нәдән данышаҹағыг?
19 Ромалылара 4:8 ајәсини охујун. Јеһованын «һәгигәтән бағышлајан» Аллаһ олдуғуна ҝөрә нә гәдәр миннәтдар олсаг, аздыр! (Зәб. 130:4). Амма Онун бизи бағышламасы үчүн биз ваҹиб бир шеји етмәлијик. Иса Мәсиһ буну белә изаһ етмишди: «[Инсанларын] тәгсирләрини бағышламырсынызса, Атаныз да сизин тәгсирләринизи бағышламајаҹаг» (Мәт. 6:14, 15). Демәли, Јеһовадан нүмунә ҝөтүрүб башгаларыны бағышламалыјыг. Нөвбәти мәгаләдә буну етмәјин јолларыны өјрәнәҹәјик.
НӘҒМӘ 46 Јеһова, Сәнә шүкр олсун
a Бурада истифадә олунан ибрани ифадәсинин ишләнмә формасы јалныз Јеһованын тамамилә бағышладығыны ҝөстәрир. Онун бағышлама тәрзи башгаларынынкындан фәргләнир. Мүгәддәс Китабын бир чох тәрҹүмәләриндә ајәдәки бу мүһүм мәгам бурахылыб. «Мүгәддәс Јазыларын Јени Дүнја Тәрҹүмәси»ндә исә Зәбур 130:4 ајәсиндәки бу фәрг ҝөстәрилиб. Бу да тәрҹүмәмизә өзәллик гатыр.
