1, 2. Јеһованын Әшија 65:16, 17 ајәләриндә јазылан сөзләри бизә тәслим олмамаға неҹә көмәк едир?

«ТӘСЛИМ ОЛМА!» 2017-ҹи илин реҝионал топлантысы белә адланырды. Бу мөһтәшәм топлантыдан үзләшдијимиз сынаглара тап ҝәтирмәјин јолларыны өјрәндик. О вахтдан бәри дөрд ил кечиб. Биз һәлә дә бу дүнјада чохлу проблемләрә дөзмәли олуруг.

² Тәзәликҹә һансы проблемлә үзләшмисиниз? Бу, мүхтәлиф проблемләр ола биләр. Ола билсин, аилә үзвүнүз вә ја јахын достунуз вәфат едиб. Ағыр хәстәликлә чарпышырсыныз. Гоҹалығын өзү илә ҝәтирдији чәтинликләрлә үзләширсиниз. Тәбии фәлакәтин вә ја зоракылығын гурбаны олмусунуз. Тәгибләрә мәруз галырсыныз. Јахуд һансыса хәстәлик уҹбатындан, мәсәлән, COVID-19 пандемијасынын вурдуғу зәрәрә ҝөрә әзијјәт чәкирсиниз. Һамымыз проблемләримизин архада галаҹағы, унудулаҹағы вә бир даһа олмајаҹағы ҝүнү һәсрәтлә ҝөзләјирик! (Әшија 65:16, 17 ајәләрини охујун.)

3. Һал-һазырда нә етмәлијик вә нәјә ҝөрә?

³ Бу дүнјада һәјат чох ағырдыр. Ола билсин, ҝәләҹәкдә даһа ағыр чәтинликләрлә үзләшәҹәјик (Мәт. 24:21). Ајдындыр ки, даһа да дөзүмлү олмағы өјрәнмәлијик. Чүнки Иса Мәсиһ демишди: «Дөзүмлә һәјатынызы хилас едәҹәксиниз» (Лука 21:19). Бизим кими ејни чәтинликләрә дөзәнләрин нүмунәси дөзүмүмүзү ҝүҹләндирә биләр.

4. Нәјә ҝөрә Јеһова ән ҝөзәл дөзүм нүмунәсидир?

⁴ Дөзүм ҝөстәрмәкдә ән ҝөзәл нүмунә кимдир? Јеһова Аллаһ. Ҹаваб сизи тәәҹҹүбләндирди? Ола билсин, һә. Амма бир аз дүшүнсәк, ҝөрәрик ки, бу, доғрудан да, беләдир. Бу дүнја Шејтанын һакимијјәти алтындадыр вә проблемләрлә долудур. Јеһова бир анын ичиндә бу дүнјадакы писликләрә  сон гојмаға гадирдир. Амма О, тәјин етдији вахты ҝөзләјир (Ром. 9:22). О вахта гәдәр исә дөзүм ҝөстәрир. Ҝәлин Јеһованын дөзүм ҝөстәрдији доггуз саһәјә нәзәр салаг.

5. Јеһованын адына һансы гаралар јахылыр вә сиз буна ҝөрә һансы һиссләри кечирирсиниз?

⁵ Адына гара јахылмасына дөзүр. Јеһова адыны севир вә истәјир ки, һәр кәс Онун адына һөрмәтлә јанашсын (Әшј. 42:8). Амма тәхминән алты мин илдир ки, Онун адына гара јахылыр (Зәб. 74:10, 18, 23). Бу, Әдән бағындан башлады. Иблис (мәнасы «бөһтанчы») иддиа етди ки, Аллаһ Адәмлә Һәвваны онларын хошбәхтлији үчүн лазым олан шејдән мәһрум едир (Јар. 3:1—5). Та о вахтдан Јеһова һагсыз иттиһамлара мәруз галыр, ҝуја инсанлары зәрури шејләрдән мәһрум едир. Атасынын адына атылан бөһтанлар Иса Мәсиһи чох нараһат едирди. Буна ҝөрә дә о, шаҝирдләринә белә дуа етмәји бујурмушду: «Ҝөјләрдә олан Атамыз, гој адын мүгәддәс тутулсун» (Мәт. 6:9).

6. Нәјә ҝөрә Јеһова һакимијјәтинин бәраәт газанмасы үчүн хејли вахт вериб?

⁶ Чохларынын Онун һакимијјәтинә гаршы чыхмасына дөзүр. Јери вә ҝөјү идарә етмәјә јалныз Јеһованын ихтијары чатыр вә Онун идарәетмә тәрзи мүкәммәлдир (Вәһј 4:11). Иблис исә чалышыр ки, мәләкләри вә инсанлары алдатсын, Аллаһын һакимијјәт сүрмәјә һаггы чатмадығына инандырсын. Јеһованын һакимијјәт сүрмәјә лајиг олдуғунун сүбута јетирилмәси бир ҝүнүн ичиндә һәлл олунасы мәсәлә дејил. Буна ҝөрә дә һикмәтли Аллаһ Јеһова кифајәт гәдәр вахт вериб. Бу вахт әрзиндә инсанлар ајдын шәкилдә ҝөрә биләрдиләр ки, инсанын Јарадандан азад шәкилдә јашајыб, бир-бири үзәриндә ағалыг етмәси һәмишә уғурсузлугла нәтиҹәләнәҹәк (Әрм. 10:23). Јеһованын сәбри сајәсиндә бу мәсәлә бирдәфәлик һәлл олунаҹаг. Онун һакимијјәти бәраәт газанаҹаг. Јеһова сүбут едәҹәк ки, јалныз Онун Падшаһлығы јер үзүндә әсл сүлһү вә тәһлүкәсизлији бәргәрар едә биләр.

7. Кимләр Јеһоваја гаршы чыхды вә Јеһова онларла бағлы һансы тәдбири ҝөрәҹәк?

⁷ Јаратдығы варлыгларын үсјанына дөзүр. Јеһова һәм руһани варлыглары, һәм дә инсанлары камил, гүсурсуз јарадыб. Амма руһани варлыг Шејтан (мәнасы «әлејһдар») Аллаһа үсјан етди вә камил инсанлары, Адәмлә Һәвваны, Она гаршы галдырды. Башга мәләкләр вә инсанлар да бу үсјана гошулду (Јһд. 6). Һәтта сонралар Јеһованын сечилмиш халгы Исраил Она аси чыхды вә сахта аллаһлара ситајиш етмәјә башлады (Әшј. 63:8, 10). Һаглы олараг, Јеһова хәјанәтлә үзләшдијини һисс едирди. Амма О дөзүр вә бүтүн үсјанкарлары мәһв етмәк вахты чатана гәдәр дөзәҹәк. Онда Јеһова илә бирҝә бу дүнјадакы писликләрә дөзән садиг хидмәтчиләри динҹлик тапаҹаг!

8, 9. Јеһова һагда һансы јаланлар сөјләнилир вә биз бунларын јалан олдуғуну неҹә сүбут едә биләрик?

⁸ Иблисин јаланлар јағдырмасына дөзүр. Шејтан Јеһованын дүрүст хидмәтчиси Әјјуба вә онун симасында Јеһованын бүтүн садиг хидмәтчиләринә шәр атыб иддиа етди ки, онлар Јеһоваја худбин мәгсәдлә гуллуг едирләр (Әјј. 1:8—11; 2:3—5). Иблис та бу ҝүнә кими Јеһованын хидмәтчиләрини иттиһам етмәјә давам едир (Вәһј 12:10). Амма биз онун јаланчы олдуғуну сүбут едә биләрик. Неҹә? Јеһоваја севҝидән ирәли ҝәләрәк садиг галмагла вә сынаглара дөзмәклә. Әјјуб кими, Јеһова бизә дә дөзүмүмүзә ҝөрә мүкафат верәҹәк (Јаг. 5:11).

 ⁹ Шејтан јалан динин хадимләри васитәсилә инсанлара ашылајыр ки, Аллаһ гәддардыр, нә баш верирсә, Онун мәсләһәти илә баш верир. Әзабларымыз Онун алын јазысыдыр. Һәтта ушаглар өләндә бәзиләри дејир ки, ҝөјдә мәләк лазым иди дејә, Аллаһ онлары јанына апарды. Бу, Аллаһа гаршы чох бөјүк күфрдүр! Амма биз билирик ки, бу, гәтијјән белә дејил. Ҹидди хәстәлијимиз оланда, јахуд јахынымыз вәфат едәндә биз һеч вахт Аллаһы ҝүнаһландырмырыг. Әксинә, иман едирик ки, бир ҝүн Јеһова бүтүн бунлара чарә гылаҹаг. Бизи динләмәк истәјән һәр кәсә Јеһованын нә гәдәр мәһәббәтли Аллаһ олдуғуну даныша биләрик. Бунун сајәсиндә Јеһова Она мејдан охујана ҹаваб верә биләҹәк (Мәс. 27:11).

10. Зәбур 22:23, 24 ајәләриндән Јеһова һагда нә өјрәнирик?

¹⁰ Әзиз бәндәләринин әзабына дөзүр. Јеһова шәфгәтли Аллаһдыр. Бизим тәгиб, хәстәлик, гејри-камиллик вә диҝәр сәбәбләрә ҝөрә етдијимиз фәрјадлары ешидәндә Онун үрәји ағрыјыр. (Зәбур 22:23, 24 ајәләрини охујун.) О бизим ағрыларымызы дујур, бунлара сон гојмаг истәјир вә гојаҹаг да. (Чыхыш 3:7, 8; Әшија 63:9 ајәләри илә әлагәләндирин.) Ҝүн ҝәләҹәк, Аллаһ бизим ҝөзләримиздән «бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг» (Вәһј 21:4).

11. Өлән хидмәтчиләриндән өтрү Јеһова һансы һиссләри кечирир?

¹¹ Өлүмүн дәјәрли достларыны Ондан ајырмасына дөзүр. Јеһова өлән мөмин киши вә гадынлары јенидән ҝөрмәјин һәсрәтиндәдир! (Әјј. 14:15). Бир тәсәввүр един, Јеһова досту Ибраһим пејғәмбәр үчүн нә гәдәр дарыхыр (Јаг. 2:23). Ја да «үз-үзә» данышдығы Муса пејғәмбәр үчүн (Чых. 33:11). Јахуд дүшүнүн, Давудун вә диҝәр мәзмурчуларын јенидән Она  ҝөзәл һәмд нәғмәләри уҹалтмасынын неҹә арзусундадыр! (Зәб. 104:33). Јеһованын бу достлары өлүм јухусуна ҝетсәләр дә, онлары унутмајыб (Әшј. 49:15). Онлара хас һәр бир шеј Онун јадындадыр. Белә ки, Јеһова үчүн «онларын һамысы сағдыр» (Лука 20:38). Вахты чатанда Јеһова онлары һәјата гајтараҹаг вә јенидән онларын сәмими дуаларыны ешидәҹәк, ибадәтләрини гәбул едәҹәк. Әҝәр јахыныныз вәфат едибсә, бүтүн бунлары билмәк сизә тәскинлик верә биләр.

12. Бу шәр дүнјада нәләри ҝөрмәк Јеһова үчүн ағырдыр?

¹² Инсанларын писләрин әлиндән әзаб чәкмәсинә дөзүр. Әдән бағында үсјан галханда Јеһова билирди ки, һәр шеји јахшылыға доғру дәјишмәздән өнҹә дүнјадакы вәзијјәт ҝетдикҹә писләшәҹәк. О, бу дүнјадакы писликләрә, һагсызлыға вә зоракылыға нифрәт едир. Јеһова һәмишә дуллар вә јетимләр дә дахил олмагла, зәиф вә мүдафиәсиз инсанлара гаршы хүсусилә шәфгәтли олуб (Зәк. 7:9, 10). Ән чох да О, садиг хидмәтчиләринин тәгиб олунмасына вә һәбс едилмәсинә ҝөрә пис олур. Јеһова илә бирҝә бүтүн бу шејләрә дөзәнләр, әмин олун ки, Јеһова сизи чох севир.

13. Јеһованын ҝөзү өнүндә бәшәр аиләсинин әхлагы илә нә баш верир вә О бунунла бағлы һансы тәдбири ҝөрәҹәк?

¹³ Бәшәријјәтин әхлаги тәнәззүлүнә дөзүр. Шејтан Аллаһын бәнзәриндә јарадылмыш инсанлары әхлаги ҹәһәтдән тәнәззүлә уғратмагдан зөвг алыр. Нуһ пејғәмбәрин дөврүндә Јеһова ҝөрәндә ки, «јер үзүндә инсанлар тамам позулуб», онлары «јаратдығына тәәссүф етди вә үрәји ағрыды» (Јар. 6:5, 6, һаш., 11). О вахтдан бәри дүнјанын вәзијјәти дүзәлиб? Әлбәттә ки, јох! Тәсәввүр етмәк олар, Иблис һәм ејни ҹинсдән, һәм дә әкс ҹинсдән олан инсанлар арасында ҹинси әхлагсызлығын һәр ҹүр нөвүнүн ҝениш јајылдығыны ҝөрәндә нә гәдәр севинир! (Ефес. 4:18, 19). Ән чох да Шејтан пак ибадәтдә олан инсанлары ҝүнаһа сүрүкләјәндә севинир. Јеһованын сәбри сона чатанда О, бүтүн бу әхлагсыз әмәлләрә тамамилә нифрәт етдијини ајдын шәкилдә ҝөстәрәҹәк.

14. Инсанлар Аллаһын јаратдыглары илә неҹә давраныр?

¹⁴ Инсанларын Јер күрәсини тәләф етмәсинә дөзүр. Инсан нәинки инсан үзәриндә ағалыг едиб она зәрәр јетирир, һәмчинин Аллаһын бујруғу илә гуллуг етмәли олдуғу Јер күрәсини вә һејванат аләмини истисмар едир (Ваиз 8:9; Јар. 1:28). Мүтәхәссисләрин фикринҹә, инсанларын уҹбатындан бир нечә ил сонра бир милјондан чох һејван вә битки нөвүнүн нәсли кәсилә биләр. Елә буна ҝөрә онлар тәбиәтин мәһв олмаг үзрә олдуғуну дејирләр! Хошбәхтликдән, Јеһова вәд едиб ки, «јери тәләф едәнләри тәләф» едәҹәк вә бүтүн дүнјаны ҹәннәтә чевирәҹәк (Вәһј 11:18; Әшј. 35:1).

15, 16. Бизә Јеһова илә бирҝә дөзмәјә нә ҝүҹ верир? Нүмунә чәкин.

¹⁵ Ҝөрүн Јеһова мин илләрдир нә гәдәр шејләрә дөзүрмүш! (« Јеһова нәләрә дөзүр?» адлы чәрчивәјә бахын.) Јеһова бу шәр дүнјаја истәдији ан сон гоја биләрди. Амма Онун сәбри бизим үчүн бөјүк немәтләрә јол ачды. Буну белә бир нүмунә әсасында тәсвир етмәк олар. Бир әр-арвада дејирләр ки, онларын өвлады ҹидди хәстәликлә дүнјаја ҝәләҹәк, әзијјәт чәкәҹәк вә чох јашамајаҹаг. Валидејнләр билсәләр дә ки, көрпәнин гејдинә галмаг ағыр олаҹаг, о доғуланда чох севинирләр. Ону чох истәдикләриндән һәр чәтинлијә гатлашырлар, тәки о, мүмкүн гәдәр раһат јашасын.

 ¹⁶ Ејнилә, Адәмлә Һәвванын да бүтүн өвладлары дүнјаја гејри-камил ҝәлир. Буна бахмајараг, Јеһова онлары севир вә гејдинә галыр (1 Јәһ. 4:19). Нүмунәдәки валидејнләрдән фәргли олараг, Јеһова инсанларын әзабына әнҹам чәкмәјә гадирдир. О, бәшәријјәти ҹәнҝинә алан бүтүн бәлалара сон гојмаг үчүн ҝүн тәјин едиб (Мәт. 24:36). Јеһованын бизә мәһәббәти бизи дә Онунла бирҝә нә гәдәр лазымдыр, о гәдәр дөзмәјә ҝүҹ верир!

17. Ибраниләрә 12:2, 3 ајәләриндә Иса һагда дејиләнләр дөзүмлү олмағымыза неҹә көмәк едир?

¹⁷ Јеһова ән али дөзүм нүмунәсидир. Иса да Атасындан өрнәк алараг дөзүм ҝөстәрмишди. О биздән өтрү әдавәтли сөзләрә, рүсвајчылыға вә ишҝәнҹә дирәјиндә чәкдији әзаблара дөзмүшдү. (Ибраниләрә 12:2, 3 ајәләрини охујун.) Јеһованын дөзүм ҝөстәрмәси, шүбһәсиз ки, Исаја да дөзмәјә ҝүҹ вермишди. Бу бизә дә ҝүҹ верә биләр.

18. 2 Бутрус 3:9 ајәсиндән ҝөрдүјүмүз кими, Јеһованын сәбри нәләрә јол ачыб?

¹⁸ 2 Бутрус 3:9 ајәсини охујун. Јеһова јахшы билир, бу шәр дүзәнә нә вахт сон гојмаг лазымдыр. Онун сәбри сајәсиндә бөјүк издиһамын јығылмасы мүмкүн олуб, нечә милјонларла инсан Она ибадәт едир вә уҹалдыр. Онларын һәр бири шүкүр едир ки, Јеһова бу гәдәр дөзүб, беләҹә, онларын анадан олмаг, Јеһованы таныјыб Ону севмәк вә өзләрини Она һәср етмәк имканы олуб. Ахыра кими дөзән милјонларла инсан хилас олунанда ҝүн кими ајдын олаҹаг ки, Јеһованын бу гәдәр дөзмәк гәрары әбәс јерә дејилди!

19. Нә етмәјә гәти гәрарлы олмалыјыг вә бунун мүгабилиндә һансы мүкафаты алаҹағыг?

¹⁹ Јеһованын нүмунәси бизә чәтинликләрә севинҹлә таб ҝәтирмәјә көмәк едир. Шејтанын сәбәб олдуғу әзаблара вә үрәк ағрысына рәғмән, Јеһова хошбәхт Аллаһдыр (1 Тим. 1:11). Биз дә Јеһованын Өз адыны мүгәддәс тутаҹағы, һакимијјәтинә бәраәт газандыраҹағы, бүтүн писликләрә сон гојаҹағы вә һазыркы проблемләри арадан галдыраҹағы вахты сәбирлә ҝөзләјәнә гәдәр севинҹимизи горуја биләрик. Одур ки, ҝәлин дөзүм ҝөстәрмәјә гәти гәрарлы олаг вә Јеһованын да бизимлә бирҝә дөздүјүнү билмәк гој бизә тәсәлли версин. Онда нөвбәти ајәдә јазылан немәтләр һәр биримизә нәсиб олаҹаг: «Сынаглара таб ҝәтирән адам хошбәхтдир. Чүнки о, бәјәнилиб Јеһованын Ону севәнләрә вәд етдији һәјат таҹыны алаҹаг» (Јаг. 1:12).