Шүбһәсиз, Јеһова аилә гуран ики нәфәрин хошбәхт, мүнасибәтләринин мөһкәм вә әбәди олмасыны истәјир (Мәт. 19:4—6). Аилә гурмаг истәјирсинизсә, јахшы һәјат јолдашы неҹә тапа биләрсиниз? Јеһова бир Јарадан кими, хошбәхт никаһа саһиб олмаг үчүн нә лазым олдуғуну јахшы билир. Буна ҝөрә дә Онун вердији принсипләрә әмәл етсәк, хејир тапаҹағыг. Ҝәлин бу принсипләрдән бәзиләрини нәзәрдән кечирәк.

Әввәла, өзүмүзлә бағлы нөвбәти һәгигәти дәрк етмәлијик: «Үрәк ән бөјүк хаиндир, хатакардыр» (Әрм. 17:9). Аилә гурмаг истәјән ики нәфәр ҝөрүшмәјә башлајанда бир-биринә дујдуғу һиссләр тез бир заманда ҝүҹләнир вә бу заман сағлам дүшүнмәк чәтинләшир. Евләнмәк гәрарыны сырф бу һиссләр әсасында верәнләр чох вахт сонрадан бөјүк пешманчылыг чәкир (Мәс. 28:26). Ҝөрүшмәјә башлајан ики нәфәрин јахындан таныш олмамыш бир-биринә дәрин һиссләрини ифадә етмәси вә ја вәдләр вермәси һикмәтли дејил.

Мәсәлләр 22:3 ајәсиндә јазылыб: «Узагҝөрән бәланы дујуб ҝизләнәр, ҹаһил исә габаға ҝедиб зијан тапар». Танышлыг сајтларындан истифадә етмәјин һансы тәһлүкәләри вар? Әфсуслар олсун ки, бәзиләри танымадығы инсанларла онлајн таныш олуб ҝөрүшмәјә башлајандан сонра һәмин инсанын она фырылдаг ҝәлдијини баша дүшүб. Үстәлик, фырылдагчылар сахта һесаблар јарадараг садәлөвһ инсанларын пулуну мәнимсәјиб. Дәфәләрлә олуб ки, инсанлары бу ҹүр рәһмсизҹәсинә алдаданлар өзләрини Јеһованын Шаһиди кими гәләмә вериб.

Танышлыг сајтларынын башга тәһлүкәси дә вар. Кимин кимә ујғун ҝәлдијини мүәјјән етмәк үчүн алгоритмләр, башга сөзлә, ријази һесабламалар истифадә олунур. Амма бу ҹүр үсулларын ишә јарадығына даир һеч бир дәлил јохдур. Киминлә аилә гурмагла бағлы ҹидди гәрар вермәздән өнҹә инсанларын јаратдығы һансыса компүтер програмына етибар етмәк нә дәрәҹәдә һикмәтли олар? Һеч ријази һесабламалары Аллаһын Кәламындакы принсипләрә тај тутмаг олар? (Мәс. 1:7; 3:5—7).

Мәсәлләр 14:15 ајәсиндә белә бир принсип вар: «Садәлөвһ һәр сөзә инанар, узагҝөрән һәр аддымыны өлчүб-бичәр». Һансыса инсана ҝәләҹәк һәјат јолдашы ҝөзү илә бахмаздан өнҹә ону јахшы танымаг лазымдыр. Амма танышлыг сајтлары васитәсилә буну етмәк чох чәтиндир.  Бир-биринизин профилини ҝөрсәниз дә вә месажлашмаға хејли вахт сәрф етсәниз дә, демәк олармы ки, сиз һәмин инсаны јахшы таныјырсыныз? Елә инсанлар олуб ки, әсл мәһәббәти тапдыгларыны дүшүнүбләр, амма һәмин инсанла ҹанлы ҝөрүшәндән сонра онун һаггында дәһшәтли шејләр өјрәнибләр.

Мәзмурчу демишди: «Јаланчыларла отуруб-дурмурам, ич үзүнү ҝизләдәнләрә гајнајыб-гарышмырам» (Зәб. 26:4). Чохлары башгаларынын хошуна ҝәлмәк үчүн танышлыг сајтларында өзләри һаггында јалан мәлуматлар пајлашмаға нормал бахыр. Ола билсин, онлар әсл хасијјәтләрини ҝизләдирләр. Һәтта буну етмәсәләр дә, онлајн јазышма заманы инсанын мәнфи ҹәһәтләрини ҝөрмәк мүмкүн олмаја биләр. Һәмчинин нөвбәти суаллар үзәриндә дә дүшүнмәк лазымдыр: «Бәзиләри Јеһованын Шаһиди олдугларыны десәләр дә, доғруданмы, вәфтиз олунублар? Онлар руһани ҹәһәтдән јеткиндирләр? Јеһова илә сых мүнасибәтләри вар? Јығынҹагда јахшы ад газаныблар? Јохса башгалары үчүн пис нүмунәдирләр, һәтта пис дост һесаб олунурлар? (1 Кор. 15:33; 2 Тим. 2:20, 21). Јенидән аилә гурмаг үчүн Мүгәддәс Китаб әсаслары вар?» Бу шејләри билмәк чох ваҹибдир. Амма онлары јахшы таныјан Јеһованын Шаһидләри илә бу барәдә данышмамыш буну мүәјјән етмәк чәтин ола биләр (Мәс. 15:22). Иманда олмајан адамла аилә гурмагдан исә сөз ҝедә билмәз, Јеһованын һеч бир садиг хидмәтчиси буну ағлына белә ҝәтирмәз (2 Кор. 6:14; 1 Кор. 7:39).

Нәзәрә алсаг ки, танышлыг сајтларынын тәһлүкәси чохдур, ҝәләҹәк һәјат јолдашы тапмаг вә ону јахындан танымаг үчүн даһа јахшы үсуллардан истифадә етмәк лазымдыр. Бәс аилә һәјаты гурмаг истәјирсинизсә, јахшы һәјат јолдашыны һарадан тапа биләрсиниз? Бирҝә јығышмаг гадаған олунмајан вахтларда Јеһованын Шаһидләринин јығынҹаг ҝөрүшләриндә, бөјүк топлантыларда вә диҝәр тәдбирләрдә бир-бирини танымаг имканы олур.

Бирҝә топлашмағын мүмкүн олмадығы вахтларда, мәсәлән, COVID-19 пандемијасында олдуғу кими, биз јығынҹаг ҝөрүшләриндә иштирак етмәк үчүн електрон васитәләрдән истифадә едирик. Бу ҝөрүшләрдә субај Јеһованын Шаһидләри илә таныш олмаг имканы вар. Онларын јығынҹаг ҝөрүшләриндә неҹә иштирак етдијинә, шәрһ верәркән өз иманыны неҹә ифадә етдијинә фикир верә биләрсиниз (1 Тим. 6:11, 12). Һәмчинин јығынҹагдан сонра јарадылан әлавә отагларда бир-биринизлә сөһбәт едә биләрсиниз. Башга вахтларда исә бир груп Јеһованын Шаһиди илә виртуал үнсијјәт едәндә хошунуза ҝәлән инсанын башгалары илә неҹә рәфтар етдијини мүшаһидә едә биләрсиниз. Беләҹә, онун неҹә инсан олдуғуну ҝөрәҹәксиниз (1 Бут. 3:4). Вахт кечдикҹә ону даһа јахшы таныјандан сонра мүәјјән едә биләрсиниз ки, мәгсәдләриниз вә дәјәрләриниз үст-үстә дүшүрмү вә бир-бириниз үчүн јахшы һәјат јолдашы олаҹагсынызмы?

Субај инсан ҝәләҹәк һәјат јолдашы ахтараркән Мүгәддәс Китаб принсипләрини әлдә рәһбәр тутса, онда Мәсәлләр 18:22 ајәсиндә јазылан сөзләрин доғрулуғуна өзү шаһид олаҹаг. Орада јазылыб: «Јахшы арвад [јахуд әр] тапан инҹи тапыб, Јеһованын лүтфү онунладыр».