1. Рәгабәт руһу инсанлары нәләрә тәһрик едир?

БУ ҜҮН дүнјада инсанларын чоху бир-бириләри илә худбинҹәсинә рәгабәт апарыр. Мәсәлән, олур ки, бизнесмен нәјин баһасына олурса-олсун рәгибиндән үстүн олмаға чалышыр. Идманчы гәләбә газанмаг үчүн биләрәкдән рәгиб команданын ојунчусуна хәсарәт јетирир. Тәләбә танынмыш университетә дахил олмаг үчүн гәбул имтаһанларында фырылдаг ишләдир. Бир мәсиһи кими, биз баша дүшүрүк ки, бу ҹүр һәрәкәтләр јанлышдыр вә ҝүнаһлы бәдәнин әмәлләринә дахилдир (Гал. 5:19—21). Бәс елә ола биләрми ки, Јеһованын хидмәтчиси һеч өзү дә билмәдән јығынҹагда башгаларыны рәгабәтә тәһрик етсин? Бу, чох ваҹиб суалдыр, чүнки рәгабәт руһу баҹы-гардашларла арамыздакы бирлији поза биләр.

2. Бу мәгаләдә нәји мүзакирә едәҹәјик?

² Бу мәгаләдә баҹы-гардашларла арамызда рәгабәтә ҝәтириб чыхаран мәнфи хүсусијјәтләрдән данышаҹағыг. Һәмчинин гәдимдә јашамыш Аллаһын садиг хидмәтчиләринин нүмунәсинә нәзәр салаҹағыг. Онлар чәтин вәзијјәт јаранса да, рәгабәт руһуна јолухмамышдылар. Әввәлҹә исә ҝәлин ҝөрәк ҝөрдүјүмүз иши һансы нијјәтлә етдијимизи неҹә јохлаја биләрик.

3. Өзүмүзә һансы суаллары вермәлијик?

³ Јахшы олар ки, вахташыры нијјәтимизи јохлајаг. Нөвбәти суалларын үзәриндә дүшүнә биләрик: «Өзүмә гијмәти башгалары илә мүгајисә әсасында верирәм? Ҝөрдүјүм иши нәјә ҝөрә мүмкүн гәдәр јахшы ҝөрмәјә чалышырам: һамыдан, јахуд һансыса баҹы вә ја гардашдан даһа јахшы олмаг  үчүн, јохса Јеһованын јолунда әлимдән ҝәләни етмәк истәдијим үчүн?» Нәјә ҝөрә бу суалларын үзәриндә дүшүнмәлијик? Ҝөрүн Аллаһын Кәламында нә дејилир.

4. Галатијалылара 6:3, 4 ајәләриндә гејд олундуғу кими, нәјә ҝөрә өзүмүзү башгалары илә мүгајисә етмәмәлијик?

⁴ Мүгәддәс Китабда дејилир ки, биз өзүмүзү башгалары илә мүгајисә етмәмәлијик. (Галатијалылара 6:3, 4 ајәләрини охујун.) Чүнки өзүмүзүн башгасындан јахшы олдуғуну дүшүнсәк, гүрурланаҹағыг, башгасынын биздән даһа јахшы олдуғуну дүшүнсәк, руһдан дүшәҹәјик. Бу ики вәзијјәтин һеч бириндә сағлам дүшүнҹә јохдур (Ром. 12:3). Јунаныстанда јашајан Катерина * адлы баҹы дејир: «Өзүмү мәндән даһа ҝөзәл олан, даһа јахшы тәблиғ едән, башгалары илә даһа тез достлашан инсанларла мүгајисә едирдим. Нәтиҹәдә өзүмү дәјәрсиз һисс едирдим». Унутмајын, Јеһова бизи Өзүнә она ҝөрә ҹәлб етмәјиб ки, биз ҝөзәлик, јахшы данышыг габилијјәтимиз вә ја чохлу достларымыз вар. О ҝөрдү ки, биз Ону севә вә Оғлунун дедикләринә риајәт едә биләрик; бизи буна ҝөрә сечиб (Јәһ. 6:44; 1 Кор. 1:26—31).

5. Һан адлы гардашын нүмунәсиндән нә өјрәнирик?

⁵ Өзүмүзә нөвбәти суалы да вермәлијик: «Мәни һамы илә сүлһә ҹан атан инсан кими таныјырлар, јохса мүбаһисә едән инсан кими?» Ҝәлин Ҹәнуби Корејадан олан Һан адлы гардашын нүмунәсинә бахаг. Әввәлләр о, јығынҹагда мүәјјән мәсулијјәти оланлары өзүнә рәгиб ҝөрүрдү. О дејир: «Бу гардашлара мән тәнгиди јанашырдым вә дедикләри илә чох вахт разылашмырдым». Бу ағсаггалын һәрәкәти нәјә ҝәтириб чыхарды? «Мәним бу ҹүр әһвал-руһијјәм јығынҹагда бирлији позду», — дејә о етираф едир. Һанын бәзи достлары она сәһвини ҝөрмәјә көмәк етди. Һан өзүндә дәјишиклик етди вә инди онун бир ағсаггал кими, јығынҹаға бөјүк көмәји дәјир. Әҝәр биз ҝөрсәк ки, сүлһә ҹан атмаг әвәзинә, башгаларыны рәгабәтә тәһрик едирик, онда дәрһал һәрәкәтә кечмәлијик.

6. Галатијалылара 5:26 ајәсинә әсасән, һансы пис хүсусијјәтләр инсанда рәгабәт руһу јарада биләр?

⁶ Галатијалылара 5:26 ајәсини охујун. Һансы пис хүсусијјәтләр инсанда рәгабәт руһунун јаранмасына ҝәтириб чыхара биләр? Онлардан бири мәғрурлугдур. Мәғрур инсан тәкәббүрлүдүр вә анҹаг өзүнү дүшүнүр. Диҝәр мәнфи хүсусијјәт исә пахыллыгдыр. Пахыл инсан нәинки башгасынын саһиб олдуғу шеји арзулајыр, һәмчинин онун бу шејдән мәһрум олмасыны истәјир. Ҝөрүндүјү кими, пахыллыг нифрәтин бир нөвүдүр. Бу хүсусијјәтләри өзүмүздән тамамилә узаг тутмалыјыг!

7. Мәғрурлуғун вә пахыллығын зәрәрли олдуғуну нүмунә әсасында изаһ един.

⁷ Мәғрурлуг вә пахыллыг кими мәнфи хүсусијјәтләри тәјјарәнин јанаҹағыны чиркләндирән маддәләрә бәнзәтмәк олар. Ола билсин, тәјјарә һаваја галхаҹаг, амма бу чиркли маддәләр уҹбатындан јанаҹаг хәтләри тутула биләр вә нәтиҹәдә, тәјјарә енән анда мүһәррикин ҝүҹү зәифләјәҹәк вә беләҹә, тәјјарә гәзаја уғрајаҹаг. Ејнилә, ола билсин, инсан бир мүддәт Јеһоваја хидмәт едәҹәк, амма әҝәр о, мәғрур вә пахылдырса, бу онун мәһвинә ҝәтириб чыхара биләр (Мәс. 16:18). О, Јеһоваја хидмәт етмәји дајандыраҹаг, һәм өзүнә, һәм дә башгаларына зәрәр ҝәтирәҹәк. Бәс өзүмүзү мәғрурлуг вә пахыллыгдан неҹә горуја биләрик?

8. Мәғрурлуға неҹә галиб ҝәлә биләрик?

 ⁸ Мәғрурлугла, тәкәббүрлә мүбаризә апармаг үчүн һәвари Булусун филиппилиләрә дедији мәсләһәтә әмәл етмәлијик: «Һиккә илә, тәкәббүрлә һеч нә етмәјин. Әксинә, тәвазөкар олуб башгаларыны өзүнүздән үстүн сајын» (Филип. 2:3). Биз башгаларыны өзүмүздән үстүн сајырыгса, биздән даһа истедадлы, даһа габилијјәтли оланларла рәгабәт апармајаҹағыг. Әксинә, онлара ҝөрә севинәҹәјик, хүсусилә дә онлар бу габилијјәтләрини Јеһоваја хидмәтдә истифадә едәрәк Онун адына шәрәф ҝәтирирләрсә. Әҝәр онлар да, өз нөвбәсиндә, Булусун мәсләһәтинә әмәл етсәләр, биздәки ҝөзәл хүсусијјәтләри ҝөрәҹәкләр. Беләҹә, јығынҹагда бирлијин вә сүлһүн һөкм сүрмәсиндә һамымызын пајы олаҹаг.

9. Пахыллыгла неҹә мүбаризә апара биләрик?

⁹ Пахыллыгла мүбаризә апармаг үчүн тәвазөкар олмалыјыг, јәни мәһдудијјәтләримизин фәргиндә олмалыјыг. Тәвазөкар олсаг, өзүмүзүн һәр кәсдән даһа истедадлы, даһа баҹарыглы олдуғуну сүбут етмәјә чалышмајаҹағыг. Әксинә, биздән даһа баҹарыглы оланлардан нә исә өјрәнмәјә чалышаҹағыг. Мәсәлән, тәсәввүр един, јығынҹагда бир гардаш чох ҝөзәл натигдир. Ондан соруша биләрик ки, чыхышларыны неҹә һазырлајыр. Әҝәр һансыса баҹы јемәк биширмәји јахшы баҹарырса, бу саһәдә ондан мәсләһәт ала биләрик. Әҝәр һансыса ҝәнҹ гардаша өзүнә дост тапмаг чәтиндирсә, башгалары илә тез достлашмағы баҹарандан мәсләһәт ала биләр. Белә етсәк, биз пахыл олмајаҹағыг вә өз баҹарыгларымызы инкишаф етдирәҹәјик.

10. Ҹәдун һансы чәтинликлә үзләшмишди?

¹⁰ Ҝәлин Мәнәссә гәбиләсиндән олан Ҹәдунла Әфраим гәбиләсиндән олан кишиләр арасында баш верән бир һадисәјә нәзәр салаг. Јеһованын көмәјилә Ҹәдун вә 300 дөјүшчүсү мөһтәшәм бир гәләбә газанмышды. Бу онлары гүрурландыра биләрди. Әфраим гәбиләсиндән олан кишиләр Ҹәдунла ҝөрүшәндә ону тәрифләмәк әвәзинә, онунла далашырлар. Ҝөрүнүр, онларын шәнинә тохунмушду ки, Ҹәдун Аллаһын дүшмәнләринә  гаршы дөјүшмәк үчүн онлары лап әввәлдән дәвәт етмәјиб. Әфраимлиләр диггәтләрини гәбиләләринин ад-санына о гәдәр ҹәмләмишдиләр ки, даһа ваҹиб шеји унутмушдулар. Ҹәдун Аллаһын адыны уҹалтмышды вә Онун халгыны горумушду (Һак. 8:1).

11. Ҹәдун әфраимлиләрә неҹә ҹаваб верди?

¹¹ Ҹәдун тәвазөкарлыгла әфраимлиләрә деди: «Сизин еләдијинизин јанында мәним еләдијим нәдир ки?» Сонра о, Јеһованын әфраимлиләрә дајаг олдуғуну ҝөстәрмәк үчүн бир нүмунә чәкди. Ҹәдунун бу сөзләриндән сонра онлар «сакитләшдиләр» (Һак. 8:2, 3). О, Аллаһын халгы арасында сүлһү горумаг үчүн гүруруну бир гыраға гојмаға һазыр иди.

12. Әфраимлиләрдән вә Ҹәдунун нүмунәсиндән нә өјрәнирик?

¹² Бу һадисәдән нә өјрәнирик? Әфраимлиләрин һәрәкәтиндән өзүмүз үчүн дәрс ҝөтүрә биләрик ки, бизим үчүн Јеһованын адынын уҹалмасы өнәмли олмалыдыр, өз адымызын јох. Ҹәдунун нүмунәсинин исә аилә башчыларына вә ағсаггаллара көмәји дәјә биләр. Әҝәр етдијимиз һансыса бир һәрәкәт киминсә хошуна ҝәлмәјибсә, вәзијјәтә онун тәрәфиндән бахмаға чалышмалыјыг. Һәмчинин онда һансыса јахшы бир шејә диггәт јетириб, буна ҝөрә ону тәрифләјә биләрик. Бунун үчүн тәвазөкарлыг лазымдыр, хүсусилә дә онун сәһв олдуғу ҝөз габағындадырса. Амма сүлһү горумаг дүз чыхмағымыздан даһа ваҹибдир.

13. Һәннәнин һансы чәтинликләри вар иди вә о бунун өһдәсиндән неҹә ҝәлди?

¹³ Инди исә ҝәлин Һәннә илә баш верәнләрә нәзәр салаг. О, Әлгәна адлы бир лавили илә аилә гурмушду. Әлгәна ону чох севирди, амма онун башга бир арвады да вар иди. Ады Фәнинә иди. Әлгәна Һәннәни Фәнинәдән чох истәјирди. Лакин бир проблем вар иди. «Фәнинәнин ушаглары вар иди, Һәннәнин исә ушаглары олмурду». Буна ҝөрә дә Фәнинә Һәннәни «әлә салыб дилхор едирди». Мүгәддәс Китабда дејилир ки, Һәннә «ағлајыр вә чөрәк јемирди» (1 Ишм. 1:2, 6, 7). Амма һеч јердә охуја билмәрик ки, Һәннә неҹәсә Фәнинәдән гисас алмаг истәјирди. О өз үрәјинин дәрдини Јеһоваја ачды вә әмин иди ки, Јеһова һәр шеји өз јолуна гојаҹаг. Фәнинәнин Һәннәјә мүнасибәти дәјишди? Мүгәддәс Китабда бу һагда һеч нә јазылмајыб. Бир шеји билирик ки, Һәннә јенидән гәлб раһатлығы тапды вә ону итирмәди. «Артыг онун чөһрәсиндә кәдәр олмады» (1 Ишм. 1:10, 18).

14. Һәннәнин нүмунәсиндән нә өјрәнирик?

¹⁴ Һәннәдән нә өјрәнирик? Әҝәр кимсә сизинлә рәгабәт апарырса, неҹә давранаҹағыныз сизин әлиниздәдир. Еһтијатлы олун ки, сиз дә онунла рәгабәт апармаға башламајасыныз. Пислијә писликлә  ҹаваб вермәјин, һәмин инсанла сүлһ јаратмаға чалышын (Ром. 12:17—21). Һәтта о, мүнасибәтини дәјишмәсә дә, сиз гәлб раһатлығынызы горујаҹагсыныз.

15. Аполлосун вә Булусун һансы ортаг ҹәһәтләри вар иди?

¹⁵ Сонда исә ҝәлин шаҝирд Аполлосун вә һәвари Булусун нүмунәсинә нәзәр салаг. Ҝөрәк онлардан нә өјрәнә биләрик. Онларын һәр икиси Мүгәддәс Китабы мүкәммәл билирди. Икисини дә һамы таныјырды. Икиси дә баҹарыглы мүәллим иди вә һәр икиси чохлу шаҝирд һазырламышды. Амма бири диҝәринә рәгиб ҝөзү илә бахмырды.

16. Аполлос неҹә инсан иди?

¹⁶ Аполлос исҝәндәријјәли иди. Биринҹи әсрдә Исҝәндәријјә елм оҹағы сајылырды. Аполлос «чох ҝөзәл натиг иди вә Мүгәддәс Јазылары јахшы билирди» (Һәв. 18:24). О, Коринфдә оларкән јығынҹагдакы бәзи баҹы-гардашлар ону башга гардашлардан, һәтта Булусдан да чох бәјәндикләрини ачыг-ајдын ҝөстәрирдиләр (1 Кор. 1:12, 13). Аполлос парчаланма јарадан бу баҹы-гардашлары дәстәкләди? Онун белә етдијини һеч ағлымыза белә ҝәтирә билмәрик. Аполлос Коринфдән ҝедәндән бир мүддәт сонра Булус ону јенидән ора гајытмаға тәшвиг етмишди (1 Кор. 16:12). Булус һисс етсәјди ки, Аполлос парчаланма јарадыр, һеч вахт ондан белә шеј хаһиш етмәзди. Ајдындыр ки, Аполлос өз баҹарыгларындан мүждәни тәблиғ етмәк вә баҹы-гардашлары мөһкәмләндирмәк үчүн истифадә едирди. Шүбһә јохдур ки, о, тәвазөкар инсан иди. Мәсәлән, Мүгәддәс Китабын һеч бир јериндә јазылмајыб ки, Аквилас вә Прискилла она «Аллаһын јолуну даһа дәгигликлә» изаһ едәндә о бундан инҹисин (Һәв. 18:24—28).

17. Булус јығынҹагда сүлһүн олмасы үчүн нә едирди?

 ¹⁷ Һәвари Булус Аполлосун ҝөрдүјү бүтүн јахшы ишләрдән аҝаһ иди. Амма Булус нараһат дејилди ки, инсанлар Аполлосун ондан даһа јахшы олдуғуну дүшүнәрләр. Онун Коринф јығынҹағына јаздығы мәктубундан ҝөрмәк олар ки, о, тәвазөкар, садә вә дәрракәли инсан иди. «Мән Булусун шаҝирдијәм» дејән инсанларын сөзләри она хош ҝәлә биләрди. Амма о, бүтүн диггәти Јеһова Аллаһа вә Иса Мәсиһә јөнәлтди (1 Кор. 3:3—6).

18. 1 Коринфлиләрә 4:6, 7 ајәләриндән Аполлос вә Булус һагда нә өјрәнирик?

¹⁸ Аполлосун вә Булусун нүмунәсиндән нә өјрәнә биләрик? Ола билсин, Јеһованын јолунда чох ишләр ҝөрүрүк вә чох адама вәфтизә доғру ирәлиләмәјә көмәк етмишик. Амма баша дүшүрүк ки, бүтүн бунлара Јеһованын көмәји сајәсиндә наил олмушуг. Аполлос вә Булусун нүмунәсиндән бир шеј дә өјрәнирик. Јығынҹагда нә гәдәр чох мәсулијјәтимиз варса, бир о гәдәр чох сүлһ јаратмаг имканымыз вар. Миннәтдарыг ки, мәсул гардашлар арамызда сүлһүн вә бирлијин олмасына чалышырлар. Бунун үчүн онлар өз мәсләһәтләрини Аллаһын Кәламына әсасландырырлар вә диггәти өзләринә јох, бизим үчүн өрнәк олан Мәсиһ Исаја ҹәмләјирләр. (1 Коринфлиләрә 4:6, 7 ајәләрини охујун.)

19. Һәр биримиз нә едә биләрик? (« Башгаларыны рәгабәтә тәһрик етмәјин» адлы чәрчивәјә бахын.)

¹⁹ Јеһова һәр биримизә мүәјјән истедад вә баҹарыг вериб. Биз бу әнамларымыздан бир-биримизә хидмәт етмәк үчүн истифадә етмәлијик (1 Бут. 4:10). Ола биләр ки, етдикләримиз бизә хырда бир шеј кими ҝәлсин. Амма палтар тикәркән кичик тикишләр парчаны бир-биринә бәркитдији кими, бизим хырда ишләримиз дә јығынҹагда бирлијин олмасына көмәк едир. Ҝәлин бундан сонра да вар ҝүҹүмүзлә чалышаг ки, биздә зәррә гәдәр дә олса, рәгабәт руһу олмасын. Јығынҹагда сүлһүн вә бирлијин олмасы үчүн әлимиздән ҝәләни едәк (Ефес. 4:3).