Атам килсә ағсаггалы иди. Буна ҝөрә дә һәр базар баҹымла мәни килсәнин нәздиндә олан мәктәбә ҝөндәрирди. Даһа сонра саат 11-дә онунла бирликдә килсә хидмәтинә ҝедирдик. Ҝүнорта исә анам бизи ибадәт евинә апарырды. Биз бу ики динин арасындакы фәрги чох ајдын ҝөрүрдүк.

Анам јени етигады барәдә чохдандыр достлуг етдији Боб вә Мерион Һачесон аиләсинә данышды. Онлар да Јеһованын Шаһиди олдулар. Боб вә Мерион 1958-ҹи илдә мәни үч оғуллары илә бирликдә Нју-Јорк шәһәриндә кечирилән топлантыја апардылар. Бу, сәккиз ҝүн давам едән «Аллаһын ирадәси» адлы бејнәлхалг топланты иди. Инди баша дүшүрәм ки, мәни өзләри илә апармаг үчүн онлар нә гәдәр зәһмәт чәкибләр. Бу топланты һәјатымда ән јадда галан һадисәләрдән бири олду.

Јенијетмәлик илләримдә биз фермада јашајырдыг. Һејванлара гуллуг етмәкдән хошум ҝәлирди. Буна ҝөрә дә ағлыма гојмушдум ки, бајтар олаҹағам. Анам буну јығынҹағымыздакы ағсаггала деди. Гардаш мәнимлә меһрибан данышыб изаһ етди ки, биз ахырзаманда јашајырыг (2 Тим. 3:1). Сорушду ки, илләрими университетә сәрф етмәјим Јеһова илә мүнасибәтимә неҹә тәсир едәҹәк? Бу сөһбәтдән сонра университетдә тәһсил алмаг истәјимдән ваз кечдим.   

 Амма һеј фикирләширдим ки, орта мәктәби битирәндән сонра һансы ишин гулпундан јапышым. Дүздүр, һәр һәфтәсону хидмәтә чыхырдым. Амма тәблиғ етмәкдән хошум ҝәлмирди вә өнҹүл олмаг фикрим јох иди. Иманыма шәрик олмајан атам вә әмим мәнә дејирдиләр ки, Торонтода апарыҹы бир сығорта ширкәтиндә ишә дүзәлим. Әмим орада јүксәк вәзифәдә ишләјирди, буна ҝөрә дә мән бу ишә разылашдым.

Торонтода оланда вахтымын чоху ишә ҝедирди. Һәм дә иманыма шәрик олмајан инсанларла отуруб-дурурдум. Буна ҝөрә дә јығынҹагда, хидмәтдә мүнтәзәм иштирак едә билмирдим. Әввәл-әввәл Јеһованын Шаһиди олмајан бабамла јашајырдым. О өләндән сонра исә галмаг үчүн башга јер тапмалы идим.

Боб вә Мерион мәнә өвладлары кими јанашырдылар. Буна ҝөрә дә онлара көчмәји тәклиф етдиләр. Онлар мәнә Јеһова илә достлуғуму мөһкәмләндирмәјә көмәк етдиләр. 1960-ҹы илдә оғуллары Ҹон илә бирликдә вәфтиз олундум. Ҹон өнҹүл кими хидмәт етмәјә башлады вә бу мәни тәшвиг етди ки, хидмәтдә даһа чох иштирак едим. Руһани инкишафым гардашларын диггәтиндән јајынмады. Бир мүддәт сонра онлар мәни Теократик Хидмәт Мәктәбинин нәзарәтчиси тәјин етдиләр a.

1966-ҹы илдә мән Ранди Берҹлә аилә һәјаты гурдум. О, бөјүк һәвәслә өнҹүл кими хидмәт едирди вә тәләбат олан әразијә көчмәк арзусунда иди. Сәјјар нәзарәтчи бизимлә јахындан марагланырды. О бизи тәшвиг етди ки, Ориллијадакы (Онтарио) јығынҹаға көмәк едәк. Биз дәрһал јығышыб ора көчдүк.

Ориллијаја көчән кими мән дә Рандијә гошулуб өнҹүл кими хидмәт етмәјә башладым. Онун хидмәтә олан шөвгү артыг мәндә дә һәвәс ојатмышды. Бир өнҹүл кими пүхтәләшмәјә чалышдыгҹа ҝөрүрдүм ки, Мүгәддәс Китабдан даһа јахшы истифадә едирәм вә инсанлар һәгигәти дәрк едир. Сөзсүз ки, буна ҝөрә севинирдим. Ән бөјүк хошбәхтлик дә о иди ки, Ориллијада јашајан бир әр-арвада һәјатларыны дәјишиб Јеһованын хидмәтчиси олмаға көмәк етмишик.

Бир дәфә Торонтоја ҝедәндә Бејтелдә хидмәт едән Арнолд Макнамара адлы гардашла таныш олдум. О мәндән сорушду: «Хүсуси өнҹүл олмаг истәјәрдиниз?» Мән дәрһал дедим: «Әлбәттә. Квебекдән башга һара десәниз ҝедәрик». Һәмин вахт мән өлкәдә олан мүәјјән сијаси фикирләрин тәсири алтында белә демишдим. Канаданын инҝилисдилли әһалиси Квебек әјаләтиндә јашајан франсыздилли әһалијә пис мүнасибәт бәсләјирди. О вахт Квебекдә мүстәгиллик уғрунда сепаратчы һәрәкат баш галдырмышды.

Арнолд деди: «Инди филиал хүсуси өнҹүлләри јалныз Квебекә тәјин едир». Мән дәрһал ора ҝетмәјә разылыг вердим. Билирдим ки, орада хидмәт етмәк Рандинин көнлүндән кечир. Бу бизим һәјатда вердијимиз ән ҝөзәл гәрарлардан бири иди.

Биз бешһәфтәлик франсыз дили курсуна ҝетдик. Сонра исә Ранди илә мән башга бир әр-арвадла бирликдә Монреалдан тәхминән 540 километр шимал-шәргдә јерләшән Римуски шәһәринә јола дүшдүк. Дили өјрәнмәјә һәлә чох вар иди. Бир дәфә јығынҹагда еланлары охујанда буна даһа да әмин олдум. Мән демәк истәјирдим ки, нөвбәти топлантыда чохлу «австријалы гонагларымыз» олаҹаг. Амма охшар сәсләнән сөз ишләдиб демишдим ки, бизим чохлу «дәвәгушу гонагларымыз» олаҹаг.

Римускидә дөрдүмүзлә јанашы дөрд субај баҹы вә ики гызлары илә бирликдә Һјубердолар аиләси хидмәт едирди. Бу аилә једди јатаг отағы олан бөјүк бир еви кирајә ҝөтүрмүшдү вә орада јашајан бүтүн өнҹүлләр кирајә пулуну өдәмәјә көмәк едирди. Биз бу еви «Ағ ев» адландырырдыг. Чүнки бу евин фасады ағ иди вә ағ сүтунлары вар иди. Адәтән бу евдә 12—14 нәфәр јашајырды. Ранди илә мән хүсуси өнҹүл олдуғумуз үчүн һәм сәһәр, һәм ҝүнорта, һәм дә ахшам хидмәтә чыхырдыг. Буна ҝөрә дә севинирдик ки, хидмәт етмәк үчүн һәмишә, һәтта сојуг гыш ахшамларында да әмәкдашымыз олурду.

Бу садиг өнҹүлләрлә о гәдәр достлашдыг ки, артыг бир аилә кими идик. Биз тез-тез оҹағын әтрафында топлашырдыг. Бәзән «вареники ҝүнләри» тәшкил едирдик. Һәмин ҝүн һамымыз мүхтәлиф ичликләри олан вареникиләр һазырлајырдыг. Гардашлардан бири мусигичи иди, буна ҝөрә дә чох вахт шәнбә ҝүнләри ахшам охујуб ојнајырдыг.

Римуски чох бәһрәли әрази иди. Беш илин ичиндә хејли шаҝирд руһән инкишаф едиб вәфтиз олунду. Јығынҹагда тәблиғчиләрин сајы һарадаса 35-ә чатмышды.

Квебекдә биз бир тәблиғчи кими пүхтәләшдик. Јеһова бизә һәм тәблиғ ишиндә дајаг олурду, һәм дә мадди еһтијаҹларымызын гејдинә галырды. Бундан әлавә, биз франсыздилли инсанлары, онларын дилини, мәдәнијјәтини севмәјә башладыг. Бунун нәтиҹәсиндә биз диҝәр мәдәнијјәтләри дә севмәјә башладыг (2 Кор. 6:13).

Ҝөзләнилмәдән филиал бизә Нју-Брансуикин шәрг саһилиндә јерләшән Тракадијә көчмәји тәклиф етди. Бу, асан дејилди. Биз тәзәликҹә мәнзилин кирајәси илә бағлы мүгавилә имзаламышдыг. Һәмчинин мәктәбдә һәфтәдә бир нечә саат мүәллим ишләмәк үчүн мүгавилә бағламышдым. Бундан әлавә, шаҝирдләримизин бәзиләри тәзәликҹә тәблиғчи олмушдулар. Ибадәт евинин тикинтиси дә баша чатмамышды, һәлә ишин јарысы ҝөрүлмүшдү.

Бүтүн һәфтәсону бу барәдә дуа етдик вә Тракадинин неҹә бир јер олдуғуну ҝөрмәк үчүн ора ҝетдик. Бура Римускидән хејли фәргләнирди. Јеһова бизим бурада олмағымызы истәјирди, буна ҝөрә дә бура көчмәк гәрарына ҝәлдик. Биз Јеһованы сынадыг вә ҝөрдүк ки, О, һәр бир манеәни арадан галдырды (Мәл. 3:10). Һәмишәки кими Рандинин руһән  мөһкәм олмасы, фәдакарлығы вә јумор һисси бизим көчмәјимизи асанлашдырды.

Јени јығынҹағымызда ҹәми бир ағсаггал вар иди. Онун ады Роберт Рос иди. О, јолдашы Линда илә өнҹүл кими хидмәт едирди. Илк ушаглары дүнјаја ҝәләндән сонра да онлар бурада галмаг гәрарына ҝәлдиләр. Көрпә ушаглары ола-ола онлар бизә гонагпәрвәрлик ҝөстәрирдиләр вә тәблиғ ишиндә шөвглә чалышырдылар. Бу бизи чох руһландырырды.

Тракадидә ики ил өнҹүл кими хидмәт етдик. Сонра исә јенә дә бизә ҝөзләнилмәз тәклиф ҝәлди. Биз сәјјар хидмәтә дәвәт олундуг. Једди ил инҝилисдилли рајонларда хидмәт етдик. Сонра исә Квебекдә франсыздилли рајона тәјин олундуг. Квебекдәки вилајәт нәзарәтчимиз Леонс Крапо b нитгләримә ҝөрә һәмишә мәни тәрифләјәрди. Амма тәрифләјәндән сонра һәр дәфә мәнә белә бир суал верәрди: «Сәнҹә, нә едә биләрдин ки, нитгин даһа практики олсун?» Гардашын шәхсән мәнимлә марагланмасы мәнә көмәк етди ки, нитгләрим даһа конкрет вә ајдын олсун.

Мәним ән јадда галан тәјинатларымдан бири 1978-ҹи илдә олуб. Һәмин вахт Монреалда кечирилән «Галиб ҝәлән иман» адлы бејнәлхалг топлантыда Әрзаг тәҹһизаты шөбәсиндә хидмәт едирдим. Топлантыја 80 000 нәфәрин ҝәләҹәји ҝөзләнилирди. Үстәлик, онлар үчүн јемәји јени үсулла һазырламалы идик. Һәр шеј јени иди: һәм аваданлыг, һәм менју, һәм дә һазырланма үсулу. Бизим 20 әдәд бөјүк сојудуҹу гошгумуз вар иди. Амма бәзән онлар ишләмирди. Үстәлик, топлантыдан әввәлки ҝүн стадионда идман тәдбири планлашдырылмышды. Буна ҝөрә һазырлыг ишләри ҝөрмәк үчүн биз ҝеҹәјарысындан тез стадиона дахил ола билмәздик. Һәмчинин сәһәр јемәјини һазырламаг үчүн собалары алагаранлыгда јандырмалы идик. Һамымыз чох јорғун идик. Амма көмәк едән баҹы-гардашларын зәһмәткешлијиндән, јеткинлијиндән, јумор һиссиндән өзүм үчүн дәрс ҝөтүрдүм. Биз чох јахын олдуг. Онларла достлуғумуз индијә кими давам едир. Квебекдә кечирилән бу тарихи топлантыда олмаг бөјүк бир хошбәхтлик иди. Ахы 1940—1950-ҹи илләрдә бу әјаләтдә амансыз тәгибләр олмушду.

Монреалда кечирилән бөјүк топлантылар заманы мән диҝәр нәзарәтчиләрдән чох шеј өјрәндим. Бир ил топланты бүросуна һал-һазырда Рәһбәрлик Шурасында хидмәт едән Дејвид Сплејн гардаш нәзарәт  етди. Нөвбәти топланты заманы һәмин мәсулијјәт мәнә һәвалә олунанда Дејвид гардаш мәнә ҹанла-башла дәстәк олду.

Ранди вә мән 36 ил сәјјар хидмәтдә олдуг. 2011-ҹи илдә мәнә Јығынҹаг Ағсаггаллары үчүн Мәктәбдә мүәллим кими хидмәт етмәк тәклиф олунду. Ранди илә мән ики ил әрзиндә 75 чарпајы дәјишмишик. Амма һәр бир гурбаны вермәјә дәјәрди. Һәр һәфтәнин сонунда ағсаггалларын үрәји миннәтдарлыгла долурду, чүнки ҝөрүрдүләр ки, Рәһбәрлик Шурасы онларын руһән мөһкәм олмасы үчүн чох чалышыр.

Сонралар мән Падшаһлыг Мүждәчиләри Мәктәбиндә дәрс демәјә башладым. Шаҝирдләр чох вахт мәктәбин сых графикиндән јорулурдулар. Онлар ҝүн әрзиндә једди саат синифдә отурмалы идиләр, ахшам үч саат ев тапшырығыны етмәли идиләр, һәлә һәфтәдә дөрд-беш дәфә дә шаҝирд тапшырыглары вар иди. Мән вә о бири мүәллим шаҝирдләрә изаһ едирдик ки, Јеһованын көмәји олмадан онлар бүтүн бунларын өһдәсиндән ҝәлә билмәзләр. Шаҝирдләрин тәәҹҹүбүнү һеч вахт унутмарам: онлар Јеһоваја ҝүвәнмәләри сајәсиндә мүмкүнсүз ҝөрдүкләри шејләрдән дә артығыны едирдиләр.

Анам һәр кәсә ајры-ајрылыгда диггәт ҝөстәрирди. Бунун сајәсиндә онун дәрс кечдији шаҝирдләр руһани ҹәһәтдән инкишаф едирдиләр. Һәтта атамын да һәгигәтә мүнасибәти јумшалды. Анам өләндән үч ҝүн сонра атам бизи мат-мәәттәл гојду. О, ачыг нитги динләмәк үчүн ибадәт евинә ҝәлди. Атам та о вахтдан 26 ил әрзиндә ибадәт ҝөрүшләриндә иштирак етди. Дүздүр, атам һеч вахт вәфтиз олунмады, амма ағсаггаллар дејирди ки, о, һәр һәфтә јығынҹаға һамыдан тез ҝәлир.

Анам өз өвладларына да ҝөзәл нүмунә олуб. Баҹыларымын үчү дә һәјат јолдашлары илә бирликдә Јеһоваја сәдагәтлә хидмәт едир. Онларын икиси филиалда хидмәт едир: бири Португалијада, бири дә Һаитидә.

Һал-һазырда Ранди илә мән Һамилтонда (Онтарио) хүсуси өнҹүлүк. Сәјјар хидмәтдә оланда биз баҹы-гардашларла онларын тәкрар сөһбәтләринә, Мүгәддәс Китаб дәрсләринә ҝедирдик. Амма инди бизим өз шаҝирдләримиз вар вә онларын руһани инкишафыны ҝөрмәк чох ҝөзәл бир һиссдир. Биз јени јығынҹагдакы баҹы-гардашларла јахын дост олмушуг. Ҝөрүрүк ки, Јеһова онлара һәм хош ҝүнләриндә, һәм дар ҝүнләриндә дајаг олур. Бу бизи чох руһландырыр.

Бу илләр әрзиндә бизә ҝөстәрилән диггәтә, гајғыја ҝөрә бүтүн баҹы-гардашлара чох миннәтдарыг. Биз дә өз нөвбәмиздә башгалары илә үрәкдән марагланмышыг, онлары Јеһованын јолунда даһа чох иш ҝөрмәјә тәшвиг етмишик (2 Кор. 7:6, 7). Мәсәлән, бир аиләдә ана, оғул вә гызы өнҹүл кими хидмәт едирди. Мән атадан сорушдум: «Нә вахтса өнҹүл олмаг барәдә дүшүнмүсән?» О деди ки, үч нәфәрин өнҹүл кими хидмәт етмәсинә дәстәк олур. Мән дә она белә бир суал вердим: «Сән онлара Јеһовадан даһа јахшы дәстәк ола биләрсән?» Бу сөзләрлә ону тәшвиг етдим ки, аиләсинин дујдуғу севинҹи о да дадсын. Бу сөһбәтдән алты ај кечмәмиш о, өнҹүл олду.

Ранди вә мән «ҝәләҹәк нәслә» Јеһованын «һејрәт доғуран ишләри» барәдә данышмаға давам едирик (Зәб. 71:17, 18). Үмид едирик ки, бизим кими онлар да Јеһоваја хидмәтдән севинҹ дујаҹаглар.