1. Мүгәддәс Китабы арашдырмаға башлајанда һансы һәгигәтләри өјрәнмишдиниз?

 МҮГӘДДӘС КИТАБЫ илк өјрәндијиниз вахтлары хатырлајырсыныз? Ола билсин, Аллаһын адынын олдуғуну биләндә тәәҹҹүбләнмишдиниз. Аллаһын ҹәһәннәм одунда инсанлара әзаб вермәдијини өјрәнмишдиниз вә үрәјиниз хејли раһатлашмышды. Үстәлик, үмидиниз јаранмышды ки, јахынларыныз дириләҹәк вә онларла бирликдә јер үзүндә ҹәннәтдә јашајаҹагсыныз.

2. Мүгәддәс Китабы өјрәнәндән бәри һансы саһәләрдә инкишаф етмисиниз? (Ефеслиләрә 5:1, 2).

² Аллаһын Кәламыны өјрәндикҹә Јеһоваја мәһәббәтиниз артырды. Бу мәһәббәт сизи өјрәндикләринизә ујғун јашамаға тәшвиг етди. Мүгәддәс Китабдакы принсипләр әсасында даһа јахшы гәрарлар вермәјә башладыныз. Аллаһы разы салмаг истәдијиниз үчүн дүшүнҹәниздә, давранышынызда дәјишиклик етдиниз. Ушаг валидејнинә бәнзәмәјә чалышдығы кими, сиз дә сәмави Атаныза бәнзәмәјә чалышырдыныз. (Ефеслиләрә 5:1, 2 ајәләрини охујун.)

3. Һансы суалларын үзәриндә дүшүнә биләрик?

³ Нөвбәти суалларын үзәриндә дүшүнүн: «Јеһоваја мәһәббәтим вәфтиз олунанда ҝүҹлү иди, јохса инди? О вахтдан бәри Јеһоваја даһа чох бәнзәјәрәк баҹы-гардашлара мәһәббәт ҝөстәрирәм?» Әввәлки мәһәббәтинизин сојудуғуну һисс едирсинизсә, руһдан дүшмәјин. Бу, биринҹи әсрдәки мәсиһиләрлә дә баш вермишди, амма Иса онлардан үмидини үзмәди. О биздән дә үмидини үзмүр (Вәһј 2:4, 7). Иса билир ки, биз һәгигәти өјрәнәндә дујдуғумуз мәһәббәти јенидән аловландыра биләрик.

4. Бу мәгаләдә нә һагда данышаҹағыг?

 ⁴ Бу мәгаләдә өјрәнәҹәјик ки, Јеһоваја вә инсанлара мәһәббәтимизи неҹә артыра биләрик. Сонра исә бунун бизә вә башгаларына һансы немәтләр ҝәтирдији һагда данышаҹағыг.

5, 6. Хидмәти бојунҹа Булус һансы чәтинликләрлә үзләшмишди вә Јеһоваја хидмәтини давам етдирмәјә она нә көмәк етмишди?

⁵ Һәвари Булус Јеһоваја хидмәт етмәкдән севинҹ дујурду, амма бу о демәк дејил ки, онун чәтинликләри јох иди. Булус тез-тез узун сәјаһәтләрә чыхырды. Амма һәмин дөврдә сәјаһәт етмәк һеч дә асан дејилди. О, бәзән «чајларда тәһлүкә» илә, «гулдурларын әлиндән тәһлүкә» илә үзләширди. Һәтта елә олурду ки, дүшмәнләри ону дөјүрдү (2 Кор. 11:23—27). Бәзән исә Булус баҹы-гардашларын уғрунда чәкдији зәһмәтин гаршылығында һеч «чох сағ ол» да ешитмирди (2 Кор. 10:10; Филип. 4:15).

⁶ Бәс Булуса хидмәтини давам етдирмәјә нә көмәк етмишди? О һәм Мүгәддәс Јазылардан охудугларындан, һәм дә шәхси тәҹрүбәсиндән Јеһова һагда чох шеј өјрәнмишди. Булус әмин олмушду ки, Јеһова Аллаһ ону севир (Ром. 8:38, 39; Ефес. 2:4, 5). Елә о өзү дә Јеһованы севирди. Буну мүгәддәсләрә хидмәт етмәклә ҝөстәрирди (Ибр. 6:10).

7. Јеһоваја севҝимизи артырмағын бир јолу һансыдыр?

⁷ Биз Аллаһа севҝимизи неҹә артыра биләрик? Онун Кәламыны ҹидд-ҹәһдлә мүталиә етмәклә. Чалышын охудуғунуз һәр һиссәдән Јеһова һаггында нәсә өјрәнәсиниз. Нөвбәти суалларын үзәриндә дүшүнүн: «Бу ајәләрдән Јеһованын мәни севдији неҹә ҝөрүнүр? Охудуғума әсасән мәним Јеһованы севмәк үчүн һансы әсасым вар?»

8. Дуа Јеһоваја мәһәббәтимизи артырмаға неҹә көмәк едир?

⁸ Јеһоваја мәһәббәтимизи артырмағын диҝәр јолу һәр ҝүн дуа едиб үрәјимизи Она ачмагдыр (Зәб. 25:4, 5). Јеһова да дуаларымызы ҹавабсыз гојмајаҹаг (1 Јәһ. 3:21, 22). Асијада јашајан Кән b адлы баҹы дејир: «Әввәлләр Аллаһа севҝим алдығым биликләрә әсасланырды. Амма сонрадан Јеһованын дуаларыма ҹаваб вердијини ҝөрдүкҹә Ону үрәкдән севмәјә башладым. Јеһованы севдијим үчүн истәјирдим Ону разы салан ишләри ҝөрүм».

9. Тимутинин баҹы-гардашлара мәһәббәтини артырдығы нәдән ҝөрүнүрдү?

⁹ Булус тәблиғ сәјаһәтләринин бириндә Тимути адлы бир ҝәнҹлә таныш олур. Тимути һәм Јеһованы, һәм дә инсанлары чох севирди. Ҝөрүн Булус бир нечә ил сонра филиппилиләрә Тимути барәдә нә демишди: «Онун кими ҹан-дилдән сизин гејдинизә галаҹаг башга һеч кимим јохдур» (Филип. 2:20). Булус бурада Тимутинин натиглик, тәшкилатчылыг габилијјәтиндән данышмырды. О, Тимутинин баҹы-гардашлары нә гәдәр севдијини ҝөрүрдү вә елә јәгин ки, онун мәһз бу хүсусијјәтинә һејран олмушду. Шүбһәсиз ки, Тимутинин хидмәт етдији јығынҹаглар онун зијарәтләрини сәбирсизликлә ҝөзләјирдиләр (1 Кор. 4:17).

10. Анна илә һәјат јолдашы баҹы-гардашлары чох истәдикләрини неҹә ҝөстәрмишдиләр?

¹⁰ Биз дә иман баҹы-гардашларымыза көмәк етмәк үчүн јоллар ахтарырыг (Ибр. 13:16). Ҝәлин өтән мәгаләдә ады чәкилән Анна баҹынын нүмунәсинә бахаг.  Шиддәтли гасырғадан сонра о, јолдашы илә бирликдә бир мәсиһи аиләјә баш чәкди. Ҝөрдүләр ки, бу аиләнин евинин дамы учуб, бу сәбәбдән тәмиз палтарлары да галмајыб. Анна дејир: «Биз онларын палтарларыны евимизә апарыб јудуг, үтүләдик, гатладыг вә ҝери гајтардыг. Бу бизим үчүн чәтин бир шеј дејилди. Амма бундан сонра биз һәмин аилә илә мөһкәм дост олдуг вә бу достлуг бу ҝүнә гәдәр давам едир». Анна вә һәјат јолдашы баҹы-гардашлары севдикләри үчүн онлара көмәк етмишдиләр (1 Јәһ. 3:17, 18).

11. а) Инсанлара мәһәббәт ҝөстәрмәјимиз онлара неҹә тәсир едә биләр? б) Мәсәлләр 19:17 ајәсинә әсасән Јеһова башгаларына мәһәббәт ҝөстәрмәјимизә неҹә јанашыр?

¹¹ Биз башгаларына хејирхаһлыг вә севҝи ҝөстәрәндә онлар ҝөрүрләр ки, биз Јеһоваја бәнзәмәјә чалышырыг. Ола билсин, онлар бизә һеч ағлымыза ҝәлмәјән гәдәр миннәтдар олсунлар. Јухарыда ады чәкилән Кән она көмәк едән кәсләри хош һиссләрлә хатырлајыр. О дејир: «Мәни хидмәтә апаран бүтүн баҹылара о гәдәр миннәтдарам ки! Онлар ҝәлиб мәни евдән ҝөтүрүрдүләр, мәни гәлјаналтыја вә ја наһара дәвәт едирдиләр вә сонра евә ҝәтирирдиләр. Инди баша дүшүрәм ки, бунлары етмәк үчүн онлар нә гәдәр әзијјәт чәкибләр. Үстәлик, бүтүн бунлары үрәкдән едирдиләр». Тәбии ки, етдикләримизә ҝөрә һәр кәс миннәтдарлығыны билдирмәјәҹәк. Кән она көмәк едәнләр барәдә белә дејир: «Каш, мәнә етдикләри бу гәдәр јахшылығын хәҹаләтиндән чыха биләрдим. Һејиф ки, бу баҹыларын һарада јашадығыны билмирәм. Амма Јеһова билир вә мән дуа едирәм ки, Јеһова онлара бунун әвәзини версин». Кән һаглыдыр. Јеһова бизим башгалары үчүн етдијимиз ән хырда јахшылығы белә ҝөрүр. О буна  дәјәрли бир гурбан вә әвәзини верәҹәји бир борҹ кими бахыр. (Мәсәлләр 19:17 ајәсини охујун.)

12. Гардашлар јығынҹаға севҝиләрини неҹә ҝөстәрә биләрләр? (Һәмчинин шәкилләрә бахын.)

¹² Әҝәр гардашсынызса, баҹы-гардашлара мәһәббәт ҝөстәрмәк, онлара көмәк етмәк үчүн нәләр едә биләрсиниз? Ҹордан адлы ҝәнҹ гардаш бир дәфә ағсаггалындан сорушмушду ки, јығынҹаг үчүн нәләр едә биләр. Ағсаггал ону индијә кими етдији инкишафа ҝөрә тәрифләди вә даһа чох шеј едә билмәси үчүн бәзи төвсијәләр верди. Она мәсләһәт ҝөрдү ки, ибадәт евинә тез ҝәлиб һамыны саламласын. Ҝөрүш заманы шәрһ версин, тәблиғ групу илә мүнтәзәм олараг әмәкдашлыг етсин вә дүшүнсүн ки, кимә неҹә көмәк етмәк олар. Ҹордан бу мәсләһәтә әмәл етди. Бунун сајәсиндә о бу саһәләрдә даһа да пүхтәләшди, ән әсасы исә баҹы-гардашлары даһа чох севмәји өјрәнди. Ҹордан баша дүшдү ки, һансыса гардаш јығынҹаг хидмәтчиси оланда о, баҹы-гардашлара көмәк етмәјә башламыр, буна давам едир (1 Тим. 3:8—10, 13).

13. Кристиан адлы гардаш нәјин сајәсиндә јенидән ағсаггал ола билди?

¹³ Бәс әҝәр артыг јығынҹаг хидмәтчиси вә ја ағсаггал кими хидмәт етмирсинизсә, онда неҹә? Јеһова кечмишдә етдијиниз ишләри, ҝөстәрдијиниз мәһәббәти унутмур (1 Кор. 15:58). Елә инди ҝөстәрдијиниз мәһәббәт дә Онун ҝөзүндән јајынмыр. Кристиан адлы гардашын ағсаггал тәјинаты дајананда о, чох мәјус олмушду. Буна бахмајараг, ҝөрүн о нә дејир: «Мән гәрар вердим ки, ағсаггал олсам да, олмасам да Јеһоваја хидмәтдә әлимдән ҝәләни едәҹәјәм». Бир мүддәт сонра о, јенидән ағсаггал тәјин олунду. Кристиан  сөзүнә әлавә едир: «Бу тәјинаты гәбул етмәјә үрәк етмирдим. Амма фикирләшдим ки, әҝәр Јеһова мәнә јенидән ағсаггал кими хидмәт етмәји лүтф едибсә, онда Ону вә баҹы-гардашларымы севдијимә ҝөрә буну едәҹәјәм».

14. Ҝүрҹүстандан олан баҹынын сөзләриндән нә өјрәндиниз?

¹⁴ Јеһованын хидмәтчиләри башга инсанлары да севирләр (Мәт. 22:37—39). Мәсәлән, Ҝүрҹүстанда јашајан Елена адлы баҹы дејир: «Әввәлләр мән сырф Јеһованы севдијим үчүн тәблиғ едирдим. Амма сәмави Атама мәһәббәтим артдыгҹа инсанлара да мәһәббәтим артды. Дүшүнүрдүм: “Онлар һансы проблемләрлә үзләширләр? Һансы мөвзулар онлара даһа мараглы ола биләр?” Белә дүшүндүкҹә онлара көмәк етмәк истәјим ҝет-ҝедә артды» (Ром. 10:13—15).

15, 16. Шәкилләрдә тәсвир олундуғу кими башгаларына көмәк етмәк һансы немәтләрә јол ачыр?

¹⁵ Баҹы-гардашлара мәһәббәт ҝөстәрмәјимизин тәкҹә онлара хејри дәјмир. COVID-19 пандемијасы башлајанда Пауло гардашла јолдашы јашлы баҹы-гардашлара көмәк едирдиләр. Онлар баҹы-гардашлара електрон ҹиһазлары васитәсилә тәблиғ етмәји өјрәдирдиләр. Әввәл-әввәл бир јашлы баҹыда бу, һеч ҹүр алынмырды. Амма сонрадан о буну баҹарды. Бунун сајәсиндә баҹы гоһумларыны анма мәрасиминә  дәвәт едә билди вә онлардан 60-ы видеоконфранс васитәсилә ҝөрүшә гатылды. Пауло илә јолдашынын чәкдији зәһмәт сајәсиндә һәм баҹы, һәм дә онун гоһумлары бөјүк фајда әлдә етдиләр. Һәмин баҹы сонралар Паулоја белә сөзләр јазмышды: «Чох сағ олун ки, јашлылары өјрәдирсиниз. Јеһованын гајғысыны вә сизин әмәјинизи һеч вахт унутмарам».

¹⁶ Пауло бу кими һадисәләрдән ваҹиб бир шеј өјрәнди: мәһәббәт ҝөстәрмәк биликли вә истедадлы олмагдан гат-гат ваҹибдир. О дејир: «Мән бир заманлар рајон нәзарәтчиси кими хидмәт едирдим. Инди анлајырам ки, баҹы-гардашлар нитгләрими унутсалар белә онлара ҝөстәрдијим көмәји һәлә дә хатырлајырлар».

17. Мәһәббәт ҝөстәрмәјимиз даһа кимә фајда ҝәтирәҹәк?

¹⁷ Башгаларына мәһәббәт ҝөстәрмәклә ҝөзләмәдијимиз немәтләр ала биләрик. Јени Зеландијада јашајан Ҹонатан адлы гардаш бу фикирлә разыдыр. Бир дәфә шәнбә ҝүнү ҝүнорта Ҹонатан ҝөрүр ки, бир өнҹүл гардаш гызмар һавада тәк тәблиғ едир. О, гәрар верир ки, нөвбәти шәнбә ҝүнләри һәмин гардашла хидмәтә чыхсын. Амма һеч хәбәри јох иди ки, бу јахшылығынын онун өзүнә нә гәдәр хејри олаҹаг. Гардаш дејир: «О вахтлар саһә хидмәтини севмирдим. Амма бу гардашын неҹә тәлим вердијинә гулаг асдыгҹа, хидмәтинин нә гәдәр бәһрәли олдуғуну ҝөрдүкҹә тәблиғ иши мәнә зөвг вермәјә башлады. Һәмчинин мән ҝөзәл бир дост газандым. О мәнә руһани ҹәһәтдән бөјүмәјә, тәблиғ ишини севмәјә вә Јеһова илә мүнасибәтими мөһкәмләндирмәјә көмәк етди».

18. Јеһова нә етмәјимизи истәјир?

¹⁸ Јеһова истәјир ки, Она вә инсанлара севҝимиз ҝетдикҹә артсын. Өјрәндијимиз кими Јеһоваја мәһәббәтимизи артырмаг үчүн Онун Кәламыны охујуб үзәриндә дүшүнмәли вә мүнтәзәм олараг дуада Онунла сөһбәт етмәлијик. Баҹы-гардашлара мәһәббәтимизи артырмаг үчүн исә мүхтәлиф јолларла онлара көмәк етмәлијик. Севҝимиз артдыгҹа биз һәм Јеһова илә, һәм дә руһани аиләмизлә даһа јахын олаҹағыг вә бу достлуғумуз әбәди сүрәҹәк.