НАРАҺАТЛЫГ үрәјимиздә дашыдығымыз ағыр јүк кимидир (Мәс. 12:25). Сиз дә нә вахтса һәјатынызда нараһатлығын вердији әзабы дујмусунуз? Олуб ки, бу нараһатлыг һиссинә үрәјинизин артыг таб ҝәтирә билмәјәҹәјини дүшүнмүсүнүз? Әҝәр бу ҹүр һиссләр кечирмисинизсә, сиз тәк дејилсиниз. Арамызда кимиси хәстәјә гуллуг едир, кимисинин әзизи вәфат едиб, кимиси исә тәбии фәлакәтдән зәрәр чәкиб вә ја башга проблемләрлә үзләшиб. Бүтүн бу шејләр бизи үзүр, нараһатлығымыза сәбәб олур вә бизи мәјус едир. Бәс нараһатлыг һиссини неҹә дәф едә биләрик? a

Давуд падшаһын нүмунәси бизә бу саһәдә көмәк едә биләр. О, һәјатда чохлу чәтинликләрлә үзләшмишди. Һәтта бир нечә дәфә өлүмлә бурун-буруна ҝәлмишди (1 Ишм. 17:34, 35; 18:10, 11). Бәс о, нараһатлыг һиссинә неҹә үстүн ҝәлди? Биз ондан неҹә өрнәк ала биләрик?

Давудун башы чох бәлалар чәкмишди, бәзән дә һәр шеј ејни анда баш верирди. Мәсәлән, ҝөрәк Талут падшаһын әлиндән гачан вахт о, даһа нәләрлә үзләшмишди. Бир дәфә Давудла адамлары дөјүшдән евә гајыданда ҝөрдүләр ки, дүшмәнләри мал-мүлкләрини талан едиб, ев-ешикләрини јандырыб, аиләләрини исә әсир апарыб. Белә бир дәһшәтли сәһнәни ҝөрәндә о нә етди? Давуд вә адамлары «һөнкүрүб ағлады, о гәдәр ағладылар ки, ахырда тагәтләри галмады». Бу азмыш кими, Давудун өз адамлары «ону дашгалаг етмәк истәјирдиләр» (1 Ишм. 30:1—6). О, ејни анда үч бөјүк проблемлә үз-үзә иди: аиләси тәһлүкә алтында иди, адамларынын ону өлдүрәҹәјиндән горхурду, үстәлик, Талут падшаһ һәлә дә ону ахтарырды. Давудун бу заман нә гәдәр нараһатлыг кечирдијини адам һеч ағлына да ҝәтирә билмир!

Белә бир мәгамда Давуд нә етди? О, дәрһал «Аллаһы Јеһовадан гүввәт алды». Ҝөрәсән о, буну неҹә етди? Үмумијјәтлә, Давуд чәтин вәзијјәтдә Јеһоваја дуа едиб көмәк истәмәјә вә Онун кечмишдә она неҹә көмәк етдији барәдә дүшүнмәјә вәрдиш етмишди (1 Ишм. 17:37; Зәб. 18:2, 6). Давуд билирди ки, Јеһоваја үз тутмалыдыр вә буна ҝөрә дә нә етмәли олдуғу илә бағлы Ондан мәсләһәт истәди. Сонра исә дәрһал Онун дедијинә әмәл етди. Јеһова онун вә адамларынын ишини аванд етди вә онлар аиләләрини вә мал-мүлкләрини ҝери гајтардылар (1 Ишм. 30:7—9, 18, 19). Диггәт јетирдинизсә, Давуд үч аддым атмышды. Көмәк үчүн Јеһоваја дуа етди, кечмишдә Јеһованын она неҹә көмәк етдији һагда дүшүндү вә Јеһованын вердији ҝөстәришә әмәл етди. Биз Давуддан неҹә өрнәк ала биләрик? Ҝәлин онун атдығы үч аддыма нәзәр салаг.

1. Дуа един. Һәр дәфә үрәјимиздә нараһатлыг баш галдыранда Јеһоваја дуа едиб Ондан һикмәт вә көмәк истәјә биләрик. Белә вахтларда узун-узун дуа едиб, һәр дәрдимизи Јеһова илә бөлүшмәк олар. Јахуд елә ола биләр ки, вәзијјәтимиздән долајы үрәјимиздә гысаҹа дуа едәк. Һәр дәфә Јеһовадан көмәк истәјәндә Давудун әминликлә дедији сөзләрә шәрик олуруг: «Јеһова јалчын гајам, истеһкамымдыр, мәним ниҹатымдыр. Аллаһым гајамдыр, Она сығынырам» (Зәб. 18:2). Дуа, доғруданмы,  көмәк едир? Калија адлы бир өнҹүл баҹы дејир: «Дуадан сонра үрәјим раһатлашыр. Дуа мәнә көмәк едир ки, вәзијјәтә Јеһова кими бахым вә Она даһа чох етибар едим». Һәгигәтән дә, дуа Јеһованын бизә вердији мөһтәшәм әнамдыр. Онун васитәсилә Јеһова бизә нараһатлығымызы дәф етмәјә көмәк едир.

2. Дүшүнүн. Һәјатынызда елә чәтинликләр олубму ки, онлара јалныз Јеһованын көмәји сајәсиндә таб ҝәтирә билмисиниз? Јеһованын шәхсән бизә, һәмчинин кечмишдәки хидмәтчиләринә дајаг олдуғу һагда дүшүнәндә өзүмүздә ҝүҹ тапырыг вә Јеһоваја етибарымыз артыр (Зәб. 18:17—19). Ҹошуа адлы бир ағсаггал дејир: «Јеһова дуаларыма ҹаваб вердикҹә онлары бир сијаһыја јазырам. Бу мәнә көмәк едир ки, Јеһованын конкрет дуаларыма неҹә дәгигликлә ҹаваб вердији вахтлары унутмајым». Доғрудан да, Јеһованын биздән өтрү индијә гәдәр етдикләри һагда дүшүнәндә нараһатлыға үстүн ҝәлмәк үчүн јенидән ҝүҹ тапырыг.

3. Әмәл един. Һансыса вәзијјәтдә неҹә давранаҹағымыза гәрар вермәздән өнҹә ән етибарлы мәсләһәти алмаг үчүн Аллаһын Кәламына үз тутмалыјыг (Зәб. 19:7, 11). Чохлары фикир вериб ки, һансыса ајә илә бағлы әтрафлы ахтарыш апаранда бу ајәни һәјатларында неҹә тәтбиг едә биләҹәкләрини даһа јахшы баша дүшүрләр. Ҹарод адлы бир ағсаггал бунунла бағлы дејир: «Ахтарыш апармағымын сајәсиндә мән ајәнин мәнасыны һәртәрәфли анлајырам. Јеһованын мәнә нә дедијини баша дүшүрәм. Беләҹә, охудуғум бејнимә батыр вә буна ујғун даврана билирәм». Доғрудан да, Јеһованын бизә јол ҝөстәрмәси үчүн Онун Кәламына үз тутанда вә ҝөстәрдији јолла ҝедәндә биз нараһатлығын өһдәсиндән даһа јахшы ҝәлирик.

Давуд билирди ки, нараһатлығын өһдәсиндән ҝәлмәк үчүн Јеһованын көмәјинә еһтијаҹы вар. Јеһованын дәстәјинә ҝөрә Давуд о гәдәр миннәтдар иди ки, белә демишди: «Аллаһын ҝүҹү илә сәдләр ашарам Белими гүввәтлә гуршајан Аллаһдыр» (Зәб. 18:29, 32). Бәзән бизә дә елә ҝәлә биләр ки, проблемләримиз ашылмаз бир сәдд кимидир. Амма Јеһованын көмәји илә биз сәдд кими гаршымызда дуран истәнилән проблеми аша биләрик! Доғрудан да, әҝәр Јеһоваја дуа едиб көмәк истәјириксә, Онун бизә индијә гәдәр етдикләри һагда дүшүнүрүксә вә ҝөстәришләринә әмәл едириксә, әмин ола биләрик ки, О бизә нараһатлығымызын өһдәсиндән раһат ҝәлмәк үчүн ҝүҹ вә һикмәт верәҹәк!