Тәблиғ иши ҝенишләндикҹә нәшрләрә тәләбат артды. Бруклиндәки гардашлар журналлары өзләри чап едирдиләр, амма галын ҹилдли китабларын чапы үчүн өзәл нәшријјат ширкәтләринә мүраҹиәт едирдиләр. Бу ширкәтләр бир нечә ај јетәринҹә китаб чап едә билмәдиләр, бу да ки, тәблиғ ишинә өз тәсирини ҝөстәрирди. Буна ҝөрә дә Рутерфорд гардаш чапханаја нәзарәт едән Роберт Мартин гардаша тәклиф етди ки, китаблары өзләри чап етсинләр.

Роберт Мартин гардаш һәмин аны хатырлајараг дејир: «Мәни һәјәҹан бүрүдү. Бу, о демәк иди ки, биз тәзә чапхана ачмалы идик, бүтүн ишләри — јығым, галваноөртмә, чап, ҹилдләмә, һамысыны өзүмүз етмәли идик». Гардашлар Бруклиндә Конкорд күчәси, ев 18-дә бир јери иҹарәјә ҝөтүрдүләр вә орада лазыми аваданлыглары гурашдырдылар.

Амма бу јенилик һамыны севиндирмәди. Әввәлләр китабларымызы чап едән ширкәтин президенти бизим јени чапханамыза ҝәлди. О, ришхәнд едәрәк деди: «Сизин әла аваданлыгларыныз вар, амма һеч биринизин онлардан башы чыхмыр. Алты аја бунлары зај едәҹәксиниз».

Роберт Мартин гардаш дејир: «Онун дедији дүз ҝөрүнә биләрди. Амма о билмирди ки, Аға һәмишә бизимләдир». Роберт гардаш һаглы иди. Чох кечмәмиш бу јени бинада ҝүнә 2000 китаб һазырланырды.

Јеһованын хидмәтчиләри артыг бәзи китаблары өзләри чап едирдиләр. Бунунла јанашы, онлар хош мүждәни јени үсулла — радиојајым васитәсилә бәјан етмәјә башладылар. 1922-ҹи ил февралын 26-сы базар ҝүнү наһардан сонра Рутерфорд гардаш илк дәфә радио васитәсилә чыхыш етди. О, Лос-Анҹелесдә (Калифорнија штаты, АБШ) KOG радиостансијасында «Һал-һазырда  јашајан милјонларла инсан һеч вахт өлмәјәҹәк» адлы нитгини сөјләди.

Програма тәхминән 25 000 инсан гулаг асмышды. Бәзиләри миннәтдарлыг мәктублары ҝөндәрмишдиләр. Онлардан бири Калифорнијанын Санта-Ана шәһәриндә јашајан Вилард Ашфорд иди. О, Рутерфорд гардаша јаздығы мәктубунда она «долғун вә мараглы» чыхышына ҝөрә миннәтдарлығыны билдирмишди вә белә сөзләр јазмышды: «Евимиздә үч хәстә вар. Сиз бу нитги дүз гоншулугда сөјләсәјдиниз белә, һеч биримиз ҝедиб гулаг аса билмәјәҹәкдик».

Нөвбәти һәфтәләрдә башга програмлар да јајымланды. Илин сонунда «Ҝөзәтчи гүлләси»ндә дәрҹ олунан һесабата әсасән, «радио васитәсилә, ән азы, 300 000 нәфәр мүждәни ешитмишди».

Мүгәддәс Китаб Тәдгигатчылары инсанлардан ҝәлән мүсбәт рәјләри ҝөрдүләр вә белә гәрара ҝәлдиләр ки, Бруклиндәки Бејтелин јахынлығында Стејтон-Ајленд әразисиндә өз радиостансијаларыны гурашдырсынлар. Артыг нөвбәти илләрдә онлар Падшаһлыг хәбәрини даһа ҝениш иҹтимаијјәтә чатдырмаг үчүн өз радиостансијаларыны истифадә едирдиләр. Бу радиостансија WBBR адланырды.

«Ҝөзәтчи гүлләси»нин 1922-ҹи ил 15 ијун сајында елан олунмушду ки, 1922-ҹи ил сентјабрын 5-дән 13-дәк Оһајо штатынын Сидар-Поинт шәһәриндә бөјүк топланты кечириләҹәк. Мүгәддәс Китаб Тәдгигатчылары бөјүк ҹошгу илә Сидар-Поинтдә кечирилән топлантыја ахышдылар.

Рутерфорд гардаш топлантынын ачылыш нитгиндә нөвбәти сөзләри демишди: «Там әминликлә дејә биләрәм ки, Аға бу топлантыны бәрәкәтли едәҹәк вә јер үзүндә һеч вахт олмадығы гәдәр бөјүк шаһидлик вериләҹәк». Топлантынын диҝәр натигләри дә баҹы-гардашлары тәблиғ ишиндә иштирак етмәјә тәшвиг етмишдиләр.

Сентјабрын 8-и ҹүмә ҝүнү залда тәхминән 8000 инсан вар иди. Һамы бөјүк һәвәслә Рутерфорд гардашын нитгини ҝөзләјирди вә онлар үмид едирдиләр ки, о, дәвәтнамәләрин үстүндә јазылмыш ADV һәрфләринин мәнасыны изаһ едәҹәк. Һамы отурмаг үчүн өзүнә јер  тапмаға чалышырды, јәгин, кимләрсә сәһнәнин лап јухарысында бүкүлмүш плаката фикир вермишди. Топлантыја Тулса шәһәриндән (Оклаһома штаты, АБШ) Артур Клаус гардаш да гатылмышды. О, програмы ешидә билсин дејә өзүнә јахшы јер тапмышды. Белә бир јер тапмаг әсл һүнәр иди, чүнки залда нә микрофон вар иди, нә дә сәсҝүҹләндириҹи.

Програмын сәдри ҝөрүшүн манеәсиз кечмәси үчүн елан етди ки, ҝеҹикәнләр Рутерфорд гардашын нитги заманы аудиторијаја бурахылмајаҹаг. Рутерфорд гардаш нитгинә сәһәр саат 9:30-да башлады. О, Иса Мәсиһин Мәтта 4:17 ајәсиндәки сөзләрини ситат ҝәтирәрәк деди: «Сәмави Падшаһлыг јахынлашыр». Даһа сонра о, инсанларын Падшаһлыг һагда хәбәри неҹә ешидәҹәкләри барәдә данышмышды вә бунунла бағлы белә сөзләр демишди: «Иса Мәсиһ өзү шәхсән бәјан етмишди ки, һүзуру заманы бичин ишини һәјата кечирәҹәк вә һәмин вахт садиг вә һәгиги давамчыларыны топлајаҹаг».

Әсас залда отуран Артур гардаш һәмин ҝүнү хатырлајараг дејир: «Чалышырдыг, нитгдән бир сөз дә бурахмајаг». Бирдән Артур гардашын һалы писләшди. О, залдан чыхмаг истәмирди, чүнки билирди ки, чыхса, ону ичәри бурахмајаҹаглар. Амма о, залы тәрк етмәли олду.

Бир нечә дәгигәдән сонра онун һалы јахшылашды. О, зала тәрәф ҝәләндә ҝурултулу алгыш сәдалары ешитди. Бу, ону лап һәјәҹанландырды! Гәрара ҝәлди ки, бу мөһтәшәм нитгин галанына гулаг асмаг үчүн лап лазым ҝәлсә, дама да чыхаҹаг. 23 јашында олан Артур гардаш дама галхан бир јол тапды. Тавандакы пәнҹәрәләр ачыг иди. О, пәнҹәрәјә јахынлашды вә ҝөрдү ки, орадан нитг «чох ҝөзәл ешидилир».

Амма Артур орада тәк дејилди. Онун бәзи достлары да дамда иди. Онлардан бири, Франк Ҹонсон она тәрәф гачыб сорушду:

— Ҹибиндә бычаг олмаз?

— Вар,— дејә Артур ҹаваб верди.

 — Сән бизим дуаларымыза ҹавабсан. Бу бөјүк рулону ҝөрүрсән? Бу, плакатдыр, кәндирлә мисмарлара бәркидилиб. Һакимә * диггәтлә гулаг ас. О дејәндә ки, «елан един, елан един» кәндирләри кәсәрсән.

Беләҹә, Артур әлиндә бычаг диҝәр гардашларла бирҝә ишарә ҝөзләјирди. Чох кечмәмиш Рутерфорд гардашын нитги өз кулминасија нөгтәсинә чатды. О, бөјүк ҹошгу вә шөвг ичиндә, уҹа сәслә нөвбәти сөзләри деди: «Ағамызын садиг вә һәгиги шаһиди олун. Бабил јерлә јексан олунана гәдәр мүбаризәни дајандырмајын. Хош хәбәри јахын вә узаг елләрдә бәјан един. Бүтүн дүнја билмәлидир ки, Јеһова Аллаһдыр, Иса Мәсиһ исә падшаһларын Падшаһы вә ағаларын Ағасыдыр. Бу, тарихдә ән мүһүм ҝүндүр. Будур! Падшаһ артыг һөкмранлыг едир! Сиз онун ҹарчыларысыныз. Буна ҝөрә дә Падшаһы вә онун Падшаһлығыны елан един, елан един, елан един».

Артур гардаш дејир ки, о вә диҝәр гардашлар плакатын ипләрини кәсдиләр вә плакат јаваш-јаваш, ҝөзәл шәкилдә ачылмаға башлады. Плакатын үстүндә «Падшаһы вә Падшаһлығы елан един» сөзләри јазылмышды. Һамыја мараглы олан «ADV» һәрфләри, сән демә, инҝилис дилиндә «елан един» сөзүнүн илк һәрфләри имиш.

Сидар-Поинтдәки топланты баҹы-гардашлара диггәтләрини Падшаһлығын тәблиғи ишинә ҹәмләмәјә көмәк етди. Үрәјиндә һазырлыг руһу оланлар тәблиғ ишиндә иштирак етмәјә чох һәвәсли идиләр. Оклаһома штатында өнҹүл кими (әввәлләр китабпајлајан адланырды) хидмәт едән бир гардаш јазмышды: «Бизим тәблиғ етдијимиз әразидә әксәријјәт көмүр мәдәнләриндә ишләјир вә чох касыбдыр». О гејд етмишди ки, инсанлар «Гызыл әср» журналындакы хош хәбәри ешидәндә ҝөз јашларыны сахлаја билмәјиб ағлајырлар. Гардаш сөзүнүн јекунунда белә демишди: «Онлара тәсәлли верә билдијимиз үчүн чох севинирик».

Бәли, Мүгәддәс Китаб Тәдгигатчылары Исанын Лука 10:2 ајәсиндәки сөзләринин тәҹили олдуғуну баша дүшүрдүләр: «Мәһсул бол, бичинчи исә аздыр». Ил сона чатырды вә будур, мүждәчиләр Падшаһлыг һаггындакы мүждәни даһа чох әразиләрдә тәблиғ етмәјә һәмишәкиндән дә гәтијјәтли идиләр.