1. Дүнјада һөкм сүрән худбинлик руһу бизә неҹә тәсир едә биләр?

НӘ ҮЧҮН Аллаһын Кәламындан өјрәндикләримизә әмәл етмәк асан дејил? Әввәла она ҝөрә ки, дүзҝүн оланы етмәк үчүн тәвазөкарлыг ҝәрәкдир. Јашадығымыз бу ахырзаманда исә «худбин, пулпәрәст, ловға, өзүндән разы,.. өзүнә һаким олмајан» инсанларла әһатә олундуғумуза ҝөрә тәвазөкар галмаг һеч дә асан дејил (2 Тим. 3:1—3). Аллаһын хидмәтчиләри бу кими хүсусијјәтләрин пис олдуғуну дәрк етсәләр дә, бәзән худбин инсанларын һәјатда уғур газандығыны, јахшы јашадығыны ҝөрәндә онлара һәсәд апарыр (Зәб. 37:1; 73:3). Һәтта кимсә дүшүнә биләр: «Башгаларыны өзүмдән үстүн тутмағын бир хејри вар? Тәвазөкарлыг етсәм, инсанларын мәнә һөрмәти итмәјәҹәк ки?» (Лука 9:48). Дүнјада һөкм сүрән худбинлик руһунун бизә сирајәт етмәси бир мәсиһи кими адымыза вә баҹы-гардашларла мүнасибәтимизә хәләл ҝәтирә биләр. Лакин Мүгәддәс Китабда гәләмә алынмыш иман нүмунәләрини арашдырсаг вә онлардан өрнәк ҝөтүрсәк, бунун фајдасыны ҝөрәҹәјик.

2. Кечмишдә јашамыш иманлы инсанлар һагда өјрәнмәјин бизә һансы фајдасы вар?

² Әҝәр мөмин инсанларын иманыны өрнәк ҝөтүрмәк  истәјириксә, онларын буна наил олмаг үчүн нәләр етдикләрини јахшыҹа арашдырмалыјыг. Мүталиә заманы дүшүнә биләрик: «Онлар Аллаһын досту олмаға, Онун разылығыны газанмаға неҹә мүвәффәг олмушдулар? Онун ирадәсини јеринә јетирмәк үчүн ҝүҹү һарадан алмышдылар?» Руһани ҹәһәтдән мөһкәм галмаг үчүн бу ҹүр мүталиә олдугҹа ваҹибдир.

3, 4. а) Илаһи ҝөстәришләри һарадан әлдә едирик? б) Нәјин әсасында дејә биләрик ки, садәҹә билик алмаг руһани гида алмаг демәк дејил?

³ Биз Мүгәддәс Китаб, нәшрләримиз, веб сајтымыз, JW телевизијамыз, јығынҹаг вә топлантыларымыз васитәсилә чохлу ҝөзәл мәсләһәтләр вә тәлим алырыг. Бунунла белә, Иса Мәсиһин Јәһја 4:34 ајәсиндә јазылмыш сөзләриндән ҝөрмәк олар ки, руһани гида тәкҹә билик алмагла мәһдудлашмыр. Бәс бура даһа нәләр дахилдир? Мәсиһ демишди: «Мәним јемәјим мәни ҝөндәрәнин ирадәсини јеринә јетирмәк вә Онун бујурдуғу иши тамамламагдыр».

⁴ Иса Мәсиһ үчүн Аллаһын бујругларына ујғун давранмаг руһани гида иди. Һансы мәнада? Неҹә ки фајдалы јемәкләр бизим әһвалымызы јахшылашдырыр вә организмимизи бәсләјир, еләҹә дә Аллаһын ирадәсини јеринә јетирмәк иманымызы мөһкәмләндирир. Һеч олубму ки, өзүнүзү јахшы һисс етмәсәниз дә, тәблиғ ҝөрүшүнә ҝетмисиниз вә тәблиғдән гајыданда өзүнүзү ҝүмраһ һисс етмисиниз?

5. Һикмәтли давранышын бәһрәси нәдир?

⁵ Илаһи ҝөстәришләрә әмәл едән кәс һикмәт саһибидир (Зәб. 107:43). Һикмәтин ҝәтирдији мүкафат исә истәнилән зәһмәтә дәјир. Мүгәддәс Китабда бу мүкафат барәдә јазылыб: «Арзуладығын шејләрдән һеч бири она тај ола билмәз... Һикмәт она бағлананлар үчүн һәјат ағаҹыдыр, ондан јапышанлар бәхтәвәр адланар» (Мәс. 3:13—18). Иса Мәсиһ шаҝирдләринә демишди: «Мадам ки бунлары билирсиниз, әмәл един, онда хошбәхт олаҹагсыныз» (Јәһ. 13:17). Шаҝирдләри онун ҝөстәришләринә әмәл етдикләри мүддәтдә хошбәхт олаҹагдылар. Онлар Мәсиһин тәлимләринә вә нүмунәсинә тәкҹә һәмин вахт риајәт етмәдиләр. Бу, онларын һәјат јолу олду.

6. Нә үчүн бундан сонра да һикмәтли давранмалыјыг?

⁶ Өјрәндијимиз һәгигәтләрә ујғун јашамаг бу ҝүн хүсусилә ваҹибдир. Белә бир нүмунәјә нәзәр салаг. Дејәк ки, устанын јетәринҹә савады, лазыми аләт вә материаллары вар. Лакин о, әлиндә олан бу имканлардан истифадә етмәсә, һеч бир нәтиҹә әлдә етмәјәҹәк. Уста вахтилә өз сәнәти үзрә ишләјиб јахшы тәҹрүбә газанмыш олса да, өјрәндикләрини унутмамаг үчүн даима ишләмәлидир. Буна бәнзәр тәрздә, биз дә Мүгәддәс Китабдан өјрәндикләримизә әмәл етмәјә башлајанда бунун фајдасыны ҝөрүб севинирдик. Анҹаг хошбәхтлијимизин даими олмасыны истәјириксә, Аллаһымыздан ҝәлән ҝөстәришләрә һәр ҝүн әмәл етмәлијик.

7. Мүгәддәс Китабдакы нүмунәләр бизә даһа һикмәтли олмагда неҹә көмәк едир?

⁷ Ҝәлин ҝөрәк һансы вәзијјәтдә тәвазөкарлығымыз сынана биләр вә гәдимдә јашамыш мөмин инсанлар бу ҹүр вәзијјәтләрдә неҹә давраныблар. Руһани ҹәһәтдән мөһкәм галмағымыз үчүн бу мәлуматлары садәҹә охумаг кифајәт дејил. Одур ки, мүталиә едәркән онларын нүмунәсини неҹә тәглид едә биләҹәјимизи дүшүнмәли вә өјрәндијимизи јубанмадан тәдбиг етмәлијик.

8, 9. Һәвариләрин ишләри 14:8—15 ајәләриндә јазылмыш һадисәләрдән һәвари Булусун тәвазөкар олдуғу неҹә ҝөрүнүр? (Мәгаләнин әввәлиндәки шәклә бахын.)

⁸ Јеһованын ирадәси одур ки, «һәр ҹүр инсан хилас олуб һәгигәт барәсиндә дәгиг билијә јијәләнсин» (1 Тим. 2:4). Сиз һәлә һәгигәти өјрәнмәјән инсанлара неҹә јанашырсыныз? Һәвари Булус тәкҹә синагоглара ҝедиб Аллаһ һаггында мүәјјән гәдәр билији олан јәһудиләрә тәблиғ етмирди. О, јад аллаһлара ибадәт едән инсанлара да тәблиғ едирди. Бу инсанларын Булуса мүнасибәти онун тәвазөкарлығыны сынамышды. Неҹә?

⁹ Һәвари Булус биринҹи тәблиғ сәјаһәтиндә оларкән Ликаонија ҹамааты Барнәба илә ону илаһиләшдириб өз аллаһлары Зевс вә Һермес адландырырды. Бәс онлар бу гәдәр иззәти ҝөрүб шан-шөһрәт хәстәлијинә тутулдулар? Олмаја диҝәр ики шәһәрдә үзләшдикләри тәгибләрдән сонра нәһајәт раһат нәфәс алаҹагларыны дүшүндүләр? Бәлкә, бу ҹүр мәшһурлуг сајәсиндә даһа чох инсана тәблиғ едә биләҹәкләрини фикирләшдиләр? Хејр! Онлар дәрһал јахаларыны ҹырдылар, өзләрини ҹамаатын арасына атыб гышгырдылар: «Сиз нә едирсиниз? Биз дә сизин кими ади инсаныг» (Һәв. 14:8—15).

10. Нә үчүн Булусла Барнәба өзләрини Ликаонија ҹамаатындан үстүн тутмады?

¹⁰ Булус вә Барнәба «биз дә сизин кими ади инсаныг» демәклә бу бүтпәрәст инсанларын иманына шәрик олдугларыны јох, гејри-камил олдугларыны нәзәрдә тутурду. Мәҝәр бу ики нәфәр мүждәни јајмаг үчүн хүсуси тәјинат алмамышды? (Һәв. 13:2). Мәҝәр онлар мүгәддәс руһла мәсһ едилмәмишдиләр, мөһтәшәм үмидә саһиб дејилдиләр? Лакин бүтүн бунлара ҝөрә онлар өзләрини Ликаонија ҹамаатындан үстүн һесаб етмирди. Булусла Барнәба баша дүшүрдү ки, бу инсанлар хош хәбәри гәбул етсә, ејни немәтләри дада биләҹәкләр.

11. Тәблиғ едән заман Булусун тәвазөкарлығыны неҹә өрнәк ала биләрик?

¹¹ Һәвари Булусун тәвазөкарлығыны неҹә тәглид едә биләрик? Илк нөвбәдә, биз Јеһованын ҝүҹү сајәсиндә јеринә јетирдијимиз ишләрә ҝөрә нә өзүмүзү хүсуси сајмалыјыг, нә дә инсанлардан тәриф ҝөзләмәлијик. Һәр биримиз өзүмүздән сорушмалыјыг: «Тәблиғ етдијим инсанлара неҹә јанашырам? Бәлкә, фәргиндә олмадан мүәјјән груп инсанлара гәрәзли мүнасибәт ҝөстәрирәм?» Тәрифәлајигдир ки, бүтүн дүнјадакы Јеһованын Шаһидләри әразиләрини гарыш-гарыш ҝәзәрәк хош хәбәрә мејилли инсанлары ахтарырлар. Бәзән бунун үчүн башгаларынын гәрәзлә јанашдығы дил вә мәдәнијјәтләри өјрәнирләр. Јеһованын Шаһидләри һеч вахт өзләрини тәблиғ етдикләри инсанлардан үстүн сајмырлар. Әксинә, хош хәбәрин бу инсанларын үрәјиндә көк салмасы үчүн һәр кәсә фәрди јанашырлар.

12. Епафрас инсанлара һансы тәмәннасыз гајғыны ҝөстәрмишди?

¹² Илаһи ҝөстәришләрә тәвазөкарлыгла табе олдуғумузу ҝөстәрмәјин диҝәр бир јолу исә «бизимлә ејни дәјәрли иманы газанмыш» баҹы-гардашлар үчүн дуа етмәкдир (2 Бут. 1:1). Бу саһәдә Епафрасдан нүмунә ҝөтүрә биләрик. Мүгәддәс Китабда Епафрасын адына јалныз Булусун јаздығы мәктубларда вә ҹәми үч дәфә раст ҝәлирик. Булус Ромада ев дустағы оларкән Колосдакы мәсиһиләрә јазмышды ки, Епафрас «[онлардан] өтрү даима ҹидд-ҹәһдлә дуа едир» (Кол. 4:12). О,  јығынҹаг үзвләрини јахындан таныјырды вә онлара сәмими гајғы ҝөстәрирди. Епафрас Булусла бирҝә һәбсдә иди вә тәбии ки, онун дәрди өзүнә бәс иди (Флм. 23). Бунунла белә, баҹы-гардашлар һагда дүшүнүр, онлара көмәк етмәк үчүн баҹардығыны едирди. О, јығынҹагдакылар үчүн адбаад дуа едирди. Мәҝәр бу, ријасыз мәһәббәтин тәҹәссүмү дејил? Биз дә ејни ҹүр даврана биләрик. Белә дуаларын ҝүҹү бөјүкдүр (2 Кор. 1:11; Јаг. 5:16).

13. Дуа едәркән Епафрасдан неҹә нүмунә ҝөтүрә биләрик?

¹³ Дуанызда кимләрин адларыны чәкә биләрсиниз? Епафрас кими, бир чох баҹы-гардашларымыз јығынҹагларындакы диндашлары, чијинләриндә ағыр аилә мәсулијјәти олан аиләләр үчүн, ҹидди гәрар гаршысында галан, сынагларла үзләшәнләр үчүн дуа едирләр. Һәмчинин бир чохлары jw.org сајтында јерләшән «Иманларына ҝөрә һәбсдә олан Јеһованын Шаһидләри» адлы мәгаләдәки диндашлары барәдә дуа едирләр (ХӘБӘРЛӘР > ҺҮГУГИ МӘСӘЛӘЛӘР бөлмәсинә бахын). Бундан башга, әзизләрини итирән инсанлар үчүн, јахын вахтларда баш вермиш тәбии фәлакәтдән вә мүһарибәдән сағ чыханлар үчүн вә мадди сыхынтыдан әзијјәт чәкәнләр үчүн дуа едә биләрик. Һәгигәтән дә, дуаларымыза еһтијаҹы олан баҹы-гардашларын сајы аз дејил. Белә баҹы-гардашлар үчүн дуа едәндә ҝөстәририк ки, биз јалныз өзүмүзү јох, башгаларыны да дүшүнүрүк (Филип. 2:4). Јеһова бу ҹүр дуалары динләјир.

14. Јеһова бизә динләмәклә бағлы һансы мүкәммәл нүмунәни гојуб?

¹⁴ Тәвазөкар олдуғумузу ҝөстәрән диҝәр саһә инсанлара диггәтлә гулаг асмагдыр. Јагуб 1:19 ајәсиндә дејилир ки, «ешитмәјә һазыр олмалы»јыг. Бу саһәдә ән ҝөзәл өрнәк Јеһовадыр (Јар. 18:32; Јуш. 10:14). Ҝәлин Чыхыш 32:11—14 ајәләриндә јазылмыш диалога диггәт јетирәк. (Ајәләри охујун.) Јеһова Муса пејғәмбәрин фикринә еһтијаҹ дујмаса да, она һиссләрини бөлүшмәк имканы верди. Ахы ким јанылан инсаны сәбирлә динләјиб сонра онун дедији кими давранарды? Амма Јеһова Аллаһ иманла дуа едән инсанлары сәбирлә динләјир.

15. Инсанлара һөрмәт ҝөстәрмәкдә Јеһовадан неҹә өрнәк ала биләрик?

¹⁵ Јахшы олар ки, һәр биримиз өзүмүзә нөвбәти суаллары верәк: «Әҝәр Уҹа Јараданымыз Ибраһим, Рәһилә, Муса, Јушә, Мәнуһ, Илјас вә Һизгијјәнин вәзијјәтиндә олдуғу кими, инсанлары динләјирсә, мәҝәр мән дә белә етмәмәлијәм? Баҹы-гардашларыма даһа чох һөрмәт ҝөстәрмәк үчүн онлары динләјә вә јери ҝәләндә дедикләри кими даврана биләрәм? Бәлкә, јығынҹаг вә ја аилә үзвләримдән кимәсә даһа чох диггәт ҝөстәрмәлијәм? Бунун үчүн һансы тәдбирләри ҝөрә биләрәм?» (Јар. 30:6; Һак. 13:9; 1 Пад. 17:22; 2 Салн. 30:20).

16. Давуд пејғәмбәр Шимајын пис рәфтарына неҹә мүнасибәт ҝөстәрмишди?

¹⁶ Тәвазөкарлыг һәмчинин пис рәфтара мәруз галанда тәмкинимизи горумаға көмәк едир (Ефес. 4:2). Буна даир ҝөзәл нүмунә 2 Ишмуил 16:5—13 ајәләриндә гәләмә алыныб. (Ајәләри охујун.) Падшаһ Талутун гоһуму Шимај Давуду вә онун адамларыны тәһгир етмиш вә үстләринә һүҹум чәкмишди. Давуд ону сусдурмаға гадир олса да, бу тәһгирләрә дөзмүшдү. Тәмкинини горумаға она нә көмәк етмишди? Зәбур китабынын 3-ҹү мәзмуру буна ајдынлыг ҝәтирир.

17. Давуд пејғәмбәрә тәмкинини горумаға нә көмәк етмишди вә биз ондан неҹә өрнәк ала биләрик?

 ¹⁷ Давуд пејғәмбәр Зәбур китабынын 3-ҹү мәзмуруну оғлу Абсаламдан гачдығы заман јазмышды. Бу мәзмурун 1 вә 2-ҹи ајәләри 2 Ишмуил китабынын 16-ҹы фәслиндә тәсвир олунан һадисәләрлә вәһдәт тәшкил едир. Зәбур 3:4 ајәси Давуд пејғәмбәрин әминлијини ҝөстәрир: «Мән Јеһованы чағырарам, О, мүгәддәс дағындан мәнә һај верәр». Тәгибләр заманы биз дә дуа етмәлијик. Дуамыза ҹаваб олараг Јеһова мүгәддәс руһу васитәсилә дөзмәјә ҝүҹ верәҹәк. Дүшүнүн ҝөрүн сиз һансы вәзијјәтләрдә даһа тәмкинли олмалы вә ја бағышламағы баҹармалысыныз? Јеһованын кечирдијиниз һиссләри ҝөрдүјүнә вә сизә көмәк едәҹәјинә нә дәрәҹәдә әминсиниз?

18. Илаһи ҝөстәришләрә бағлы галмаг бизә һансы немәтләри бәхш едәҹәк?

¹⁸ Аллаһын бәјәндији кими давранмагла һикмәт газаныр вә Јеһовадан бол немәтләр алырыг. Мәсәлләр 4:7 ајәсиндә јазылыб: «Ән әсасы һикмәтдир». Һикмәт биликдән гајнагланса да, һикмәтли олуб-олмадығымыз билијимиздән јох, гәрарларымыздан бәлли олур. Һәтта гарышгалар да һикмәт нүмајиш етдирир. Онларын инстинктив олараг ҝөстәрдији бу һикмәт јајда азугә тәдарүк етмәсиндән ҝөрүнүр (Мәс. 30:24, 25). Аллаһын һикмәти адланан Мәсиһ һәмишә Атасыны разы салан ишләр ҝөрүр (1 Кор. 1:24; Јәһ. 8:29). Дүзҝүн гәрарын нә олдуғуну билмәк вә бу гәрара ујғун давранмаг фәргли шејләрдир. Јеһова дөзүмлә тәвазөкарлыг ҝөстәрәнләри вә дүзҝүн даврананлары мүкафатсыз гојмур. (Мәтта 7:21—23 ајәләрини охујун.) Одур ки, јығынҹагда тәвазөкарлыг руһунун һөкм сүрмәси үчүн әлиниздән ҝәләни един. Дүзҝүн олдуғуну билдијиниз шејләрә әмәл етмәк үчүн сәбир вә вахт лазымдыр, бундан тәвазөкар олдуғунуз ҝөрүнәҹәк. Тәвазөкарлыг исә һәм индики, һәм дә ҝәләҹәк хошбәхтлијинизин зәманәтидир.