1. Јеһованын Шаһидләрини хошбәхт едән нәдир? (Мәгаләнин әввәлиндәки шәклә бахын.)

ЈЕҺОВАНЫН ШАҺИДЛӘРИ чох хошбәхтдирләр. Онларын ибадәт ҝөрүшләри, топлантылары, бирҝә кечирдикләри тәдбирләр хош аб-һавада вә ҝүлүш сәдалары алтында кечир. Онлары хошбәхт едән нәдир? Әсас сәбәб одур ки, онлар Јеһованы, хошбәхт Аллаһы таныјыр, Она ибадәт едир вә Она бәнзәмәјә чалышырлар (1 Тим. 1:11; Зәб. 16:11). Хошбәхтлик мәнбәји олан Аллаһ бизим дә бәхтијар олмағымызы истәјир. О, севинмәјимиз үчүн чохлу сәбәбләр вериб (Ган. 12:7; Ваиз 3:12, 13).

2, 3. а) Хошбәхтлик нәдир? б) Нә үчүн хошбәхт олмаг чәтиндир?

² Бәс шәхсән сиз хошбәхтсиниз? Даһа чох хошбәхтлик дујмаг мүмкүндүр? Бир изаһата әсасән, хошбәхтлик узун сүрән мәмнунлуг һиссидир. О, ади мәмнунлугдан тутмуш ҝүҹлү севинҹ һиссинә кими мүхтәлиф дујғуларла сәҹијјәләнир вә тәбии олараг, инсан онун битмәсини истәмир. Мүгәддәс Китаба әсасән, јалныз Јеһова Аллаһла јахшы мүнасибәтләри олан шәхсләр һәгигәтән хошбәхт ола биләр. Лакин јашадығымыз дүнјада хошбәхт олмаг асан дејил. Сәбәб нәдир?

³ Әзиз инсанын өлүмү, јахынымызын јығынҹагдан кәнар  олунмасы, аиләмизин дағылмасы, ишимизи итирмәк вә бу кими сарсыдыҹы вәзијјәтләр хошбәхтлијимизә көлҝә сала биләр. Аиләдахили мүнагишәләр, мүнасибәтләрин ҝәрҝинләшмәси, мәктәб вә ја иш јолдашларымызын тәнәләри, етигадымыза ҝөрә үзләшдијимиз тәгибләр, һәбс, сәһһәтимизин писләшмәси, хроники хәстәлик, депрессија вә саирә севинҹимизи горумаға мане олур. Лакин ҝәлин унутмајаг ки, бизим Иса Мәсиһ кими һакимимиз вар. «Хошбәхт вә јеҝанә һакимијјәт саһиби» олан Мәсиһ инсанлара тәсәлли вермәкдән вә хошбәхтлик бәхш етмәкдән һәмишә зөвг дујуб (1 Тим. 6:15; Мәт. 11:28—30). Онун Дағүстү вәзиндә вурғуладығы хүсусијјәтләр Шејтан дүнјасында үзләшдијимиз чәтинликләрә бахмајараг, хошбәхт олмағымыза көмәк едәҹәк.

4, 5. Хошбәхтлијә наил олмаг вә бу һисси горумаг үчүн нә етмәлијик?

⁴ Иса Мәсиһин вурғуладығы илк мәгам хошбәхтлијимиз үчүн чох ваҹибдир. О демишди: «Аллаһа еһтијаҹы олдуғуну дәрк едәнләр хошбәхтдир, чүнки сәмави Падшаһлыг онларындыр» (Мәт. 5:3). Аллаһа еһтијаҹ дујдуғумуз нәдән ҝөрүнүр? Бу, бизим Аллаһын Кәламыны мүталиә етмәјимиздән, Онун бујругларына табе олмағымыздан вә ибадәти һәр шејдән үстүн тутмағымыздан бәлли олур. Әҝәр бүтүн бунлары етсәк, хошбәхтлијимиз ҝетдикҹә артаҹаг. Аллаһын вәдләринин тезликлә ҝерчәкләшәҹәјинә иманымыз даһа да мөһкәм олаҹаг. Һәмчинин Мүгәддәс Китабда салеһ бәндәләр үчүн вәд олунмуш «ҝөзәл үмид» бизә проблемләрә дөзмәјә ҝүҹ верәҹәк (Тит. 2:13).

⁵ Хошбәхтлијимизин давамлы олмасыны истәјириксә, Јеһова илә мүнасибәтләримизи мөһкәмләндирмәјә давам етмәлијик. Һәвари Булус Аллаһдан илһам алараг јазмышды: «[Јеһоваја] хидмәтдә һәмишә севинин. Бир дә дејирәм, севинин!» (Филип. 4:4). Јеһова илә ҝөзәл мүнасибәтләримизин олмасы үчүн илаһи һикмәтә јијәләнмәлијик. Онун Кәламында јазылыб: «Хошбәхт о кәсдир ки, һикмәт тапыб, о кәсдир ки, бәсирәтә наил олуб... Һикмәт она бағлананлар үчүн һәјат ағаҹыдыр, ондан јапышанлар бәхтәвәр адланар» (Мәс. 3:13, 18).

6. Хошбәхтлијимизин узун сүрмәси нәдән асылыдыр?

⁶ Лакин хошбәхтлији горујуб сахламаг үчүн Мүгәддәс Китабы садәҹә охумаг кифајәт дејил, биз орада јазыланлара әмәл етмәлијик. Иса Мәсиһ нөвбәти сөзләри илә бунун ваҹиблијини вурғуламышды: «Мадам ки бунлары билирсиниз, әмәл един, онда хошбәхт олаҹагсыныз» (Јәһ. 13:17; Јагуб 1:25 ајәсини охујун). Бу, руһани еһтијаҹымызы тәмин етмәјин вә давамлы хошбәхтлијә наил олмағын ачарыдыр. Бәс бу гәдәр проблемин ичиндә неҹә хошбәхт олмаг олар? Ҝәлин ҝөрәк Иса Мәсиһ Дағүстү вәзиндә даһа һансы мәсләһәтләри вермишди.

7. Дәрд чәкәнләр неҹә хошбәхт ола биләр?

⁷ «Дәрд чәкәнләр хошбәхтдир, чүнки онлар тәсәлли тапаҹаглар» (Мәт. 5:4). Биздә суал јарана биләр: «Дәрд чәкән инсан неҹә хошбәхт ола биләр?» Иса Мәсиһ бу сөзләри дејәркән бүтүн дәрд чәкәнләри нәзәрдә тутмурду. «Сон дәрәҹә чәтин» олан бу ахырзаманда һәтта пис инсанлар да мүхтәлиф проблемләр уҹбатындан дәрд чәкир (2 Тим. 3:1). Лакин бу инсанларын фикри-зикри өз проблемләриндә олдуғундан Аллаһа јахынлашмаг барәдә  дүшүнмүрләр, буна ҝөрә дә онлар хошбәхтлик тапа билмәзләр. Одур ки, Иса Мәсиһ бу сөзләри дејәркән Аллаһа еһтијаҹы олдуғуну дәрк едән инсанлары нәзәрдә тутурду. Онлары кәдәрләндирән дүнјадакы инсанларын Аллаһдан чох узаг олмасыдыр. Һәмчинин онлар ҝүнаһлы олдугларынын фәргиндәдирләр вә ҝүнаһын нәтиҹәсиндә бәшәријјәтин дүшдүјү аҹынаҹаглы вәзијјәти ҝөрүрләр. Јеһованын нәзәри дәрд чәкән бу сәмими инсанларын үстүндәдир; О, онлара Кәламы васитәсилә тәсәлли, хошбәхтлик вә әбәди јашамаг үмиди бәхш едир. (Һизгијал 5:11; 9:4 ајәләрини охујун.)

8. Һәлим олмаг инсанын хошбәхтлијиндә һансы ролу ојнајыр?

⁸ «Һәлимләр хошбәхтдир, чүнки Јер онларын олаҹаг» (Мәт. 5:5). Һәлим олмаг инсаны неҹә хошбәхт едир? Һәгигәти дәрк едән инсан ҝет-ҝедә дәјишир. Бир заманлар кобуд, давакар, агрессив олан кәсләр «јени шәхсијјәти» ҝејинәрәк шәфгәт, хејирхаһлыг, тәвазөкарлыг, мүлајимлик, сәбир кими хүсусијјәтләри тәзаһүр етдирир (Кол. 3:9—12). Инди онлар динҹ, хошбәхт өмүр сүрүрләр вә башгалары илә јахшы мүнасибәтләри вар. Үстәлик, Мүгәддәс Китабда вәд олунур ки, «Јер онларын олаҹаг» (Зәб. 37:8—10, 29).

9. а) Һансы мәнада Јер һәлимләрин олаҹаг? б) «Салеһлик үчүн сусајыб она ҹан атанлар» нә үчүн хошбәхтдирләр?

⁹ Һансы мәнада Јер һәлимләрин олаҹаг? Мәсһ олунмушлар јер үзүнү каһин вә падшаһ гисминдә идарә едәндә «Јер онларын олаҹаг» (Вәһј 20:6). Бу вәд ҝөјдә јашамаг үмидинә саһиб олмајан милјонларла диҝәр инсана да аиддир. Онлар јер үзүндә әбәди јашамаг имканы әлдә едәндә Јерә саһиб олаҹаглар. Һәмин вахт онлар камил олаҹаг вә хошбәхт өмүр сүрәҹәкләр. «Салеһлик үчүн сусајыб она ҹан атанлар хошбәхтдир» сөзләри дә һәлимләр барәсиндә дејилиб (Мәт. 5:6). Аллаһ бүтүн писликләри бир дәфәлик мәһв едәндә салеһлик үчүн сусајанларын арзусу јеринә јетәҹәк (2 Бут. 3:13). О заман салеһләр хошбәхт олаҹаг, онлары мәјус едән ганунсузлуг вә һагсызлыг кими проблемләр даһа олмајаҹаг (Зәб. 37:17).

10. Рәһмдилли олмаг нә демәкдир?

¹⁰ «Рәһмдиллиләр хошбәхтдир, чүнки онлара мәрһәмәт ҝөстәриләҹәк» (Мәт. 5:7). Рәһмдилли инсан үрәјијумшаг, башгасынын һалына аҹыјан, шәфгәтли инсандыр. Лакин рәһмдилли олмаг јалныз шәфгәт дујмаг дејил. Мүгәддәс Китабда истифадә олунан бу сөз шәфгәти фәал шәкилдә тәзаһүр етдирмәк, белә ки, хејирхаһ әмәлләр ҝөстәрмәк мәнасыны верир.

11. Хејирхаһ сәмәријјәли һагда мәсәлдән рәһмдилли олмагла бағлы нә өјрәнирик?

¹¹ Лука 10:30—37 ајәләрини охујун. Иса Мәсиһин хејирхаһ сәмәријјәли һагда чәкдији мәсәл рәһм ҝөстәрмәјин нә демәк олдуғуну чох ҝөзәл шәкилдә изаһ едир. Сәмәријјәли өлүмҹүл вәзијјәтдә олан инсанын һалына јандығы үчүн она көмәк әли узатмышды. Мәсәли данышдыгдан сонра Иса демишди: «Ҝет, сән дә белә елә». Өзүмүздән соруша биләрик: «Бәс мән сәмәријјәли кими давранырам? Чәтинлији оланлара шәфгәт ҝөстәрирәм? Белә инсанлара көмәк етмәк үчүн даһа нәләр едә биләрәм? Мәсәлән, јығынҹагдакы јашлы мәсиһиләрә, дуллара, валидејнләри һәгигәтдә олмајан ушаглара јардым әлими узада биләрәм? “Гәмҝинләрә тәскинлик” вермәк үчүн тәшәббүс ҝөстәрә биләрәм?» (1 Салон. 5:14; Јаг. 1:27).

12. Рәһмдилли олмаг неҹә хошбәхтлик ҝәтирир?

¹² Бәс рәһмдилли олмаг инсана неҹә хошбәхтлик ҝәтирир? Иса Мәсиһ демишди ки, вермәк хошбәхтлик ҝәтирир. Одур ки,  башгаларына мәрһәмәт ҝөстәрәндә онлар үчүн нәсә етдијимизә ҝөрә хошбәхтлик дујуруг. Һәмчинин билирик ки, бунунла Јеһованы разы салырыг (Һәв. 20:35; Ибраниләрә 13:16 ајәсини охујун). Давуд пејғәмбәр башгаларына диггәт ҝөстәрәнләр барәдә јазмышды: «Јеһова ону һифз едәр, һәјатыны горујар, бәхтәвәр дејәрләр ҹаһанда она!» (Зәб. 41:1, 2). Рәһмдилли олмагла биз Јеһованын мәрһәмәтини газанаҹаг вә нәтиҹәдә әбәдијјән хошбәхтлик дујаҹағыг (Јаг. 2:13).

13, 14. Үрәјитәмиз олмағымыз хошбәхтлијимизә неҹә вәсилә олур?

¹³ «Үрәјитәмизләр хошбәхтдир, чүнки онлар Аллаһы ҝөрәҹәкләр» (Мәт. 5:8). Үрәјимизин тәмиз олмасы үчүн дүшүнҹә вә нијјәтләримиз пак олмалыдыр. Јалныз бу һалда Аллаһ ибадәтимизи гәбул едәҹәк. (2 Коринфлиләрә 4:2 ајәсини охујун; 1 Тим. 1:5.)

¹⁴ Үрәјитәмизләрин Јеһова илә ҝөзәл мүнасибәтләрә саһиб олмаг имканы вар. Јеһова онлар барәдә дејир: «Либасларыны јујанлар нә бәхтијардыр!» (Вәһј 22:14). Бу, нә мәна кәсб едир? Мәсһ олунмушларын либасларыны јумасы о демәкдир ки, онлар Јеһованын ҝөзүндә тәмиздирләр; Јеһова онлара өлмәзлик бәхш едәҹәк вә онлар ҝөјдәки мөвгеләриндә сонсузадәк хошбәхт олаҹаглар. Јер үзүндә јашамаг үмиди олан бөјүк издиһам үчүн дә бу, Јеһованын досту олараг Онун ҝөзүндә салеһ сајылмаг демәкдир. Белә ки, бу инсанлар артыг индидән «либасларыны Гузунун ганында јујуб ағардыблар» (Вәһј 7:9, 13, 14).

15, 16. Үрәјитәмизләр һансы мәнада Аллаһы ҝөрәҹәкләр?

¹⁵ Мүгәддәс Китабда јазылыб ки, Аллаһын үзүнү «ҝөрән кәс сағ гала билмәз» (Чых. 33:20). Бәс неҹә ола биләр ки, үрәјитәмизләр Аллаһы ҝөрсүн? «Ҝөрмәк» кими тәрҹүмә олунан јунан сөзү тәсәввүр етмәк, дәрк етмәк, билмәк мәнасыны верир. Буна ҝөрә дә Аллаһы һәгигәтән таныјан вә онун хүсусијјәтләринә бәләд олан шәхсләр гәлбинин ҝөзү илә Аллаһы ҝөрүр (Ефес. 1:18). Иса Мәсиһ дә Јеһованын хүсусијјәтләрини мүкәммәл шәкилдә тәзаһүр етдирдији үчүн демишди: «Мәни ҝөрән Атаны да ҝөрүб» (Јәһ. 14:7—9).

¹⁶ Аллаһын хүсусијјәтләринә бәләд олмагла јанашы, һәјатымызда Онун әлини һисс етмәклә дә Ону ҝөрмүш олуруг (Әјј. 42:5). Һәмчинин биз гәлбимизин ҝөзүнү Јеһованын вәдләринә ҹәмләјирик. О, паклығыны горујан вә Она садиг галан кәсләрә мөһтәшәм немәтләр вәд едиб. Мәсһ олунмуш мәсиһиләр исә дирилиб сәмави мүкафатларыны аландан сонра Јеһованы һәрфи мәнада ҝөрәҹәкләр (1 Јәһ. 3:2).

17. Сүлһүн хошбәхт олмағымызда һансы ролу вар?

¹⁷ «Сүлһпәрвәрләр хошбәхтдир» (Мәт. 5:9). Сүлһ јарадан шәхсләрин хошбәхт олмаг үчүн әсаслы сәбәби вар. Шаҝирд Јагуб јазмышды: «Салеһлик бәһрәсинин тохуму исә сүлһпәрвәрләр үчүн әмин-аманлыг шәраитиндә әкилир» (Јаг. 3:18). Диндашымыз вә ја аилә үзвүмүзлә мүнасибәтләримиз ҝәрҝиндирсә, Јеһовадан бизә сүлһпәрвәр олмаға көмәк етмәсини диләјә биләрик. Онда Аллаһын руһу сајәсиндә мәсиһи кејфијјәтләри тәзаһүр етдирә вә даһа хошбәхт ола биләҹәјик. Иса Мәсиһ сүлһ јаратмаг үчүн тәшәббүс ҝөстәрмәјин ваҹиблијини вурғулајараг демишди: «Әҝәр бәхшишини гурбанҝаһа ҝәтирәндә јадына дүшсә ки, кимсә сәндән инҹијиб, бәхшиши орада, гурбанҝаһын гаршысында гој. Әввәлҹә ҝет онунла барыш, сонра ҝәл бәхшишини тәгдим ет» (Мәт. 5:23, 24).

18, 19. Нә үчүн мәсиһиләр тәгибләрлә үзләшсәләр белә, севинҹләрини итирмирләр?

¹⁸ «Мәнә ҝөрә инсанлар сизи тәһгир вә тәгиб едәндә, сизин һаггынызда һәр ҹүр јалан вә пис сөз данышанда сиз неҹә дә хошбәхтсиниз!» Иса Мәсиһин бу сөзләри һансы мәна кәсб едир? О дејир: «Севинин вә шадланын, чүнки ҝөјдә сизи бөјүк мүкафат ҝөзләјир, ахы сиздән әввәл пејғәмбәрләри дә белә тәгиб етмишләр» (Мәт. 5:11, 12). Һәвариләри дөјәндән сонра бир дә тәблиғ етмәмәји тапшырыб бураханда онлар «Синедриондан севинә-севинә» чыхмышдылар. Әлбәттә, онлар дөјүлдүкләринә ҝөрә јох, Исанын ады наминә тәһгир олундугларына ҝөрә севинирдиләр (Һәв. 5:41).

¹⁹ Бу ҝүн дә Јеһованын халгы Исанын адына ҝөрә үзләшдији тәһгирләри вә диҝәр сынаглары севинҹлә гаршылајыр. (Јагуб 1:2—4 ајәләрини охујун.) Һәвариләр кими, бизим дә әзаб чәкмәкдән хошумуз ҝәлмир. Лакин сынаглар заманы Јеһоваја садиг галсаг, онларын өһдәсиндән ҝәлмәјә көмәк едәҹәк. Мәсәлән, диктаторлуг дөврүндә јашајан Һенрик Дорник вә гардашы илә баш верән һадисәјә нәзәр салаг. 1944-ҹү илин август ајында һөкумәт онлары һәбс дүшәрҝәсинә ҝөндәрмәјә гәрар верир. Ҝөрүн әлејһдарлар онлар һагда нә демишдиләр: «Онлары фикирләриндән дашындырмаг гејри-мүмкүндүр. Иманлары уғрунда өлмәк онлара севинҹ ҝәтирир». Һенрик гардаш дејир: «Дүздүр, мән өлмәк истәмирдим. Амма Јеһоваја садиг галдығым үчүн чәкдијим әзаблара ҹәсарәтлә вә ләјагәтлә таб ҝәтирмәк мәнә севинҹ верирди... Һәрарәтлә етдијим дуалар мәни Јеһоваја даһа да јахынлашдырды вә О, мәнә әсл дајаг олду».

20. Хошбәхт Аллаһа ибадәт етмәк нә үчүн бизә севинҹ бәхш едир?

²⁰ Хошбәхт Аллаһымызын биздән разы галдығыны билмәк етигадымыза ҝөрә үзләшдијимиз тәгибләрә, аилә үзвләримизин ҝөстәрдији манеәләрә, хәстәлијин вә гоҹалығын ҝәтирдији чәтинликләрә рәғмән севинҹимизи горумаға көмәк едәҹәк (1 Тим. 1:11). Һәмчинин «һеч вахт јалан данышмајан Аллаһын» вердији ҝөзәл вәдләр дә бизә хошбәхтлик бәхш едир (Тит. 1:2). Јеһованын вәдләринин ҝерчәкләшмәси о гәдәр мөһтәшәм олаҹаг ки, бу ҝүн үзләшдијимиз сынаглар вә чәтинликләр јадымыза да дүшмәјәҹәк. Јерүзү Ҹәннәт олан заман Јеһова бизә ағлымыза белә ҝәтирмәдијимиз немәтләр бәхш едәҹәк. Сөзсүз ки, о заман севинҹимиз ашыб-дашаҹаг, хошбәхтлијимиз јерә-ҝөјә сығмајаҹаг. О вахт Јеһованын бүтүн хидмәтчиләри «әмин-аманлығын боллуғундан һәзз алаҹаг» (Зәб. 37:11).