1. Јеһованы ағлынызда неҹә ҹанландырырсыныз?

 ЈЕҺОВАНЫН ҝөрүнүшү неҹәдир? Һеч бу барәдә дүшүнмүсүнүз? Дуа едәндә Ону ағлынызда неҹә ҹанландырырсыныз? Јеһова ҝөзәҝөрүнмәз олса да, Мүгәддәс Китаб Ону мүхтәлиф ҹүр тәсвир едир. Јеһова «ҝүнәш», «сипәр», «јандырыб-јахан алов» адланыр (Зәб. 84:11; Ибр. 12:29). Онун һүзуру ҝөј јагута, шөлә сачан гызылла ҝүмүшә, парылтылы ҝөј гуршағына бәнзәдилир (Һизг. 1:26—28). Јеһованын бу ҹүр тәсвир олунмасы инсаны һејрәтә ҝәтирир, һәтта ләрзәјә салыр.

2. Бәзиләри нәјә ҝөрә Јеһоваја јахынлашмагда чәтинлик чәкир?

² Јеһованы ҝөрә билмәдијимиз үчүн Онун бизи севдијинә инанмаг чәтин ҝәлә биләр. Бәзиләри дүшүнүр ки, Јеһова онлары һеч вахт севмәз. Буна сәбәб онларын кечмишдә јашадыгларыдыр. Ола билсин, онлар һеч вахт ата севҝиси ҝөрмәјибләр. Јеһова һансы һиссләри кечирдијимизи вә нәјә ҝөрә Она јахынлаша билмәдијимизи баша дүшүр. Она ҝөрә Кәламы васитәсилә бизә неҹә ҝөзәл, меһрибан Аллаһ олдуғуну ачыглајыр.

3. Нәјә ҝөрә Јеһованын мәһәббәти барәдә даһа ҝениш дүшүнмәлијик?

³ Бир сөз вар ки, Јеһованы там шәкилдә ифадә едир: мәһәббәт. Мүгәддәс Китабда дејилир: «Аллаһ мәһәббәтдир» (1 Јәһ. 4:8). Јеһованын ҝөрдүјү һәр бир ишин архасында мәһәббәт дурур. Онун мәһәббәти о гәдәр бол, о гәдәр ҝүҹлүдүр ки, тәкҹә Ону севәнләрә јох, Ону севмәјәнләрә дә бәс едир (Мәт. 5:44, 45). Бу мәгаләдә Јеһова вә Онун мәһәббәти барәдә даһа ҝениш данышаҹағыг. Аллаһымызы даһа јахындан таныдыгҹа Она севҝимиз артдыгҹа артаҹаг.

 ЈЕҺОВА БИЗИ ЧОХ ИСТӘЈИР

4. Јеһованын меһрибан олмасы сизә неҹә тәсир едир? (Һәмчинин шәклә бахын.)

⁴ «Јеһова чох меһрибан»дыр (Јаг. 5:11). Мүгәддәс Китабда Јеһованын бизә мәһәббәти ана мәһәббәтинә тән тутулур (Әшј. 66:12, 13). Көрпә баласына гајғы ҝөстәрән ананы хәјалынызда ҹанландырын. О, көрпәсини дизи үстүндә ојнадыр, онунла меһрибан, ширин-ширин данышыр. Көрпәси ағлајанда, ја да ағрыјанда тез һајына чатыр. Биз дә гәлбимиз сызылдајанда Јеһованын мәһәббәтинә архалана биләрик. Мәзмурчу јазмышды: «Фикирләр мәни чулғајанда мәнә тәсәлли вериб овутдун» (Зәб. 94:19).

5. Јеһованын бол мәһәббәтли, сәдагәтли олмасы сизин үчүн нә мәна кәсб едир?

⁵ Јеһованын мәһәббәти болдур, О, сәдагәтли Аллаһдыр (Зәб. 103:8). Биз һансыса сәһвә јол верәндә Јеһова биздән әлини үзмүр. Исраил халгы Јеһованы дәфәләрлә мәјус етмишди. Амма онлар төвбә едәндә Јеһова нөвбәти сөзләрлә онлара севҝисини изһар етмишди: «Мәнә әзиз олдун, сәни шәрәфләндирдим, сәни севдим» (Әшј. 43:4, 5). Јеһова бизи дә ејни дәрәҹәдә севир, буна һәмишә әмин ола биләрик. Һәтта ҹидди сәһвләр етсәк дә, О биздән үз дөндәрмәз. Төвбә едиб Јеһоваја ҝери дөнсәк, ҝөрәҹәјик ки, Онун бизә севҝиси әввәлки гәдәрдир. Јеһова бизи «ҹомәрдликлә әфв» едәҹәјинә сөз верир (Әшј. 55:7). Мүгәддәс Китабда Јеһованын әфви Ондан ҝәлән «тәравәт мөвсүмү»нә бәнзәдилир (Һәв. 3:19).

6. Зәкәријјә 2:8 ајәсиндән Јеһова барәдә нә өјрәнирик?

⁶ Зәкәријјә 2:8 ајәсини охујун. Јеһова бизи Өзүнүн ҝөз бәбәјинә бәнзәдир. Ҝөз бәдәнин һәссас вә чох дәјәрли бир үзвүдүр. Буна ҝөрә дә Јеһова санки бизә белә дејир: «Еј халгым, сизи инҹидән Мәним үчүн чох дәјәрли бир шеји инҹитмиш олур». Јеһова бизи севдији үчүн кечирдијимиз һиссләр Онун ҝөзүндән јајынмыр, О бизи горумаг истәјир. Биз кәдәрләнәндә Јеһова да кәдәрләнир. Она ҝөрә дә әминликлә бу ҹүр дуа едә биләрик: «Мәни ҝөз бәбәјин кими гору» (Зәб. 17:8).

7. Јеһованын севҝисинә олан әминлијимизи нәјә ҝөрә мөһкәмләндирмәлијик?

⁷ Јеһова сизи шәхсән севир, О буна әмин олмағынызы истәјир. Амма Јеһова билир ки, кечмишдә башыныза ҝәләнләрә ҝөрә үрәјиниздә Онун севҝисинә шүбһә ола биләр. Ја да ола билсин, инди үзләшдијиниз һансыса вәзијјәт  Јеһованын севҝисинә етибарынызы сынасын. Бәс Онун мәһәббәтинә етибарынызы неҹә артыра биләрсиниз? Бунун үчүн ҝәлин ҝөрәк Јеһова Исаја, мәсһ олунмуш мәсиһиләрә вә бизә мәһәббәтини неҹә ифадә едир.

ЈЕҺОВА МӘҺӘББӘТИНИ НЕҸӘ ИФАДӘ ЕДИР?

8. Исаны Атасынын ону севдијинә нә әмин етмишди?

⁸ Јеһова милјардларла ил севимли Оғлу илә бирҝә вахт кечириб. Бу илләр әрзиндә араларында мөһкәм мәһәббәт јараныб. Онларын мүнасибәти Каинатдакы ән гәдим мүнасибәтдир. Мәтта 17:5 ајәсиндән охудуғумуз кими Јеһова ајдын шәкилдә Исаны севдијини билдирмишди. Јеһова истәсәјди, садәҹә белә дејә биләрди: «Мән ондан разыјам». Амма О, Исаны «Мәним севимли Оғлум» адландырмышды, чүнки ону нә гәдәр чох севдијини билмәјимизи истәјирди. Јеһова Иса илә фәхр едирди, онун тезликлә атаҹағы аддыма ҝөрә гүрур дујурду (Ефес. 1:7). Иса Атасынын севҝисинә зәррә гәдәр дә шүбһә етмирди. Иса үчүн Јеһованын мәһәббәти о гәдәр ҝерчәк иди ки, буну үрәјинин дәринлијинә кими һисс едирди. Буна ҝөрә дә Атасынын ону севдијини дәфәләрлә демишди (Јәһ. 3:35; 10:17; 17:24).

9. Јеһованын мәсһ олунмушлары севдијини һансы ифадә ҝөстәрир? Изаһ един (Ромалылара 5:5).

⁹ Јеһова мәсһ олунмуш мәсиһиләри дә севдијини билдириб. (Ромалылара 5:5 ајәсини охујун.) Мүгәддәс Китабын бир изаһлы лүғәтиндә «долмушдур» сөзү «чајтәк үстүмүзә ахмышдыр» кими верилиб. Бу ифадә Јеһованын мәсһ олунмуш мәсиһиләрә севҝисинин боллуғуну неҹә дә ҝөзәл тәсвир едир! Мәсһ олунмушлар Аллаһ тәрәфиндән севилдикләрини билирләр (Јһд. 1). Һәвари Јәһја нөвбәти сөзләри јазаркән онларын һиссләрини ифадә етмишди: «Ҝөрүн Атамыз бизә неҹә дә бөјүк мәһәббәт бәхш едиб ки, биз Онун өвладлары адланырыг!» (1 Јәһ. 3:1). Бәс Јеһова тәкҹә мәсһ олунмушлары севир? Хејр. О һамымыза севҝисини сүбут едиб.

10. Јеһованын бизә олан мәһәббәтинин ән бөјүк исбаты нәдир?

¹⁰ Јеһованын мәһәббәтинин ән бөјүк исбаты нәдир? Фидјә. Бу, Каинатдакы ән бөјүк мәһәббәтин тәҹәссүмүдүр (Јәһ. 3:16; Ром. 5:8). Јеһова бүтүн инсанларын ҝүнаһларынын бағышланмасы вә Онунла дост олмасы үчүн Она әзиз олан Оғлунун өлмәсинә разы олду (1 Јәһ. 4:10). Јеһованын вә Исанын неҹә бөјүк бир дәјәр өдәдији барәдә дүшүндүкҹә онларын һәр биримизи нә гәдәр чох севдијини даһа ајдын баша дүшүрүк (Гал. 2:20). Јеһова фидјәни сырф әдаләтинин буну тәләб етдији үчүн тәмин етмәмишди. Бу, мәһәббәтдән ирәли ҝәләрәк верилмиш һәдијјә иди. Јеһова Онун үчүн ән әзиз олан варлығы, Иса Мәсиһи гурбан вермәклә бизи нә гәдәр чох севдијини сүбут етди. О биздән өтрү Оғлунун әзаб чәкмәсинә вә өлмәсинә изин верди.

11. Әрәмја 31:3 ајәсиндән нә өјрәнирик?

¹¹ Ҝөрдүјүмүз кими Јеһова һиссләрини ҝизләтмир. О, ачыг-ашкар бизә олан мәһәббәтини билдирир. (Әрәмја 31:3 ајәсини охујун.) Севҝидән ирәли ҝәләрәк Јеһова бизи Өзүнә тәрәф чәкир. (Ганунун тәкрары 7:7, 8 ајәләри илә әлагәләндирин.) Һеч ким вә һеч нә бизи Онун мәһәббәтиндән ајыра билмәз (Ром. 8:38, 39). Бәс Јеһованын севҝиси сиздә һансы һиссләри јарадыр? Зәбур 23-ҹү мәзмуру охујун. Ҝөрүн Јеһованын севҝиси вә нәвазиши Давудда һансы һиссләр јаратмышды вә бизим һәр биримиздә һансы һиссләри јарада биләр.

ЈЕҺОВАНЫН МӘҺӘББӘТИ БИЗӘ НЕҸӘ ТӘСИР ЕДИР?

12. Зәбур 23-ҹү мәзмурда нәдән данышылыр?

¹² Зәбур 23:1—6 ајәләрини охујун. 23-ҹү мәзмурда Давуд Јеһованын ону севдијинә,  онун гајғысына галдығына олан әминлијини ифадә едир. О бу мәзмурда Јеһованы «Чобаным» адландырыр. Онунла арасындакы мөһкәм достлуг телләриндән данышыр. Давуд Јеһованын ону јөнләндирмәсинә изин вермәклә өзүнү тәһлүкәсизликдә һисс едирди. О, тамамилә Јеһоваја бел бағлајырды. Давуд һәр ҝүн Јеһованын мәһәббәтини дујаҹағына әмин иди. Бу әминлик онда һарадан иди?

13. Давуд Јеһованын гајғысына нәјә ҝөрә әмин иди?

¹³ «Мөһтаҹ олмарам». Давуд һеч нәдән корлуг чәкмирди. Чүнки Јеһова онун зәрури еһтијаҹларыны һәмишә өдәјирди. Давуд билирди ки, Јеһова кими досту вар вә Јеһова ондан разыдыр. Буна ҝөрә дә ҝәләҹәкдә нә баш верир версин, Давуд Јеһованын бундан сонра да онун гејдинә галаҹағына әмин иди. Давудун Јеһованын мәһәббәтинә олан етибары кечирдији нараһатлыглардан даһа ҝүҹлү иди. Бу да она хошбәхтлик вә гәлб раһатлығы верирди (Зәб. 16:11).

14. Јеһова гајғымыза неҹә галыр?

¹⁴ Јеһова бизим дә гајғымыза галыр, хүсусилә дә башымыза пис шејләр ҝәләндә. 20 илдән чохдур ки, Бејтелдә хидмәт едән Клер a баҹынын һадисәсинә бахаг. Онун аиләси ард-арда проблемләрлә үзләшмишди. Атасы ифлиҹ олмушду, баҹыларындан бири јығынҹагдан кәнар едилмишди. Бу, азмыш кими, аиләси кичик бизнесини итирмишди, үстәлик, банк онларын евини мүсадирә етмишди. Клер баҹы нә едәҹәјини билмирди, өзүнү чарәсиз һисс едирди. Бәс Јеһова онларын гајғысына галдығыны неҹә ҝөстәрди? Клер баҹы дејир: «Јеһова һәр ҝүн аиләмин зәрури еһтијаҹларыны тәмин едирди. Дәфәләрлә олуб ки, О бизим еһтијаҹларымызы артыгламасы илә өдәјиб. Тез-тез Јеһованын бизә көмәк етдији вахтлар  барәдә дүшүнүрәм. Онун мәһәббәтлә бизим гајғымыза неҹә галдығыны һеч вахт унутмарам. Бу һадисәләр мәнә үзләшдијим диҝәр чәтинликләрдән дә кечмәјә көмәк етди».

15. Давуд нәјин сајәсиндә гүввәтләнмишди? (Һәмчинин шәклә бахын.)

¹⁵ «Ҹаныма гүввәт верир». Давуд јашадығы проблемләр, үзләшдији сынаглар уҹбатындан һәрдән мәјус олурду (Зәб. 18:4—6). Амма Јеһованын мәһәббәти, гајғысы она гүввәт верирди. Јеһова проблемләрдән тәнҝә ҝәлмиш достуну «јашыл отлагларда динҹәлдир», «јахшы суварылан сакит јерләрә апарыр»ды. Бунун сајәсиндә Давуд јенидән ҝүҹ топлајыб Јеһоваја хидмәтини давам етдирә билирди (Зәб. 18:28—32).

16. Јеһованын мәһәббәти сизи неҹә гүввәтләндирир?

¹⁶ Биз дә сынагларла, чәтинликләрә үзләшәндә «Јеһованын мәһәббәти» сајәсиндә дөзә билирик (Мәрс. 3:22; Кол. 1:11). Рејчел баҹынын һадисәсинә бахаг. COVID-19 пандемијасы вахты әри баҹыны атыб ҝетмишди вә Јеһовадан үз дөндәрмишди. Бу һадисә баҹыны чох сарсытмышды. Бәс Јеһова баҹынын гајғысына неҹә галды? Рејчел дејир: «Јеһова севилдијими һисс етдирди. О, баҹы-гардашлар васитәсилә мәнә көмәк етди: онлар мәнимлә вахт кечирирдиләр, мәнә јемәк ҝәтирирдиләр, руһландырыҹы месажлар, ајәләр ҝөндәрирдиләр, мәни ҝөрәндә ҝүлүмсәјирдиләр вә Јеһованын гајғыма галдығыны даима хатырладырдылар. Бу ҹүр гајғыкеш, меһрибан аиләјә ҝөрә Јеһоваја һәмишә миннәтдарлығымы билдирирәм».

17. Нәјә ҝөрә Давуду һеч нә горхутмурду?

¹⁷ «Һеч нә мәни горхутмур, чүнки Сән мәнимләсән». Давудун һәјаты тез-тез тәһлүкәдә олурду. Онун чохлу ҝүҹлү дүшмәнләри вар иди. Амма Јеһованын мәһәббәти сајәсиндә о өзүнү тәһлүкәсизликдә һисс едирди. Давуд Јеһованын һәр вәзијјәтдә онунла олдуғуну һисс едирди, буна ҝөрә дә үрәји раһат иди. Елә бу сәбәбдән о демишди: «[Јеһова] мәни бүтүн горхулардан азад етди» (Зәб. 34:4). Давудун горхулары әбәс јерә дејилди. Амма Јеһованын мәһәббәти сајәсиндә о бу горхуларына галиб ҝәлди.

18. Горху кечирәндә Јеһованын мәһәббәтинә әминлијиниз сизи неҹә мөһкәмләндирә биләр?

¹⁸ Бәс бизи горхуја салан вәзијјәтләрлә үзләшәндә Јеһованын севҝисинә олан әминлијимиз бизә неҹә ҝүҹ верир? Сузи адлы өнҹүл баҹынын һадисәсинә бахаг. Баҹынын оғлу интиһар етмишди. Бу фаҹиәви һадисә она вә әринә һансы  һиссләри јашатмышды? Баҹы дејир: «Һәјатында гәфил фаҹиә баш верәндә инсан чох сарсылыр, әли-голу јанына дүшүр, өзүнү чарәсиз һисс едир. Амма Јеһованын мәһәббәти сајәсиндә өзүмүзү санки Онун ганадлары алтында һисс етдик». Јухарыда ады чәкилән Рејчел бөлүшүр: «Бир ҝеҹә үрәјим дәһшәтли дәрәҹәдә ағрымаға башлады. Чох нараһат идим, горхурдум. Һајгырараг Јеһоваја дуа етдим. Ана ушағыны сакитләшдирдији кими Јеһова да о дәгигә мәни овутду, үрәјимә сакитлик верди. Беләҹә, јата билдим. Һәмин ан һеч вахт јадымдан чыхмаз». Тасос адлы ағсаггал исә һәрби хидмәтдән имтина етдији үчүн дөрд ил иди ки, һәбсдә иди. Бәс гардаш Јеһованын мәһәббәтини, гајғысыны неҹә һисс етди? Тасос дејир: «Јеһова бүтүн еһтијаҹларымы артыгламасы илә өдәди. Бу мәним Јеһоваја там етибар етмәк гәтијјәтими мөһкәмләндирди. Һәмчинин Јеһова мүгәддәс руһу илә мәнә һәбсхана кими бир мүһитдә севинҹими горумаға көмәк етди. Бу мәни әмин етди ки, Јеһова илә нә гәдәр чох әмәкдашлыг етсәм, Онун кәрамәтини бир о гәдәр чох дадаҹағам. Беләҹә, һәбсдә ола-ола өнҹүл хидмәтинә башладым».

МЕҺРИБАН АЛЛАҺ ЈЕҺОВАЈА ЈАХЫНЛАШЫН

19. а) Јеһованын бизи севдијини билмәк дуаларымыза неҹә тәсир едәҹәк? б) Јеһованын мәһәббәти илә бағлы һансы тәсвир сизә хүсусилә тәсир етди? (« Јеһованын мәһәббәтинин истилијини дујмаға көмәк едән ајәләр» адлы чәрчивәјә бахын.)

¹⁹ Бүтүн бу һадисәләр сүбут едир ки, «мәһәббәт... Аллаһы» Јеһова бизимләдир! (2 Кор. 13:11). О бизимлә шәхсән марагланыр. Әминик ки, Онун мәһәббәти бизи әһатә едир (Зәб. 32:10). Јеһованын севҝисини һансы јолларла ҝөстәрдији барәдә даһа чох дүшүнсәк, гајғымыза галдығына даһа да әмин олаҹағыг, өзүмүзү Она јахын һисс едәҹәјик. Биз Јеһоваја чәкинмәдән дуа едә биләрик, севҝисинә нә гәдәр еһтијаҹ дујдуғумузу дејә биләрик. Бүтүн нараһатлыгларымызы Онунла бөлүшә биләрик, чүнки әминик ки, О бизи баша дүшүр вә бизә көмәк етмәк истәјир (Зәб. 145:18, 19).

20. Јеһованын мәһәббәти бизи Она неҹә јахынлашдырыр?

²⁰ Сојуг һавада оҹаг бизи иситдији кими чәтинликләрлә, сынагларла үзләшәндә дә Јеһованын мәһәббәти гәлбимизи исиндирир. О бизи овудур, бизә гәлб раһатлығы верир, одур ки, севинин! Онун мәһәббәтинин гаршылығында сиз дә белә дејин: «Јеһованы севирәм»! (Зәб. 116:1).