«ЈЕНИ Дүнја Тәрҹүмәси»ндә истифадә олунан «араба» сөзү алтында мүхтәлиф нөв арабалар нәзәрдә тутула биләр (Һәв. 8:28, 29, 38). Бунунла белә, ҝөрүнүр, һәбәшистанлы мәмурун олдуғу араба мүһарибә вә ја јарышда истифадә олунан арабалардан даһа бөјүк иди. Белә нәтиҹәјә ҝәлмәк үчүн нөвбәти әсаслар вар.

Бу һәбәшистанлы киши сарај мәмуру иди вә узун јола чыхмышды. О, «Һәбәшистан һөкмдары кандакинин сарај хадими вә хәзинәдары» иди (Һәв. 8:27). Гәдим Һәбәшистана буҝүнкү Суданын әразиси вә буҝүнкү Мисирин ҹәнуб бөлҝәсинин әксәр һиссәси дахил иди. Ола билсин, мәмур бүтүн сәјаһәти ејни араба илә етмәмишди. Бунунла белә, узун сәфәрә чыхдығы үчүн, һәр һалда, јүкү чох иди. Ерамызын биринҹи әсриндә сәрнишин арабаларынын бәзиләри дөрдтәкәрли вә үстү бағлы олурду. Бир китабда дејилир: «Бу ҹүр арабаларда јүк дашымаг үчүн јер чох иди, сәјаһәт етмәк раһат иди вә еһтимал ки, даһа узун сәфәрләрә чыхмаг олурду» («Acts—An Exegetical Commentary»).

Филип јахынлашанда һәбәшистанлы мәмур китаб охујурду. Һәвариләрин ишләри 8:30 ајәсиндә јазылыб: «Филип арабајла јанашы гачанда ешитди ки, мәмур уҹадан Әшија пејғәмбәрин китабыны охујур». Сәјаһәт арабалары сүрәтли ҝетмәк үчүн дүзәлдилмәмишди. Араба аста ҝетдији үчүн һәм мәмур раһат китаб охуја билирди, һәм дә Филип гачараг арабаја чата билмишди.

Мәмур «Филипдән хаһиш етди ки, арабаја галхыб јанында отурсун» (Һәв. 8:31). Јарыш арабаларында јарышчылар ајаг үстә дурурду. Сәјаһәт арабасында исә мәмурун вә Филипин отурмасы үчүн, јәгин ки, јер вар иди.

Һәвариләрин ишләри 8-ҹи фәслә вә әлдә олан тарихи сүбутлара әсасән сон вахтлар нәшрләримиздә һәбәшистанлы мәмур мүһарибә вә ја јарышда истифадә олунан кичик арабада јох, бөјүк арабада тәсвир олунур.