Бу ҝүн биз мәсиһиләр Мусанын гануну алтында јашамасаг да, Јеһова һәр биримиздән һәмин гануна дахил олан ики ән ваҹиб әмрә табе олмағы тәләб едир. Һәмин әмрләрдә дејилир ки, биз Аллаһы вә инсанлары севмәлијик (Мт 22:37—39). Бу мәһәббәт өз-өзүнә јаранмыр, нә дә ирсән кечмир. Ону инкишаф етдирмәк ҝәрәкдир. Буну неҹә етмәк олар? Ваҹиб аддымлардан бири Мүгәддәс Китабы һәр ҝүн охумагдыр. Кәламы охудугҹа Аллаһын мүхтәлиф хүсусијјәтләрини, Онун һүснүнү ҝөрүрүк (Зб 27:4). Бунун сајәсиндә Она мәһәббәтимиз артыр вә Онун дүшүнҹәсини әкс етдирмәјә башлајырыг. Бу да, өз нөвбәсиндә, бизи, инсанлары севмәк гануну да дахил олмагла, Јеһованын бүтүн ганунларына табе олмаға тәшвиг едәҹәк (Јһ 13:34, 35; 1Јһ 5:3). Мүгәддәс Китаб мүталиәсини мараглы етмәк үчүн үч тәклиф:

• Тәхәјјүлүнүзү ишә салын. Охудуғунуз парчаны тәсәввүрүнүздә ҹанландырын. Нә ҝөрүрсүнүз? Һансы сәсләри ешидирсиниз? Һансы гохулары дујурсунуз? Һаггында охудуғунуз инсанлар һансы һиссләри кечирир?

• Мүхтәлиф үсулларла охујун. Мүгәддәс Китабы пәсдән охуја, јахуд аудио јазысыны динләјәркән һәмин парчаны китабдан изләјә биләрсиниз. Јахуд фәсилләри ардыҹыл олараг охумаг әвәзинә, мүәјјән персонаж, ја да һадисә барәдә охумаг олар. Мисал үчүн, Мүгәддәс Китабын А7 вә Б12 әлавәләриндә Иса Мәсиһ һаггында охуја биләрсиниз. Ҝүндәлик ајәнин ҝөтүрүлдүјү фәсли бүтөв охујун. Һәмчинин Мүгәддәс Китаб бөлмәләрини хроноложи ардыҹыллығына ҝөрә охумаг да олар.

• Охудуғунузу баша дүшмәјә чалышын. Охумаг хатиринә һәр ҝүн бир нечә фәсил охумагданса, ҹәми бир фәсил охујуб үзәриндә дүшүнмәк јахшы оларды. Вәзијјәти тәсәввүр етмәјә чалышын, хырдалыглара диггәт јетирин, хәритәләрдән вә чарпаз истинадлардан истифадә един. Баша дүшмәдијиниз мәгамлардан ән азы бирини арашдырын. Охумаға нә гәдәр вахт ајырырсынызса, чалышын охудугларынызын үзәриндә дүшүнмәјә дә о гәдәр вахт ајырын.