«SALEH imanı sayəsində yaşayacaq»,— deyə Müqəddəs Kitabda yazılır (Romalılara 1:17). Bu ayədəki sevindirici vədin sizə də aidiyyəti var. Gəlin görək necə.

Yer üzündəki tapşırığını başa vurduqdan sonra İsa Məsih göylərə, Allahın yanına qayıtdı. O, şagirdlərinin gözü önündə «yuxarı qaldırıldı və bulud onu örtüb görünməz etdi» (Həvarilərin işləri 1:9). Göylərdə Allah onu qüdrətli səmavi Padşah təyin etdi. Yaxın gələcəkdə «İnsan Oğlu [İsa] bütün mələklərlə birgə öz calalında gəlib şanlı taxtına əyləşəcək. Bütün xalqlar onun önündə yığışacaq və o, insanları çoban qoyunları keçilərdən ayırdığı kimi, bir-birindən ayıracaq» (Mətta 25:31, 32). Bu nə zaman baş verəcək?   

Müqəddəs Kitabda Məsihin xalqlar üzərində hökmünün yaxınlaşmasına əlamət olaraq bütün dünyada əzab-əziyyətin olacağı bir dövr haqda qabaqcadan peyğəmbərlik edilmişdi. İsa bu əlamətə nələrin daxil olacağını sadalamışdı: «Millət millətə qarşı, dövlət dövlətə qarşı qalxacaq. Güclü zəlzələlər olacaq, gah burada, gah orada qıtlıqlar və xəstəliklər olacaq. İnsanlar dəhşətli mənzərələrin... şahidi olacaq» (Luka 21:7, 10, 11).

Bu gün biz İsanın sözlərinin yerinə yetdiyini aydın görürük. Tezliklə İsa pisləri məhv etmək üçün gələcək. Sonda hətta Şeytan da məhv olunacaq! Bütün yer üzü Cənnətə çevriləcək. Hamı bir-birilə, hətta heyvanlarla sülh içində yaşayacaq. «Qurdla quzu sülhdə yaşayacaq, bəbirlə çəpiş yan-yana uzanacaq. Buzov, aslan və bəslənmiş heyvan bir yerdə olacaq. Onları balaca uşaq otaracaq... Onlardan xətər gəlməyəcək» (Əşiya 11:6, 9). «Heç bir sakin “xəstəyəm” deməyəcək... O vaxt korların gözləri açılacaq, karların qulaqları eşidəcək» (Əşiya 33:24; 35:5). Hətta ölülər də dirildiləcək. «Külli-İxtiyar Yehova bütün üzlərdən göz yaşlarını siləcək», həmçinin «artıq ölüm olmayacaq. Nə dərd, nə fəryad, nə də ağrı olmayacaq» (Əşiya 25:8; Vəhy 21:4). Allahın yer üzünə dair ilk niyyəti o zaman yerinə yetəcək. Necə də gözəl ümiddir!

Allah Cənnətdə yaşamaq mükafatını kimlərə verəcək? İmanlı insanlara — həqiqi imana sahib olan insanlara!

Unutmayın ki, həqiqi iman Allahın Kəlamından olan dəqiq biliyə əsaslanır. Buna görə də Allahı və İsanı daha yaxşı tanımağa çalışın!

Həqiqi iman saleh əməllərlə təsdiqlənir. Allahın Kəlamında deyilir: «Ruhsuz bədən ölü olduğu kimi, əməlsiz iman da ölüdür» (Yaqub 2:26). Yaxşı işlər görməklə siz Allahın qüvvə, ədalət, hikmət və məhəbbət kimi gözəl  keyfiyyətlərini əks etdirəcəksiniz. Allaha məqbul olan bu xüsusiyyətləri özünüzdə yetişdirməyə çalışın!

Həqiqi imana sahib olmaq sizə bol nemətlər gətirəcək. Həqiqətən də, əsl iman xoşbəxtliyin açarıdır. Onun sayəsində biz indi və gələcəkdə əbədiyyən xoşbəxtliyə nail ola bilərik!