Ир менән ҡатын, бер самолеттағы ике пилот кеүек, бер команда булып эш итергә тейеш. Хатта ауырлыҡтар килеп сыҡҡанда ла, икеһенә лә «мин» тип түгел, «беҙ» тип уйларға кәрәк.

ИЗГЕ ЯҘМАНАН ПРИНЦИП: «Улар инде икәү түгел, ә бер бөтөн» (Матфей 19:6).

«Никах ул — соло түгел, ә дуэт. Никах ныҡ булһын өсөн, ир менән ҡатын тығыҙ хеҙмәттәшлек итергә тейеш» (Кристофер).

Ауырлыҡтар килеп сыҡҡанда, бер команда булмаған ир менән ҡатын, бергәләп проблеманы хәл итер урынға, бер-береһенә һөжүм итә. Һөҙөмтәлә, төймәләй генә ауырлыҡ дөйәләй проблемаға әйләнергә мөмкин.

«Никахта бер команда булыу бик мөһим. Әгәр улай түгел икән, ир менән ҡатын күршеләр кеүек: бергә йәшәйҙәр, ә мөһим һорауҙар килеп сыҡҡанда, һәр кем үҙенә башҡа» (Александра).

ҮҘЕГЕҘҘЕ ТИКШЕРЕГЕҘ

• Эшләп тапҡан аҡсамды үҙемдеке тип һанайыммы?

• Ныҡлап ял итер өсөн, миңә тормош иптәшемдән айырым булырға кәрәкме?

• Тормош иптәшем туғандары менән яҡшы мөнәсәбәттә булһа ла, мин улар менән аралашмаҫҡа тырышаммы?

БЕРГӘ ФЕКЕР АЛЫШЫҒЫҘ

• Ниндәй өлкәләрҙә беҙ бер команда кеүек эш итәбеҙ?

• Ниндәй өлкәләрҙә беҙгә яҡшырырға кәрәк?

• Беҙгә яҡшыраҡ хеҙмәттәшлек итергә нимә ярҙам итер?

КӘҢӘШТӘР

• Теннистағы кеүек, сетканың ике яғында бер-берегеҙгә ҡаршы уйнар урынға, бер команда булып бер яҡта уйнағыҙ.

• «Миңә нисек еңергә?» тип түгел, «беҙгә нисек еңергә?» тип уйлау яҡшыраҡ.

«Кем хаҡлы, кем ғәйепле икәнен асыҡларға маташмағыҙ. Ғаиләләге тыныслыҡ һәм гармония күпкә мөһимерәк» (Итан).

ИЗГЕ ЯҘМАНАН ПРИНЦИП: «Һәр кем үҙ мәнфәғәтен генә түгел, башҡалар хаҡында ла хәстәрлек күрһен» (Филиптарға 2:3, 4).