Adam lan Hawa ngelah panak, suba kéto manusa di guminé ngancan ngeliunang. Di masané ento, ada para malaékat ané milu memberontak nukung I Setan.

Ipun tuun ka guminé lan masalin rupa dadi manusa apang ngidaang ngantén ajak anak eluh. Lantas, anaké eluh ento ngelah keturunan ané awakné gedé siteng lan jaat.

Guminé kabekin baan manusa ané malaksana jaat. Alkitab ngorahang ”kadurakan manusane kalintang ageng ring jagate, miwah sakancan pepinehipune tansah ngwetuang kadrowakan kewanten.”

Nuh anak ané jemet. Yehuwa ngorahin Nuh unduk rencanan Ida lakar ngapus manusa ané jaat nganggo blabar gedé.

Tuhan mréntahang Nuh ngaé kapal ané gedé, ané kaadanin bahtera, lantas ia ngajak kluargané makejang macelep ka kapalé ento, kéto masih tiap-tiap jenis beburon.

Nuh ngemaang peringatan tekén manusané makejang lakar ada Blabar gedé, kéwala anaké ditu tusing nyak madingehang. Ada ané ngedékin, ané lénan gedeg tekén Nuh.

Disubané bahterané ento pragat, Nuh nedehang beburonné macelep ka kapalé.