Yesus ngajahang tekén anak ané ninutin Tuhan, tuah abesik ada agama ané sujati. Ipun ngumpamaang buka jalan ané nuju idup langgeng. Yesus ngorahang: ”Langah pesan anak ane nepukin” jalané ento. (Matius 7:​14) Tuhan tuah nrima ibadat ané madasar baan Cakepan Suci. Makejang anak ané nyalanang ibadat ané sujati, lakar patuh kapracayaané.​—Baca Yohanes 4:​23, 24; 14:6; Epesus 4:​4, 5.

Yesus taén ngemaang peringatan unduk nabi-nabi palsu. Uli sisi, ngenahné ia nyalanang ibadat ané sujati. Gereja-gerejané ngaku Kristen. Kéwala, apaké mula saja kéto? Uli dija ragané bisa nawang? Anak Kristen ané sujati ngenah uli sipat lan laksanané ané tingaliné tekén anak lénan.​—Baca Matius 7:​14-​23.

Kenehang lelima ciri-ciriné:

• Anak ané nyalanang ibadat sujati ngormatin Cakepan Suci ané dadi Sabdan Tuhan. Ia ngaé upaya apang idupné adung ajak prinsip-prinsip Cakepan Suci. Dadiné, agama ané sujati malénan tekén agama ané ajahané madasar uli tradisi manusa. (Matius 15:​7-9) Anaké ané nyalanang ibadat ané sujati idupné cocok ajak apa ané ajahanga.​—Baca Yohanes 17:17; 2 Timotius 3:​16, 17.

•   Anaké ané nyalanang ibadat sujati ngormatin adan Tuhan, Yehuwa. Carané Yesus ngormatin adan Tuhan, ia ngajahin anak lénan kanti liu anaké nawang Yehuwa. Ia nulungin anak lénan apang nawang Tuhan lan ngajahin ipun carané ngastawa apang adan Yehuwa kasuciang. (Matius 6:⁠9) Di tongos ragané ngoyong, nyénké ané suba ngortiang adan Tuhan?​—Baca Yohanes 17:26; Roma 10:​13, 14.

• Anaké ané nyalanang ibadat sujati ngortiang unduk Kerajaan Tuhan. Tuhan ngutus Yesus buat ngortiang orti luung unduk Kerajaan. Tuah Kerajaan Tuhan ané dadi harapan buat umat manusané. Yesus terus ngortiang Kerajaan kanti ia mati. (Lukas 4:​43; 8:1; 23:​42, 43) Ia masih ngorahin murid-muridné ngortiang unduk Kerajaan. Yén ada anak teka ngorahin ragané unduk Kerajaan Tuhan, apa agaman anaké ento?​—Baca Matius 24:⁠14.

• Anaké ané nyalanang ibadat sujati tusing milu dadi bagian uli guminé ané jaat. Ragané bisa nawang anak ané nyalanang ibadat sujati, krana ipun tusing milu urusan politik. (Yohanes 17:16; 18:36) Buina ia tusing nuutin solah lan laksana jelek ané umum di guminé jani.​—Baca Yakobus 4:⁠4.

• Anaké ané nyalanang ibadat sujati ngelah rasa sayang tekén anak lénan. Uli Sabdan Ida, ipun malajah ngormatin suku ané lénan. Anaké ané nyalanang ibadat palsu biasané nukung perang. Ané nyalanang ibadat sujati tusing nyak milu perang. Anak Kristen sujati tusing mentingang dewék, ia nyak nganggon waktu lan gelahné buat nulungin tur ngibur anak lénan.​—Baca Yohanes 13:​34, 35; 1 Yohanes 4:​20.

Menurut ragané, agama ané cén ajahané madasar baan Sabdan Tuhan, ngormatin adan Tuhan lan ngumumang tuah Kerajaan Tuhan ané dadi harapan umat manusané? Kelompok ané encén ané nunjukang rasa sayang lan tusing nukung perang?​—Baca 1 Yohanes 3:​10-​12.