1, 2. Lelaa ñôma Paul a bi unda le a nti mayéga inyu konangoo i mbuma ñañ i Djob?

Ñoma Paul a bé a kôli kal ni maliga le: “Karis [i Djob] inyu yem i yila bé yañga.” ^[1] (Añ 1 Korintô 15:9, 10.) Paul a bé tibil yaga yi le a bé bé a kôli kôhna konangoo i mbuma ñañ i Yéhôva, hala kiki a bé ntééñga bikristen.

² I lisuk li niñ yé hana isi, Paul a bi tilna Timôtéô le: “Me nti Kristô Yésu Nwet wés mayéga, nu a lédés me ni lipémba, lakii a añ me kikii mut a kôli bôdôl ñem, ndi a téé me ikété nson wé.” (1 Timôtéô 1:12-14) Kii i bé nson wé? Paul a bi kal mimañ mi likoda li Efésô le: “Ndi me ñañ bé me nom yem kii tik yem jam, ndik le m’a mélés liké jem, ni nson me bi kôs ni Nwet le Yésu i bok mbôgi inyu miñañ minlam mi karis Nyambe.”​—Minson mi baôma 20:24.

3. Umbe nson u tôbôtôbô Paul a bi kôhna? (Béñge titii i bibôdle bi yigil.)

³ Mimbe “miñañ minlam” Paul a bé añal, mi mi ñunda  nseñ u konangoo i mbuma ñañ i Yéhôva? Paul a bi kal bikristen bi Efésô le: “Ni bi nok inyu nson kindak u karis Nyambe u u bi tina me inyu nan.” (Efésô 3:1, 2) Ba bi ep Paul i tjam miñañ minlam yak bôt ba ta bé Lôk Yuda, kayéle ba jôp ikété nsoñgi u bôt ba nlama ane i ngii ni Mésia. (Añ Efésô 3:5-8.) Mu kiki a bééna makénd, Paul a bi yigle bikristen loñge ndémbél, a unda ki le konangoo i mbuma ñañ inyu yé i bé bé “yañga.”

4, 5. Inyuki di nla kal le “miñañ minlam mi Ane” mi yé nlélém jam ni miñañ minlam mi “karis Nyambe”?

⁴ Munu masuk ma ngéda mana, litén li Yéhôva li nkôhna nson u añal “miñañ minlam mi Ane mini . . . [ni] nkoñ isi wonsôna i ba biloñ gwobisôna mbôgi.” (Matéô 24:14) Miñañ di ntjam mi yé ki “miñañ minlam mi karis Nyambe,” inyule bisai gwobisôna di mbem le d’a kôhna isi Ane i Djob bi ga lôl bés ni njel Yésu, nu Yéhôva a ngwélél inyu unda konangoo yé i mbuma ñañ. (Efésô 1:3) Baa hiki wada wés a nigle Paul, a undga le a nti mayéga inyu konangoo i mbuma ñañ i Yéhôva, a añlak miñañ minlam ni makénd?​—Añ Rôma 1:14-16.

⁵ Mu yigil i ntagbe, di nigil ngandak manjel Yéhôva a ngwélél inyu unda bés baboñbéba konangoo yé i mbuma ñañ. Jon yak bés di yé nyégsaga i boñ kii yosôna di nla inyu niiga bôt bape lelaa Yéhôva a unda gwéha yé, ni lelaa hala a nla lona hiki wada wap bisai. Di nlama hôla bape i diihe ngandak manjel Djob a ngwélél inyu unda konangoo yé i mbuma ñañ. Mambe ma manjel?

6, 7. Lelaa di ntjam miñañ minlam mi konangoo i mbuma ñañ i Djob, ngéda di ntoñle bôt kii i yé binoñ?

⁶ Unu nkoñ isi u nwas le hiki mut a boñ yom a nsômbôl, jon bôt ba nlôôha meya béba kayéle ba ntehe ha bé nseñ i kôhna kobla. Ndi i nlélém ngéda, ngandak bôt i nléba le ntén niñ u, u nlona bé bo ngandak maséé. Ngéda ba nsôk boma Mbôgi Yéhôva, libim jap li nyi bé kii béba i yé, lelaa i ntihba bés, ni inyuki di nlama jo inyu waa ba minkol mi béba. I bôt ba ngwés maliga ba nkôhna hobge ngéda ba nigil le Yéhôva, ikété konangoo yé i i mbuma ñañ ni soso yé gwéha, a bi ep man wé hana isi inyu tohol bés i moo ma béba, ni nsaa wé le nyemb.​—1 Yôhanes 4:9, 10.

⁷ Paul a bé pôdôl Man nu gwéha nu Yéhôva ngéda a bi tila le: “Ikété yé nyen di gwéne kobla inyu matjél mé, nwéhél inyu mahôha més kingéda lingwañ li karis yé.” (Efésô 1:7) Sesema i niñ i Yésu i yé likébla likeñi Djob a nti bés, li ñunda ki le konangoo yé i mbuma toi ñañ. Kinje hogbe hala a nlona bés, ngéda di nigil le ibale di ñunda le di nhémle binoñ bi Yésu, bibéba gwés gw’a nwéhlana, ni le di ga bana kiññem i mpôp! (Lôk Héber 9:14) Hala a yé yaga miñañ minlam di nlama añle bôt bape!

8. Inyuki bikwéha bi bôt bi gwé le bi sañgla ni Djob?

⁸ Di gwé nson i yis bôt bobasôna le ba nla bana maada malam ni Nheg wap. Nwaa le mut binam a mbana  hémle inyu sesema i niñ i Yésu, a bé ñoo Djob. Jon ñôma Yôhanes a bi tila le: “Nu a nhémle Man a gwé niñ boga; ndi nu a nôgôl bé Man a’ tehe bé niñ, ndi hiun hi Nyambe hi tiñi ni nye.” (Yôhanes 3:36) Loñge jam i yé le sesema i niñ i Yésu i nyible bés njel i sañgla ni Djob. Inyu hala nyen ñôma Paul a kal le: “Bé ba ni bé babaglaga ni baoo ikété mahoñol manan ni ikété minson minan mimbe, hanano ni a mal sañgal bé ni nyemede inyu nyemb ikété nyuu i minsôn nwé.”​—Kôlôsé 1:21, 22.

9, 10. (a) Umbe nson Yésu a bi ti bilôk bikéé bi yé minhook? (b) Lelaa “mintômba mimpe” mi nla hôla bilôk bikéé bi bi yé minhook?

⁹ Kristô a bi ti minhook nwé, mi mi ngi yii hana isi, unu nson ñôma Paul a nsébél le “nson sañgla.” Ngéda a bé toñle minhook mi bikristen mi bisu jam li, Paul a bi tila le: “Ndi mam momasôna ma nlôl yak Nyambe, nu a sañgal bés ni nyemede i Kristô, a ti bés nson sañgla. Hala a yé le, Nyambe a ba i Kristô, a sañglak nkoñ isi ni nyemede, a éñél ha bé bôt mahôha map, a ti ki bés lipôdôl li sañgla i. Inyu hala di yé bakeñwin inyu Kristô, wengoñle Nyambe a mbéhne bôt manyo més, di nyemhene bé inyu Kristô le, “ni ba nsañglaga ni Nyambe.””​—2 Korintô 5:18-20.

¹⁰ “Mintômba mimpe” mi ntehe le hala a yé bo bisai i hôla minhook ikété nson u likalô. (Yôhanes 10:16) Ba yé kiki bôt Kristô a ñep, ba yoñok ki ngaba keñi i niiga bôt mam ma mbuu, ba hôlga ki bo i hôlôs maada map ni Yéhôva. Ini bôlô i nyoñ ngaba keñi mu nson wés i bok mbôgi, inyu miñañ minlam mi konangoo i mbuma ñañ i Djob.

11, 12. Inyuki hala a yé miñañ minlam le bôt ba nigil lelaa ba nla soohe Yéhôva?

¹¹ Ngandak bôt i len ini i nsoohe inyule hala a nhôla bo i nôgda loñge, ndi ba nhémle bé toi le Djob a ñemble masoohe map. Ba nlama yi le Yéhôva a yé “Nu a ñemble masoohe.” Jon ntôp tjémbi le David a bi tila le: “A we nu u ñemble masoohe, minsôn nwominsôna nw’a lo weeni. Bibôñôl bibe bi nyamal me; w’a nwéhél matjank més.”​—Tjémbi 65:3, 4.

¹² Yésu a bi kal banigil bé le: “Ibale ni nyagal to limbe jam i jôl jem, m’a boñ jo.” (Yôhanes 14:14) Bini bibuk le “to limbe” bi nlama kobla le to limbe jam li nkiha ni sômbôl i Yéhôva. Yôhanes a nti bés ini botñem le: “Ndi makénd di gwé bisu gwé, mo mana le ibale di nyagal nye jam kingéda sômbôl yé, wee a nôgôl bés.” (1 Yôhanes 5:14) Kinje maséé di gwé i niiga bôt bape le di nlama ndik bé soohe inyu hôyôs miñem nwés, ndi le masoohe ma yé bañga bañga njel di ngwélél inyu kôôge bebee ni “yééne karis”! (Lôk Héber 4:16) Ibale di niiga bôt lelaa ba nlama soohe, njee ba nlama soohe, ni inyu mambe mam ba nlama soohene, di nla hôla bo i kôôge bebee ni Yéhôva ni kôhna hogbe ikété mandutu.​—Tjémbi 4:2; 145:18.

13, 14. (a) Bimbe bisai bikeni bi mbem minhook i dilo di nlo? (b) Imbe bôlô keñi minhook mi ga boñ inyu bôt ba binam?

¹³ Yéhôva a ga unda konangoo yé i mbuma ñañ yak mbus tjiba i hiai hibe  hini. Paul a bé pôdôl bisai bikeñi Djob a nti 144000 bôt, ba ba ga ba bikiñe ni Yésu i Ane i ngii, ngéda a bi tila le: “Ndi Nyambe nu a yôgi ni lingwañ li konangoo, inyu ngandak yé gwéha a gwés bés ngéda di ba bawoga inyu mahôha més, a niñis bés lôñ yada ni Kristô (ni bi tohlana ni karis Nyambe). A tugul bés lôñ yada ni nye, a yis ki bés homa wada nyoo ngii i Kristô Yésu, le ikété tjai d’a lo, a éba sôkbôk lingwañ li karis yé ikété loñgeñem inyu yés i Kristô Yésu.”​—Efésô 2:4-7.

¹⁴ Noode ki hoñol mam malam Yéhôva a ntéédana minhook mi bikristen, ngéda ba ga yén i biyééne bi Ane, ba bak ki bikiñe ni Yésu nyoo i ngii. (Lukas 22:28-30; Filipi 3:20, 21; 1 Yôhanes 3:2) Inyu yap tôbôtôbô nyen Yéhôva a ga unda “sôkbôk lingwañ li karis yé ikété loñgeñem inyu yés i Kristô Yésu.” Bon ba ga ba “Yérusalem yondo,” nwaa Kristô. (Masoola 3:12; 17:14; 21:2, 9, 10) Ba ga yoñ ngaba ni Yésu i “mélés makon ma biloñ,” ba undga bôt ba manôgla njel i nyodi isi béba ni nyemb, ni i yila peles.​—Añ Masoola 22:1, 2, 17.

15, 16. Lelaa Yéhôva a ga unda konangoo yé i mbuma ñañ inyu “mintômba mimpe” mu dilo di nlo?

¹⁵ I kaat Efésô 2:7, di ñañ le Djob a ga unda konangoo i mbuma ñañ “ikété tjai d’a lo.” Ibabé pééna, mbok yondo Yéhôva a ga lona hana isi, i ga ba mbôgi i “sôkbôk lingwañ li karis yé.” (Lukas 18:29, 30) Jam jada li nlôôha likeñi Yéhôva a ga boñ inyu unda konangoo i mbuma ñañ, i ga ba bitugne bi bôt ba binam ba ba yé ikété “soñ.” (Hiôb 14:13-15; Yôhanes 5:28, 29) Bôlôm ni bôda ba telesép ba kôba, ba ba bi wo iloo le Kristô a nti sesema i niñ yé, yak “mintômba mimpe” mi mi ntééda libak jap li telepsép mu dilo di nsôk letee ni nyemb, ba ga témb i niñ inyu ke ni bisu i gwélél Yéhôva.

¹⁶ Didun di bôt di di bi wo bo ngi yi Djob, yak bo ba ga tuge. Pôla i ga tina bo le ba suhus bomede isi énél i Yéhôva. Ñôma Yôhanes a bi tila le: “Ni me me tehe bawoga, bakeñi ni batitigi, ba téé bisu bi yééne ane; ni bikaat bi budlana, yak kaat ipe ki i budlana, yon i yé kaat niñ; ndi bawoga ba bi kôs mbagi mu mam ma bé ntilbaga ikété bikaat bi, kingéda minson nwap. Ni tuye a nwas bawoga ba bé ikété yé; yak nyemb ni Hadé ba nwas bawoga ba bé ikété yap; ndi hi mut a bi kôs mbagi kingéda minson nwé.” (Masoola 20:12, 13) I yé mbale le, i ga béda le bôt ba ga lo i bitugne ba nigil i yi lelaa ba nlama niñ inoñnaga ni matiñ ma Djob, ma ma yé ikété Bibel. Jam lipe li yé ki le, i ga béda bo le ba noñ biloñge bi biniigana bi yé ntilga ikété ‘bikaat bi mbudlana,’ bi bi ntoñol mam Yéhôva a mbat le bôt ba noñ inyu niñ ikété mbok yondo. Liyeelak li mam ma yé ntilga ikété bikaat bi mbudlana, li ga ba njel ipe Yéhôva a ga gwélél inyu unda konangoo yé i mbuma ñañ.

17. Kii di nlama tééda i mahoñol ngéda di nyoñ ngaba i nson u likalô?

¹⁷ Iloo ki ngéda bisu, nson wés mu kiki di ntehe lisuk li nkôôge bebee, u yé yaga le di añal miñañ minlam mi Ane! (Markô 13:10) Ibabé pééna, miñañ minlam mi ñunda nseñ u konangoo  i mbuma ñañ i Yéhôva. Di nlama tééda jam li mu mahoñol més, ngéda di nyoñ ngaba i nson u likalô. Njômbi yés ngéda di añal miñañ minlam i yé le di ti Yéhôva lipém. Di nla boñ hala ngéda di niiga bôt le bisai gwobisôna Yéhôva a mbôn bés, bi yé ngandak manjel a ngwélél inyu unda konangoo yé i mbuma ñañ.

18, 19. Lelaa di nti konangoo i mbuma ñañ i Yéhôva lipém?

¹⁸ Ngéda di añle bôt miñañ minlam, di nlama toñle bo le isi énél i Ane i Kristô, bôt ba binam ba ga kôhna bisai i nya i yôni ni njel sesema i niñ i Yésu, ni le ba ga yila peles ndék ni ndék. Bibel i nkal le: “Bihégél gwomede ki gw’a témb ngwélés le bi ba bañ isi ane kiki minkol inyu tjiba, ndi bi ba ngwélés ikété lipém kiki bon ba Nyambe.” (Rôma 8:21) Hala a ga boña ndigi inyu konangoo i mbuma ñañ i Yéhôva.

¹⁹ Di gwé bisai i añle bôt bobasôna ba ñemble bés mbônga u ntina maséé, u di nléba ikété kaat Masoola 21:4, 5: “[Djob] a’ tos gwiiha gwobisôna mis map; nyemb y’a ba ha bé, to malep, to nlondok, to njiiha ki, b’a ba ha bé, inyule mam ma bisu ma mal tagbe.” Ni Yéhôva, nu a yii mu yééne ane, a nkal le: “Nun-ki, me mboñ mam momasôna yondo.” Ni nye a nkal ki le: “Tila; inyule bibañga bini bi yé maliga, bi yé ki bañga.” Ngéda di ñañle bôt miñañ mini ni maséé, di nti yaga konangoo i mbuma ñañ i Yéhôva lipém!