NKUM NTAT No. 1 2018 | Baa Bibel i gwé ki mahee i len ini?
BAA BIBEL I GWÉ KI MAHEE I LEN INI?
Di niñil i nkoñ isi, i het bikei bikeñi bi nti maéba nya ndi nya; jon mbadga i yé le, baa Bibel i yé nlômbi ngandak inyu bana mahee? Bibel i nkal le:
“Tilna yosôna i nlôl ni Nyambe, i mbahal.”—2 Timôtéô 3:16.
Ini nomba i Nkum Ntat, i ga wan inyuki Bibel i nkal le, i nla éga bés mu makas ma niñ yés momasôna.
Baa maéba ma Bibel ma yé mahee i len ini?
Kikii biniigana bi mondo bi mpam hiki linut, umbe nseñ u yé i béñge nlômbi kaat i bebee le 2000 nwii?
Biniigana bi Bibel—Pék i nom i mba ni mba
Ilole i ba kaat i ntagbe ngéda, kingéda biyi bi mondo, ibel i gwé biniigana bi umne i ngii matiñ ni bilem bi bi yé mahee i mba ni mba.
I bisu tole i mbus ngéda yé?
Bibel i ta bé kaat njôôñ yi, ndi i gwé ngim bipôdôl bi njôôñ yi bi bi yé le bi hélés we.
1 Mahôla inyu keñgle bikuu
Béñge lelaa pék Bibel i bi hôla bôt i keñgle ngim bikuu bikeñi bi niñ.
2 Mahôla inyu yémbél mandutu
Pék Bibel i nla hôla bés i yémbél mandutu ma ma ñadbe bés, ma tinak ki bés njôô, kiki bo nduña i nlôôha, lem i timbis mam ni mbus, ni liboyop wetama.
3 Mahôla inyu hônba mandutu
Kii di nla boñ inyu mandutu di nla bé keñgle, to yémbél, kiki bo kon u u mal bé, tole nyemb?
Bibel ni bilôl gwoñ
Bañga i Nyambe i nla hôla bés i jôs mandutu ma ma yé bés i mbombom—mandutu ma hiki kel, munu nkoñ isi unu u u nhéñha hiki ngéda. Ndi Bibel i nla boñ iloo ha. Mapubi mé ma mbéyés bés njel inyu dilo di nlo.
We u nhoñol lelaa?
Wan jam ngim bôt i nhoñol inyu ini mbadga, ni kii Bibel yomede i niiga mu.
