Ngandak nwii len, di bé yi bé ndimbhe i mbadga i, jon makon ma bé nol didun di bôt. Bôt ba njoñ yi ba bi sôk léba maliga. Ba bi léba le bon ba minsoñ nwon mi nti makon. I yi maliga ma i bi boñ le ba laa pémés bee bi bi bi hôla i tibil makon ma bôt, ni i kônde bo dilo di niñ.

Kii di nla kal inyu mambadga makeñi mape ma niñ? Baa u nhoñol le i yéñ yi maliga inyu mambadga makeñi mana ma noñ i nla héñha niñ yoñ?

• Njee a yé Djob?

• Njee a yé Yésu Kristô?

• Kii i yé Ane Djob?

• Kii bilôl bi ga lona bés?

Didun di bôt di bi léba mandimbhe inyu mambadga mana, hala a nhôla ki bo i kônde lémés niñ yap. Mandimbhe ma, ma nla bane yak we nseñ.

U nla badba le: ‘Baa mut a nla toi léba mandimbhe inyu mambadga momasôna?’ I pot maliga, i yéñ yi maliga inyu hiki jam i nla ba ndutu kiyaga. Inyuki?

I len ini bôt ba neebe ha bé i yom bangomin, bôt ba nyuñga ni batjam manwin ba nkal bo. I yé bo jam li ndutu i boñ maselna ipôla mahoñol ma bôt ni i mam ma yé toi, tole i yi njee a mpot maliga ni njee a mpot bitembee. Ha ngéda i, mut nye ki nye a nyi ha bé njee a bôdôl ñem, yak manwin nwominsôna mi yé ndik bitembee, bôt ba nyi ha bé kii i yé maliga ni kii hala a nla bane bo nseñ.

Tolakii hala a nene ndutu, di nla léba mandimbhe inyu mambadga makeñi ma niñ. Lelaa? Ngéda di ngwélél makeñge di mbéna gwélél hiki kel.

Hiki kel nyen u nyéñ maliga. Béñge le hihéga hi Jessica. A nkal le: “Ngond yem i gwé béba kon i i boñ le a nla bé je hiônde, ibale a nje hiônde to ndék laana a nla wo.” Jessica a nyéñ yi ibale bijek a nsomb inyu ngond yé bi ga tééñga bé mbôô wé. A nkônde le: “Ibale me nsômbôl somb ngim bijek, me mbôk ndugi añ lipep li bijek bi inyu yi yom i yé mukété. I mbus me nkônde boñ nyiña inyu bijek bi, me nsébél yak mut a nlamb gwo inyu ba nkwoog nkaa le to ndék hiônde i njôp bé mu. Me yé me boñ yak minyiña bahoma bape inyu yi ibale bôt ba sabe ba, ba nuñul bijek bilam.”

Tolakii nyiña woñ u maliga u ta bé kiki u Jessica, u nla gwélél minlélém mi makeñge Jessica a ngwélél:

• Yéñ yi kii i yé ntiik.

• Kônde boñ minyiña.

• Tibil pohol bikaat bi mpot maliga inyu boñ minyiña nwoñ.

Makeñge ma, ma nla hôla we i léba mandimbhe inyu mambadga makeñi ma niñ. Lelaa?

Ngéda Jessica a nigil Bibel, a ngwélél minlélém mi makeñge a yé a gwélél inyu yéñ bijek bilam inyu ngond yé. A nkal le: “Lisoñgol ni minyiña mi bi hôla me i léba maliga ikété Bibel.” Nlélém kiki Jessica, didun di bôt di bi nigil kii Bibel i nkal inyu mambadga mana ma noñ:

• Inyuki di bi héga?

• Kii i ntagbe i mbus nyemb?

• Inyuki mandutu ma yé?

• Kii Djob a ga boñ inyu mélés mandutu?

• Lelaa lihaa jés li nla ba maséé?

U nla léba mandimbhe inyu mambadga mana ni mape ki ibale u ñañ Bibel ni ibale u mboñ minyiña mimpe ikété site yés internet www.dan124.com.