I 60 ma manut ma ma noñ ligwéé li man ma yé mahee kiyaga. Inyuki? Inyule ibale nyañ man a ñadbe man i ngéda a ntip gwéé, hala a nhoo hôla man i nañ loñge ikété manjel momasôna, ni i hôlôl kiki i mbéda. *

Kii i ntinde muda a ntip gwal i yoñ ngéda ni man wé? Malét suklu keñi wada le Jeannette Crenshaw a ntoñol i lipep li manwin ni hop Ngisi li ba nsébél le Perinatal Education le, ngéda hormone ba nsébél le ôksitôsin i yé mbedek ngandak i nyuu muda, “i ntôdôl ngôñ liléla mbus ligwéé i ngéda muda a ntihba man, a béñgege nye tole a nyuñhak nkéñéé wé man.” (hormone di mpôdôl hana, i yé ntén malép le ngim gwom bikété bi mbañ ikété nyuu mut; i malép ma, ma ntagbene i matjél inyu boñ le ngim jô i nyuu, tole yom ikété i nyuu i sal kiki i mbéda.) Inyuki hala a yé nseñ?

Yéhôva Djob, * Nhek wés nu gwéha, nyen a bi téé maada ma ngui ma yé ipôla man bo nyañ. Kiñe David a bi kal le Nyambe nyen a bi ‘pémés nye libum’ li nyañ, a bii ki nye i moo ma nyañ le ha nyen a nôyôi. A bi soohe Djob le: “Ba bi leñ me i moo moñ ibôdôl libum, u yé Nyambe wem ibôdôl ngéda ini a gwal me.”​—Tjémbi 22:10, 11.

BÉÑGE KI LE: Ibale Djob nyen a bi téé mam hala, le nyañ man a memle man wé, a boñok ki yom man wé a gwé ngôñ, baa u nhoñol bé le, Djob a ntôñ hiki wada wés inyule di yé ‘bon bé’?​—Minson mi baôma 17:29.

Yésu Kristô, nu a nyi Nhek wés iloo mut nye ki nye, a bi niiga bés le: “Baa ba nuñul bé diuuna diba inyu pes kaba? To hiada hi nkwo bé isi ibabé [le] Isoñ nan [a yi]; yak tjôñ dinan di ño tjodisôna yaga di ñéña. Jon ni kônôl bañ woñi; ni nloo ngandak diuuna.”​—Matéô 10:29-31.

Ibale ndék ikété yés yon i nyoñ ngéda i tibil béñge dinuni di ntehe, bôô ni ngélé yañen ngéda hiada hi nkwo isi. Ndi Tata wés nu ngii, nye a nyimbe hiki hiada! Ndi dinuni​—to ngandak dinuni yaga​—di gwé bé nseñ i mis ma Djob iloo mut binam wada. Yom u nlama tééda i yé le: U nlama bé “kon woñi” le Djob a ntehe bé we. Ni maliga, Djob a ntôñ we, bañga litôñôk!

 Bitilna bi nti bés makénd le

• “Mis ma Yéhôva, ma yé homa nyensôna, ma mbéñge bôt babe ni ba ba yé loñge.”​—BINGÉNGÉN 15:3.

• “Mis ma Yéhôva ma yé ngola i bôt ba téé sép, yak maôô mé ma sédi inyu nlondok wap.”​—TJÉMBI 34:16.

• “M’a séé, me hak ki inyu loñge yoñ ñem, inyule u bi tehe ndééñga yem, u bi yi me ngéda ndutu.”​—TJÉMBI 31:8.

Baa litehge jés inyu Nyambe li nla héñha ibale di nyi le a ntehe bés ni le a ntôñ toi bés, a tadak ki bés ni gwéha yosôna? I pot maliga, litehge li, li nla héñha. Di yoñ hihéga hi Hanna, * nu a niñ i loñ Ngisi, a nkal le:

“Ngandak ngélé me bé nôgda le Yéhôva a bé gwés bé me pak pak, i pôônaga ki me le yak masoohe mem a bé timbhe bé mo. Me bé hoñol le men me bééna bé hémle. A bé wengoñle ngim kogse yon me bi kôs, tole ba bé tjome me inyule me bééna bé nseñ. Me bé hoñol le Djob a bééna bé ngéda yem.”

Ndi nano, Hanna a mpééna ha bé le Yéhôva a mbéñge nye, ni gwés nye. Kii i bi boñ le mahoñol mé ma héñha? A ntoñol le: “Mam ma bi héñha ndék ni ndék. Me nhoñol nkwel wada, hala a yé ngandak nwii nano u u bé toñol binoñ Yésu a bi ti; nkwel u, u bi tihba me ngandak, u bi hôla ki me i tibil nok i gwéha Yéhôva a ngwés me. Ngéda me bé me kôhna ndimbhe inyu masoohe mem, gwiiha bi bé bi kuli me hiki ngéda inyule me bé nôgda le to i ba yaa lelaa, Yéhôva a ngwés me. Yigil i Bibel ni i ke i makoda, bi bi niiga me ngandak mam inyu Yéhôva, umbe ntén mut a yé, ni kii a nôgda inyu yés. Nano, me ntibil yaga tehe le Yéhôva a ngwés bés, a nidik ki bés bobasôna, a gwé ki ngôñ i hôla hiki wada wés ni ñem wé wonsôna.”

I yom Hanna a nkal, i nlédhana nyuu. Ndi lelaa u nla ba nkwoog nkaa le Djob a ntibil yi mam u nôgda mu ñem woñ, a téédaga ki mo i mahoñol mé? I yigil i noñ ha, i ga timbhe mbadga i.