NWAN bikék ni mangéda a yé béñge bititii mu kei yé. A yé tehe i bisu bi ngéda le soso mbuk mbebi a yé bebee i ôbôs ngim nkoñ. Kiki a ntôñ bôt ba, a mboñ kii yosôna a nla inyu béhe bo ilole bikuu bi nkwo.

Hala nyen yak Yéhôva a yé béhe bôt ba binam i len ini inyu béba “mbuk mbebi” nu a yé njel. A yé béba i nya i nloo héga. Lelaa a mbéhe bo? Kii i nyis bés le a nti bôt ngéda i héñha? Inyu timbhe di béñge ndugi kiki Yéhôva a bi bôk a béhe bôt i ngéda kôba.

I ngéda kôba Yéhôva a bi béhe bôt le a ga lona “mbuk mbebi” tole bikééhene, ikolba ba bobasôna ba ndobgbene nye. (Bingéngén 10:25; Yérémia 30:23) Hiki ngéda, a nyoñ bitelbene inyu béhe bibé- ba bi bôt ntandaa ngéda ilole tjiba i nlo, a ti ki bo maéba le ba héñha libak jap. (2 Bikiñe 17:12-15; Néhémia 9:29, 30) Inyu hôla bo, a bé om bagwélél bé le ba yis bo le bikééhene gwé bi yé bebee, ni le ba nlama pala héñha.​—Amôs 3:7.

Nôa a bé wada mu bôt Djob a gwélél inyu béhe nkoñ ’isi. A bi tégbaha ngandak nwii i béhe bôt ba bé gwés mpuñgu ni bisañ le Djob a nlona Ntida malép. (Bibôdle 6:9-13, 17) A bi kal ki bo kii ba bé lama boñ inyu pei​—a bi tibil sal nson wé kayéle a sébla le “ñañal telepsép.”​—2 Pétrô 2:5.

To hala kiki Nôa a bi boñ biliya bi gwobisôna, bôt ba bi emble bé nye. Ba bééna bé hémle to ndék. Kii i bi yik bôña? Ba bi wo ngéda Ntida malép ‘u bi lo, u sas bobasôna.’ (Matéô 24:39; Lôk Héber 11:7) Ngéda Ntida malép u bi lo, ba bé bé le ba kal le Djob a bi béhe bé bo.

Mangéda mape, Yéhôva a bé a béhe bôt ndék ngéda ilole a nlona “mbuk mbebi” nôgôs. Ndi to hala, a bé a ti bo ngéda i yoñ bitelbene ilole a nlona mbagi nôgôs. Kiki hihéga, Yéhôva a bi béhe bon ba Égiptô ilole Jôm li dimala di nkwél bo ni ini njel le a ep Môsi bo Arôn i béhe Faraô ni bagwélél bé le himala hi yônhe isaambok hi bé njel: Soso nop matan-ga. Kiki nop matan-ga a bé lama bôdôl hilo hi bé noñ ha, baa Yéhôva a bi ti bo ngéda i yéñ lisolbene? Bibel i nkal le: “Bagwélél ba Faraô ba ba bi kon lipôdôl li Yéhôva woñi, ba bi pala boñ le bagwélél bap ni bilém gwap bi jôp i mandap, ndi nu ni nu a bi diihe bé lipôdôl li Yéhôva, a bi nwas bagwélél bé ni bilém gwé i nwom.” (Manyodi 9:18-21, MN.) Kiki di ntehe, Yéhôva a bi tibil béhe bo, kayéle i bet ba bi emble mabéhna ma, ba bi pei.

Yak ngéda himala hi nsôk hi bé njel, Djob a bi yis Faraô ni bagwélél bé. Ndi ba bi jôñôp ba emble bé nye. (Manyodi 4:22, 23) Sôk i bi sôk, bon bap ba bisu ba bi wo. Kinje ngoo! (Manyodi 11:4-10; 12:29) Baa ba bé le ba yoñ bitelbene ilole ngéda i nkola? Ñ! Môsi a bi pala yis Lôk Israel le himala hi nsôk hi yé njel, a kal ki bo kii ba bé lama boñ inyu pei ni  mahaa map. (Manyodi 12:21-28) Bôt bañen ba bi emble Môsi? Ngim bôt i nkal le iloo didun diaa di bôt, bon ba Israel ni “mintén mi bôt nwominsôna,” bôt ba matén mape ni bon ba Égiptô ba bi pei.​—Manyodi 12:38.

Kiki dihéga di di ñunda, Yéhôva a bééna lem i yoñ bitelbene i béhe bôt bisu bi ngéda. (Ndiimba Mbén 32:4) Kii i bé tinde Djob i boñ hala? Ñôma Pétrô a toñol le Yéhôva “a ngwés bé le to mut wada a nimil, ndigi le bobasôna ba pam homa ba nhiel miñem.” (2 Pétrô 3:9) Ñ, Djob a bé tôñ toi i bôt ba. A bé gwés le ba hiel miñem, ba boñ sômbôl yé ilole a nlona mbagi nôgôs.​—Yésaya 48:17, 18; Rôma 2:4.

Yak i len ini, bôt bobasôna ba nlama emble nwin u tôbôtôbô u u nleglana ni nkoñ ’isi wonsôna. Ngéda Yésu a bé hana ’isi, a bi yis bôt le i nkoñ ’isi unu u bé lama tjiba i “njiiha ikeñi.” (Matéô 24:21) A bi toñol mam momasôna ikété ngim mbañ, a añle yak banigil bé mam ma bé lama yis bo le i ngéda i i yé bebee. Yésu a bi pôdôl balôm ba mam ba di ntehe ba nyon i len ini.​—Matéô 24:3-12; Lukas 21:10-13.

Kiki mbañ i i yé yon, Yéhôva a nti bés makénd i suhus bésbomede isi énél Yé. Sômbôl yé i yé le bôt ba manôgla ba bana niñ ilam ibôdôl nano, ni bisai dilo di nlo i mbok yondo i het telepsép y’a ba. (2 Pétrô 3:13) Inyu hôla bôt i hémle mimbônga nwé, Yéhôva a bi bééga bés nwin u tohi, hala wee “miñañ minlam mi Ane” mi Yésu a kal le nw’a “añlana nkoñ ’isi wonsôna i ba biloñ gwobisôna mbô- gi.” (Matéô 24:14) Djob a bi tjek bagwélél bé le ba bok i “mbôgi” ini ikété jam kiki bo 240 biloñ. Yéhôva a gwé ngôñ le libim li bôt li emble nwin u tohi inyu pei “mbuk mbebi” bikééhene gwé nu a yé njel.​—Sôfônia 1:14, 15; 2:2, 3.

Jon di ntehe le, Yéhôva a nti bôt ngéda i kôli inyu boñ le ba héñha. Ndi mbadga ikeñi i mbéda: Baa bôt ba ga emble Djob munu ndék ngéda ini i yii? Bés ba di yé balegel nwin ba Djob, di waa bañ hôla libim li bôt di nla i pei i lisuk li hiai hini.