1. Inyuki di nlama gwélél ndigi Yéhôva nyetama?

DI NLAMA gwélél ndigi Yéhôva nyetama inyule a yé Nhek wés, nyen a bi ti bés niñ. (Masoola 4:11) Ndi hiandi hiada hi yé mu. Tolakii di ngwés Yéhôva, di tinak nye lipém, i nla pam le mam mape ma niñ ma yoña bés kayéle di la ha bé gwélél ndigi nyetama. Lelaa hala a nla bôña? Di béñge ndugi kii i yé i gwélél ndik Yéhôva nyetama.

2. Inoñnaga ni kaat Manyodi 34:14, kii di ga boñ ibale Yéhôva nyetama nyen di ngwélél?

² Ngéda Bibel i nkal le, Nyambe nyetama nyen di nlama gwélél, hala a nkobla le di nlama bana njôôñ gwéha inyu yé. Di ga neebe bé le mut nye ki nye tole yom yo ki yo i sôña bés i gwés nye.​—Añ Manyodi 34:14, MN.

3. Mambe manjom di gwé i gwélél Yéhôva?

³ Di gwé manjom malam i gwélél Yéhôva. Mambe? Di bi nigil ngandak mam inyu yé. Mbus, di bôdôl gwés nye inyu bilem gwé. Di nyi kii a ngwés, ni kii a ñoo. Di nyi bitééne gwé inyu bôt ba binam, di nidik gwo. Di yé maséé i yi le a nti bés pôla i ba mawanda mé. (Tjémbi 25:14) I mam momasôna di nigil inyu Nhek wés ma ñôt bés nyeni.​—Yakôbô 4:8.

4. (a) Kii Nsohop a ngwélél inyu boñ le di gwés ndik bañ Yéhôva nyetama? (b) Kii di ga tehe munu yigil ini?

 ⁴ Nsohop nyen a ñane nkoñ ’isi unu, a ngwélél wo inyu boñ le i mam ma nkon bés ngôñ mon di bugus i niñ yés, ni le hala a ba bés ndutu i jôs bibomb gwés. (Éfésô 2:1-3; 1 Yôhanes 5:19) Ngôñ yé i yé le di gwés ndik bañ Yéhôva nyetama, ndi di gwés yak mam mape. Di béñge manjel ima a ngwélél inyu kwés bés ngim mangéda. Pog, a ntinde bés i nyiña moni, iba, a noode ki tinde bés i gwés mintuk mi mi nlémél bé Djob.

5. Inyuki di nlama yoñ yihe ni gwéha moni?

⁵ Bés bobasôna di gwé ngôñ ni bijek, mambot malam, ni loñge homa liyééne. Ndi di nlama yoñ yihe ni gwéha moni. Ngandak bôt i len ini i ‘ngwés moni’, i gwéhék ki masañgô. (2 Timôtéô 3:2) Yésu a bé yi le banigil bé ba bé lama bana ndutu i keñgle i hiandi hi. A kal le: “Mut nye ki nye a nla bé gwélél bet ba, ndik le a’ oo wada, a gwés nuu, tole a’ adbe ni wada, a yan nuu. Ni ta bé le ni gwéélak Nyambe, ni gwéélak ki Nkus.” (Matéô 6:24) Ibale mut a ngwélél Yéhôva, ndi a tégbahaga ngandak ngéda ni ngui i nyiña nkus, wee a nyéñ gwélél bet iba. Ha ngéda i, a ta ha bé gwélél Yéhôva nyetama.

6. Kii di nla nigil mu jam Yésu a kal lôk kéé i Laôdikéa?

⁶ Bebee ni lisuk li hiai hi bisu, lôk kéé i likoda li Laôdikéa i bé kadba le: “Me yé ngwañ, me bi kwés ki  memede ngwañ, kayéle jam jo ki jo li nhéñél bé me.” Ndi i mis ma Yéhôva bo Yésu, ba bé ‘kônha ngoo, ba bé diyeyeba, ni bôt ba ndim, ni bôt ba yé nso.’ Yésu a bi ti bo maéba he bé inyule ba bé ngwañ, ndi inyule gwéha yap i moni i bé ôbôs maada map ni Yéhôva. (Masoola 3:14-17) Ibale di nléba le hép i nkus i nkahal o ñem wés, di pala yoñ bitelbene inyu kodol mahoñol més. (1 Timôtéô 6:7, 8) Ibale di mboñ bé hala, di mba nkabak, Yéhôva a ga neebe bé bibégés gwés. A “mbat le di gwélél ndigi nyetama.” (Ndiimba Mbén 4:24) Lelaa moni mi nla yila jam li bisu i niñ yés?

7-9. Kii ñañ u mankéé David u niiga we?

⁷ Di yoñ hihéga hi mañ wada le David i loñ Amérika. Nyemede a nkal le a bé sal ngandak. I homa wé bôlô a bé hol ndigi hol ni hol a kôhôk ngandak moni, a bi pam i yiba inyu likeñge jé li bôlô. David a nkal le: “Ha ngéda i me bé hoñol le mahol mem i homa bôlô ma bé yimbne le Yéhôva a bé sayap me.” Ndi baa hala a bé maliga?

⁸ David a bi bôdôl yimbe le bôlô yé i bi kahal ôbôs maada mé ni Yéhôva. A nkal le: “Ngéda me bé makoda tole likalô, mahoñol mem momasôna ma bé ndigi i bôlô. Bôlô i bé ti me ngandak moni, ndi ndék ni ndék me kahal bana nduña, me bôdôl yak bana mindañ ni nwaa wem.”

⁹ David a bi nôgda le a bé lama tiimba wan mam ma yé toi nseñ. A  nkal le: “Me bi yoñ makidik ma ngui inyu héñha.” David a bé sômbôl tibil tjek ngéda yé, a bi yis ki nwet wé bôlô hala. Mam ma bi sôk lelaa? David a bi nimis bôlô yé! Kii a bi boñ? A nkal le: “I kel i bé noñ ha, me yônôs lipep li nsañal nu pes ngéda inyu ngandak sôñ.” Inyu kôs koga kel, David bo nwaa ba bi bôdôl pubus mandap ma bôt. Mbus ngéda, a bi yila nsañal nu ngéda yosôna, yak nwaa a noñ nye mu. Babiina ba, ba bi pohol i gwel ngim nson bôt bape ba bé yan, ndi i bôlô i bé yon i bé lôôha ba nseñ inyu yap. To hala kii moni ba bé kôs mi bé ndék, koga kel i bé héñél bé bo. Ngôñ yap i bé le nson u Yéhôva won u ba jam li bisu i niñ yap, ba bi tehe le Djob a nyônôs ngôñ i ba bobasôna ba nyéñ ndugi Ane yé.​—Matéô 6:31-33.

10. Lelaa di nla tééda ñem wés?

¹⁰ Too di nyep, too di yé ngwañ, di nlama tééda ñem wés. Lelaa? Di gwés bañ moni. Di nwas bañ to le bôlô yés i yuu nson u Yéhôva. Lelaa u nla yi le hala a yé pémél we? U nla badba le: ‘Baa me mbéna hoñol bôlô yem ngeñ me yé likalô tole makoda? Baa me mbéna badba lelaa m’a boñ dilo di nlo inyu jam li moni? Baa mindañ me mbéna bana ni sobiina wem mi nlôl i mam ma moni? Baa me yé bebee i sal bôlô bôt bape ba nyan inyu bana ngéda yem yosôna i nson u Yéhôva?’ (1 Timôtéô 6:9-12) Mu kii di mba di ntimbhe mambadga ma, di tééda mahoñol le Yéhôva a ngwés bés, a mbôn i bet ba ngwélél ndik nyetama le: “M’a yôi yaga bé me we; to yék we kekikel.” Inyu hala nyen ñôma Paul a tila le: “Lem nan i ba bañ i gwés moni.”​—Lôk Héber 13:5, 6.

11. Kii i nla pémél mut ibale a mbep pohol mintuk nwé?

¹¹ Yéhôva a ngwés le di nok line li niñ, mintuk mi nla hôla bés i nok line li. Ñ, Bañga i Djob yomede i nkal le: “Jam lipe li tane bé mut loñge, ndik le a jek, a nyok, ñem wé u nogok loñge i ndumbba yé.” (Ñañal 2:24) Ndi libim li mintuk li nla ôbôs libak jés. Mi nla tinde bôt i neebe tole i  gwés mintuk Bañga i Djob i mbéhe bés le di keñgle.

12. Inoñnaga ni 1 Korintô 10:21, 22, inyuki di nlama tibil pohol mintuk nwés?

¹² Makidik més ma yé le, di gwélél ndik Yéhôva nyetama, jon di ta bé le di ban-ga jôga i ‘téblé i Yéhôva,’ di ban-ga ki jôga i “téblé i mimbuu mimbe.” (Añ 1 Korintô 10:21, 22.) Bôt ba mbéna je ntôñ ngéda ba yé mawanda. Ibale di mpohol mintuk mi mi nhôñôs bisañ, makañ, malal ma nyega, ni maboñok ma nyega mape, wee di yé je bijek mimbuu mimbe mi nlamb. Sôk i nsôk, hala a nyik ôbôs libak jés, yak maada di gwé ni Yéhôva.

13-14. Inoñnaga ni Yakôbô 1:14, 15, inyuki di nlama yoñ yihe ni mintuk di mpohol? Ti hihéga.

¹³ Di béñge manjel ma tôbôtôbô i het mintuk mi yé kiki bijek. Bésbomede bon di mpohol i yom di nje. Ndi ngéda di mal mil bijek, nyuu yés i nkok gwo, i baa gwo, i yégla gwom bi yé nseñ. Bijek bilam bi nla tééda mbôô wés; ki le bijek bibe bi nla ti bés kon. I nla pam le di hoo bé nôgda le nyuu yés i yé héñha, ndi di ga nôgda jam li mbus ngéda.

¹⁴ Nlélém ni mintuk nwés, bésbomede bon di mpohol i mam di ga jubus mahoñol més. I ngéda di mal yoñ ngaba mintuk, mi ntihba ñem wés ni mahoñol més. Mintuk minlam mi nhôgbaha bés, ndi mintuk mimbe mi ñôbôs bilem gwés bilam. (Añ Yakôbô 1:14, 15.) I nla pam le hala a hoo bé nene, ndi i mbus ngéda hala a’ yiba. Inyu hala nyen Bibel i mbéhe bés le: “Ni yôm bañ: mut a ta a tôgbege bé Nyambe. Inyule jam mut a nsal, jo ki jon a’ bumbul; inyule mut a nsélél minsôn nwé nyemede, mu minsôn nyen a’ bumble tjiba.” (Galatia 6:7, 8) Ñ, i nlôôha ba nseñ i keñgle mintuk nwominsôna mi mi nhôñôs mam Yéhôva a ñoo!​—Tjémbi 97:10.

15. Limbe likébla lilam Yéhôva a bi kôôbana bés?

¹⁵ Ngandak bagwélél ba Yéhôva ba nok maséé i béñge JW Nkuu Biliñgeliñge, i site yés internet ilam. Sita yada le Marilyn a kal le: “JW Nkuu Biliñgeliñge a nhôla me i ba maséé, me nla béñge mam momasôna ibabé i todol. Ngéda me ntomb tole me nôgdaga binyuu, minkwel mi ntiba mu ni buk kel me mbéñge bi nlédés me. Hala a nhôla me i ba bebee ni Yéhôva, yak ni ntôñ wé. JW Nkuu Biliñgeliñge a nhéñha niñ yem héñha yosôna.” Baa yak we u ñôt nseñ mu likébla li Yéhôva li? U héya i gwom gwobisôna bi mpam i JW Nkuu Biliñgeliñge hiki sôñ, di nléba ki ngandak minkwel ba ñemble, bividéô bipe, ni minsik minlam i homa le vidéô kingéda litebek.

16-17. Inyuki di nlama tjek ngéda di ntégbaha mintuk, lelaa di nla pam i boñ hala?

¹⁶ Di nlama ndik bé yoñ yihe ni i nya mintuk di mpohol, ndi yak ni ngéda di ntégbaha mu. Ibale hala bé, di ga tégbaha ngandak ngéda mintuk iloo i di ntégbaha i nson u Yéhôva. Hala a nlédél ngandak lôk kéé i tjek ngéda ba ntégbaha mintuk. Sita yada le Abigail i i gwé 18 nwii i nkal le:  “Ngéda me mbéñge biliñgeliñge kôkôô bi nkandal me nyuu. Ndi ibale me nyoñ bé yihe bi nla yoñ me ngéda yosôna.” Njohok mankéé le Samuel a nkal le: “Me bi bôdôl béñge ngandak bon ba bividéô i internet. Me mbôdôl ni yada, mbus me léba le me ntégbaha ngeñ aa tole ina ibabé i yi.”   

¹⁷ Lelaa u nla tjek ngéda u ntégbaha mintuk? Jam li bisu li yé le, yéñ ndugi i yi ngeñ yañen u mbéna tégbaha mu. Noode soñgol ngeñ u ntégbaha mintuk inyu ngim sonde. I ngeñ u ntégbaha i béñge biliñgeliñge, i internet, i tuk gém i téléfon yoñ, mage yo ngim homa. Ibale u nléba le u nlôôha nom, noode tjek ngéda yoñ. Bôdôl ndugi ni mam ma nlôôha nseñ, mbus gwélél i ndék ngéda i yii inyu mintuk. Jam li nyônôs iba li yé le, bat Yéhôva mahôla inyu noñ ntjega woñ. Ibale u mboñ hala, u ga bana ngéda ni ngui i i mbéda we inyu yigil i Bibel, bibégés bi ndap lihaa, makoda, ni likalô. Hala a mboñ le kiññem i ga tééñga bé we inyu ngéda u ntégbaha mintuk.

18-19. Lelaa di nla unda le di ngwélél ndik Yéhôva nyetama?

¹⁸ I mbus le ñôma Pétrô a bi pôdôl lisuk li nkoñ ’isi u Satan ni mbok yondo i i nlo, a bi kônde le: “A bagwéha, hala kiki ni mbem i mam mana, boña biliya binan gwobisôna le i lisuk, ni lébna le ni gwé bé to liton li mahindi, to hibôlô, ndi le ni yé ikété nsañ.” (2 Pétrô 3:14, MN.) Ngéda di noñ maéba ma, ndi di boñok biliya i yén mapubi i pes mbuu ni maboñok, di ñunda le di ngwélél ndik Yéhôva nyetama.

¹⁹ Satan ni nkoñ ’isi wé b’a ke ni bisu i tinde bés i bii mam ma gwé bé nseñ kiki jam li bisu i niñ yés. (Lukas 4:13) Ndi tolakii di mboma mandutu, di ga gwés bé yom ipe tole mut numpe iloo Yéhôva. Makidik més ma yé le di ti Yéhôva i jam nyetama a kôli bana: Bibégés gwés!