I NGÉDA u nyéñ yi ngeñ, kii u yé u boñ? U nla béñge kilok u gwé mu woo woñ, tole i i yé libap li ndap. Ibale liwanda joñ li mbat we ngeñ, lelaa w’a timbhe? Ngandak manjel i yé inyu ti ngeñ. Lelaa hala a mbôña?

Di nla kal le ngeñ yada i ntagbe môm maa ma manut i mbus kosi. U nla ki timbhe le ngeñ yada ni pes. Inoñnaga ni homa u nyéne ni bilem bi libôga, u nla kal le jôm li ngeñ ni aa li ntagbe môm maa ma manut. Litinak li ngeñ li, li umne i lisoñgol li 24 ngeñ. I bahoma bape, ba yé le ba kal ki le “pes ngeñ inyu yonôs ngeñ iba.”

Ngéda di nsoñgol Bibel, di nla ba nhelek i tehe lelaa bôt ba bé añ ngeñ ngéda ba bé tila Bibel. Manjel ma bé ngandak. Bitilna bi Lôk Héber bi ngwélél bibuk kii bo: “kegla,” “kosi,” ni “kôkôa.” (Bib. 8:11; 19:27; 43:16; Ndi. 28:29; 1 Bi. 18:26) Ndi ngim mangéda Bibel i ngwélél bibuk bi kôli inyu ti bañga ngeñ.

Ngéda ba bé tila Bibel, ba bé béna gwélél batat tole bôt ba faa. Ba bé sal téntén ni juu. Ngandak nwii ilole Yésu a ngwéé, Lôk Israel i bi kap u môga maa, ba bé sébél le faa juu. (Tjé. 63:7) Kaat Bakéés 7:19 i mpôdôl “faa i ñemkété.” I dilo di Yésu, Lôk Yuda i bé kap u môga ma-na kiki bon ba Grikia ni bon ba Rôma.

Bikaat bi-na bi bisu bi Lôk Grikia, yak gwo bi mpôdôl ngeñ i yo-na. Kiki hihéga, hala a bé “maye ma kel,” hala wee faa i yônôs ina i ngéda Yésu a bé ke i ngii lom mu kii a bé ke i sitima i het banigil bé ba bé. (Mat. 14:25) Ngéda a bé ti hihéga Yésu a kal le: “Bale bo nwet mbai a yik ngéda mut wip a nlôl, ki a bak le a yén péé, a neebe bé le ba bôk nye ndap.”​—Mat. 24:43.

Yésu a bé pôdôl faa juu yo ina i ngéda a bé kal banigil bé le: “Yéna péé; inyule ni nyi bé ngéda nwet ndap a nlôl, to kôkôa, to ni ñem u, to ngéda kôp i ñôñôl, to kegla” (Mar. 13:35) Faa juu i bisu i bé bôdôl “kôkôa,” i bé ke ibôdôl i manañle ma hiañgaa ikepam i ngeñ bôô juu. Faa juu i yônôs iba, i “ñem u” i bé ke ibôdôl i ngeñ bôô i juu ikepam i kosi juu. Faa juu i yônôs aa, i “maye ma kel,” tole “ngéda kôp i ñôñôl,” i bé bôdôl i kosi juu ikepam i ngeñ aa i kegla. Bebek le ha ngéda i nyen kôp i bi oñ, i u ba bi gwel Yésu. (Mar. 14:72) Faa juu i yônôs ina, i “kegla” i bé bôdôl i ngeñ aa i maye ma kel ikepam i ngéda hiañgaa hi mpam.

Jon tolakii bôt ba kôba ba bééna bé bikilok kiki bés i len ini, ba bééna yaa ngim makeñge inyu añ ngeñ juu kii njamuha.