1-3. Mambe manjom ma yé ma boñ le bagwelnson ba ngéda yosôna ba téé nson wap?

ROBERT bo Maria Jo ba nkal le: “I mbus 21 nwii di bi tégbaha i nson tôbôtôbô, ikété ngandak maséé, bagwal bés bo ba-na ba bi kwo kon. To hala kiki di bé maséé i tééda bo, di bi nok ndutu ngéda di bi téé nson wés.”

² Yak William bo Terrie ba nkal le: “I ngéda ba bi yi le mbôô wap u bé ti ha bé bo pôla i kena nson wap u tôbôtôbô ni bisu, ba bi ee ngandak.” Ba nkônde le: “Eem yés i sal i loñ ipe i bi telbene ha.”

³ Mankéé Aleksey a nkal le: “Di bé yi le bakolba bés ba bé sômbôl yip hikuu hi loñ i het me bé sal. Ndi hala a bi lôôha tééñga bés ngéda ngeñ i bi kola le Bétel i yip makôga.”

4. Mambe mambadga di ga timbhe munu yigil ini?

⁴ U héya manjom di mbôk di pôdôl, dikôô di bilôk bikéé bipe bi bi bé sal i Bétel ni bahoma bape, bi bi kôs minson mi mondo. * I lôk kéé i bôlôm ni i bôda i, i bi nok ndutu i nwas nson ba bé lôôha gwés. Kii i nla hôla bo i hônba mahéñha ma? Lelaa u nla lôl bo mahôla? Mandimbhe d’a kôs mu mambadga ma, ma nla hôla bés bobasôna i hônba ibale mam ma nhéñha i niñ yés.

5. Ngéda ba nhéñha bés nson, kii i nla tééñga bés?

⁵ To di nsal i Bétel tole homa numpe, di nla pam i gwés nson wés yak i bôt bés ni bo di nsal ntôñ. Jon ibale inyu ngim njom di nlama nwas nson wés, hala a nla ntééñga bés. Di nla bana ngôñ ikeñi i tehe lôk kéé i i salak ni bés, di badbaga lelaa ba niñ, téntén ngéda di nyi le ngolba i yé nayak nyoo. (Matéô 10:23; 2 Korintô 11:28, 29) Ibale ba ñep bés i sal homa numpe, hala a nla ba jam li ndutu inyule di nlama nigil mam ma mondo, to ibale i mbéda le di témb i homa di bi néñél. Robert bo Maria Jo ba nkal le: “Di bé yi ha bé bilem bi loñ yés, to téé likalô ni hop wés. Kiki di bi sal homa numpe ntandaa ngéda, di bé kiki bakén i loñ yés.” Bilôk bikéé bihogi ba bi om i sal homa numpe, bi yé bi kahal pémés moni iloo héga. Ba nla nôgda wengoñle ba ga pamba bé, hala a nla yak boñ le ba nimis makénd map. Kii i nla hôla bo?

6. Lelaa di nla yén bebee ni Yéhôva?

⁶ Yén bebee ni Yéhôva. (Yakôbô 4:8) Lelaa di nla pam i boñ hala? Ngéda di yé nkwoog nkaa le a yé Nwet a “ñemble masoohe.” (Tjémbi 65:3) Kaat Tjémbi 62:9 i nkal le: “Kôba miñem minan bisu gwé.” Yéhôva a nla boñ “iloo mam momasôna di nsoohe to hoñol.” (Éfésô 3:20) A ñemble ndik bé i yom di nkal nye ngéda di nsoohe. A nla pémés bés mandutu i nya di bemek bé, tole i nya di hégdaga bé.

7. (a) Kii i ga hôla bés i yén bebee ni Yéhôva? (b) Inoñnaga ni kaat Lôk Héber 6:10-12, umbe nseñ w’a kôs ibale u ntéñbe i gwélél Yéhôva?

⁷ Inyu yén bebee ni Yéhôva, añ Bibel hiki kel, u soñdaga ki yo. Mankéé wada nu a bé nsañal nu tôbôtôbô biloñ bipe a nkal le: “Di nlama tééda bilem gwés bi mbuu kiki bo i bégés Yéhôva ni lihaa jés, i kôôba makoda, kiki di bé boñ behee.” U nlama ke ni bisu i yoñ ngaba i nya i yôni i nson likalô ni likoda joñ li mondo. Yéhôva a nhôya bé nson u bet ba ntéñbe i gwélél nye, to ibale ba nla ha bé boñ i mam  momasôna ba bé boñ behee.​—Añ Lôk Héber 6:10-12.

8. Lelaa kaat 1 Yôhanes 2:15-17 i nhôla we i kon maséé ni ndék gwom u gwé?

⁸ Kon maséé ni ndék gwom u gwé. U nwas bañ le nduña i nkoñ ’isi u Satan i “ham” minson nwoñ mi mbuu. (Matéô 13:22) U emble bañ bôt boñ ba lihaa tole mawanda ma ma ntinde we i yéñ ngandak moni munu hiai hi Satan. (Añ 1 Yôhanes 2:15-17.) Bôdôl Yéhôva ñem, nu a mbôn le a’ yônôs ngôñ yés i pes mbuu, i pes mahoñol ni i pes minsôn i ‘ngéda kôli.’​—Lôk Héber 4:16; 13:5, 6.

9. Inoñnaga ni kaat Bingéngén 22:3, 7, inyuki di nlama keñgle mapil ma yañga, kii i ga hôla bés i yoñ makidik malam?

⁹ Yoñ bañ mapil yañga. (Añ Bingéngén 22:3, 7.) Ngéda u nlama héñha liyééne, hala a mbat ngandak moni, hala a nla ki tinde we i poo moni. Jon inyu boñ le di yoñ bañ mapil tolaa tolaa, di poo bañ moni inyu somb gwom bi tane bé bés nseñ. Ngéda di ntééda nkokon, tole ngéda di gwé nduña ñem, i nla ba jam li nlet i yi moni nwañen di poo. Ha ngéda i, u hôya bañ le ‘masoohe ni minyemhe’ mi nla hôla we i yoñ makidik malam. Inyu timbhe masoohe moñ, Yéhôva a nla ti we nsañ u u ga ‘tat ñem woñ ni mahoñol moñ,’ kayéle u pam i hek pék ni nwee nyensôna.​—Filipi 4:6, 7; 1 Pétrô 5:7.

10. Lelaa di nla bot mawanda ma mondo?

¹⁰ Tééda maada malam ni lôk kéé yoñ. Toñle mawanda moñ i yom u nôgda ni i mam u mboma, téntén i bet ba bi boma minlélém mi mam. Hala a ga hôla we i nôgda loñge. (Ñañal 4:9, 10) Mawanda u bi bot i homa u bé sal ma ngi yii mawanda moñ. Nano, u nlama bot mawanda mape i homa u yé. U hôiga bañ le, inyu bana mawanda wemede u nlama ba liyômba. Ndi lelaa u nla bot mawanda ma mondo? Yoñ ngéda i añle bo i mam malam Yéhôva a ma bôñôl we, hôla bo i nôgda maséé mut a nla bana i nson u Yéhôva. To ibale lôk kéé ihogi i likoda i nok bé inyuki u ngwés nson nsañal, bape ba ga bana ngôñ i yi manjom ma, ni i yila mawanda moñ. U lôôha bañ pôdôl wemede, i mam u bi boñ nson u Yéhôva, tole i mam ma ma ntééñga we.

11. Lelaa u nla tééda maséé ikété libii joñ?

¹¹ Ibale u nlama téé nson woñ inyule sobiina woñ a nkon, u ôm bañ nye nsohi. Tole ibale wemede nyen u nkon,  u hoñol bañ le wen u ntéé nson wé, njom i ta bé yoñ. Bigda le, ni yé “nsôn wada,” ni bi bôn ki bisu bi Yéhôva le ni ga tôñna to ibale kii i mbôña. (Matéô 19:5, 6) Ibale u ntéé nson woñ inyule sita a nyoñ jém, ni yoñ bitelbene le man nan a yi le a nlôôha nseñ iloo nson u tôbôtôbô ni bé gwel. Kal man woñ le u ntehe nye kiki “likébla” li li nlôl ni Nyambe. (Tjémbi 127:3-5) Nlélém ngéda, añle nye i mam malam ni bi bana mu nson nan. I boñ hala i nla ti nye ngôñ i noñ mabal manan.

12. (a) Lelaa di nla hôla bagwelnson ba ngéda yosôna i kena nson wap ni bisu? (b) Lelaa di nla tômbôs bo mam, kayéle ba hoo meya nson u mondo ba nkôs?

¹² Kinje maséé i yi le ngandak makoda, tole ngandak bilôk bikéé i nhôla i bet ba gwé minson mi tôbôtôbô i kena nson wap ni bisu. Inyu pam i boñ hala, ba nti bo makénd, ba nti ki bo gwom bi mbéda bo, tole ba nhôla ki bo i tééda bôt bap ba lihaa ba ba nkon tole ba ba ñun. (Galatia 6:2) Ibale ba ñom bagwelnson ba ngéda yosôna i sal likoda joñ, u tehe bañ hala kiki bo le ba nhôs, tole ba nkodol bo. * Maselna ni hala, hôla bo i meya nson wap u mondo. Leege bo loñge, bégés bo inyu bôlô ba bi sal, to ibale mbôô u nti ha bé bo pôla i sal kiki ba bé sal behee. Yéñ yi bo loñge. Ôt nseñ ni yi yap ikeñi, ni makeñge map yak ni mam ba bi boma.

13. Mambe mahôla di nla ti i bet ba ntip lo likoda jés?

 ¹³ Bilôk bikéé ba ñep i sal homa numpe bi yé bi bana ngôñ le ba hôla bo i léba ndap, i yi lelaa ba nyoñ ndiyô, i léba bôlô, ni i boñ mam mape. Ba nla ki bana ngôñ ni mahôla inyu mam kiki bo i saa tas, i kôs bañga matibla, tole i boñ bôm. Ba gwé ndik bé ngôñ le ni kônôô bo ngoo, ndi le ni nok mandutu ba mboma. I nla ba le bomede ba nkon, tole mut wap lihaa nyen a nkon. Bebek ba nok njôghe inyu nyemb mut wap lihaa. * I nla ki ba le ba ta bé maséé, téntén ngéda ba yé botama ba nhoñol mawanda map ba bi yék i homa ba bé. Hala a nla yoñ ngandak ngéda inyu boñ le njôghe yap i sôs.

14. Lelaa bilôk bikéé bi bi hôla sita yada i kon maséé ni nson wé?

¹⁴ Kiki ngéda i ntagbe, mahôla ni ndémbél nan bi nla hôla bo i kon maséé ni nson wap. Sita yada i i bi sal ntandaa ngéda i loñ ipe i nkal le: “Ngéda me bé sal nyoo, me bé tégbaha gwigil bi Bibel hiki kel. Ndi nano, to pôla i yibil Bibel, to i unda vidéô i likalô, me gwé bé. Ndi bilôk bikéé bi yé bi naña me i éga bo mapeple, tole i tégbaha gwigil. Makénd ma lôk kéé i, ni ñem wap ngui ngéda ba ntégbaha gwigil bi Bibel bi bi nhol, bi nhôla me i tééda botñem le yak me m’a léba mut me ni nye di ga nigil Bibel kel yada. Ba bi niiga me i jubus nkwel ngéda me yé likalô. I mam ma momasôna ma bi hôla me i témbna maséé mem.”

15. Lelaa u nla boñ le nson woñ u num matam?

¹⁵ U nla yilha nson woñ u mondo jam li maséé. U tehe bañ mahéñha kiki bo le u mboñ jam libe, tole kiki bo le u nkwo makégse. Yoñ ngéda i hoñol  mam malam Yéhôva a mbôñôl we, u kee ki ni bisu i añal ñañ nlam. Kôna ndémbél i bikristen bi hiai bisu. To hee homa ba bé, “ba ba kenek, ba añlak bañga i miñañ minlam.” (Minson mi baôma 8:1, 4) Ibale u mboñ biliya i ke ni bisu i téé likalô, u nla bumbul matam malam. Kiki hihéga, basañal ba ba bi buñga i ngim loñ ba bi yap i loñ ipe i i bé ha ipañ, i het ngôñ i batéé likalô ba ba mpot hop wap i bé ikeñi. Hala a bi nom bé, muu ma batéé likalô ma kahal gwéé.

16. Lelaa u nla kon maséé ni nson woñ u mondo?

¹⁶ “Maséé ma Yéhôva ma yé ngui nan.” (Néhémia 8:10) Maséé més ma nlama lôl maada di gwé ni Yéhôva, he bé nson di ngwel, to ibale di nlôôha diihe wo. Kee ni bisu i kiha ni Yéhôva, i yéñ pék yé, maéba mé ni mahôla mé. Bigda le u bi pam i gwés i homa u bé, inyule u bé gwés hôla i bôt ba bé nyoo. Nano, boñ nlélém ni nson u ntip kôs, neebe ki mahôla Yéhôva a nti we inyu pam i gwés wo.​—Ñañal 7:10.

17. Kii di nlama bé hôya inyu nson di ngwel nano?

¹⁷ Di hôiga bañ le di ga gwélél Yéhôva i boga ni boga, ndi minson di ngwel ntôñ wé mi yé ndigi inyu ngim ngéda. I mbok yondo, bés bobasôna di ga kôs nson mondo. Mankéé Aleksey nu di mbôk sima, a nhoñol le mahéñha a nkôs nano, ma nkôôba nye inyu ma ma mbem nye i mbok yondo. A nkal le: “Me mah pééna bé le Yéhôva a yé, tole mbok yondo y’a ba, ndi i bé nene me wee me nlama kônde bem. Nano, me ntehe wee Yéhôva a yé me bisu, ni le mbok yondo i yé toi bebee.” (Minson mi baôma 2:25) To umbe nson di ngwel, di kee ni bisu i kiha ni Yéhôva. A’ yôi bé bés, ndi a ga hôla bés i nok maséé ma ma nlôl i boñ kii yosôna di nla i nson wé, to hee homa di yé.​—Yésaya 41:13.