1. Umbe nsima bagwélél ba Yéhôva ba gwé?

BAGWÉLÉL ba Yéhôva ba gwé nsima i ba ikété ntôñ wé. To hala kiki di ngwel bé nlélém nson, bés bobasôna di yé nseñ, di nhôlna ki. Ñôma Paul a nhôla bés i nok i jam li. Lelaa?

2. Inoñnaga ni Éfésô 4:16, inyuki di nlama tina lipém, di salak ki ntôñ?

² Kiki nlôñ Bibel u ñéga i yigil ini u nkal, Paul a nyigye le ngwélél Yéhôva a nla bé béñge numpe a kal nye le: “U tane bé me nseñ.” (1 Korintô 12:21) Inyu boñ le nsañ u ba ikété likoda, di nlama tina lipém di sal ki ntôñ. (Añ Éfésô 4:16.) I ngéda di nsal ntôñ ikété adna, gwéha i yé ikété likoda, di gwé ki makénd.

3. Kii di ga tehe munu yigil ini?

³ Bonjee di nlama ti lipém ikété ntôñ? Munu yigil ini, di ga tehe lelaa mimañ mi nla unda le mi nti mini mimañ mimpe lipém. I mbus, di ga tehe lelaa di nla unda le di nti lôk kéé yés i bôda ni bôlôm i i ta bé mbiibaga lipém. Di ga tehe ki lelaa di nla unda i bet ba ntibil bé pot hilémb hiés gwéha.

4. Mambe maéba ma Paul ma mpémél i kaat Rôma 12:10 mimañ nlama noñ?

⁴ Mbuu mpubi u Yéhôva won u ntéé mimañ mi likoda nwominsôna. Ndi bobasôna ba gwé bé minlélém mi makébla to nlélém ngap. (1 Korintô 12:17, 18) Bahogi ba ntip yila mimañ jon bebek ba nyi bé ngim mam mu nson u. Bape ba yé ñunuk tole ba nkon. Ndi mañ wo ki wo u nlama bé kal mini mimañ mimpe le: “[Ni] tane bé me nseñ.” Mimañ nwominsôna mi nlama noñ maéba ma Paul ma yé i kaat Rôma 12:10.​—Añ.

5. Lelaa mimañ mi ñunda le mi nti mini mimañ mimpe lipém, inyuki hala a yé nseñ?

⁵ Mimañ mi ñunda le mi nti mini mimañ mimpe lipém ngéda mi nyoñ ngéda i emble nwo. Mi nlama boñ hala téntén ngéda juu li mimañ li nkodba inyu pôdôl mam ma likoda. Inyuki? La Tour de Garde du 1^er octobre 1988 i bé kal le: “Mimañ mi nlama yi le Kristô a nla gwélél mbuu mpubi inyu boñ le to umbe mañ ikété juu li mimañ u léba litiñ li Bibel li li ntihba i jam ba yé pôdôl, tole li li nla hôla bo i yoñ makidik malam. (Minson mi baôma 15:6-15) Mañ wo ki wo u mal bé yi.”

6. Kii i nla hôla mimañ i sal ikété adna, kii hala a nlona likoda?

⁶ Mañ u u nti mini mimañ mimpe lipém u nyéñ bé pala yoñ hop hiki ngéda i boma mimañ. A nyéñ bé le nyetama nyen a podok, a nhoñol bé to le i yom a mpot yo ndik yon i yé. A nti mahoñol mé ni ñem nsôhga ni suhulnyuu. A ñemble ngéda mini mimañ mimpe mi mpot. Jam li nlôôha nseñ li yé le, mahoñol a nti ma nlama kiha ni Bibel yak ni biniigana bi “nkol maliga ni u pék.” (Matéô 24:45-47) Ngéda mimañ mi nkwel ni gwéha mi tin-ga lipém,  mbuu Djob w’a ba ipôla yap, w’a hôla ki bo i yoñ makidik ma ma ga hôlôs likoda.​—Yakôbô 3:17, 18.

7. Lelaa Yésu a bé tehe i bôt ba bé bé mbiibaga?

⁷ Ikété makoda més i len ini, di gwé babiina ni mahaa. Ndi di gwé yak ngandak lôk kéé i bôlôm ni i bôda i i ta bé mbiibaga. Lelaa di nlama tehe i bet ba ta bé mbiibaga? Di bigda lelaa Yésu a bé tehe bo. Mu ngéda yosôna a bi sal hana ’isi, Yésu a bi biiba bé. A bi tégbaha ngéda yé yosôna mu nson wé. Yésu a niiga bé le mut a nlama ndik biiba tole mut a nlama bé biiba. Ndi a bi kal le ngim bikristen i yé le i yoñ makidik le i mbiiba bé. (Matéô 19:11, 12; béñge ndoñi bibuk le nwak.) Yésu a bé ti i bôt ba bé bé mbiibaga lipém. A bé tehe bé bo kiki ditégéé di bôt tole bôt ba nhel.

8. Inoñnaga ni 1 Korintô 7:7-9, kii Paul a bi ti bikristen makénd i wan?

⁸ Kiki Yésu, ñôma Paul a bé bé mbiibaga i ngéda a bé gwel nson wé u likalô. Paul a mah niiga bé le ibale kristen i mbiiba bé wee i nhôs. A bi kal le hiki mut nyen a nyoñ makidik mé mu jam li. Ndi a bi ti bikristen makénd i wan inyu tehe ibale ba yé le ba gwélél Yéhôva ngi biiba. (Añ 1 Korintô 7:7-9.) Ntiik, Paul a bé yan bé bikristen bi bi bé bé mbiibaga. A bi gwélél yak mañge wanda le Timôtéô nu a bé bé mbiibaga inyu sal minson minkeñi. * (Filipi 2:19-22) Hala a ñunda le, di nlama bé tjél bééga mankéé ngim nson ndik inyule a yé mbiibaga tole a ta bé mbiibaga.​—1 Korintô 7:32-35, 38.

9. Kii di nla kal inyu libii ni i yén ngi biiba?

⁹ To Yésu to Paul, mut a bi kal bé le bikristen bi nlama biiba tole bi nlama bé biiba. Kii di nla ni kal inyu libii ni i yén ngi biiba? La Tour de Garde du 1^er octobre 2012, a ntimbhe mbadga i ni bini bibuk le: “I pot mbale, libii ni i yén ngi biiba bi yé makébla ma Djob. . . . Yéhôva a ntehe bé i yén ngi biiba kiki jam  li wonyuu tole jam li ngoo.” Hala a nhôla bés i nok le di nlama ti lôk kéé i bôda ni i bôlôm i i ta bé mbiibaga lipém.

10. Lelaa di nla unda le di nti lôk kéé i i ta bé mbiibaga lipém?

¹⁰ Lelaa di nla unda le di ntôñ lôk kéé i bôda ni i bôlôm i i ta bé mbiibaga? Di nlama yi le ngim bikristen i bi yoñ makidik le i mbiiba bé. Bape ba gwé ngôñ i biiba, ndi ba nlébga bé mut a nla kiha ni bo. Bape ki, sobiina wap a bi wo. Ndi baa hala a nlama tinde bilôk bikéé i bat i bet ba ta bé mbiibaga inyuki ba ta bé mbiibaga, tole ba nlama hôla bo i yéñ sobiina? I yé mbale le ngim bikristen i i yé ngi biiba, i yé le i bat i nya mahôla i. Ndi ibale ba mbat bé mahôla, kii ba nla nôgda ibale di nkahal yiñil bo sobiina? (1 Tésalônika 4:11; 1 Timôtéô. 5:13) Di emble le lôk kéé i bôda ni i bôlôm i i ta bé mbiibaga.

11-12. Kii i nla tééñga lôk kéé i i ta bé mbiibaga?

¹¹ Ngwélél makiiña wada nu a ta bé mbiibaga, ni nu a ngwel nson wé loñge ngandak, a nkal le libak jé li yéne nye nseñ ngandak mu nson wé. Ndi a nkônde le, hala a ntééñga nye ngandak i ngéda ngim bilôk bikéé bi bi gwé mahoñol malam bi mbat nye le: “Inyuki u ta bé mbiibaga?” Mankéé wada nu a nsal i Bétel a nkal le: “Ngim mangéda lôk kéé i mboñ wengoñle i bôt ba ta bé mbiibaga ba yé bôt ba nlama kônôl ngoo. Hala a mboñ le bôt ba hoñol le i yén ngi biiba i yé ndiihe ha likébla bé.”

¹² Sita yada i i ta bé mbiibaga, i salak i Bétel i nkal le: “Ngim lôk kéé i nhoñol le, i bet ba yé ngi biiba bobasôna ba nyéñ libii, tole inyu yap hiki likoda tole boma i yé ngim pôla inyu léba nwaa tole nlôm. Lisañ jada, Bétel i bi om me i sal ngim bôlô i tison ipe, me ke likoda ni juu. I sita i bi leege me i kal me le bilôk bikéé bi bôlôm biba bi yé mu likoda bi gwé nwii nwem. A yis ki me le a ta bé yiñil me nlôm. Ndi bés ngi pam ndap Ane, a kena me i boma bilôk bikéé bi. I pot mbale, hala a bi lôôha tééñga me, hala a tééñga yak bilôk bikéé bi.”

13. Imbe ndémbél i nlédés sita yada i i nsal i Bétel?

¹³ Sita ipe i i ta bé mbiibaga, i salak i Bétel i nkal le: “Me nyi minhôôlak mi basañal mi mi ta bé mbiibaga, ba nsal nson wap ni maséé, ba gwé ngim njômbi, ba yé bebee i hôla bôt bape, ba nti mahôla ngandak ikété likoda. Ba gwé litehge lilam inyu libak jap li ngi biiba, ba nhoñol bé le ba nloo bôt bape lakii ba ta bé mbiibaga, ba ntjelel bé to inyule ba gwé bé sobiina to bon.” Kinje loñge jam i ba ikété likoda i het hiki mut a ndiihe lôk kéé ipe, a tinak bo lipém. U nyi le lôk kéé yoñ i bôda ni i bôlôm i nun bé we ni mis ma ngoo inyu libak joñ, ba nkil bé we njôñ, ba nyan bé we, ba nlôôha bé to ti we lipém. U yé maséé inyule u nyi le lôk kéé yoñ i ngwés we.

14. Lelaa di nla unda le di nti i bet ba ta bé mbiibaga lipém?

¹⁴ Bilôk bikéé bi bôda ni bi bôlôm  bi ga ba maséé ibale di nti bo lipém inyu bilem gwap bilam, ha inyu bé le ba yé mbiibaga tole ba ta bé mbiibaga. Iloole di kônôl bo ngoo inyu libak jap, di nlama bégés bo inyule ba tiñi ni Yéhôva. Ni i njel i, b’a nôgda bé wengoñle di nkal bo le: “U tane bé me nseñ.” (1 Korintô 12:21) Maselna ni hala, b’a nôgda le di nti bo lipém, ni le di yé maséé i bana bo ipañ yés.

15. Mambe mahéñha ngim lôk kéé i bi boñ inyu kéñbaha nson wap?

¹⁵ Munu nwii mini, ngim lôk kéé i bi yoñ makidik i nigil hilémb hipe inyu kéñbaha nson wap. Hala a bi bat le ba boñ mahéñha mu niñ yap. Ba bi nyodi i makoda map i het ba bé pot dilémb tjap, ba ke likoda i het ba mpot hilémb hipe inyule ngôñ i batéé likalô i yé nyoo. (Minson mi baôma 16:9) I lôk kéé i i bi yoñ makidik ma inyu nit gwéñe bi Ane. To hala kii ba yé le ba tégbaha ngandak nwii inyu yi hop mondo, ba nhôla likoda ngandak. Bilem gwap bilam ni makeñge map ma nlédés bilôk bikéé. Di nkônôl i lôk kéé i maséé inyu bisesema ba mboñ!

16. Kii mimañ mi nlama béñge i ngéda mi nsômbôl téé mankéé mañ tole nhôla nson?

¹⁶ Juu li mimañ li nlama bé tjél téé bilôk bikéé mimañ tole bahôla nson ndik inyule ba mpot bé hop u likoda loñge. Mimañ mi nlama gwélél Bitilna inyu wan too mankéé a kôli yila mañ tole nhôla nson, ba nke bé béñge too a mpot hilémb hi likoda loñge.​—1 Timôtéô 3:1-10, 12, 13; Titô 1:5-9.

17. Mambe makidik ngim mahaa i i bi ke i loñ ipe i nlama yoñ?

¹⁷ Ngim mahaa i bi ke i loñ ipe inyu ke gwét ngwéé, tole inyu yéñ bôlô. Hala a mboñ le suklu bon bap i yé ni hilémb hi loñ i. Yak bagwal ba nlama nigil hilémb hi loñ inyu léba bôlô. Mambe makidik ba ga yoñ ibale ngim likoda i ngwélél hilémb hiap? Limbe likoda lihaa li li nlama pohol? Baa ba nlama ke i likoda li hilémb hi loñ tole li hilémb hiap?

18. Inoñnaga ni kaat Galatia 6:5, lelaa di nla unda le di nkéés bé isañ mbai inyu makidik mé?

¹⁸ Isañ mbai nyen a nlama pohol likoda i het lihaa jé li nke. Kiki makidik mé ma, a nlama hoñol kii i yé loñge inyu lihaa jé. (Añ Galatia 6:5.) Di nlama bé kéés isañ mbai inyu makidik mé. To mambe makidik  a nyoñ, di neebe mo, di leege ki nye ni lihaa jé i likoda jés.​—Rôma 15:7.

19. Kii basañ mbai ba nlama wan ikété masoohe?

¹⁹ I yé i pam mangéda mape le, bagwal ba pohol i ke i likoda li mpot hilémb hiap, ndi ki le bon bap ba nyi bé hio loñge. Ibale likoda li li yéne i homa ba mpot hilémb hi loñ, i nla pam le i boñge ba ba nok bé bañga jam i makoda, hala a kéñ ki bo i hol i pes mbuu. Inyuki? Inyule i nla ba le i suklu yap, hop u loñ won u mpôda ndi ha hop u bagwal bap bé. Ha ngéda i, basañ mbai ba nlama wan jam li ikété masoohe inyu boñ le ba hôla bon bap i kôôge Yéhôva bebee ni i ke ni bisu i gwélél nye. Ba yé le ba kit le ba nhôla bon bap i tibil pot hilémb hiap, tole ba kena bo i likoda i het hilémb hi loñ hi mpôda. To mambe makidik isañ mbai a nyoñ, bilôk bikéé bi nlama leege nye ni lihaa jé loñge ba unda ki bo gwéha.

20. Lelaa di nla unda le di nti lôk kéé i bôlôm ni i bôda i i nigil hilémb hiés lipém?

²⁰ I mam mana momasôna di nsima, ma mboñ le i ngandak makoda lôk kéé i mpot bé hop u likoda loñge. Ba nla bana ndutu i pahle lôk kéé mahoñol map. Ndi, ibale di nhélél bé i béñge ndutu ba gwé i pot hilémb, di ga yimbe le ba ngwés Yéhôva ba yé ki maséé i gwélél nye. Ibale di mbok mis mu bilem gwap bilam, di ga lôôha ti bo lipém. Di ga kal bé bo le “[ni] tane bé me nseñ” ndik inyule ba ntibil bé pot hilémb hiés.

21-22. Umbe nsima di gwé?

²¹ Di gwé nsima nkeñi i ba i ntôñ u Yéhôva. Too u yé munlôm, too u yé muda, too u yé mbiibaga too u ta bé mbiibaga, mañ mut tole mañge, too u mpot hilémb loñge too u ntibil bé pot hio, bés bobasôna di yé nseñ i mis ma Yéhôva, di nhôlna ki.​—Rôma 12:4, 5; Kôlôsé 3:10, 11.

²² Di kee ni bisu i noñ maéba malam di ñôt mu hihéga hi Paul hi nyuu mut binam. Ibale di mboñ hala, di ga kônde kon maséé ni nson di nsal i ntôñ u Yéhôva yak ni nson u lôk kéé yés.