Rôbôam a bé man Salômô. Kiñe Salômô a énél 40 nwii i loñ Israel. (1 Bikiñe 11:42) A bi wo i nwii 997 B.N.Y. Mbus nyemb yé, Rôbôam a bi nyodi i Yérusalem inyu ke i Sikem, i het ba bé lama téé nye kiñe. (2 Bikiñe 10:1) Baa ni nhoñol le i noñ mabal ma isañ Salômô, nu a bi yiba inyu pék yé hélha, i bééna toi mahee i mis mé? Lelaa Rôbôam a bé le a yi le ngeñ i bé bebee ni kola inyu yi too a bééna pék i sañgal mindañ?

Ngéda Rôbôam a yoñ énél, bon ba Israel ba bé ñunbak ngandak. Kii ngéda i bé tagbe, baéga litén ba bi lo tehe nye inyu añle nye mandutu map: “Isoñ a bi bééga bés ida mbegee. Jo ni jon u hôyôs nledek nson u isoñ ni ida mbegee a bi bééga bés, ndi d’a gwélél we.”​—2 Miñañ 10:3, 4.

Rôbôam a bé le a nôgda wengoñle ba ñamb nye hiandi! Ibale a neebe i hôyôs bo mbegee, ki nye, lihaa jé, ni bôt ba yale yé bobasôna ba bé lama neebe i suhus likala jap li niñ ni yom ba bé bémél litén. Jam lipe li bé le, ibale a tjél, ki litén li bi ndogbene nye. Kii a bé lama boñ? Kiñe a bi bôk a kwel ni mimañ mi bôt, mi mi bé batipék ba isañ Salômô. Ndi, mbus Rôbôam a bi bat bisega gwé maéba. Mu kii a bi pohol i noñ maéba map, Rôbôam a bi yoñ makidik i kép bo mbai. A timbhe le: “M’a kônde idis mbegee nan. Tata a bi nôgôs bé ni disôô, ndi me m’a nôgôs bé ni diéé.”​—2 Miñañ 10:6-14.

Bimbe biniigana di nla ôt mu ñañ u? I yé ntiik le, hala a yé njel pék i emble maéba ma mimañ mi bôt, mi mi yé nhôôlak i pes mbuu. Kiki mi ma tehe ngandak mam, mi nla yi bikuu di ga kôs ibale di nyoñ makidik mabe, mi ti ki bés maéba malam.​—Hiôb 12:12.

Ngéda Rôbôam a bi tehe le litén li nkabna, a kot ntôñ wé gwét. Ndi Yéhôva a bi om mpôdôl  Sémaya i boma nye, ni unu nwin le: “Ni nlama bé bet, to jôs lôknyuñ nan le bon ba Israel. Hi mut a témbék ndap yé, inyule jam lini li nlôl ni me.”​—1 Bikiñe 12:21-24. *

Hala a bé sômbôl kal le to gwét bi bé lama bé ba. Ni hégda lelaa hala a bé lama tééñga Rôbôam! Kii litén li bé lama hoñol inyu kiñe nu a bi han bo le a nôgôs bo ni “diéé,” ndi nano a bé nyégsaga i yén nwee bisu bi ndok yap? (Hégha ni ñañ u 2 Miñañ 13:7) Ndi to hala, Kiñe ni ntôñ wé gwét ba bi “nôgôl lipôdôl li Yéhôva, ba témb boni, kingéda lipôdôl li Yéhôva.”

Bimbe biniigana di nla ôt? Njel pék i yé le di nôgôl Djob to ibale hala a mboñ le bôt ba nol bés. Ngéda di nôgôl Yéhôva, a ga gwés bés, a kôp ki bés bisai.​—Ndiimba Mbén 28:2.

Kii i bi sôk pémél Rôbôam? Kiki a bi nôgôl Yéhôva le a ke bañ jôs litén li mondo, a bôdôl pagap ni bôlô maoñ ma minkoñ mi matén ima a bé énél, hala wee Yuda ni Benyamin. A bi oñ minkoñ minhogi mi mi bééna dikôya, “a lédés [ki] nwo ngandak.” (2 Miñañ 11:5-12) Jam li nlôôha nseñ li yé le, a bi téñbe i noñ mambén ma Yéhôva inyu ngim ngéda. Kiki jôm li matén li li bé i si énél i Yérôbôam, li bi sôôbe ikété bibégés bi bisat, ngandak ikété yap i i bi téñbe ni Djob, i bé ke i Yérusalem i ‘nit Rôbôam’ mu bibégés bipubi. (2 Miñañ 11:16, 17) Ñ, manôgla ma Rôbôam ipañ Djob, ma bi lédés ane yé.

Ngéda a bi nôgda le ane yé i nsiñip, Rôbôam a boñ jam li bi hélés bôt. A bi tjôô mbén Yéhôva inyu base i bihaiden! Inyuki ni? Baa nyañ nu a bé ngond Lôk Amôn nyen a bé tinde nye? (1 Bikiñe 14:21) To kii leñek, litén jolisôna li bi noñ nye. Jon Yéhôva a bi neebe le Kiñe Sisak nu Égiptô, a kadal ngandak minkoñ mi Yudéa, tolakii Rôbôam a bi oñ nwo ni dikôya!​—1 Bikiñe 14:22-24; 2 Miñañ 12:1-4.

Mam ma bi kônde bep ngéda Sisak a bi bol Yérusalem i het Rôbôam a bé énél. Ha ni nyen, mpôdôl Sémaya a bi legel Rôbôam ni dikoo tjé di mbok nwin u Djob le: “Ni bi yék me, jon yak me me nyék bé i woo u Sisak.” Lelaa Rôbôam a bi yoñ nwin u? Loñge ngandak! Bibel i nkal le: “Hala nyen dikoo di mbok di Israel lôñni kiñe ba suhus bomede ’isi, ba kal le: ‘Yéhôva a téé sép.’” Jon, Yéhôva a bi sôñ Rôbôam ni Yérusalem le ba tjiba bañ.​—2 Miñañ 12:5-7, 12.

Mbus ha, Rôbôam a kee ni bisu i ba kiñe i ane i nwelmbok. Ilole a nwo, a bi kébha bon bé nkus wé, bebek ni mahoñol le ba kolba bañ manyañ wap Abiya, nu a bi téé kiñe mbus yé. (2 Miñañ 11:21-23) Ni njel i nyen, Rôbôam a unda pék, i a bi bana bé bisu bi ngéda.

Ndi to hala kii a boñ mam malam, Rôbôam a kônha bé Djob maséé i nya i yôni. Inyu pôdôl énél yé, Bibel i nkal sem kwep le: “A boñ mam mabe.” Inyuki? Inyule “a ôm bé siñ i ñem wé i yéñ Yéhôva.”​—2 Miñañ 12:14.

Hoñol ki: Rôbôam a bi nôgôl Djob ngim mangéda. A boñ ki mam malam inyu litén li Yéhôva. Ndi a bi bana bé maada ma bas bas ni Yéhôva, tole a ôm bé siñ i ñem wé i lémél nye. Jon, a boñ béba keñi, a kwo hiandi hi kwéha base. Ndi u nla badba le: ‘Ngéda Rôbôam a bi neebe nôgôs i Djob, baa bôt bape bon ba bi tinde nye i boñ hala, tole a bé sômbôl toi hiel ñem ni lémél Yéhôva?’ (2 Miñañ 11:3, 4; 12:6) Mbus ngéda, a bi témb a kwo i béba. Kinje mahéñha ni ndémbél ilam i sôgôl wé, Kiñe David! Ñ, David a bi boñ mahôha, ndi niñ yé yosôna i bé nyonok ni maboñok ma ma ñunda le a bé gwés Yéhôva, le a bé diihe bibégés bipubi, ni le a bé tam bibéba gwé ni ñem wé wonsôna.​—1 Bikiñe 14:8; Tjémbi 51:3, 19; 63:2.

 Di nla ôt biniigana mu ñañ Rôbôam. Ibale mut a ntôñ ni lihaa jé, a boñok ki mam ma yé loñge, a kôli ni bibégés. Ndi inyu lémél Djob, bibégés bipubi gwon bi nlama bôk i niñ yés, di téñbege ki ni gwo.

Di ga pam i boñ hala ibale di mboñ biliya i ke ni bisu i kéñbaha gwéha yés inyu Yéhôva. Nlélém kiki di yé di hue hié inyu boñ le hi lém bañ, di nlama nigil Bañga i Djob hiki ngéda, di soñdaga yo, di téñbege i masoohe, inyu tééda gwéha yés inyu Djob. (Tjémbi 1:2; Rôma 12:12) Gwéha yés inyu Yéhôva i ga tôdôl ngôñ yés i lémél nye ikété maboñok més momasôna. I ga tinde ki bés ngim mangéda i hiel ñem bañga lihielak. Maselna ni Rôbôam, di ga téñbe ni bañga bibégés.​—Yuda 20, 21.