1-2. (a) Mambe mandutu ngandak bagwélél ba Yéhôva i mboma? (b) Lelaa hala a nla tééñga bo?

DI WAN dihéga daa dini: Dokta a nléba mankéé wada, nu a yé mañge wanda béba kon u u nwéés nye. Mankéé wada, nu a yé mut bôlô, a ban-ga iloo 50 ma nwii, a nimis bôlô yé; to hala kiki a mboñ kii yosôna a nla inyu bana bôlô ipe, a yé ngi léba. Ñunuk sita u u ntéñbe i gwélél Yéhôva, u nôgda le kiki dilo di ntagbe, a gwé ha bé ngui i gwélél Yéhôva kiki a bé boñ.

² Ibale u mboma ndutu yada mu mandutu di ntip sima, u nla nôgda wee u ta ha bé nseñ. I mam mana ma nla boñ le u nimis maséé, ma tinde we i hoñol le u gwé bé mahee, ma lona ki we mindañ ni bôt bape.

3. Lelaa Satan, ni bôt ba nigle nye, ba ntehe niñ?

³ Kiki Satan, bôt ba nkoñ ’isi ba ndiihe bé niñ. Mut binam a mah bé ba nseñ i mis ma Satan. Ni ñem mbe, a bi bôn Éva le a ga ba kunde ibale a nôgôl bé Djob, ki le a bé yi yaga le ibale muda a mboñ hala, a ga wo. Ibôdôl behee, Satan nyen a ñane mam ma nyuñga, ma m’bô ni bibase bi nkoñ ’isi unu. Jon hala a nhélés bé bés le yak bôt ba nyuñga, ba m’bô ni baéga base, ba ndiihe bé niñ i bôt ba binam, ba ntôñ bé ki to bo.

4. Kii di ga tehe munu yigil ini?

⁴ Ndi Yéhôva a ngwés le di nôgda le di yé nseñ, a nit ki bés ngéda di mboma mandutu ma ma nla boñ le, di  hoñol le di gwé bé mahee. (Tjémbi 136:23; Rôma 12:3) Munu yigil ini, di ga tehe lelaa Yéhôva a nhôla bés: (1) I ngéda di nkon, (2) i ngéda di nyep, ni (3) i ngéda biuni bi ntinde bés i hoñol le nson wés inyu Yéhôva u gwé ha bé mahee. Ndi, di tehe ndugi inyuki di nla ba nkwoog nkaa le hiki wada wés a yé nseñ i mis ma Yéhôva.

5. Kii i nkwés we nkaa le bôt ba binam ba yé nseñ i mis ma Yéhôva?

⁵ To hala kiki Djob a bi hek bés ni nluñ ték, di yé nseñ iloo nso ték. (Bibôdle 2:7) Di wan ndék manjom i i nhôla bés i yi le di yé nseñ i mis ma Yéhôva. A bi hek bôt ba binam ni ngap i nigle bilem gwé. (Bibôdle 1:27) Inyu hala nyen, mut binam a nloo bini bihégél bipe gwobisôna bi yé hana ’isi, Nyambe a ti ki nye kunde i ngii hisi ni binuga.​—Tjémbi 8:5-9.

6. Kii ipe i ñunda bés le Yéhôva a ndiihe bikwéha bi bôt?

⁶ To i ngéda Adam a bi boñ béba, Yéhôva a bi ke ni bisu i diihe bôt ba binam. Inyule a nlôôha diihe bés, jon a bi ti Man wé nu gwéha le Yésu kiki binoñ inyu bibéba gwés. (1 Yôhanes 4:9, 10) Ni njel binoñ, Yéhôva a’ tugul i bôt ba bi wo inyu béba i Adam, hala wee i ‘bôt ba téé sép ni i bôt ba téé bé sép.’ (Minson mi baôma 24:15) Bañga yé i ñunda le di yé nseñ i mis mé to ibale di nkon, di nyep, tole di ñun.​—Minson mi baôma 10:34, 35.

7. Mambe mam mape ma ntinde bagwélél ba Djob i hémle le Yéhôva a ndiihe bo?

⁷ Mam mape ma ntinde bés i hémle le Yéhôva a ndiihe bés. A bi ôt bés, a yimbe ki lelaa di bi leege ñañ nlam. (Yôhanes 6:44) I ngéda di bi bôdôl kôôge Yéhôva bebee, yak nye a bi kôôge bés bebee. (Yakôbô 4:8) Inyu unda le di yé nseñ i mis mé, Yéhôva a nyoñ ngéda, a gwéélak ki ngui yé inyu niiga bés. A nyi umbe ntén mut di yé len, ni umbe ntén mut di nla ba yani. A nkodol ki bés inyule a ngwés bés. (Bingéngén 3:11, 12) Ibabé pééna, hala a ñunda toi le Yéhôva a ndiihe bés!

8. Lelaa bibañga bi kaat Tjémbi 18:28-30 bi nhôla bés ngéda di mboma mandutu?

⁸ Bôt bahogi ba bé hoñol le Kiñe David a bé bé nseñ, ndi nye a bé yi le Yéhôva a ngwés nye, a nidik nye. Kiki David a bé yi i jam li, hala a bi ti nye ngui i hônba mandutu mé. (2 Samuel 16:5-7) I ngéda di nimis ngui yés, tole di mboma mandutu, Yéhôva a nla hôla bés i tehe mam nya ipe, a nla ki hôla bés i yémbél to imbe ndutu di mboma. (Añ Tjémbi 18:28-30.) I ngéda Yéhôva a nit bés, yom to yada i nla bé kéñ bés i gwélél nye ni maséé. (Rôma 8:31) Nano, di béñge inyuki di nlama bigda le Yéhôva a ngwés bés, a diihege ki bés ngéda di mboma mana mandutu maa.

9. Lelaa di nla nôgda ngéda di nkon?

⁹ Kon u nla boñ le di bana mahoñol mabe, di nôgda wengoñle di tane bé mut nye ki nye nseñ. I ngéda bôt bape ba nyimbe le di nla ha bé boñ ngim mam, hala a nla tééñga bés, tole di kahal wo nyuu i bat bape mahôla. To ibale bôt bape ba nyimbe bé le di nkon, di nla wo nyuu inyule i mam di bé boñ  behee, di nla ha bé boñ mo. Ndi Yéhôva a nla lédés bés mu mangéda mabe ma. Lelaa?

10. Inoñnaga ni kaat Bingéngén 12:25, kii i nla hôla bés ngéda di nkon?

¹⁰ I ngéda di nkon, “loñge bañga” i nla ti bés makénd. (Añ Bingéngén 12:25.) Ikété Bibel, Yéhôva a ntééda bibañga bilam bi bi nhôñlaha bés le di yé nseñ i mis mé to ibale di nkon. (Tjémbi 31:20; 41:4) Ibale di ñañ Bañga i Djob, di tiimbaga, Yéhôva a ga hôla bés i jôs mahoñol mabe di nla bana ngéda di nkon.

11. Lelaa Yéhôva a bi hôla mankéé wada?

¹¹ Di wan hihéga hi Jorge. Jorge a bi kwo kon ngéda a bé mañge wanda, mbus ndék ngéda, kon wé u nai, kayéle a kahal nôgda le a ta ha bé nseñ. Jorge a nkal le: “Me bé yi bé le kon wem w’a wéha me nyuu, inyule bôt ba bi kahal nun me nya ipe. Kiki mam ma bé ke ndik ni bisu i bep, bep ni bep, me bé hoñol le m’a la ha bé boñ jam i niñ yem. Hala a bi lôôha tômbôs me, me soohe Yéhôva le a hôla me.” Lelaa Yéhôva a bi hôla nye? Jorge a nkal le: “Kiki me bé la ha bé nigil ntandaa ngéda, ba bi ti me makénd i añ minlôñ mi kaat Tjémbi mi mi ñap bé, mi undga le Yéhôva a ntôñ bagwélél bé. Kiki me bé tiimba añ minlôñ mi Bibel mi hiki kel, me léba le mi bé hôgbaha me, mi tinak ki me makénd. I mbus ngéda, bôt ba bôdôl yimbe le me nkañ ha bé su. Ba kal ki me le ngéda ba ntehe le me yé maséé, hala a nti bo makénd. Me bi nôgda le Yéhôva a ntimbhe masoohe mem! A bi hôla me i tehe memede nya  ipe. Me bi bôdôl bok mahoñol mem mu Bañga yé, inyule i ntoñol lelaa a ntehe me, to hala kiki me nkon.”

12. Ngéda u nkon, kii u nlama boñ inyu kôhna mahôla ma Yéhôva?

¹² Ibale u nkon, yi ntiik le Yéhôva a nok njôghe yoñ. Soohe nye le a hôla we i bana litehge lilam mu jam li mpémél we. I mbus, yéñ bibuk bilam Yéhôva a bi tééda ikété Bibel inyu hôgbaha we. Bok mahoñol mu minlôñ mi Bibel mi mi ñunda le Yéhôva a nlôôha gwés bagwélél bé. Ha nyen w’a tehe le Yéhôva a ñunda ba bobasôna ba ntéñbe i gwélél nye loñgeñem.​—Tjémbi 84:12.

13. I ngéda isañ mbai a nimis bôlô yé, kii a yé le a nôgda?

¹³ Hiki isañ mbai a gwé ngôñ i tééda lihaa jé loñge. Ndi i nla pam le mankéé wada a nimis bôlô yé, ki le a mboñ bé jam libe. To hala kiki a mboñ biliya bi ngui i yéñ bôlô ipe, a nléba bé. Kiki i mam mana ma mpémél nye, a nla nôgda le a ta bé nseñ. Ibale a mbok mahoñol mu mimbônga mi Yéhôva, lelaa hala a nla hôla nye?

14. Inyuki Yéhôva a nyônôs mimbônga nwé?

¹⁴ Yéhôva a nyônôs mimbônga nwé ngéda yosôna. (Yôsua 21:45; 23:14) A mboñ hala inyu ngandak manjom. Pog, a mboñ hala inyu tééda jôl jé lipubi. Yéhôva a bi bôn le a ga tôñ bagwélél bé, jon a nyi le a yé nyégsaga i yônôs mbônga u. (Tjémbi 31:2-4) Handugi hala, Yéhôva a nyi le di ga tomb ibale a ntôñ bé i bés ba di yé bagwélél bé. A mbôn le a ga tééda bés i pes minsôn ni i pes mbuu, yom yo ki yo i ga kéñ bé  nye i yônôs mbônga u!​—Matéô 6:30-33; 24:45.

15. (a) Imbe ndutu bikristen bi hiai bisu bi bi boma? (b) Kaat Tjémbi 37:18, 19 i nti bés imbe botñem?

¹⁵ I ngéda di mbigda le Yéhôva a nyônôs mimbônga nwé, di nla ba nkwoog nkaa le a ga hôla bés ngéda mam ma moni ma ntééñga bés. Di wan hihéga hi bikristen bi hiai bisu. I ngéda likoda li Yérusalem li bi boma ndééñga ikeñi, ‘u héya baôma, banigil bobasôna ba bi tjama mu minkoñ.’ (Minson mi baôma 8:1) Noode le hégda jam li. Ba bi kwo liyep! Bebek le bikristen bi bi nimis mandap map, ni manyuñga map. Ndi Yéhôva a bi tjôô bé bo; to maséé map, ba bi nimis bé. (Minson mi baôma 8:4; Lôk Héber 13:5, 6; Yakôbô 1:2, 3) Yéhôva a bi nit bikristen bi, a ga nit yak bés.​—Añ Tjémbi 37:18, 19.

16. Kii i nla tinde bés i badba too Yéhôva a ngi diihege nson wés?

¹⁶ I ngéda di nkahal un, di nla bôdôl nôgda le di nla ha bé boñ bañga jam i nson u Yéhôva. Kiñe David a bi lama nôgda nlélém jam, ngéda a bé un. (Tjémbi 71:9) Ndi Yéhôva a nla hôla bés. Lelaa?

17. Kii ñañ u sita Jéri u niiga bés?

¹⁷ Di wan hihéga hi sita yada le Jéri. Ba bi naña nye ni lôk kéé ipe i Ndap Ane inyu nigil likeñge li bôlô, ndi a bé gwés bé ke. A kal le: “Me ñun, me yé yik muda, me gwé bé to likeñge Yéhôva a nla gwélél i nson wé. Me ta bé nseñ.” I u u, ilole a nke likoda li, a bi yible Yéhôva ñem ni njel masoohe. To i ngéda a bi ke mu likoda li, a bé badba too i  yé nseñ le a ba ha. I ngéda likoda li bi bôdôl, mu lôk kéé i bé niiga bo, wada a bi yigye le, jam li nlôôha nseñ li yé le, ba nwas le Yéhôva a niiga bo. Jéri a mbigda le: “Jon me bi kal mu ñem wem le: ‘Ibale jolisôna li, wee yak me me nla!’ Ha nyen me bi bôô maéya ngéda me bi sôk nok le Yéhôva a bé timbhe masoohe mem. A bé hôñlaha me le me ngi gwé ngandak mam i ti mu nson wé, ni le a yé bebee i niiga me!” I ngéda a nhoñol kiki mam ma bi tagbe, Jéri a nkal le: “Me bi ke mu likoda li, me konok woñi, to makénd me bééna bé, me nôgdaga le me ta bé nseñ. Ndi me bi pam mu ni ñem ngui, me ban-ga makénd, me nôgdaga le me yé nseñ!”

18. Lelaa Bibel i ñunda le Yéhôva a nwaa bé diihe nson wés to i ngéda di ñun?

¹⁸ Yak i ngéda di ñun, di nlama yi le Yéhôva a ga ke ni bisu i gwélél bés mu nson wé. (Tjémbi 92:13-16) Yésu a bi niiga bés le, to ibale di ntehe le di nla ha bé boñ ngandak mam, di yanak biliya gwés, Yéhôva nye a ndiihe hiki jam di mboñ mu nson wé. (Lukas 21:2-4) Jon, bok mahoñol moñ mu mam u nla boñ. Kiki hihéga, u nla hôla bôt i yi Yéhôva, u nla soohe inyu lôk kéé, u nla yak ti bape makénd le ba téñbe i gwélél Djob. Yéhôva a nyoñ we kiki ngwelnson lôñ yada ni nye, ha inyu bé le u mboñ ngandak mam, ndi inyule u yé bebee i nôgôl nye.​—1 Korintô 3:5-9.

19. Imbe botñem kaat Rôma 8:38, 39 i nti bés?

¹⁹ Kinje mayéga di nla ti Yéhôva, Nyambe nu a ndiihe toi bagwélél bé! A bi hek bés le di boñ sômbôl yé; bibégés di nti nye gwon bi nlémés toi niñ yés. (Masoola 4:11) To ibale nkoñ ’isi u ntehe le di ta bé nseñ, Yéhôva nye a ntehe bé hala. (Lôk Héber 11:16, 38) Ibale kon, liyep, tole biuni bi mboñ le di nimis makénd, di bigda le jam jo ki jo li nla bé bagal bés ni gwéha i Tata wés nungigii.​—Añ Rôma 8:38, 39.