Baa ni nyoñ ngéda i añ ba Nkum Ntat ba nsôk pam i masañ mana? Wee ni béñge too ni nla timbhe mambadga ma noñ hanano:

Inoñnaga ni Bitilna, kii i nkwés bés nkaa le Djob a nok ndutu yés?

I ngéda bon ba nlômbi Israel ba bé minkol i Égiptô, Djob a bé yi ndutu yap ni njôghe yap. (Manyodi 3:7; Yésaya 63:9) Di bi héga i pôôna Nyambe, Jon di nla nok ndutu i bôt bape. A nok bés to ibale di nhoñol le di kôli bé ni gwéha yé.​—wp18.3, mapep 8-9.

Lelaa biniigana bi Yésu bi nhôla bôt i yémbél lem i pôôs bôt mahoñol mabe?

I ngéda Yésu a ba hana isi, ngandak Lôk Yuda i bééna lem i pôôs bôt bape mahoñol mabe. Kristô a bi yigye nseñ i bana suhulnyuu, a unda ki le ngôk u nlôôha inyu litén jés tole kôgôô nyuu yés u ta bé loñge. A bi ti banigil bé maéba le ba nlama tehe wada ni nuu kiki lôktata.​—w18.06, mapep 9-10.

Kii di nigil mu manjom ma bi tinde Djob i tjél le Môsi a jôp i Hisi hi Likak?

Môsi a bééna maada malam ni Yéhôva. (Ndiimba Mbén 34:10) Bebee ni mamélél ma 40 nwii ba bi tégbaha i ñoñ, litén li bi témb li bôdôl tjelel le malép ma ta bé. Djob a kal Môsi le a pôdôs liaa. Maselna ni hala, Môsi a bi bép liaa. Bebek le Yéhôva a bi unup inyule Môsi a bi noñ bé biniigana Gwé, tole inyule Môsi a bi ti bé Djob lipém inyu hélha jam i bi bôña. (Ñañga bôt 20:6-12) Hala a nlama niiga bés nseñ i nôgôl Yéhôva, ni i ti nye lipém.​—w18.07, mapep 13-14.

Inyuki di yé le di yoba ibale di mpémhene bôt mbagi kingéda bitéé bi mis?

Manjel maa bôt ba mbéna gwélél inyu pémhene bôt bape mbagi inoñnaga ni kii i nene mis, mo mana: Kôgôô i nyuu tole litén, lingwañ ni bimañ. I yé nseñ le di noode tehe bôt bape kiki Djob a ntehe bo, hala wee ngi ndodla yo ki yo! (Minson mi baôma 10:34, 35)​— w18.08, mapep 8-12.

Mambe manjel lôk kéé i i ñun i nla gwélél inyu hôla lôk kéé ipe?

Djob a nwaa bé diihe ñunuk mankéé u ba nhéñha nson, nya mankéé i i nla boñ ngandak inyu hôla bape. A nla hôla balôm ba bisita ba ba ta bé Mbôgi Yéhôva, i bôt ba mbomb i pes mbuu, i éga ngandak gwigil bi Bibel, ni i kéñbaha nson wé likalô.​— w18.09, mapep 8-11.

Bimbe bisélél bikristen bi gwé mu nkuu wap bisélél inyu niiga?

Di gwé mapep inyu yi site yés ni inyu naña bôt i lo makoda. Bon ba mapep malam juem, ibabé i hôya Nkum Ntat ni Tôde ’ilo! Nkuu wés bisélél inyu niiga u gwé ki ndék bon ba bikaat, bikaat biba bi tôbôtôbô, bividéô bina bi mahee, yak ni vidéô ini le Inyuki di nigil Bibel?​—w18.10, lipep 16.

Lelaa kristen i yé le i “somb maliga,” kiki kaat Bingéngén 23:23 i mbat?

Di nti bé moni inyu kôhna maliga. Ndi, i mbéda bés ngéda ni biliya inyu kôhna mo.​—w18.11, lipep 4.

Ngéda di nhoñol lelaa Hôséa a bi niñ ni Gômer, kii hala a niiga bés?

Tolakii Gômer a bi waa bé ke ndéñg, Hôséa a bi nwéhél nye, a neebe ki i yén libii ni nye. Ibale sobiina wada a nkwo malal ma nyega, nwet ba mbabaa a nla nwéhél. Ibale sobiina a neebe i tiimba lal ni nwet a bak ndéñg, wee i njom a bak a gwé i bos ibabé i bôk matiñ ma Bibel, i ta ha bé.​— w18.12, lipep 13.