1-2. Kiki ndémbél i Angélitô i ñunda bés, kii hiki wada wés a nlama boñ?

BAA u bi néñél lihaa li Mbôgi Yéhôva? Ibale hala, yi le hémle i nlôôhana bé. To bagwal bés ba yé Mbôgi Yéhôva to ba ta bé, hiki wada wés a nlama boñ biliya inyu yila liwanda li Yéhôva.

² Di yoñ hihéga hi mankéé wada le Angélitô. A bi néñél maliga, ndi ngéda a bé mañge, a bééna bé maada ma bas bas ni Yéhôva. A nkal le: “Me bi yila Mbôgi Yéhôva inyule bagwal bem ba bé Mbôgi Yéhôva.” Ndi Angélitô a bi yoñ makidik i soñgol Bibel ni i ôt pék mu, a kahal soohe Yéhôva hiki kel. Mam ma bi sôk lelaa? Angélitô a nkal le: “Me bi léba le mpom njel me gwé inyu yila liwanda li Yéhôva, u yé le memede me jôp i yigil.” Ndémbél i Angélitô i ntinde bés i badba mana mambadga: Mambe maselna ma yé ipôla i yi ngim mam inyu Yéhôva ni i yi toi Yéhôva? Lelaa di nla pam i yi Yéhôva?

3. Mambe maselna ma yé ipôla i yi Yéhôva ni i yi toi nye?

³ Di nla kal le mut a nyi Yéhôva ngéda a nyi jôl jé, a yik ngim mam a bi pot ni ma a bi boñ. Ndi hala a kôli bé. Inyu tibil yi Yéhôva, di nlama yoñ ngéda i nigil Bibel bañga liniglak inyu yi bilem gwé bi bi  mbuma ñañ. Ha nyen di ga tibil nok mahoñol mé, bipôdôl gwé, ni maboñok mé. Di ga pam ki i yi too mahoñol més ni maboñok més ma nlémél nye. Ngéda di nyi i jam Yéhôva a nsômbôl le di boñ, di nlama boñ jo.

4. Lelaa ndémbél i bagwélél ba Djob ba kôba i nhôla bés?

⁴ Ngim bôt i yé le i nol bés hiol inyule di mbôdôl nigil Bibel ni Mbôgi Yéhôva, ba nla yak kolba bés ngéda di nkahal ke makoda. Ndi ibale di mbôdôl Yéhôva ñem, a ga tjôô bé bés. Di ga tek hikuu hi maada malam ni Djob ma ma ga mal bé. Baa di nla toi pam i yi Yéhôva hala? Ñ! Ndémbél i Môsi bo Kiñe David, ba ba bé bikwéha bi bôt kiki bés i ñunda le di nla pam i boñ hala. Mu kii di nwan ndémbél yap, di ga timbhe mambadga mana: Lelaa ba bi pam i yi Yéhôva? Bimbe biniigana di nla ôt mu i ndémbél yap?

5. Mambe makidik Môsi a bi yoñ?

⁵ Môsi a bi yoñ makidik i gwélél Nyambe. Ngéda Môsi a bééna 40 ma nwii, a bi yoñ makidik i kiha ni bagwélél ba Djob, hala wee bon ba Israel, a tjél le ba sébél nye le “man ngond Faraô.” (Lôk Héber 11:24) Môsi a bi tjél bitel bikeñi. Kiki a bi ke i pes i Lôk Yuda, a bé yi le Faraô nu a bé ñane Égiptô, ni nu ba bé bégés kiki ngim djob, a bé le a bep unup, a nol nye. Kinje hémle ikeñi! Môsi a bé bôdôl Yéhôva ñem. I botñem i yon i bé hikuu hi maada malam Môsi a bi bana ni Yéhôva niñ yé yosôna.​—Bingéngén 3:5.

6. Kii ndémbél i Môsi i niiga bés?

⁶ Kii hala a niiga bés? Kiki Môsi, bés bobasôna di gwé makidik i yoñ: Baa di ga gwélél Djob, di kiha ki ni bagwélél bé? Di nlama boñ bisesema inyu gwélél Djob, i nla pam ngim mangéda le bôt ba kolba bés. Ndi ibale di mbôdôl Tata wés nungingii ñem, a ga nit bés!

7-8. Kii Môsi a bi ke ni bisu i nigil?

⁷ Môsi a bi ke ni bisu i yi Yéhôva ni i boñ sômbôl Yé. Kiki hihéga, i ngeñ Yéhôva a om Môsi i héya litén jé minkôm Égiptô, a bi kon woñi, a kal Yéhôva le a ga la bé. Djob a bi timbhe nye ni konangoo, a hôla ki nye. (Manyodi 4:10-16) Hala a bi boñ le Môsi a pôdôs Faraô ni makénd momasôna. I mbus, Môsi a bi tehe lelaa Yéhôva a gwélél ngui Yé inyu nol Faraô ni ntôñ wé u gwét i Tuye Nkôibaga, kayéle a péyés bon ba Israel.​—Manyodi 14:26-31; Tjémbi 136:15.

⁸ Ngéda Môsi a bi kobol Lôk Israel i Égiptô, ba bi waa bé yéñ manjom inyu tjelel. Hala a bi hôla Môsi i tehe wongut i Yéhôva. (Tjémbi 78:40-43) Môsi a bi tehe yak suhulnyuu i Yéhôva mu kiki a bi héñha mahoñol mé ngéda a bi yemhe Nye le a tjé bañ litén jé.​—Manyodi 32:9-14.

9. Inoñnaga ni kaat Lôk Héber 11:27, mambe maada Môsi a bééna ni Yéhôva?

⁹ I ngéda ba bé bebee ni Hisi hi Likak, maada ma Môsi ni Yéhôva ma bi kônde let kayéle i bé wengoñle a bé  tehe Isañ nungingii. (Añ Lôk Héber 11:27.) Inyu unda ipam limbe likala a bé liwanda li Djob, Bibel i nkal le: “Yéhôva a ba pôdôs Môsi mbom ni mbom, kiki mut a mpôdôs liwanda jé.”​—Manyodi 33:11.

10. Inyu tibil yi Yéhôva, kii di nlama boñ?

¹⁰ Kii hala a niiga bés? Inyu tibil yi Yéhôva, di nlama ndik bé yi bilem gwé, ndi di nlama boñ sômbôl yé. I len ini, sômbôl i Yéhôva i yé le “mintén mi bôt nwominsôna mi kôhna tohi, mi pam ki i bana bañga yi i maliga.” (1 Timôtéô 2:3, 4) Nson likalô u yé njel yada inyu boñ sômbôl i Yéhôva.

11. I ngéda di nhôla bôt bape i yi Yéhôva, lelaa bésbomede di mpam i tibil yi nye?

¹¹ Ngim mangéda, i ngeñ di nhôla bôt bape i yi Yéhôva, ha nyen bésbomede di mpam i yi nye loñge. Kiki hihéga, di ntibil tehe konangoo i Yéhôva i ngéda a nhôla bés i boma bôt ba gwé libak lilam. (Yôhanes 6:44; Minson mi baôma 13:48) Di nôgda ngui i Bañga i Nyambe ngéda di ntehe yo i ntinde i mut a nigil bibel ni bés i nwas bilem gwé bibe inyu yila mut yondo. (Kôlôsé 3:9, 10) Di ntehe ki wongut i Yéhôva mu kii a nti ngandak bôt ba libôga jés pôla i yi nye inyu kôhna niñ boga.​—Rôma 10:13-15.

12. Kiki kaat Manyodi 33:13 i ñunda, kii Môsi a bat Yéhôva, inyuki?

¹² Môsi a bé diihe maada mé ni Yéhôva. To hala kiki Môsi a bi boñ mimpémba mi mam i jôl li Djob, a bi ke ni bisu i soohe Yéhôva le a hôla nye i kônde yi nye. (Añ Manyodi 33:13.) Môsi a bééna jam kiki bo 80 ma nwii ngéda a bi soohe Yéhôva hala, a bé yi le a bé lama ke ni bisu i nigil ngandak mam inyu Isañ wé nungingii.

13. Imbe njel di nla gwélél inyu unda le di njôha bé ni maada més ni Nyambe?

¹³ Kii hala a niiga bés? To di ngwélél Yéhôva hala a yé ntandaa ngéda, di waa bañ diihe maada més ni nye. Njel bisu bisu di nla gwélél inyu unda le di njôha bé ni maada més ni Nyambe i yé le di soohe nye.

14. Inyuki masoohe ma nlôôha ba nseñ inyu ke ni bisu i yi Nyambe?

¹⁴ Minkwel nwon mi ñat bañga mawanda. Jon kôôge Djob bebee ni njel masoohe, u kon bañ woñi i kal nye kii u nhoñol ni kii u nôgda. (Éfésô 6:18) Sita Krista, nu a yé i loñ i Turkai, a nkal le: “Kiki me nyiblene Yéhôva ñem wem ni njel masoohe, me tehge ki nye a nhôla me, hala nyen me nkônde gwés nye, me kôndge ki bôdôl nye ñem. I tehe lelaa Yéhôva a ntimbhe masoohe mem, i bi hôla me i yoñ nye kiki Tata ni Liwanda jem.”

15. Lelaa Yéhôva a bi sébél Kiñe David?

¹⁵ Kiñe David a bi gwééne litén li Yéhôva. Ndi David a bé gwélél bé Yéhôva inyule litén jé li bé gwélél nye. A bééna mé mé maada ni Djob, Yéhôva a bé gwés ki nye ngandak. Yéhôva nyemede a bi sébél David le ‘mut nu ñem wé u ngwés.’ (Minson mi baôma 13:22) Lelaa David a boñ ndi a yila liwanda li Yéhôva?

16. Mu kiki David a bé memle bihégél, kii a bi nigil inyu Yéhôva?

 ¹⁶ David a bi nigil i yi Yéhôva ni njel bihégél. Ngéda David a bé mañge wanda, a bé tégbaha ngandak ngéda i mbégdé inyu tééda mintômba mi isañ. Bebek le ha ngéda i nyen a bi bôdôl ôt pék mu mam Yéhôva a bi hek. Kiki hihéga, ngéda a bé béñge ngii ni juu, a bé tehe ndik bé dikôô di tjôdôt, ndi a bé tehe yak bilem bi Nyambe. Hala a bi tinde David i kal le: “Ngii i ñañal lipém li Nyambe; kôkôp ngii ki i ñéba nson u moo mé.” (Tjémbi 19:2, 3) Ngéda David a bi tehe lelaa Yéhôva a bi hek bôt ba binam, a bi nôgda le pék i Yéhôva i mbuma ñañ. (Tjémbi 139:14) Mu kiki David a bé memle bihégél, a bi nôgda le a ta bé to yom bisu bi Yéhôva.​—Tjémbi 139:6.

17. Kii di ga nigil ibale di nyoñ ngéda i memle bihégél?

¹⁷ Kii hala a niiga bés? Di lela bañ bihégél bilam bi bi nkéña bés wengoñle di ntehe bé gwo, di yoñ ngéda i memle gwo! Hiki kel Djob a hek, yoñ ngéda i soñda mu gwom bi nkéña we, hala wee bibebela, binuga, ni bôt ba binam, inyu tehe bilem bi Yéhôva. Ni i njel i, w’a ke ni bisu i yi Tata wés nu gwéha. (Rôma 1:20) Gwéha yoñ inyu Yéhôva y’a kônde keñep.

18. I kaat Tjémbi 18, David a nkal le kii Yéhôva a bi bôñôl nye?

¹⁸ David a kal le Yéhôva nyen a bé nit nye. Kiki hihéga, ngéda David a bi jôs mbondo njéé ni ours bi bi bé sômbôl nol mintômba mi isañ, a bi kal le Yéhôva nyen a bi hôla nye i nol binuga bi bikai bi. Yak ngéda a bi yémbél Gôliat, David a bi kal ki le Yéhôva nyen a nhôla nye. (1 Samuel 17:37) Ngeñ a bi tohla i moo ma Kiñe Saulô nu a bé sômbôl nol nye inyule a bé kil nye njôñ, David a kal le Yéhôva nyen a ntohol nye. (Tjémbi 18, ño nkwel u hiémbi) Ibale David a bé mut ngôk, ki a bi bép woo tôl le a mboñ i mam ma ni ngui yé. Ndi David a bé mut suhulnyuu, jon a bi kal le a bi boñ i mam ma momasôna ni ngui i Yéhôva.​—Tjémbi 138:6.

19. Kii ndémbél i David i niiga bés?

¹⁹ Kii hala a niiga bés? Di nlama ndigi bé bat Yéhôva mahôla. Di nlama ki yimbe i ngéda a nhôla bés, ni lelaa a nhôla bés. Suhulnyuu y’a tinde bés i neebe le di nla bé boñ jam jo ki jo ibale Yéhôva a nhôla bé bés. Kiki di ntehe woo u Yéhôva i niñ yés, hala nyen di nkônde kôôge nye bebee. Mankéé Isak nu a yé i ôn i Fiji a mpééna bé jam li, a yé Mbôgi Yéhôva nano a yé ngandak nwii. A nkal le: “Ngéda me mbéñge niñ yem, me ntehe yaga kiki Yéhôva a bi nit me ibôdôl i kel me bôdôl nigil Bibel letee ni len. Ntiik, me ntehe le Yéhôva a yé toi.”

20. Kii di nla nigil mu maada David a bééna ni Djob?

²⁰ David a bé kôna bilem bi Yéhôva. Yéhôva a bi hek bés ni ngap i kôna bilem gwé. (Bibôdle 1:26) Kiki di nke ni bisu i yi bilem bi Yéhôva, hala nyen di ga pam i kôna nye. David a bi pam i yi Isañ nungingii bañga liyik,  jon a bi kôna Nye mu maada mé ni bôt bape. Hihéga hiada hini. David a bi ke i ndéñg ni Batséba, a nol ki nlôm, hala a bé béba ikeñi i mis ma Yéhôva. (2 Samuel 11:1-4, 15) Ndi to hala, Yéhôva a bi nwéhél David, nu yak nye a nwéhél bôt bape. Kiki David a bi bana i nya maada i ni Yéhôva, Lôk Israel i bi gwés nye ngandak, yak Yéhôva a bé sima nye kiki ndémbél inyu bikiñe bipe bi Israel.​—1 Bikiñe 15:11; 2 Bikiñe 14:1-3.

21. Inoñnaga ni kaat Éfésô 4:24; 5:1, kii di ga kôs ibale di yé “banigle Nyambe?”

²¹ Kii hala a niiga bés? Di nlama yila “banigle Nyambe.” Ngéda di mboñ biliya bi, hala a nlona bés maséé, hala a hôla ki bés i yi nye bañga liyik. Ngeñ di nigle Yéhôva, di ñunda le di yé toi bon bé.​—Añ Éfésô 4:24; 5:1.

22-23. Kii di ga kôs ibale di mbii i mam di nigil inyu Yéhôva i bisélél?

²² Kiki di nigil, di nla pam i yi Yéhôva ngéda di memle bihégél gwé, di niglak ki Bibel. Bibel i yé nyonok ni dihéga di bagwélél ba Djob ba di nla nigle, kiki bo Môsi ni David. Yéhôva a bi mal hôla bés i yi nye. Nano bôlô yosôna i yé yés.

²³ Di ga waa bé boñ biliya inyu yi Yéhôva. (Ñañal 3:11) Jam li nlôôha nseñ li ta bé i mam momasôna di nyi inyu yé, ndi biliya di mboñ inyu bii i mam di nyi inyu yé bisélél. Ibale di mbii i mam di nigil bisélél, di boñok biliya i nigle Tata wés nu gwéha, a ga kônde kôôge bés bebee. (Yakôbô 4:8) A nkal mu Bañga yé le a ga tjôô bé bés kekikel.