Baa kii u yé le u nôgda ibale liwanda joñ li ñéble we kaat i i nti makénd? I nya kaat i yon ñôma Paul a bi ômle Timôtéô, di nsébél yo len le kaat 2 Timôtéô. Ibabé pééna, Timôtéô a bi yéñ loñge homa inyu añ i kaat liwanda jé li ñem nyuu li bi tilna nye. Bebek le a bé badba le: ‘Paul nyemede a nke laa? Baa maéba mon a yé tilna me inyu hôla me i yi lelaa me nla gwel minson nwem? Baa kaat yé i ga hôla me mu kii me ntééne bôt bape likalô, me niigaga bo? Kiki di ga tehe, Timôtéô a bi léba mandimbhe ma mambadga ma ni mape ki, mu kaat i Paul. Ndi munu yigil ini, di ga wan ndigi ndék maéba ma mpémél mu kaat i.

Ibôdôl yaga bibôdle bi kaat, Timôtéô a bé le a nôgda le Paul a bé tôñ toi nye. Paul a bi sébél nye le, “man wem nu gwéha.” (2 Timôtéô 1:2) Timôtéô a bééna 30 ma nwii ngéda a kôs i léta i, i nwii 65 N.Y., a bé yak nhôôlak mañ ha ngéda i. A bé a ma sal ni Paul iloo jôm li nwii, a nigil ki ngandak mam ipañ yé.

Hala a bi lama ti Timôtéô makénd i nok le Paul a bé hônba mandutu. Paul a bé i mok i Rôma, bebee ni nyemb. (2 Timôtéô 1:15, 16; 4:6-8) Hala a bé hôla Timôtéô i nôgda le Paul a gwé toi ñem ngui, inyule nyemede a kal le: Me nkônde hônba mam momasôna.” (2 Timôtéô 2:8-13) Kiki Timôtéô, ndémbél i hônba i Paul i nla lédés yak bés.

Paul a kal Timôtéô le, Timôtéô a tehe i nson a bé gwel i ntôñ u Djob kiki yom i nlôôha mahee. Paul a bé gwés le Timôtéô a “lôñôs likébla a bi kôs ni Nyambe kiki hié.” (2 Timôtéô 1:6) I buk ini le “likébla” Paul a bi gwélél munu nlôñ kaat unu u yé khaʹris·ma ni hop Grikia. Ni hop Grikia, ba ngwélél i buk i, inyu pôdôl likébla mut a kôli bé kôs, ndi ba nti nye jo yañga, ba mbom nye mbomok. Timôtéô a bi kôs likébla li ngéda mimañ mi bi pohol nye inyu nson u tôbôtôbô a bé lama sélél lôk kéé yé i mbuu.​—1 Timôtéô 4:14.

Kii Paul a bé sômbôl le Timôtéô a boñ ni likébla li? Ngéda a bi añ bibuk bini le “loñôs jo kiki hié,” Timôtéô a bé lama hoñol makalak ma hié bôt ba ngwélél i ndap. Ba nlama hue makalak inyu boñ le ma loñ. Kaat ndoñi  bibuk yada i nkal le, i buk Grikia Paul a bi gwélél hana i nkobla le i pep hié hi hi yé bebee ni lém, inyu boñ le hi tiimba loñ. Paul a bé sômbôl kal le Timôtéô a bé lama tiimba lôñôs makénd a bééna mu nson wé. Maliga ma yé le, Paul a bé ti Timôtéô mana maéba le: ‘Yônôs nson woñ ni ñem woñ wonsôna!’ I len ini, yak bés di nlama boñ nlélém, di gwel nson wés ni makénd momasôna.

Mu kii a bé ke ni bisu i soñgol kaat liwanda jé li bi ômle nye, Timôtéô a bi léba bibuk bipe bi bi bé le bi hôla nye i num matam malam mu nson wé. Paul a tila ha homa nu le: “I jam ba bi bôdôl we ñem ndi ba ti we, tibil yaga tééda jo ni njel mbuu mpubi u u nyééne ikété yés.” (2 Timôtéô 1:14) Limbe li jam ba bi bôdôl nye ñem ndi ba ti nye? I nlôñ 13, Paul a mpôdôl bibañga bi maliga, hala wee maliga ma nlébna Bitilna tole Bibel. (2 Timôtéô 1:13) Kiki a bé kristen, Timôtéô a bé lama niiga bôt ba mbédgé maliga, a niigaga ki lôk kéé i likoda maliga. (2 Timôtéô 4:1-5) U héya hala, Timôtéô a bé yak mañ u u bé lama tééda bémba Nyambe. (1 Pétrô 5:2) Timôtéô a bé lama tééda i tik jam a bi kôs, hala wee maliga ma a bé niiga ni mahôla ma mbuu mpubi u Yéhôva, ni Bañga yé.​—2 Timôtéô 3:14-17.

I len ini, yak bés di bi kôs maliga inyu niiga bôt bape. (Matéô 28:19, 20) Di ñunda le di nti mayéga inyu likébla li, ibale di ntéñbe ni masoohe, di ban-ga lem i nigil Bañga i Djob. (Rôma 12:11, 12; 1 Timôtéô 4:13, 15, 16) U héya hala, i nla pam le di kôs ki minson mimpe, kiki bo i ba mañ tole nsañal. I nya nson tôbôtôbô u u nlama hôla bés i ba suhulnyuu ni i bôdôl Nyambe ñem. Jon, di nlama tééda likébla li, di sôñ ki jo ni mahôla ma Yéhôva, kiki yom i nlôôha mahee.

Mu minson Timôtéô a bi kôs, a bé lama ki niiga lôk kéé ipe i gwel nson wé. Inyu hala nyen Paul a bi ti Timôtéô maéba le: “I mam u bi nôgôl i meeni . . . , niiga mo bôt ba maliga, yak bo b’a bana ngap i nya i kôli inyu niiga bape.” (2 Timôtéô 2:2) Ñ, Timôtéô a bé lama niiga lôk kéé ipe i mam ba bi niiga nye. I yé toi nseñ le hiki mañ ikété likoda i len ini, i boñ nlélém. Loñge mañ u nsôô bé bini bilôk bikéé bipe bôlô, a konok woñi le i tiga le bon ba yiga yoñ i bôlô a nsal len. Ndi a niiga bana bape inyu boñ yak bo ba pam i sal i bôlô i. A nkon bé woñi le bilôk bikéé bi, bi tiga gwel nson u iloo nye, kayéle bon ba kahal nene. Jon mañ u ta ndik bé ha inyu niiga bilôk bikéé ndék bon ba gwom ba gwé ngôñ i yi inyu sal i bôlô ba nti bo likoda. Ndi a nlama niiga bo, a hôla bo i yila minhôôlak mi bikristen. Ni njel i, i bôt ba maliga a niiga, ba ga pam i hôla likoda iloo hihéga.

Ibabé pééna, Timôtéô a bi lôôha ba maséé ni kaat Paul a bi éble nye. Di nhégda le Timôtéô a bi tiimba soñgol i kaat i, a ôdôk pék mu, inyu tehe lelaa a bé le a bii maéba ma bé mu bisélél mu nson wé.

Yak bés di nlama noñ maéba Paul a bi ti Timôtéô. Lelaa? Di nlama sal ni ngui inyu lôñôs tik likébla di nkôs, inyu tééda i botñem ba gwééne bés ni inyu niiga bôt bape i mam ba bi niiga bés. Ni i njel i, kiki Paul a kal Timôtéô, di ga pam i “gwel nson [wés] i nya i yôni.”​—2 Timôtéô 4:5.