1. Lelaa u nla bot mut liwanda?

JAM li bisu di nlama boñ inyu bot mut liwanda li yé le di tégbaha ngéda ni nye. Mu kii di nkwel, hiki mut a kalak nuu numpe kii a nôgda, ni kii a nhoñol, di nsôk yila mawanda. Ndi i ta bé jam li ntomb i bot Yésu liwanda. Inyuki?

2. Ndutu yés i bisu i yé le kii?

² Ndutu i bisu i yé le di ta bé le di boma Yésu. Ngandak bikristen i hiai hi bisu i bi boma nlélém ndutu. To hala, ñôma Pétrô a kal le: “To hala kiki ni ntehge bé nye, ni ngwés nye. To hala kiki nano ni ntehe bé nye, ndi ni ñunda le ni nhémle nye.” (1 Pétrô 1:8) Jon, di nla toi yila mawanda ma Yésu to ibale di nla bé tehe nye.

3. Ndutu yés i nyônôs iba i yé le kii?

³ Ndutu i yônhe iba i yé le, di ta bé le di kwel ni Yésu. Ngéda di nsoohe, Yéhôva nyen di mpôdôs. I yé maliga le di nsoohe i jôl li Yésu, ndi nye bé nyen di nsoohe. Yésu a nsômbôl bé le di soohe nye. Inyuki? Inyule masoohe ma yé bibégés, ndi di nyi le Yéhôva nyetama nyen a kôli ni bibégés. (Matéô 4:10) To hala, di nla unda Yésu le di ngwés nye.

4. Ndutu yés i nyônôs aa i yé le kii, kii di ga tehe munu yigil ini?

 ⁴ Ndutu i yônhe aa i yé le, Yésu a yé i ngii, jon di nla bé kwel ni nye. Ndi to ibale di ta bé ni Yésu, di nla yi nye. Di ga tehe mam ma-na di nlama boñ inyu lédés maada més ni nye. Di bôk ndugi di tehe inyuki i yé nseñ i yila liwanda li Kristô.

5. Inyuki di nlama ba mawanda ma Yésu? (Béñge minkéñék mi matila ni ño le “ I ba liwanda li Yésu i nhôla i ba liwanda li Yéhôva” ni “ Litehge li kôli li tel i Yésu.”)

⁵ Ibale di nsômbôl yila mawanda ma Yéhôva, di nlama ndugi ba mawanda ma Yésu. Inyuki? Inyu manjom ima. Njom i bisu i yé le, Yésu a kal banigil bé le: “Tata nyemede a ngwés bé, inyule ni bi gwés me.” (Yôhanes 16:27) A bi kônde le: “Mut to wada a nlo bé yak Tata handugi ni njel yem.” (Yôhanes 14:6) Ibale u nyéñ yila liwanda li Yéhôva ibabé i bana maada ma bas bas ni Yésu, a yé wengoñle u nsômbôl jôp i ngim ndap ibabé i lôô i nwemel. Yésu a bi gwélél nlélém titii ngéda a bi kal le a yé “nwemel u mintômba.” (Yôhanes 10:7) Njom i yônhe iba i yé le, Yésu a bi kôna Isañ i nya i nlôôha. A kal banigil bé le: “Nu ni nu a ntehe me, wee a ntehe yak Tata.” (Yôhanes 14:9) Jon loñge njel inyu yi Yéhôva i yé le di yi Yésu. Kiki di nke ni bisu i yi Yésu, hala nyen di ga kônde gwés nye. Mu kii gwéha yés  inyu Yésu i nkônde kenep, hala nyen yak gwéha yés inyu Isañ y’a keñep.

6. Limbe jam lipe li nlama tinde bés i ba mawanda ma Yésu? Toñol.

⁶ Ibale di ngwés le Nyambe a timbhe masoohe més, di nlama ba mawanda ma Yésu. Hala a nkobla le, i kal le “i jôl li Yésu” mamélél ma masoohe i kôli bé. Ndi di nlama nok inyuki Yéhôva a mbat bés le di lôô yak Yésu inyu bol i nyeni. Yésu a kal banigil bé le: “To kinje jam ni mbat i jôl jem, m’a boñ jo.” (Yôhanes 14:13) Tolakii Yéhôva nyemede nyen a ñemble masoohe més, a timbhege ki mo, a bi ti Yésu kunde i yônôs sômbôl Yé. (Matéô 28:18) Jon, inyu boñ le a nwéhél bés, a nlama ndugi tehe le yak bés di nwéhél bôt bape kiki Yésu a bi niiga. Kiki hihéga, Yésu a kal le: “Ibale ni nwéhél bôt mahôha map, yak Isoñ nan nu ngii a’ nwéhél bé; ndi ibale ni nwéhél bé bôt mahôha map, to Isoñ nan a’ nwéhél bé bé mahôha manan.” (Matéô 6:14, 15) I yé toi nseñ le di bôñôl bôt bape i jam di gwé ngôñ le Yéhôva bo Yésu ba bôñôl bés!

7. Bonjee sesema i Yésu i yéne nseñ?

⁷ Inyu boñ le sesema i Yésu i bane bés nseñ, di nlama ba mawanda mé. Kii i nyis bés hala? Yésu a bi kal le a nlama “ti niñ yé inyu mawanda mé.” (Yôhanes 15:13) Bagwélél ba Djob ba ba bi niñ hana ’isi ilole Yésu a nlo, ba ga nigil i yi nye ni i gwés nye. I bôlôm ni bôda ba hémle bana, hala wee Abraham, Sara, Môsi, ni Rahab b’a lo bitugne, ñ yak bo ba ga bana ngôñ i yila mawanda ma Yésu inyu niñ i boga ni boga.​—Yôhanes 17:3; Minson mi baôma 24:15; Lôk Héber 11:8-12, 24-26, 31.

8-9. Inoñnaga ni kaat i Yôhanes 15:4, 5, kii di nla pam i boñ ibale di yé mawanda ma Yésu, inyuki?

⁸ Di yé maséé i sal ni Yésu i ngéda di ñañal ñañ nlam u Ane, di niigaga bôt. Ngéda Yésu a bé hana ’isi, a bé niiga bôt. Ibôdôl nu a bi témb i ngii, Yésu ño u likoda, a ñéga nson likalô. A ntehe biliya di mboñ inyu hôla libim li bôt i yi nye ni Isañ, a yé ki maséé ni biliya bi. Ñ, ndik ni mahôla ma Yéhôva bo Yésu nyen di nla gwel nson u.​—Añ Yôhanes 15:4, 5.

⁹ Bibel i niiga le, inyu lémél Yéhôva di nlama gwés Yésu. Jon di béñge mam ma-na di nla boñ inyu yila mawanda ma Yésu.

10. Jam li bisu di nlama boñ inyu yila mawanda ma Yésu li yé le kii?

¹⁰ (1) Boñ biliya i yi Yésu. Di nla pam i yi nye ibale di ñañ bikaat bini le Matéô, Markô, Lukas, ni Yôhanes. Ibale di nyoñ ngéda i ôt pék mu miñañ mi Bibel mi mi mpôdôl niñ i Yésu, di ga pam i gwés Yésu ni i ti nye lipém inyu loñgeñem a ñunda bôt ba binam. Kiki hihéga, a bi yoñ bé banigil bé kiki minkol to hala kii a bé Nwet wap. Maselna ni hala, a bi yiblene bo ñem wé. (Yôhanes 15:15) A bé nok njôghe yap, a eek ni bo. (Yôhanes 11:32-36) Yak baoo bé ba  bi yimbe le a bé liwanda li bet ba bé emble nye. (Matéô 11:19) Ngéda di niñ ni lôk kéé yés kiki Yésu a bé niñ ni banigil bé, di nlédés maada més ni bo, di nkônde ba maséé, di nkônde ki gwés Kristô.

11. Jam li nyônôs iba di nlama boñ inyu yila mawanda ma Yésu li yé le kii, inyuki di nlama boñ hala?

¹¹ (2) Bana mahoñol ma Yésu, u nigle ki nye. Kiki di nke ni bisu i hoñol kiki Yésu, hala nyen di ga kônde yila mawanda mé. (1 Korintô 2:16) Lelaa di nla nigle Yésu? Di yoñ le hihéga hini. Yésu a bé tôñ bôt bape iloo nyemede. (Matéô 20:28; Rôma 15:1-3) Mahoñol ma, ma bé tinde nye i boñ bisesema inyu bôt bape ni i nwéhél bo. A bé hoo bé unup ngéda bôt ba bé tôp nye jôl. (Yôhanes 1:46, 47) A bé nwas bé le bibéba bôt ba bi boñ behee bi kéñ nye i gwés bo. (1 Timôtéô 1:12-14) Yésu a kal le: “Bôt bobasôna b’a yi le ni yé banigil bem, ibale ni ngwéhna bé ni bé.” (Yôhanes 13:35) Badba le: “Baa me mboñ kii yosôna me nla inyu hôñôs nsañ ni lôk kéé yem i bôda ni i bôlôm kiki Yésu?”

12. Jam li nyônôs aa di nlama boñ inyu yila mawanda ma Yésu li yé le kii, lelaa di nla pam i boñ hala?

¹² (3) Nit lôk kéé i Kristô. Yésu a ntehe mam momasôna di mbôñôl minhook kiki bo le nyen di mbôñôl mo. (Matéô 25:34-40) Njel i bisu inyu hôla minhook i yé le di gwel nson Yésu a bi bééga bés, hala wee i añal ñañ nlam u Ane ni i niiga bôt Bibel. (Matéô 28:19, 20; Minson mi baôma 10:42) Ibale “mintômba mimpe” bé, ki njee a yé le a hôla lôk kéé i Kristô i boñ i hônd likalô ini ni nkoñ ’isi wonsôna? (Yôhanes 10:16) Ibale u yé mu mintômba mimpe, yi le hiki ngéda u nke likalô, u ñunda le u ngwés minhook, u gwéhék ki Yésu.

13. Lelaa di nla noñ maéba ma Yésu ma ma yé i kaat Lukas 16:9?

¹³ Njel ipe inyu éba le di yé mawanda ma Yéhôva bo Yésu i yé le, di gwélél moni nwés inyu nit nson likalô. (Añ Lukas 16:9.) Kiki hihéga, di nla ti moni inyu nit nson wés u u nséla i nkoñ ’isi wonsôna, hala wee nson likalô i het batéé likalô ba ta bé, tole i mabôga ma ma yé haa, maoñ ma mandap ma Ane ni i bôñgôl mo, i  hôla i bôt ba mboma bikuu. U héya i mam ma, di nla yak ti makébla likoda jés, di hôla ki lôk kéé i i nyep. (Bingéngén 19:17) I manjel ma mon di nla gwélél inyu nit lôk kéé i Kristô.

14. Inoñnaga ni Éfésô 4:15, 16, jam li nyônôs ina di nlama boñ inyu yila liwanda li Yésu li yé kii?

¹⁴ (4) Nit bitelbene bi ntôñ. Di nlédés maada més ni Kristô, nu a yé ño likoda, ngéda di nit i bet ba ñéga bés. (Añ Éfésô 4:15, 16.) Kiki hihéga, masañ mana, ntôñ u ngwés le di tibil gwélél mandap ma Ane. Inyu hala nyen ba bi pôdna ngim makoda i i bééna ndék batéé likalô, ba héñha yak minwaa mi mabôga map ma likalô. Bitelbene bi, bi bi boñ le ntôñ u ôbôs bañ moni. I bé béda ki le ngim batéé likalô i meya  mahéñha ma. Bebek i lôk kéé i, i bi nom mu makoda map, ba bana ki ngandak mawanda nyoo. Ndi nano, i bé béda le ba héñha likoda. Kinje maséé Yésu a nôgda inyu bilôk bikéé bi bi nit bitelbene bi!

15. Kii i ga boñ le di kee ni bisu i lédés maada més ni Yésu dilo di nlo?

¹⁵ Minhook mi gwé botñem i ane ni Yésu i boga ni boga. Ba ga ba i ngii ni Kristô, ba tehge nye, ba kwelek ni nye, ba tégbahaga ngéda ni nye. (Yôhanes 14:2, 3) U héya minhook, yak i bet ba gwé botñem i niñ hana ’isi, Yésu a’ gwés bo, a yoñ ki ndun ni bo. Tolakii ba ga tehe bé nye, ba ga kônde ba mawanda mé mu kii ba mba ba nkôs bisai Yéhôva bo Yésu ba nkôp bo.​—Yésaya 9:6, 7.

16. Kiki di yé mawanda ma Yésu bimbe bisai di nkôs?

¹⁶ Ngéda di neebe i yila mawanda ma Yésu, di nkôs ngandak bisai. Kiki hihéga, ibôdôl nano, a ngwés bés a nit ki bés. Di gwé botñem i niñ boga. Jam li nloo mam momasôna li yé le, liwanda jés ni Yésu li ga boñ le di kôs nkus u nloo minkus nwominsôna, hala wee liwanda ni Yéhôva, Isañ Yésu. Kinje nsima nkeñi di gwé i ba mawanda ma Yésu!