1. Umbe nsébla Yésu a bi leñ balop tjobi ba-na, ba bi boñ lelaa?

BANIGIL ba Yésu ba-na le Pétrô, Andréa, Yakôbô ni Yôhanes ba bé lop tjobi, ba nuñlak. Hala a bi lama hélés bo ngéda Yésu a bi kal bo le: “Noña me, m’a yilha bé balop bôt.” * Ba bi boñ lelaa? Bibel i nkal le: “I nlélém ngéda, ba yék môñgô ni isañ wap, ba noñ nye.” (Matéô 4:18-22) Makidik ma, ma bi héñha niñ yap héñha yosôna. Ibôdôl ha ngéda i, ba bi kahal ‘gwel bôt yômi.’ (Lukas 5:10) I len ini, Yésu a ngi séblak i bôt ba ngwés maliga inyu yilha bo balop bôt. (Matéô 28:19, 20) Baa u ma neebe nsébla u?

2. Inyuki di nlama tibil ôt pék ilole di nyoñ makidik i yila balop bôt, kii i ga hôla bés i yoñ makidik ma?

² Bebek u yé hol mu yigil yoñ i Bibel, u yé yak bebee i yoñ makidik i yila ntéé likalô. Ibale u nkon woñi i neebe nsébla u Yésu, hala a tômbôs bañ we. Woñi woñ u ñunda le u nyi le makidik ma, ma ta bé yom i minjôha. Bibel i nkal le Pétrô ni solôñ yé, ba bi tjôô mbunja yap “i nlélém ngéda.” Ndi hala a nsômbôl bé kal le Pétrô bo manyañ ba bi yoñ makidik ma ibabé i ôt pék. Ba bé ba ma yi  Yésu, ba neebe ki nye kiki Mésia jam kiki bo sôñ isamal bisu bi ngéda. (Yôhanes 1:35-42) Kiki Pétrô bo Yôhanes, u ma nigil ngandak mam inyu Yéhôva ni Yésu, u ngi kenek ni bisu i kôôge Yéhôva bebee. Ndi ilole u nyila ntéé likalô, u nlama tibil ôt pék. Kii i bi hôla Pétrô, Andréa, ni bana bape i yoñ makidik ma?

3. Bimbe bilem bi nla tinde we i bana ngôñ i neebe nsébla u Yésu?

³ Banigil ba Yésu ba bisu ba bé balop tjobi ba makénd, ba yik gwel bôlô yap, ba ban-ga ñem ngui ni ngap i énél manyuu map. Ibabé pééna, bilem bi gwon bi bi hôla bo i yila balop bôt ba makeñge. I yigil ini i ga niiga bés lelaa di nla hôlôs bilem bi, inyu yila balop bôt ba makeñge.

4. Inyuki Pétrô a bé lop tjobi?

⁴ Pétrô a bé lop tjobi a nuñlak inyu jés lihaa jé, ndi u héya hala, i nene le a bé gwés i bôlô i ngandak. (Yôhanes 21:3, 9-15) A bé yak maséé i yila nlop bôt. Ni mahôla ma Yéhôva, Pétrô a bi pam i yi i bôlô i loñge loñge.​—Minson mi baôma 2:14, 41.

5. Inoñnaga ni Lukas 5:8-11, inyuki Pétrô a bé kon woñi, kii i nla hôla bés i yémbél i nya woñi i?

⁵ Jam li bisu li ntinde bés i téé likalô li yé gwéha yés inyu Yéhôva. I gwéha i yon i nhôla bés i ke ni bisu i téé likalô to ibale di nôgda wee d’a la bé. Ngéda Yésu a bi sébél Pétrô inyu yilha nye nlop bôt, a kal nye le: “U kon bañ woñi.” (Añ Lukas 5:8-11.) Pétrô a bé kon woñi, ha inyu bé le a  bé badba i yom i bé lama pémél nye ibale a nyila nnigil, ndi inyu i hélha jam Yésu a bi bôñôl bo, a hôla bo i gwel ngandak tjobi. I jam li, li bi tinde Pétrô i hoñol le a kôli bé sal ni Yésu. Kiki Pétrô, u nla kon woñi i yila nnigil Kristô inyule u ntehe i mam momasôna u nlama boñ. Ibale hala a mpémél we, boñ le gwéha yoñ inyu Yéhôva, Yésu, ni mut woñ libôk i kônde keñep, ha nyen w’a ba bebee i neebe nsébla u Yésu.​—Matéô 22:37, 39; Yôhanes 14:15.

6. Kii ipe i ntinde bés i añal ñañ nlam?

⁶ Di béñge mam mape ma ma nti bés makénd i añal ñañ nlam. Di noñ i oda i Yésu ini le: ‘Kena . . . ni yilha bôt banigil.’ (Matéô 28:19, 20) Di ñañle ki bôt ñañ nlam inyule ba yé ‘nyôyôk, ba ntét ki bo,’ ba gwé ngôñ ikeñi i nok nwin u Ane. (Matéô 9:36) Sômbôl i Yéhôva i yé le mintén mi bôt nwominsôna mi pam i bana bañga yi i maliga inyu kôhna tohi.​—1 Timôtéô 2:4.

7. Lelaa kaat Rôma 10:13-15 i ñunda le nson likalô u yé nseñ?

⁷ Ngéda di nhoñol le likalô jés li nla hôla bôt i kôs tohi, hala a nti bés makénd i kena nson wés ni bisu. Maselna ni nlop tjobi nu a nlop inyu nyuñga ni je, bés di “nlop” bôt inyu hôla bo i kôs tohi.​—Añ Rôma 10:13-15; 1 Timôtéô 4:16.

8-9. Kii nlop tjobi a nlama yi, inyuki?

⁸ Dilo di Yésu, nlop tjobi a bé lama yi umbe ntén hiobi a nsômbôl gwel. (Lôk Lévi 11:9-12) I bé béda ki le a yi hee a bé le a léba i tjobi di. Tjobi di mbéna yén bahoma ba nlémél bo, ni i het bijek gwap bi yé ngandak. Baa ngim ngéda i yé inyu ke lop? Inyu timbhe i mbadga i, di béñge i yom mankéé wada nu a nyééne i Ôn Pacifik a bi kal nsañal nu tôbôtôbô wada nu ntôñ u bi ep nyoo. A kal nye le ba kee i lop, nsañal a timbhe nye le b’a ke yani kegla i ngeñ 9. Ndi i mankéé nu a kal nye le: “Hala bé. Di nkil bé i ngéda yés, ndi i ngéda tjobi.”   

⁹ Hala nyen balop bôt ba hiai hi bisu ba bé boñ, ba bé ke i homa ni i ngeñ ba bé le ba léba “tjobi” tole bôt. Kiki hihéga, banigil ba Yésu ba bé añal miñañ minlam i témpel ni i ndap mitin, mandap ni mandap ni bibôm. (Minson mi baôma 5:42; 17:17; 18:4) Yak bés di nlama yi bilem bi bôt ba libôga jés. Di nlama yi ngeñ ni homa di nla léba bo.​—1 Korintô 9:19-23.

10. Bimbe bisélél ntôñ u Yéhôva u nti bés?

¹⁰ Nlop tjobi a nyi bisélél a nlama gwélél, a yik ki gwélél gwo. Yak bés balop bôt di nlama bana bisélél bilam, di yik ki gwélél gwo. Yésu a bi niiga banigil lelaa ba nlop bôt. A niiga bo kii ba kena, hee ba kee, ni yom ba kal. (Matéô 10:5-7; Lukas 10:1-11) I len ini, ntôñ u Yéhôva u nti bés bisélél bi kôli inyu niiga. * U niiga ki bés lelaa di gwélél bisélél bi. Hala a mboñ le di añal ñañ nlam ni makénd, di tibil ki niiga bôt Bañga i Djob.​—2 Timôtéô 2:15.

11. Inyuki balop bôt ba nlama bana ñem ngui?

¹¹ I bôt ba nlop tjobi inyu nyuñga ba nlama bana ñem ngui, inyule mangéda mabe ma yé ma puhe bo i lép. Ba mbéna sal ni juu, i yé i pam ki le mbuk mbebi a tééñga bo. Yak balop bôt ba gwé ngôñ ni ñem ngui. Ngéda ba mbôdôl téé likalô, tole ba mbôdôl yis bôt le ba yé Mbôgi Yéhôva, ba nkahal boma ngolba ikeñi i mahaa map, bôt ba nkahal nol bo, bape ba ntjél leege bo. Ndi hala a nhélés bé bés. Yésu a bi kal le a bé om banigil bé ipôla bôt b’a kolba bo.​—Matéô 10:16.

12. Inoñnaga ni kaat Yôsua 1:7-9, kii i nla hôla bés i bana ñem ngui?

¹² Kii u nla boñ inyu bana ñem ngui? Pog, u nlama ba nkwoog nkaa le Yésu nyen a ñéga nson u. (Yôhanes 16:33; Masoola 14:14-16) Iba, u pééna bañ le Yéhôva a ga ti we gwom gwobisôna bi mbéda we, kiki a bi bôn. (Matéô 6:32-34) Kiki hémle yoñ i nkônde let, hala nyen w’a kônde bana ñem ngui. Pétrô ni solôñ yé ba bééna hémle i ngui, inyu hala nyen ba bi tjôô bôlô yap inyu noñ Yésu. Nlélém ni bés, di ñunda le di gwé hémle ikeñi i ngéda di nyis bôt bés ba lihaa ni mawanda més le di nigil Bibel ni Mbôgi Yéhôva,  ni le di nke makoda map! I bi béda ki we hémle ni ñem ngui inyu lona mahéñha i niñ yoñ. Mu kii u nke ni bisu i hôlôs ñem ngui, yi le “Yéhôva Nyambe woñ a yé ni we to hee u nke.”​—Añ Yôsua 1:7-9, MN.

13. Lelaa masoohe ni yoñ ngéda i ôt pék i nla hôla we i bana ñem ngui?

¹³ Kii ipe i nla ti we ñem ngui? Bat Yéhôva ñem ngui ni makénd. (Minson mi baôma 4:29, 31) Yéhôva a ga timbhe masoohe moñ, a ga tjôô bé we kekikel. A yé we ipañ hiki ngéda inyu nit we. Yoñ ngéda i ôt pék mu mam Yéhôva a bi boñ inyu péyés bagwélél bé ba kôba. Bigda ki lelaa a bi hôla we i yémbél mandutu u bi boma, ni lelaa a bi ti we ngui i lona mahéñha i niñ yoñ. Ñ, i Nwet a bi hôla litén jé i yap Tuye Nkôibaga a nla hôla we i yila nnigil Kristô. (Manyodi 14:13) U nlama bana minlélém mi mahoñol ni ntôp tjémbi nu a kal le: “Yéhôva a yé ngam yem, m’a kon bé me woñi. Mut binam a nla boñ kii me?”​—Tjémbi 118:6.

14. Bimbe biniigana u ñôt mu ndémbél i Masae ni Tômôyô?

¹⁴ Jam lipe li nla hôla we li yé i nigil miñañ mi bôt ba ba bé hañ makénd, ndi Yéhôva a hôla bo. Di yoñ hihéga hi sita yada ba nsébél le Masae. A bé nsut, a hoñlak le a ga la bé añal ñañ nlam. Ngéda a bé hoñol ndik le a ga boma bakén ba bôt, hala a bé nene nye kiki soso mbegee. A bi boñ biliya bi ngui inyu kônde gwés Djob ni mut wé libôk. Ngéda a bé hoñol le di niñil masuk ma ngéda, a bé bat Yéhôva ngui i téé likalô. Ndék ni ndék, a bi yémbél woñi, a yoñ yak bôlô nsañal i ngéda yosôna. Ñ, Yéhôva a nla hôla yak i bet ba ntip yila batéé likalô i “bana ñem ngui.” Di yoñ hihéga hi sita yada le Tômôyô. Ngéda a bi bôdôl likalô li mandap ni mandap, mut bisu a bi yuuga a bi kal nye ni hiun le: “Me nleege bé Mbôgi Yéhôva i mbai yem!” A yib likôga. Ni ñem ngui, Tômôyô a kal i sita i bé ni nye le: “U ntehe? Me ngi pahal to buk, a nyi le me yé Mbôgi Yéhôva. Kinje loñge jam!” I len ini, Tômôyô a yé nsañal nu ngéda yosôna.

15. I énél nyuu yés wee kii, inyuki bés bikristen di nlama énél manyuu més?

¹⁵ Nlop tjobi nu a nyi bôlô yé a nlama énél nyuu yé. Ba nkal le mut a nyi énél nyuu yé ngéda “a nyi nyégsa yo i boñ mam i ngéda ma nlama bôña.” I bôt ba nlop tjobi inyu nyuñga ba nlama pule tôde, ba sal ni mban letee ba mal lop. Inyu boñ i mam ma momasôna, ba nlama énél manyuu map. Yak bés balop bôt di nlama énél manyuu més inyu téñbe ni nson u Nwet letee ni lisuk.​—Matéô 10:22.

16. Kii i nla hôla bés i énél nyuu yés?

¹⁶ Di ngwééna bé ngap i énél manyuu més. Kiki di yé bikwéha bi bôt, di mbéna nwas le nyuu yés yon i énél bés. Inyu pam i ane nyuu yés, di nlama bana hôtnyuu. Di gwé ki ngôñ ni mahôla inyu boñ le di méiha nyuu yés i boñ mam ma nlédél bés. Ñ, Yéhôva a nhôla bés ni njel mbuu wé mpubi.​—Galatia 5:22, 23.

17. I kaat 1 Korintô 9:25-27, lelaa ñôma Paul a mpôdôl biliya a bé boñ inyu pam i énél nyuu yé?

 ¹⁷ Ñôma Paul a bé ane nyuu yé. A kal le a bé “tumb” nyuu yé inyu boñ loñge. (Añ 1 Korintô 9:25-27.) A bi ti bilôk bikéé bipe makénd le bi boñ mam momasôna “loñge ni ikété oda.” (1 Korintô 14:40) Di nlama boñ biliya bi ngui inyu ke ni bisu i yoñ ngaba i nson u añal ñañ nlam ni niiga bôt.​—Minson mi baôma 2:46.

18. Imbe ngéda Yéhôva a ntehe le nson wés u num matam malam?

¹⁸ I mut a nlop tjobi inyu nyuñga a ntehe le lop wé u ntagbe loñge ngéda a ngwel ngandak tjobi. Ndi likalô li ta bé hala. Nsoñgi bôt di nlona i ntôñ Djob bé won u ñunda le nson wés u num matam malam. (Lukas 8:11-15) I mis ma Yéhôva, nson wés u num matam malam ngéda di ntéñbe i añal ñañ nlam ni i niiga bôt. Inyuki? Inyule ngéda di mboñ hala, di ñunda le di nôgôl nye, di nôglak Man wé.​—Markô 13:10; Minson mi baôma 5:28, 29.

19-20. U héya mam di ntehe munu yigil ini, kii ipe i tôbôtôbô i ntinde bés i añal ñañ nlam i len ini?

¹⁹ I ngim biloñ, ngomin a bi téé ngim ngéda inyu lop. Jon ngeñ balop tjobi ba ntehe le ngéda i yii ha bé bañga, ba nkônde sal ni ngui. Bés balop bôt, nlélém jam won u ntinde bés i sal ni ngui i len ini, di nyi le lisuk li nkoñ ’isi li nlôôha kôôge bebee! A yii ndik bés ndék isii ngéda inyu hôla bôt i kôs tohi. Jon di tiñha bañ, di bem bañ ngéda i tôbôtôbô inyu sal i bôlô ini.​—Ñañal 11:4.

²⁰ Boñ biliya inyu kônde bana ngôñ i téé likalô, i lémés likeñge joñ, i bana ñem ngui, u yi ki énél nyuu yoñ. Yoñ makidik i sal ni didun juem di balop bôt bape ntjamak ni nkoñ ’isi wonsôna, ni i njel i, u ga kon maséé ma nlôl yak Yéhôva. (Néhémia 8:10) Yoñ makidik i sal nson unu i nya i yôni letee ni lisuk. Mu yigil i noñ, di ga pôdôl mam maa di nla boñ inyu téñbe mu nson wés likalô.